TAROMA LI LOWALANGI LUO MIGU SI – 28 DÖFI C

Liturgi Taroma Li Döfi A/B/C hlm. 638.

FOMBASO  I

Taroma Li Lowalangi nihalö moroi ba zura Razo, si dua.-

Me luo da'ö, möi Na'ema, kumandru andrö, mitou ba Yoridano ba i'ungugö ia fitu kali molo'ö niŵa'ö genoni Lowalangi andrö, Elisa. Te'ali nösinia, timba nösi nono matua, ba no döhö wökhö mbou auri. Ifuli ia khö genoni Lowalangi andrö, fao awönia fefu. Ba me irugi, ba i'ondrasi Gelisa, imane : "Hiza, no aboto ba dödögu, dozi tanö ba lö Lowalangi, ha ba Ndraono Gizara'eli. Tema mbuala genoniu, fangandrö saohagölö!" Imane Elisa: "Faya wa no sauri Zo'aya, si no möido enoni, lö uhalö hadia ia!" Ba he ŵa'ae iforege khönia, ena'ö ihalö, ba lö edöna ia. Ba gafuriata imane Na'ema : "He ŵa'ae lö omasi'ö wanema buala, ba hiza, tehegö khögu wolohe tanö da'e tou, ndrohundrohu noro galide si dua geu. Lö'ö sa'ae edöna genoniu andre ifosumange lowalangi bö'ö, ba wame fasömbata nitaba ba fasömbata nitunu, hatö So'aya ufosumange."- 2 Raj 5:14-17

Simanö daroma li Lowalangi.-

 

Sinunö Fanema Li : Psallite No 98, 1+2+3                    (ma Laudate No 92B)

 

FOMBASO  II

Taroma Li Lowalangi nihalö moroi ba zura Waulo si mendrua khö Dimoteo.-

Talifusö ni'omasi'ö !

Törötörö tödöu Zo'aya ya'ita, Yesu Keriso, ma'uwu Dawido andrö. No I'orifi Ia mangawuli Lowalangi moroi ba wa'amate. Da'ö duho duria somuso dödö ni'ombakha'ögu. Ba wanuriaigö turia somuso dödö andre ae wa utaha wamakao, irege larate ndra'o, hulö niha si lö sökhi. Ba lö'ö sa mufesu daroma li Lowalangi andrö. Andrö utaögö fefu hadia ia soguna ba niha nituyu Lowalangi, ena'ö lasöndra göi wangorifi andrö ba khö Keriso Yesu, awö lakhömi si lö aetu. Sindruhu daroma li andrö : Na fao ita khö Keriso ba wa'amate, fao göi ita khöNia ba wa'auri. Na tataha wamakao, fao ita göi khöNia ba wamatörö. Na ta'ositengagö Ia, I'ositengagö göi ita. Na faröi ita, ba lö'ö sa faröi Ia, me tebai sa I'ositengagö Ia.- 2 Tim 2:8-13

Simanö daroma li Lowalangi.-

 

Sinunö Föna Injil : Psallite No 250                                (ma Laudate No 62B)

 

INJIL

Turia Somuso Dödö khö Yesu Keriso nisura Luka.-

Me luo da'ö, Itohugö wofanöNia Yesu numalö ba Yerusalema. Itörö nola danö Zamaria awö danö Galilaia. Me irugi sambua mbanua side'ide, ba dalu lala, falukha Ia dafulu ndra matua sofökhö bou auri. Lö lahatö'ö ira. Moroi ba zaröu mu'ao ira, lamane : "He Yesu, guru, hakhösi tödö ndra'aga !" Me I'ila ira Yesu, Imane khöra : "Mi'ae'e khö ndra ere, ena'ö lafareso mbotomi !" – Ba tobali, barö we'amöira andrö, ba döhö wökhöra. Me i'ila si samösa ba gotaluara, wa no döhö ia, mangawuli ia, i'ebua'ö linia wanuno Lowalangi, ituhi danö föna Yesu, wangandrö saohagölö khöNia. Ya'ia niha Zamaria. Imane Yesu khöNia : "Hadia tenga dafulu ami zi döhö fökhö ? Heza so zi dasiŵa tanö bö'ö ? Hana wa ha niha si tenga soi Lowalangi andre zangawuli ba wamosumange Lowalangi ?" Awena Imane khönia : "Faoso, - fuli'ö ! Famatimö zamadöhö ya'ugö."-  Luk 17:11-19

Simanö duria somuso dödö khö Zo'aya ya'ita, Yesu Keriso.-

 

Erönua:

FAMATI SOROMA BA WANGANDRÖ SAOHAGÖLÖ KHÖ LOWALANGI

Bakha ba wombaso siföföna nihalö moroi ba zura Rzo si dua, oroma khöda hewisa Na’ema andrö sangandrö saohagölö khö Gelisa enoni Lowalangi. Ba wa omuso dödö Na’ema andrö me no döhö ia moroi ba mbou auri, omasi sibai ia wame’e buala khö Gelisa. Lö edöna wanema buala andrö. Hewa’ae simanö, lö mamalö ifabu’u si’oroi dödö Na’ema wa lö mamalö isuno Lowalangi So’aya. Ba wombaso andre ibe’e khöda dumaduma Na’ema wa tenga ha ba mbuala omuso dödö. Ba hiza, ena’ö abölö moroi ba wa’omuso dödö andrö wangandrö saohagölö khö Lowalangi.

Bakha ba wombaso sidua nihalö moroi ba zura Waulo andrö khö Dimoteo, sindruhu no sambua tandra wamasugi ba dödö. Sedöna ifasugi Faulo andrö ba ya’ia ena’ö itörö tödönia Lowalangi. Fa’afökhö nitaögö Waulo ba wanuriaigö turia somuso dödö andrö, no sambua ndrela ba wamuli sumange Lowalangi fefu lala halöwönia. Ba da’e göi oroma khöda wa fana’ögö fa’afökhö ba fanandraigö andrö, no sambua ndrela ba wamasugi ba dödöda hadia sindruhu no tafuli sumange Lowalangi fefu zi no tatema andrö.

Bakha ba duria somuso dödö andrö abölö te’oroma’ö hewisa zangandrö saohagölö andrö ba ngawalö zi no itema. Dafulu niha sangandrö ena’ö ifadöhö ira Yesu moroi ba mbou aurira, ba hiza ha tö samösa niha samuli ya’ia ba wangandrö saohagölö khö Yesu. Fefu da’ö alua börö wamati si so khönia.

Ba lala wa’auri si ero ma’ökhö, fa’itaria manö asese olifu ita wangandrö saohagölö na no tatema mbua. Ba hiza ba wangandrö ena’ö tebe’e khöda mbuala, lö mo’aetufa ita ba wangandrö. Ba duria somuso dödö andrö sindruhu oroma, wa ha samösa moroi ba gotalua zidafulu zangandrö saohagölö. Ba zimanö oroma wamati saro andrö, ya’ia na lö mamalö abölö mu’ofönai’ö wangandrö saohagölö khö Lowalangi.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011