TAROMA LI LOWALANGI LUO MIGU SI – 33 DÖFI C

Liturgi Döfi A/B/C hlm. 651.

FOMBASO  I

Taroma Li Lowalangi nihalö moroi ba zura Maleakhi, sama'ele'ö.-

Imane So'aya : Hiza sa, irugi dania luo, wa moholahola wönuGu, sangohorigö fefu niha sangosiwawöi Ya'o. Taya ira simane töla wakhe nitunu ba galitö. Tehorigö ira fefu niha si lö atulö, na luo da'ö, Iŵa'ö So'aya samatörö fefu hadia ia. Lö si tosai khöra, he wa'a ba he daha. Ba ngaluo da'ö, tumbu khömi luo, ya'ami si lö faröi khöGu. Bakha ba hagania oroma dania wa'atulömi sangorifi ya'ami.- Mal 4:1-2a

Simanö daroma li Lowalangi.-

 

Sinunö Fanema Li : Psallite No 98, 4+5+6               (ma Laudate No 97, 1-2)

 

FOMBASO  II

Taroma Li Lowalangi nihalö moroi ba zura Waulo si mendrua ba niha samati ba mbanua Desalonika.-

Ya'ami ira talifusö !

Noa sa mi'ila hewisa wolo'ömi ya'aga. Lö areu ndra'aga wohalöŵö, me soga ba gotaluami; lö'ö göi nihalöma balazo si lö nibe'ema böli. Mabe dölama wohalöŵö bongi ma'ökhö, fa böi abu dödömi khöma, haniha ami. Mohalöŵö ndra'aga tenga börö me tebai ma'andrö mbalazoma khömi, ena'ö i mabe'e famaedo ndra'aga khömi, ena'ö mi'o'ö nilauma andrö. Da'ö sa göi niŵa'öma khömi, me so ga ba gotaluami : "Si lö edöna mohalöŵö, böi ya manga." Noa sa marongo, so ösa ba gotaluami zi lö sökhi amuata. Ma'ifu lö mohalöŵö ira, arörö manö ira ba zi lö karua. Niha simane da'ö matenaŵa ba ma'o'ou ba döi Zo'aya : Akha lahonogö ira ba halöŵöra ba la'a gölöra samösa balazora.- 2 Tes 3:7-12

Simanö daroma li Lowalangi.-

 

Sinunö Föna Injil : Psallite No 268                               (ma Laudate No 97, 3)

 

INJIL

Turia Somuso Dödö khö Yesu Keriso nisura Luka.-

Me luo da'ö, so niha samatunö hewisa wa'abaga nomo Lowalangi  (ba Yerusalema), nifogamagama faoma kara si sökhi, awö mbarabara nibe'e sumange khö Lowalangi. Imane khöra Yesu: "So ginötönia dania, tedudugö fefu ni'ilami andre, ba irugi inötö dania, ba sambua lö si tosai ba dete nawönia yaŵa kara, si lö mududugö." Lasofu khö Yesu, lamane : "He Guru, ha wa'ara alua da'ö ? Ba hadia dandra, wa itörö dania da'ö ?" Imane Yesu : "Mi'angelama, böi lafaelungu ami. Börö ato sa dania zi tohare, samake töiGu, lamane : "Ya'odo andre Ia", ba laŵa'ö : "No irugi inötö." Böi mi'o'ö khöra ! Ba böi ata'u ami, na mirongo duria wasuwöta ba folaŵa. Lö'ö sa tola lö so da'ö ua. Ba lö'ö na i'anemai'ö fa'atua danö." Ba imane khöra : "Faoma la'uduni nawöra dozi soi ba faoma fasuwö ira. So ndruru danö sabölöbölö ba lofo mbanua ba fökhö sebua misa. Alua göi zihokha mbu niha, awö zahölihöli dödö ba mbanua si yaŵa. Ba föna da'ö fefu lara'u ami ba lafakao. La'etu'ö huku khömi ba nomo wangandrö khöra ba labe'e ami ba gurunga. Ba la'ohe ami föna ndra salaŵa, awö ndra samatörö, börö döiGu andrö. Da'ö ginötö si sökhi khömi wamaduhu'ö Ya'odo. Andrö mitanö ba dödömi, fa böi mihönagö mi'alui he miwisa wamu'a ba hulumi. Ya'o sa zame'e dania khömi fehede ba fa'atuatua, si tebai lalaŵa ba si tebai lafadaö dozi si fa'udu khömi. So göi dania niha si manga mbölimi, ira amami na'i ba ira talifusömi awö zi tenga bö'ö ba si fahuwu khömi. So ösa ba gotaluami nibunura. Ba dozi dania fatiu dödöra khömi, börö döiGu andrö. Ba sara rozi mbu ba högömi lö taya. Ba wa'anau gölö awö wa'ebolo dödömi dania misöndra wangorifi nosomi."- Luk 21:5-19

Simanö duria somuso dödö khö Zo'aya ya'ita, Yesu Keriso.-

 

Erönua:

SANAU ÖLÖ IRUGI GAMOZUA DA’Ö NI’ORIFI

Bakha ba wombaso sisara nihalö moroi ba Zura Male’akhi sama’ele’ö, sindruhu I’oroma’ö khöda hewisa ia na alua wönu Zo’aya andrö. Niha nifakao, si tosasa ba töratöra niha nilau si lö atulö, itaria fawuka gera’era. Ha  wa’ara Ihuku niha solau si lö sökhi andrö So’aya ? Ba zi ma’ökhö andre ifarou ita   fombaso si sara fa böi fawuka gera’erada. Lö tebulö, wa so dania wanguhuku Zo’aya andrö.

Ba wombaso sidua tarongo menemene Waulo so’amakhaita ba niha si lö mangobadödöi lala halöwö, ma tola tamane niha sareu. Ba mbanua Desalonika so niha sanguma’ö wa lö ara tö tohare Zo’aya. Andrö lö moguna sa’ae mohalöŵö ira ba arörö manö ba zi lö karua. Ba niha andrö mofönu sibai Waulo. Ba menemene Waulo andrö ifangöhösi ena’ö niha si lö mohalöwö ba lö manga. Ba da’e sindruhunia ibotokhi ba dödö niha andrö Faulo wa lala halöwö andrö lö mo’aetufa ba hiza mufalua ia sifao fa’ahele dödö.

Bakha ba duria somuso dödö andrö tarongo zagahölihöli dödö andrö nifarongogö Yesu so’amakhaita ba niha samaduhu’ö töi-Nia andrö. Ba ginötö da’ö ba oya manö zagahölihöli dödö salua. Ba hiza ha sambua ni’andrö Yesu ba niha samati ya’ia wamati saro. He oya wanandraigö ba fanandrawaisi, ba böi möi fameta’uda. Sanau ölö sa dania irugi gamozua ba sifao famati andrö da’ö zauri.

Sitölu ngawua wombaso andre sindruhu idönia’ö ita wo’erönusi inötö wa’atohare nono niha andrö ba wanguhuku niha sauri ba si no mate. Inötö andrö samösa lö sangila hawa’ara baero Nama andrö si so ba zorugo. Na simanö hadia ni’alualuida? Ni’aluida ya’ia wangöhönagö ya’ita na alua ginötö andrö. Fefu niha zamösana itema zulö hadia nilaunia ba hadia zi no ifalua. Famatida no möi fangaro dödöda ba wombalobaloi inötö andrö. He oya wanandraigö ba fa’akao, na lö tebulö ita ba wamati andrö, lö mamalö tasöndra wa’auri si lö aetu.

Iada’a hewisa ita wama’anö ya’ita? Fama’anöda ya’ita ba ya’ia da’ö: siföföna fa’aro dödö. Fa’aro dödö mo’amakhaita ba wa’afaduhu dödö wa tatema zulö fa’auri si lö aetu dania börö wamati ba khö Keriso andrö. Simendrua ba fanaha tödö. Fefu ngawalö zalua khöda, töratöra niwa’ö Yesu mege bakha ba duria somuso dödö andrö, ba ha fanaha tödö zi tola molawa da’ö fefu. Na lö fanaha tödö, ba tola adudu wamatida. Amen.

 

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011