TAROMA LI LOWALANGI LUO MIGU SI – 4 DÖFI A

Liturgi Taroma Li Döfi A/B/C hlm. 135.

FOMBASO  I

Taroma Li Lowalangi nihalö moroi ba zura Zefania, sama'ele'ö.-

Mi'alui Zo'aya, ya'ami fefu ba gulidanö, si no muhöndrögö tou, ya'ami solau satulö andrö khö Zo'aya! Fa'atulö dödö mihöna khömi ba fa lö fayaŵa mi'alui : Ma atö te'orifi ami, na baŵa wönu Zo'aya andrö. Imane So'aya : "Ya'ami Iraono Gizara'eli, Usaigö khömi niha si numana, si lö fayaŵasa. Ya'ira dania zangalui folumö'ö moroi khöGu. Lö niha solau faya ba gotaluara, ba lö tesöndra walimosa ba mbewera. Auri ira bakha ba wa'ahono dödö, ba lö sa'ae udura.- Zef 2:3;3:12-13

Simanö daroma li Lowalangi.-             Sato : Ma'andrö ...

 

Sinunö Fanema Li : Psallite No 146B                     (ma Laudate No 94, 1-2)

 

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö !

Mitörö tödömi, hewisa ami, me Ikaoni ami Lowalangi. Lö ato zatuatua ba gotaluami, na dali wa'atuatua niha, ma si so fa'abölö, ma si so ba dadaoma zalaŵa. No Ifili Lowalangi zibodo, molo'ö niha gulidanö, ena'ö te'ailasi zatuatua. Ifili niha si lö fa'abölö molo'ö ulidanö andre, ena'ö te'ailasi zabölö andrö. Ifili Lowalangi zi lö guna, ni'ositengagö niha gulidanö andre, ba wamakiko nifosumange niha gulidanö. Börö da'ö, tebai isuno ia samösa niha, haniha ia, föna Lowalangi. Lowalangi samösa mbörö, wa tobali ha sambua ami khö Keriso Yesu. Ibe'e Keriso andrö khöda Lowalangi, ena'ö khö Keriso so wa'atuatuada. Keriso zanga'azökhi amakhaitada khö Lowalangi. Keriso andrö zangatulö'ö ya'ita, ba wa'atobali soi Lowalangi ba ba wangefa'ö ya'ita moroi ba horöda. Tobali, da'ö mbörö wa tesura ba zura ni'amoni'ö: Na so zanuno ya'ia, ya musuno ia ba zi no Ifalua So'aya! 1 Kor 1:26-31

 

Simanö daroma li Lowalangi.-                    Sato : Ma'andrö ...

 

Sinunö Föna Injil : Psallite No 254                            (ma Laudate No 94, 3)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, me I'ila niha soya sibai Yesu, möi Ia ba hili.  Me no dumadao Ia, la'ondrasi Ia nifahaöNia. Ibörögö fahuhuo, Ifahaö ira, Imane : Ya owuawua dödö niha si numana fa'auri nifarou Geheha. Khöra Ibe'e gamatöröŵaNia Lowalangi. Ya owuawua dödö niha si göna fa'abu dödö. Irara dödöra dania Lowalangi. Ya owuawua dödö niha si so fa'ebolo dödö (na so wamakao). Khöra Ibe'e gulidanö andrö dania Lowalangi. Ya owuawua dödö niha solofo ba sowökhi tödö fa'atulö andrö. I'abusoi'ö ira dania Lowalangi. Ya owuawua dödö niha sangahakhösi tödö niha bö'ö. Lowalangi zangahakhösi tödö ya'ira dania. Ya owuawua dödö niha si so tödö sohauhau. Ya'ira zangila Lowalangi dania. Ya owuawua dödö niha samalua fangatulö ba gotalua niha. Lafotöi ira ono Lowalangi dania. Ya owuawua dödö niha nifakao ba wamalua somasi Lowalangi. Khöra Ibe'e dania gamatöröŵaNia Lowalangi. Ya owuawua dödömi, na börö Ndra'o la'o'aya ami niha ba na lagohi ami, ba na laböbögö khömi zi lö sökhi fefu. Mi'omusoi'ö dödömi ba mi'owuawua'ö dödömi, me ebua wa'afahöna nibe'e Lowalangi khömi dania. Mat 5:1-12

Simanö duria somuso dödö khö Zo'aya ya'ita, Yesu Keriso.-

 

Erönua:

Bakha ba wombaso siföföna andrö nihalö moroi ba zura Zefania sama’ele’ö, sindruhu no tobali ia fondrara dödö ba niha sinumana ba si tosasa. Lö I’oguna’ö niha sabölö ba si so töi Lowalangi ba wangoroma’ö fa’abölö awö lakhömiNia, ba hiza fatema ba dödöNia wamili niha side’ide, si numana ba si lö fayaŵa tödö. Ba niha sabölö ba si so töi andrö, asese sibai tesöndra wayawasa. Ba hiza ba niha side’ide andrö, alio oroma wangidengide’ö ba fanörö sindruhu ba lala wa’aurira.

Ba gotalua  niha  samati  ba  Gorindro, lö ato  niha si  teturia ba  si so töi. Ba hiza, no Ifili ira So'aya  ba  wanou'ö ba  dangara amatöröŵaNia. Tefili ira tobali asio ba niha  si fayaŵa, sobou tödö ba safönu fakhögusa ba wangai sitenga tana khönia (korupsi). Famasugi ba dödö nifa’ema Waulo andre, sindruhu tefanandrösa ia ba niha samati ba mbanua Gorindro.

Bakha ba wombaso turia somuso dödö tarongo hewisa duria andrö si sökhi moroi khö Yesu samösa. Turia nibe’e Yesu andrö no sambua howuhowu sigöna niha sigide’ide andrö. Famahowu’ö andrö yaia ena’ö owuawua dödö. Fa’owuawua dödö andrö tefatema’ö ia ba niha tenga ba gulidanö andre. Ba hiza fa’owuawua dödö andrö tefatema’ö ia ba mbanua zorugo si lö mamalö.

Na ba lala wa’auri si’ero ma’ökhö sito’ölönia  tasuno  niha  si no mogamö  ohitö dödönia, so’okhöta ba si so töi. Ohahau dödö niha si  kayo, ba  si  lö  busibusi dödö ba wa’aurinia, taŵa’ö. Fabö’ö  khö Zo’aya. Heza tesöndra wo’amböta, fa’abu dödö, fa’atebai ma fa-lö-fambinisa, ba da’ö so ginötö Zo’aya ba wamalua fa’omasiNia, asala so wanema’ö ba fa’ateboka dödö ba niha andrö.

Ba zimanö tola göi manofu ita, hadia tebai göi ta’alui wa’omuso dödö ba gulidanö andre? Ba gulidanö andre sinangea göi na ta’alui nösi gulidanö. Ba hiza, sinangea tabe’e ba dödöda ya’ia ena’ö lö mamalö so ita ba wangidengide’ö. Fangidengide’ö andrö zanoloni ya’ita ena’ö lö mamalö so khöda wa’owuawua dödö ba khö Lowalangi. Fangidengide’ö göi zanoloni ya’ita ba wa lö mamalö tafuli sumange Lowalangi fefu zi so khöda. Mendrua manö fangidengide’ö andrö zanoloni ya’ita ba wa lö mamalö ta’andrö saohagölö ba ngawalö mbuala si no tatema. Ba gafuriata, owuawua dödöda na furi we’aso ba gamatöröwa Lowalangi andrö. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang Ini Adalah Orang Benar!” Yogyakarta: Kanisius, 2011