FOMBASO I
Taroma Li
Lowalangi nihalö moroi
ba zura Yesaya, sama'ele'ö.-
Tumbu dania lewiö ba duhe Giza'i, ba mowua nono
si oroi ŵa'ania. Ifönui ia Eheha Zo'aya, ba ahono khönia: Eheha same'e fa'atuatua ba fa'aboto ba dödö, Eheha wamolala tödö ba fa'abölö, Eheha
wangila watahögö ba famosumange So'aya somuso tödö lewiö
andrö wamosumange So'aya. Tenga molo'ö ni'ila hörönia wanguhukunia, ba tenga molo'ö
nirongo dögi dalingania wangetu'önia huku, molo'ö satulö sa'ae khönia wame'e huku
ba zi numana, ba i'adölö'ö wangetu'ö huku ba zebua famakao ba danö. Famözi niha
gulidanö khönia wehede soroi mbawania andrö, ba fangahorigö zebua horö hanuhanu
andrö ba mbewenia. Fa'atulö mbömbö talu khönia. Lö samakao sa'ae ba lö samakiko ba hili ni'amoni'ö andrö khö Lowalangi. Anönö sa'ae danö wa'aboto ba
dödö niha Zo'aya, simane fa'anönö narö nasi andrö asi. Na luo da'ö, la'ondrasi soi niha gulidanö lewiö andrö, si tumbu ba ŵa'a duhe
Giza'i, ba tobali tandra mado soi niha, ba si so lakhömi Lowalangi nahania.- Yes 11:1-4a.9-10
Simanö daroma li Lowalangi.- Sato : Ma'andrö …
Sinunö Fanema Li : Psallite No 72, 1-2+4-5 (ma Laudate
No 20, 1-2)
FOMBASO II
Taroma Li
Lowalangi nihalö moroi ba zura Waulo ba niha samati ba mbanua Roma.-
Ya'ami ira
talifusö ! Hadia ia
sa nisura föna, ba ba wamahaö ya'ita tesura da'ö, ena'ö so khöda wanötöna moroi ba wa'ebolo dödö ba moroi ba wondrara dödö andrö, si so ba zura ni'amoni'ö. Lowalangi same'e
fa'ebolo dödö ba fondrara dödö, ba ya mutolo
ami, ena'ö ha sara dödömi ba khö nawömi, dali
Keriso Yesu; ena'ö
hasara limi ba wanuno Lowalangi,
Ama Zo'aya ya'ita, Yesu
Keriso. Andrö
faoma mifonaha nawömi,
simane famonaha Keriso
ya'ami, ena'ö mifolakhömi
Lowalangi. Da'e niwa'ögu: No Itehegö Ia Keriso ba wanema niha ni boto ba wangoroma'ö fa'alöfaröi Lowalangi sanandrösa ba ngawalö wawu'usa
liNia si no Ibe'e khöra furugöda, ba ena'ö lafosumange
göi Lowalangi
soi tanö bö'ö börö wa'ahakhö dödöNia. Noa sa tesura ba zura ni'amoni'ö: "Da'ö mbörö wa usuno
Ndra'ugö ba gotalua
soi bö'ö he So'aya;
ba ulau zinunö ba wanuno töiMö". Rom 15:4-9
Simanö daoma li
Lowalangi.- Sato: Ma'andrö …
Sinunö Föna
Injil : Psallite No 201 (ma Laudate
No 20, 3)
INJIL
Turia Somuso dödö khö Yesu
Keriso nisura Matai'o.-
Me luo da'ö, so Yohane Same'e Fanasa, ba mangombakha ia ba danö si mate ba
Yudaia, imane : "Mifalalini gera'erami, me no ahatö gamatöröŵa zorugo
andrö!" Ya'ia sa niŵa'ö Yesaya sama'ele'ö, imane : "So niha si'ao ba
danö si mate, sanguma'ö : "Mihaogö lala khö Zo'aya, mifadaya
lalaNia!" Baru Yohane, no baru nisoso, bu gondra; ba böbö talunia, ba uli zaŵi; önia ba tamo awö ŵe ŵani ba gatua. Ba möi baero khönia mbanua Yerusalema awö mbanua danö Yudaia
fefu, awö zi fatambai nidanö Yoridano, latema khönia wanasa andrö, ba
la'ombakha'ö horöra. Me i'ila Yohane, ato niha si möi khönia, imane khöra : "Ya'odo sa
zame'e khömi fanasa, tanda wamalalini era'era. Si so furigu dania, ba sabölö
moroi khögu, lö sinangea ndra'o wamokai badagaheNia. Ya'ia zame'e khömi fanasa
faoma Eheha Ni'amoni'ö ba alitö dania. Ba dangaNia so döriNia, ba ihaogö
golayama mbasitö khöNia. Ba ulitö, ba Ifa'anö ba halasa, ba adaya andrö, ba
itunu ba galitö si tebai mubunu."-
Mat 3:1-7a.11-12
Simanö duria somuso dödö khö
Zo'aya ya'ita, Yesu Keriso.-
FAMALALINI ERA’ERA
BA FAMADAYA LALA ZO’AYA
Bakha ba wombaso Siföföna tarongo wa no ara me lö
sa’ae razo moroi ba nga’ötö Dawido. Ama Dawido, Iza’i, tefotöi tuhe. Tefotöi ia
tuhe, yaia ba wangombakha wa lö mo’aetufa nga’ötö andrö. Yesaya zangombakha wa
moroi ba duhe andrö dania tumbu lewiö si bohou, samösa razo safönu Eheha
Ni’amoni’ö, ya’ia Yesu Keriso. Bakha ba khöNia dozi soi mangatulö ba sowuawua
fa’auri.
Ba gotalua niha samati ba Roma me
föna, ato niha keriso solo’ö nasa
ngawalö gamakhoita si so ba zura Moze ma amakhoita sanandrösa
ba ngawalö gö ba tanö bö’ö na. Niha Keriso tanö bö’ö, si no niha baero mböröta, lö ba dödöra
ngawalö gamakhoita andrö, irege alua wawukasa ba niha samati ba Roma. Andrö wa ibe’e menemenenia
Faulo ena’ö lö aetu wanötöna niha ba so wa’ebolo dödö. Sindruhu wa lö faröi
Lowalangi andrö ba niha samati khöNia.
Turia somuso dödö andrö nisura Matai’o I’ombakha’ö khöda
Yohane wa no ahatö gamatöröwa Lowalangi andrö. Amatöröwa Lowalangi andrö ya’ia
we’aso Zo’aya. Ba we’aso Zo’aya andrö, I’andrö Yohane ena’ö sindruhu tafa’anö
ita. Fama’anö andrö tebörö ia sifao famalalini era’era, ganete da’ö ba famadaya
lalaNia. Famalalini era’era aoha sibai ba wehede, ba hiza ha ya’ita samösa
zangila ba ha So’aya aefa da’ö. Ba zimanö moguna wamadaya lala, ya’ia
wamalalini era’era andrö sifao fa’ahele dödö. Na no fadaya dödöda, ba da’ö tasöndra
wa’ahele dödö.
Sitölu ngawua wombaso andre, idönia’ö ita ena’ö lö
mamalö so ita ba wama’anö we’aso Zo’aya andrö. Sindruhu wa lö omasi Lowalangi I’etu’ö
wa’omasiNia ba niha. No ihönagö duhe samatumbu’ö liwiö sibohou. Yesu si no liwiö
sibohou, no famohouni ngamakhaita niha khö Lowalangi. Me no so wamohouni andrö,
idönia’ö ita Faulo ena’ö lö mamalö ta’ame’egö tödö göi wanahatödö ba ngawalö
gisö’isö dödö. Ba zimanö lö mamalö so ita ba wangehaogö lala khö Zo’aya andrö
ba no tafadaya. Ba gafuriata, na no irugi gamatöröwa Lowalangi andrö, no tobali
ita ulitö si so ösi nibe’e ba halasa khö Lowalangi ba tenga tobali uliho andrö
nitunu ba galitö. Amen.
Nifa’anö Kat. Ingatan Sihura, S.Ag.
Umbu:
Biro Liturgi Keuskupan
Sibolga, Liturgi Taroma Li Döfi A/B/C
Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli,
Keuskupan Sibolga, 2012
Dianne Bergant, CSA &
Robert J. Karris, OFM (ed) Tafsir Alkitab
Perjanjian Lama Yogyakarta Kanisius, 2002
Dianne Bergant, CSA &
Robert J. Karris, OFM (ed) Tafsir Alkitab
Perjanjian Baru Yogyakarta Kanisius, 2002
Martin Harun, OFM, Matius
Injil Segala Bangsa Yogyakarta: Kanisius, 2019
St. Eko Riyadi, Pr, Matius
“Sungguh, Ia Ini Adalah Anak Allah!” Yogyakarta:
Kanisius, 2011
0 comments:
Posting Komentar