TAROMA LI LOWALANGI LUO MIGU SI – 29 DÖFI C

Liturgi Taroma Li Döfi A/B/C hlm. 641.

FOMBASO  I

Taroma Li Lowalangi nihalö moroi ba zura Moze, si dua.-

Me luo da'ö, so moroi sa Ndraono Gamaleki, möi fasuwö ba Ndraono Gizara'eli, ba mbanua Rafidi. Imane Moze khö Yosua : "Tutuyu khöda niha sabölö. Mahemolu, lö tola lö'ö fasuwö ami ba Ndraono Gamaleki andrö. Ba ya'o, ba zuzu hili muzizio ndra'o; ba dangagu so zi'o andrö khö Lowalangi." Ba i'o'ö Yosua niŵa'ö Moze khönia ba wasuwöta ba Ndraono Gamaleki. Ba möi ba zuzu hili ndra Moze, A'aroni ba Huri. Sagötö ifazaŵa dangania Moze, abölö Ndraono Gizara'eli. Na idada dangania, Iraono Gamaleki zabölö. Ba me atage danga Moze, lahalö gara ba labe'e dadaomania. Ba latuwu da'io Moze ira A'aroni ba Huri, - samösa dambai, irugi aekhu luo. Ba tobali ilaŵa Ndraono Gamaleki Yosua ba ihorigö ira faoma bawa zi'öli.  2 Moz 17:8-13

Simanö daroma li Lowalangi.-

 

Sinunö Fanema Li : Psallite No 121                                  (ma Laudate No 89)

 

FOMBASO  II

Taroma Li Lowalangi nihalö moroi ba zura Waulo si mendrua khö Dimoteo.-

Talifusö ni'omasi'ö !

Böi böhöli zi no örongo ba si no öfaduhusi tödö. Ya'ugö zangila ha'ökhö örongo, awö wa ö'ila göi zura ni'amoni'ö andrö, i'otarai iraono ndra'ugö, si tola mangatuatua'ö ya'ugö, ba wangalui fangorifi andrö börö wamati andrö khö Keriso Yesu. Fefu zi no musura andrö fao fanolo Geheha Lowalangi moguna ba wamaha'ö, ba wangotu'ö, ba wanga'azökhi awö ba wamomaha niha ba wa'atulö dödö. Ba faoma zura ni'amoni'ö andrö niha si möi enoni Lowalangi tola mo'ahonoa ba ngawalö mbuabua si sökhi andrö fefu. Uŵa'ö sibai khöu föna Lowalangi ba föna Yesu Keriso, sanguhuku dania niha sauri awö zi no mate, na to'ele ba mamatörö Ia : Ombakha'ö daroma li andrö, böi bulö'ögö, - he omasi ira, ba he lö omasi ira. Otu'ö ira, tegu ira ba farou dödöra ba ya so khöu wa'ebolo dödö awö wa'aboto ba dödö.- 2 Tim 3:14-4:2

Simanö daroma li Lowalangi.-

 

Sinunö Föna Injil : Psallite No 251                                   (ma Laudate No 97)

 

INJIL

Turia Somuso Dödö khö Yesu Keriso nisura Luka.-

Me luo da'ö, Ilau gamaedola Yesu khö ndra nifahaöNia, ba wangoroma'ö wa lö tola lö fadoro wangandrö, wa böi atage. Imane : "So samösa zanguhuku ba zi sambua banua, si lö mangata'ufi Lowalangi, ba lö ba dödönia hadia niŵa'ö niha. So göi samösa lakha mbanua ba mbanua andrö, si lö aetu mangondrasi sanguhuku andrö, ena'ö i'o'awögö ia ba warakaro, imane : "Tolodo wolaŵa udugu." Ba ara lö edöna ia.  Ba gafuriata imane tödönia : "He lö u'ata'ufi Lowalangi ba he lö ba dödögu hadia niŵa'ö niha, ba edönado utolo lakha mbanua andrö, me ifakao ndra'o, fa böi afökhö högögu ibe'e, na lö ibatobato we'amöi."-  Ba Imane Yesu : "Mifondrondrongo hadia niŵa'ö zanguhuku si lö sökhi andrö. Ba hadia, lö Itolo Lowalangi ndra nitutuyuNia andrö, si'angaröfi li Ya'ia bongi ma'ökhö ? Hadia Ibalobaloi ua, awena Itolo ira ? Uŵa'ö khömi, i'anemai'ö Itolo ira."- Luk 18:1-8a

Simanö duria somuso dödö khö Zo'aya ya'ita, Yesu Keriso.-

Erönua:

FA’AHATÖ KHÖ KERISO NO FA’ABÖLÖ WAMATI

Bakha ba wombaso siföföna nihalö moroi ba zura Moze sidua andrö, tarongo hewisa wasuwöta ndraono Gizara’eli ba niha Gamaleki. Ba wasuwöta andrö aboto ba dödöda hewisa wa’amöna ndraono Gizara’eli andrö börö wamazawa danga ma famahowu’ö Moze andrö moroi ba zuzu hili. Famazawa danga Moze andrö no sambua tandra wa’ebua dödö Lowalangi  ba fefaoNia ba ndraono Gizara’eli. Ba zimanö aboto ba dödöda wa sabölö saae ita na fao awöda Zo’aya.

Bakha ba wombaso sidua nihalö ba zura Waulo andrö simendrua khö Dimoteo, no zui sambua famasugi ba dödöda wamati ba khö Keriso andrö. Lö mamalö omasi Zo’aya khöda ya’ia töratöra bakha ba Zura Ni’amoni’ö. Ba da’ö tola ta’erönusi wa’aurida sero ma’ökhö. Fahuhuosa Zo’aya bakha ba Zura Ni’amoni’ö, zanolo ya’ita ba wamotokhi ba dödöda niŵa’ö Zo’aya bakha ba wa’auri sero ma’ökhö. Ba zimanö na sindruhu lö mamalö fao khöda Zo’aya ba wa’auri sero ma’ökhö, lö mamalö sabölö ita ba wanaögö hadia ia fefu zanandraigö ya’ita.

Bakha ba duria somuso dödö andrö, itugu I’oroma’ö khöda Luka, gamaedola Yesu andrö khöndra nifaha’öNia. Börö wa lö mo’aetufa wangandrö lakha mbanua andrö, alulu dödö zanguhuku andrö. Lö mendrua manö ita ba khö Keriso andrö. Hadia tenga no ifaha’ö ita wogaoni Lowalangi andrö wanguma’ö “AMA”. Ba da’e oroma hewisa wa’ahatöda ba khö Lowalangi andrö. Lö hadöi otalua nono khö nama. Lö göi otaluada ya’ita niha wamati ba khö Keriso. Börö wa’ahatöda andrö, fefu zoguna khöda no I’a’asogö hewa’ae lö ta’andrö. Ha fangandrö saohagölö khöda ya’ita niha samati.

Sitölu ngawua fombaso andre, edöna idönisi dödöda wa moguna böi taböhöi wa’ahatö ita khö Lowalangi. Fefu da’ö no soguna khöda, ba wolumö’ö ya’ita moroi ba ngawalö gametau’ö, ba wangabölö’ö ya’ita ba wamati, ba wangotu’ö ya’ita ba ngawalö gohitö dödö, ba ba gafuriatania ba wangamualagö khöda balazo bongi ma’ökhö. Tafalua wa’ahatö andre khö Yesu, ya’ia siföföna na lö mamalö tabaso ma ta’alui ia ba Mbuku Ni’amoni’ö andrö.

Faudu göi ba luo migu si – 29 andre, Gereja Katolik ba zi sagörö ulidanö andre, ta’owasaini ngaluo Hari Pangan Sedunia. Ba da’e göi lö mamalö idönia’ö ita Gereja ena’ö lö mamalö ta’oguna’ö fefu mbua zinanö si so ba zifasuida. Fefu da’ö no buala Lowalangi sinangea tarorogö ba tafaliaro ia soguna khöda ba lala wa’aurida.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011