Nifa’anö Kat. Ingatan Sihura.
Ya’ami ira talifusö ni’omasi’ö…!
Asese sibai urongo na so zangowalu sandroto wehede sanguma’ö: “no khilikhili mbanua zorugo waelöwa zidarua niha.” Ba wehede andre, asese sibai manofunofu dödögu: “hadia sindruhu khilikhili mbanua zorugo wangowalu zidarua niha andrö, ma khilikhili mbanua tanöbö’ö?” Hana wa’asese manofu dödögu ba zimanö, börö me asese sibai u’ila na mangowalu nono matua ba ono alawe; na no aefa wangowalu ba oya manö wangabudödö nirongoda ba mendrua manö ni’ilada. Ölö simanö da’ö, hadia simanö sindruhunia wangowalu zidarua niha andrö?
Taroma Li Lowalangi nirongoda ba zima’ökhö andre, edöna ifangöhösi khöda hewisa sindruhunia wahasambua zifaronga andrö ma sangowalu andrö. Hewa’ae fanofu ndra farizai’o andrö mo’amakhaita ia ba wanandraigö Yesu, ba hiza itema’ö göi khöra Yesu simane ösi dödöra andrö. Lasofu khö Yesu: “hadia tola tetehegö ifabali ngambatönia samösa niha?”
Fanofu simane da’e edöna ba wanandraigö Yesu ba wamesu li Yesu ena’ö tola la’adugö ba lafara’ugö Yesu. Ba da’e tenga itehe ma itenawa ira Yesu. Hiza, ifasugi ine ba dödöra Yesu hadia goroisa Moze ba khöra. “No itehe Moze wame’e sura wamabali, ba awena ifofanö ngambatönia andrö.”
Ba zimanö iwa’ö khöra Yesu: “Börö wa’abe’e dödömi wa no ibe’e khömi goroisa andrö. Ba hiza ba mböröta wanga’asogö ulidanö andre no I’a’asogö niha Lowalangi: ira matua ba ira alawe. Da’ö mbörö wa iröi namania awö ninania niha ba ha sambua boto dania zidarua andrö. Börö da’ö: hadia zi no I’osambua’ö Lowalangi, ba böi ifabali niha.
Ya’ami ira talifusö ni’omasi’ö….!
Nata’angeraigö tödöda, hana wa’ifuli ifasugi ba dödöda Yesu wa hadia zi no I’osambua’ö Lowalangi, ba böi ifabali niha? Ba ginötö ma ne ma’ökhö, I’otarai ba mbanua side’ide irugi ba fasa sebua, no a’oi möi ba sikola sebua niha ba a’oi so wa’atuatua. Ba wa’atuatua niha andrö asese manö tetandraigö dödö ba ngawalö gisöisö dödö. So tölu ngawalö gisöisö dödö sasese manandraigö niha ba ginötö andre. Hadia da’ö: 1). Dadaoma; 2). Harato; ba si 3). Ono Alawe salawa ikhu. Ba zitölu faosatö andre asese mangulu dödö niha ba alai zalau ba wangala. Töratöra ba wa’alawa nikhu nono alawe sifaluka ma fa’asiga nono matua sifaondra, tola manö alua gamaedola wanguma’ö: Fangaösöngaösö towitowi, me iwaö to’ia ta’ita’i; röi ndrongau halödo’i me ya’o nono matua fondrege zisökhi; me ya’o nono alewe sebolo afi.
Fondrönisi dödö andre moguna tabe’e famasugi ba dödöda hadia sindruhunia zalua ba wangowalu zidarua niha andrö. Fangowalu andrö no nihonogöigö Lowalangi samösa I’otarai wamobörö ba wanga’asogönia ulidanö. So tölu faosatö zinangea ta’erönusi tödöda sanandrösa ba wangowalu zidarua niha andrö faudu molo’ö fanga’asogö niha andrö siföföna khö Lowalangi. Sitölu ngawalö andrö, ya’ia da’ö:
1. Fahasamösa:
Fanga’asogö niha andrö aröu faehu ia moroi ba ni’a’asogö tanöbö’ö. Fanga’asogö niha andrö, tenga ha ba wehede Lowalangi manö, ba hiza ibabaya tanga-Nia samösa ba Ibe’e wöfö hanuhanu-Nia andrö; irege ibe’e kuaso ba niha ba wame’e töi fefu ba ni’a’azökhi tanöbö’ö andrö ba ikuasoi.
Hewa’ae simanö, ba wahasamösa niha andrö, lö mamalö so khönia wehulu dödö ba wangalui niha tanöbö’ö, sanolo sifakhili khönia. Ba walukhata sifakili khönia andrö, tesöndra wahuwusa. Fa’atuatua ba wamakhai fahuwusa andrö, da’ö zitobali famaehusi niha moroi ba ni’a’azökhi tanöbö’ö.
2. Fahasambua:
Fehede Yesu me’ifasugi goroisa Moze me’iwa’ö: “andrö wa iröi namania awö ninania niha ba molemba dödönia ba ngambatönia.” Ba da’e so nifotöi “fa’adöni dödö.” Fa’adöni dödö samösa iramatua ba niha sifagölö khönia ba hiza faehu, ya’ia ndra’alawe andrö. Fa’adöni dödö andre zitobali dela ba wahasambua boto dania zidarua andrö.
Fahasambua ba da’e tenga ha fasambua mboto manö ba hiza fahasambua wa’auri ba fangera ngera. Böi dania alua gamaedola wanguma’ö: he naesenaese, naesenaese ndraha lase, ha wö ba mbewe yawa utehe, ösi dödögu bakha sa no ugogohe, ösi dödögu bakha sa aröu fabaohe.
Fahasambua börö wa’adöni dödö andre, so dua faosatö zilö tola lö’ö tefalua; ya’ia da’ö: “fanou’ö ba fanema’ö.” Samösa ira matua aboto ba dödönia wa no isöndra ngambatönia sifagölö khönia sanoloni ba samönökhi fa’aurinia. Simanö göi ndra alawe. Ba wahasambua andre dania tesöndra wa’orudu zifaronga andrö ba wefao khö Lowalangi ba wanga’azökhi niha sibohou andrö.
3. Fa’alönukha:
fa’alönukha ba da’e tenga ha fa lö balubalu mboto. Fa’alö nukha ba da’e abölö manandrösa ia ba wa’alö oto’oto ba gotalua ndra’alawe ndra matua. Ba da’e lö khöra fa’ata’u ba wamaehagö ösi dödö, ba hiza sifao fa’lö aiwö (Bebas) wamaehagö ohitö dödö ba wamahuhuosi lala wa’aurira.
Fa’alönukha ba da’e, mofozu ia ba wa lö aiwö ba wangai angetula wefao sandrohu fa’auri ba ba wa faoma mamosumange awö sagötö fekoli ba gulidanö. Ba da’e tefasugi ba dödö zidarua niha andrö, hadia zi no mifabu’u ba ginötö mitema sakramen fangowalu. Tenga khö Pastor fawululi ndra’ugö ……. ba hiza khö Lowalangi ba khö wo’omou. No fawu’usa li mi da’ö. Me iwa’ö ba gamaedola: mobowo gaele föda, ba mowua dania ndruria ulöndra. Ba hiza, böi miwuwu ba böi miböda me no zazimi ba mböröta.
Ya’ami ira talifusö ni’omasi’ö … !
Fangowalu zidarua niha no fanötöna Lowalangi I’otarai wamobörö ba wanga’asogö niha. Fangowalu zi darua niha andrö göi ba no oroisa ba khöda me iwa’ö: “na ebuabua nono matua ba mufangowalu, ba na ebua bua nono alawe ba mube nihalö. Me oroisa da’e, ba data’owuawua’ö dödöda irege falukhatada ba zima’ökhö andre no khilikhili mbanua zorugo.
Fatua lö u’asiwaisi renungan andre, itörö tödögu sambua cerita ya’ia cerita Aristoteles khö zamahaö ya’ia Plato mo’amakhaita ba “wa’omasi” ba “fangowalu”…….
Fa’omasi andrö böi töra mamili, ba hiza fangowalu andrö sambua angetula ba wangohonogöigö tödö ba wanema’ö buala andrö. …ono matua….. no’öfili ba ö’omasi’ö …ono alawe… tobali fo’omomö ba ya lö mamalö ö’omasi’ö ba öfosumange ia tobali sondrorogö ösi nomomö. Ba ya’ugö …ono alawe… no öfili …ono matua… tobali ngambatöu, ba ya lö mamalö ö’omasi’ö ba öfosumange ia tobali sabölöu ba wanörö lala wa’auri ba gulidanö andre. Ya lö mamalö ibe’e howuhowu-Nia khömi Lowalangi. Amen.
0 comments:
Posting Komentar