TAROMA LI LOWALANGI LUO MIGU ADVEN SI – 1 DÖFI A

Liturgi Taroma Li Döfi A/B/C, halaman. .

Bacaan I: Yesaya 2:1-5.

Bacaan II: Roma 13:11-14.

Bacaan Injil: Matai’o 24:37-44.

MIFA’ANO AMI ME NO AHATÖ GAMATÖRÖWA LOWALANGI ANDRÖ

 

Erönua:

Bakha ba wombaso sisara nihalö moroi ba Zura Yesaya sama’ele’ö, sindruhu i’oroma’ö khöda hewisa ia gangi’ilata sisökhi andrö. Angi’ilatania andrö manandrösa ia ba niha sasese fasuwö sitebulö fangerangera. Laaböhöi wasuwöta, fefu gamagamara ba wasuwöta labali’ö gamagama ba wohalöwö ba danö. Födara andrö so nibali’ö faku ba toho andrö nibali’ö guti wakhe ba laza. Lafalua fefu da’ö börö wa’aboto ba dödöra darma li Lowalangi andrö.

Ba wombaso sidua tarongo menemene Waulo so’amakhaita ba niha si lö mangobadödöi famatinia. Idöia’ö ita Faulo wa no irugi saae inötö si sökhi andrö. Inötö andrö ba ya’ia ginötö wamawuai moroi ba halöwö fa’ogömigömi, numalö ba halöwö haga. Halöwö fa’ogömigömi andrö ba ya’ia femanga ba famadumadu, fohoröhorö ba fohokha, faguaguasa ba fa’afökhö dödö. Halöwö haga andrö ba ya’ia wanaha tödö ba falö molau balö, famalua fa’omasi ba fangandrö salahi zifatiu tödö, ba tanöbö’önia na.

Bakha ba duria somuso dödö andrö tarongo wamangelama Yesu andrö, ba we’aso Nono Niha andrö. Fe’ason Nono Niha andrö ba no hulö zanagö, lö nininini, ba lö fangombakha. Ba hiza, ba we’aso Nono Niha andrö, ha si no mama’anö ba da’ö zifao khönia. Na so darua zifao ba ha samösa nihalö. Si samösa ba niröi. Amaedoa da’e edöna ifatunö wa ha sama’anö andrö da’ö dania zifao khönia, ba hiza silö’ö andrö ba da’ö niröi.

Sitölu ngawua wombaso andre sindruhu idönia’ö ita wo’erönusi inötö wa’atohare Nono Niha andrö ba wanguhuku niha sauri ba si no mate. Inötö andrö samösa lö sangila hawa’ara baero Nama andrö si so ba zorugo. Na simanö hadia ni’alualuida? Ni’aluida ya’ia wangöhönagö ya’ita na alua ginötö andrö. Fefu niha zamösana itema zulö hadia nilaunia ba hadia zi no ifalua. Famatida no möi fangaro dödöda ba wombalobaloi inötö andrö. He oya wanandraigö ba fa’akao, na lö tebulö ita ba wamati andrö, lö mamalö tasöndra wa’auri si lö aetu.

Iada’a hewisa ita wama’anö ya’ita? Fama’anöda ya’ita ba ya’ia da’ö, famu’ai wangerangerada. Yesaya ba wombaso siföföna zame’e khöda dumaduma wamu’ai fangerangera, ya’ia wondröi halöwö silö sökhi andrö, ba hiza mu’olohia’ö wolau si sökhi. Töratöra Waulo, amuata si lö sökhi andrö itöla’ö wanguma’ö. Moguna tafalua wamu’ai fangerangera andrö börö me lö ta’ila hawa’ara we’aso Nono Niha andrö. Ba zimanö na so nono niha andrö, ena’ö no sama’anö ita. Ba gafuriata fama’anöda andrö ya’ita, da’ö zolohe ya’ita fao ita ba gamatöröwa Lowalangi andrö. Amen.