TAROMA LI LOWALANGI LUO MIGU SI – 5 DÖFI A

Liturgi Taroma Li Döfi A/B/C, hlm. 138.

FOMBASO I

Taroma Li Lowalangi nihalö moroi ba zura Yesaya, sama'ele'ö.

Iŵa'ö So'aya: Da'ö wuasö somasi Ndra'o: Toto'ö wesufesu wa'afaito khö ndra talifusöu, böi osawuyu nawöu niha ba böhöi fefu ngawalö wangöhöndrögö awö. Fesasi göu ba zolofo ba ohe yomo khöu niha si numana, si lö nahia. Na ö'ila niha si lö balubalu, ena'ö öfonukha. Böi hole'ö mbawau, na falukha khöu niha si tosasa. Awena tumbu wa'ohahau dödöu, simane fa'atumbu luo ba zi hulö wongi, ba mangaösö wa'adöhö wökhöu. Mowaöwaö fönau gamuatau satulö; ba so lakhömiGu moroi furiu ba lala, tobali folumö'öu. Ba na mu'ao ndra'ugö khöGu, Utema liu. Na ö'angaröfi li Ndra'o, Umane : Ya'e Ndra'odo! Na lö sa'ae öhöndrögö nawöu, na lö sa'ae ötuturu niha wango'aya ya'ia ba na öbato wanandraŵaisi awöu, na öbe'e ba zolofo mbalazou ba na örara dödö zebua famakao, awena humaga haga andrö khöu ba zogömigömi, ba hulö haga ba zi laluo zogömigömi andrö khöu dania.- Yes 58:6-10

Simanö daroma li Lowalangi.-             Sato: Ma'andrö …

 

Sinunö Fanema Li : Psallite No 112 ma 41      (ma Laudate No 10 ma 6, 3)

 

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö !

Me möido khömi wangombakha nifakhoi Lowalangi andrö si lö ni'ila niha gulidanö, tenga fa'atuatua wahuhuosa molo'ö fa'aniha nifakegu ma tenga göi fa'atuatua gulidanö andre. Me so ndra'o khömi, no u'osambua'ö gera'eragu, wa lö u'ombakha'ö hadia ia, baero zanandrösa khö Yesu Keriso, si no mate ba röfa andrö. Me so ndra'o khömi, no sambö fa'abölö ndra'o ba sanizinizi wa'ata'u. Turia nifa'emagu khömi tenga ba wehede sadönidöni dödö molo'ö fa'atuatua niha ufa'ema, ba hiza, ufa'ema ia molo'ö fangoroma'ö wa'abölö moroi khö Geheha Lowalangi. Ulau zinunö, ena'ö fa'afaduhu dödömi khö Lowalangi, tenga sodanedane ba wa'atuatua niha, no sodanedane ba kuaso Lowalangi. Tesura sa ba zura ni'amoni'ö: "Ba niha sangomasi'ö Lowalangi, no Ihönagö zi lö irai mu'ila ba si lö irai irongo niha, ba si lö irai tumbu bakha ba dödö niha."- 1 Kor 2:1-5.9

 

Simanö daroma li Lowalangi.-             Sato : Ma'andrö …

 

Sinunö Föna Injil : Psallite No 258                                (ma Laudate No 79)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Imane Yesu khö ndra nifahaöNia: "Ya'ami  nasio ba gulidanö. Na taya wa'asi'asi nasio, hadia labe'e fangasi'asinia mangawuli? Lö gunania sa'ae, - ha tö fanibo ya'ia, fa lahundrahundra niha. Ya'ami haga ba niha ba gulidanö. Banua si so ba zuzu hili, tebai tobini. Lö'ö göi latunu wandru ba labalugö faoma rumbi. Labe'e na'i yaŵa ba naha wandru, ena'ö ihagaini niha si so yomo ba nomo. Ya simanö göi hagami, ena'ö humaga ba niha, ena'ö la'ila niha si sökhi ba lasuno Namami si so ba zorugo."- Mat 5:13-16

Simanö duria somuso dödö khö Zo'aya ya 'ita, Yesu Keriso.

 

Erönua:

ASIO BA HAGA

Taroma li Lowalangi nihalö moroi ba zura Yesaya sama’ele’ö andrö, no sambua famangelama ba niha somasi manoloni awö. Fanoloni nibe’e andrö ba ena’ö tumbu ia moroi ba wuasö. Famangelama niwa’öNia andrö ya’ia na tabe’e ma tafosasi zi so khöda, simane okhöta, fa’abölöda, inötö si so  khöda ma göi tödöda, ena’ö mufalua ia ba wa’omasi. Muröi wa’afaito, awö wangöhendrögö awö. Mu’obadödöi niha sinumana ba böi börö wangalui hare. Famalua da’ö fefu, tenga simöi taya luoda. Ba hiza, fefu zi no mufalua simanö, möi börö wangahatö ba khö Zo’aya.

Famaduhu’ö Waulo ba niha samati ba mbanua Gorindro, sindruhu no famaduhu’ö sanandrösa khö Yesu simate ba döla röfa. Fa’amate Yesu ba döla röfa andrö, sindruhu no sambua fango’aya na dali niha. Ba hiza, no tobali tandra wemöna ia ba niha samati. Faulo ni’oguna’ö Lowalangi ba wanuriaigö Taroma LiNia andrö, sindruhu tenga I’otarai niha si sökhi. Ba wamobörö, Faulo andrö ba no solohi niha samati. Ba hiza ba we’amöinia ba ba wolo’önia taroma Li Lowalangi andrö, lö mamalö tefolakhömi Lowalangi. Ifili tengetengeNia niha si to’ölö Lowalangi, me abua ba niha sonekhe wanema’ö lala nifakhoiNia. Me ba niha sito’ölö andrö, lö mamalö labe’e fönara wa’omasi Lowalangi.

Turia Somuso Dödö andrö nihalö moroi ba zura Matai’o, no taroma li sasese sibai tarongo ba tabe’e dumaduma ba niha. Asio ba haga, no dombua gamagama si lö irai aefa ba lala wa’auri niha. Asio ba wame’e raso ba gö, haga ba wanului fa’ogömigömi.  Sidombua faosatö andre no famarou si’oroi Yesu samösa ba niha samati. Fa’atobali asio, ya’ia na tola tobali niha samati andrö solohe fa;ohahau dödö ba gotalua niha samati. Fa’atobali haga andrö, ya’ia na tola tobali samokai lala wangerangera ba niha.

Sitölu ngawua wombaso andre, edöna idönia’ö niha samati ba wo’angeraigö lala wa’auri wamati andrö, ya’ia we’asoda ba gotalua niha samati tanöbö’ö. Famati si no ta’okhögö andrö, böi ha so ia ba döi. Ba hiza ena’ö tola lö mamalö mufowua ia. Hewa’ae niha side’ide ba sinumana ita, ba hiza börö wolo’öda famati andrö ba tola tafalua mbua wamati andrö, no möi börö wangahatöda khö Lowalangi, ba möi göi famolakhömi Lowalangi. Tenga ha famatida nitötöna Yesu Keriso moroi khöda ba tenga ha ba wanema fangorifi soroi khöNia, ba hiza ena’ö fa’aurida tobali dumaduma. Ba ena’ö alua da’ö ba wa-ha-sambua niha Keriso, börö me famaduhu’ö si fao sato abölö moroi ba wamaduhu’ö zi samösamösa. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh Ia Ini Adalah Anak Allah” Yogyakarta: Kanisius, 2011