TAROMA LI LOWALANGI LUO MIGU SI – 27 DÖFI C

 Liturgi Taroma Li döfi A/B/C hlm. 636.

FOMBASO  I

Taroma Li Lowalangi nihalö moroi ba zura Habakuki, sama'ele'ö.-

Imane sama'ele'ö: Ha wa'ara sa'ae u'andrö tolo khöU, Ya'ugö, he So'aya, ba lö Öfondrondrongo. Ha wa'ara sa'ae mu'aodo khöU : Lafakao niha ! – ba lö Ötolo. Hana wa Öfa'ila'ö khögu zi lö sökhi andrö ba Öfaigifaigi manö wamakao niha awöra? Famalangögö ba famakao  zi so ba dumuma hörögu; andrö wa no tumbu wasosota, ba soso manö zui waguaguasa. Itema ligu So'aya, Imane khögu : Nifa'ele'öGu khöu iada'e, tanö ba zura, haogö wanura ba gara wanura, ena'ö lö afökhö ba niha wombaso ya'ia. Mogasa nasa wa'alua gangilata andrö, ba aösö ia ba wa'alua, ba no tenga faya. Na mogasa ia, ba dönadöna manö; lö'ö sa zi lö itörö, lö zi lö alua : Gofu haniha zohundragö huku, tekiko dania. Ba hiza, si lö faröi khöGu ba samalua satulö, i'orifi wa'aurinia.- Hab 1:2-3;2:2-4

Simanö daroma li Lowalangi.-

 

Sinunö Fanema Li : Psallite No 95, 1+3+4                       (ma Laudate No 92)

 

FOMBASO  II

Taroma Li Lowalangi nihalö moroi ba zura Waulo si mendrua khö Dimoteo.-

Talifusö ni'omasi'ö !

Ufasugi ba dödöu wehi'a dödö ba wamalua halöŵö, si no ötema moroi khö Lowalangi, me luo utufa tangagu högöu. Eheha, nibe'e Lowalangi khöda, tenga Eheha sombali'ö ya'ita tobali ata'u ba hiza, no Eheha same khöda fa'abölö, fa'omasi ba fanaha tödö.

Börö da'ö böi aila'ö wame'e famaduhu'ö sanandrösa khö Zo'aya ya'ita ba böi göi aila ndra'ugö börö ndra'o, si no mukuru börö Keriso. Ya fao ndra'ugö wanaögö famakao soguna ba duria somuso dödö andrö si fao fa'abölö nibe'e Lowalangi. Aro'ö dödöu ba ngawalö wamahaö nirongou khögu. Da'ö wamahaö sindruhu. O'ö da'ö fefu, börö wamati ba fa'omasi ni'amualagö Keriso Yesu khöu. Rorogö girögirö si sökhi andrö, nibe'eNia khöda, fao fanolo Geheha Ni'amoni'ö, sauri ba dödöda.- 2 Tim 1:6-8.13-14

Simanö daroma li Lowalangi.-

 

Sinunö Föna Injil : Psallite No 264                                   (ma Laudate No 77)

 

INJIL

Turia Somuso Dödö khö Yesu Keriso nisura Luka.-

Me luo da'ö, me no aefa ibe'e khöra menemene, la'andrö khö Zo'aya ira rasul, lamane : "Abölö'ö wamatima !" Imane So'aya : "Na so wamatimi, fa'ebua danömö höwa, tola miŵa'ö ba döla geu andrö : Deha'ö ba fawu'a'ö, tanö'ö ba nasi ! – ba i'o'ö limi.- Haniha ba gotaluami zi so samösa enoni samaku ba laza ma sokubaloi urifö, zanguma'ö khönia na mangawuli ia moroi ba nowi : 'Aine, lau manga!' Hadia tenga miŵa'ö khönia : 'Fa'anö gögu! Böbö dalumö ba ae enonigu, fatua mangado ba ubadu nidanö; awena tola manga'ö?' Hadia, i'andrö saohagölö khö genoni andrö, me no i'o'ö niŵa'ö khönia? Simanö göi ami : Na no mi'o'ö fefu zi no laŵa'ö khömi, ya mimane : Enoni si lö guna ndra'aga. Hadia zinangea halöŵöma, da'ö nifaluama.  Luk 17:5-10

Simanö duria somuso dödö khö Zo'aya ya'ita, Yesu Keriso.-

 

Erönua:

FAMATI SARO

Ba ginötö so ba gotalua Ndraono Gizara’eli, Habakuki sama’ele’ö andrö, no la’iagö mbosi fondrege tanö yaŵa Iraono Gizara’eli ba wamalua korupsi (ma fangoguna’ö kefe si lö atulö). Ba wahuhuosa Habakuki andrö khö Lowalangi oroma wa hulö zaetu wanötöna Habakuki börö me lö nasa mofönu Lowalangi ba Ndraono Gizara’eli. Ba da’e ta’ila wa lö omasi Lowalangi alio ihuku niha Lowalangi na fasala. Omasi nasa Lowalangi wame’e inötö ba niha ero zamösana ba wamalalini era’era.

Sura Waulo andrö khö Dimoteo, sindruhu no sambua sura wamasugi ba dödö zifatalifusö so’amakhaita ba lala halöwö si no irai lafalua. Hewa’ae bakha ba gurunga so Waulo, lö mo’aetufa ibe’e wondrara dödö ba niha si so baero si tenga nihuku. Ba da’e I’a’aro’ö dödö Dimoteo ena’ö böi aila ba wamaduhu’ö  sanandrösa ba khö Zo’aya. Sindruhu afökhö wolo’ö khö Lowalangi, ba hiza Ehaha ni’amoni’ö sa zame’e fa’abölö, fa’omasi ba fanaha tödö. Sura Waulo andre andre göi, sindruhu ifasugi ba dödöda wa sökhi na asese tatörö tödöda ba mamati ita wa Lowalangi sa zame’e halöŵö ba Ya’ia göi zame’e kharasi andrö.

Bakha ba Duria Somuso Dödö andrö nisura Luka, oroma khöda hadia sindruhunia lohelohe niha samati andrö. Lohelohenia ha “famati saro” nifo’amaedola Yesu andrö zi hulö zizai tanömö höwa. Tanömö höwa andrö ba no tamömö zinanö fondrege zide’ide. Ba hiza na no tumbu ia ba danö, ba töla höwa andrö ba tola mangazuni wofo. Famati sizai hunö höwa andrö ba ya’ia wamati saro si lö mangiwa, ba fanou’ö ba danga Lowalangi ofanöwa lala wa’auri andrö silö mamalö itoloni Eheha Ni’amoni’ö.

Ba zi tölu ngawua wombaso andre oroma khöda wa ya’ita niha samati khö Lowalangi andre lö mamalö alau nasa ita ba wanandraigö ma fasalata. Ba hiza börö wamati andrö göi, lö alio ihuku ita Lowalangi. Lö mo’aetufa ibe’e khöda ginötö ba wamalalini era’era. Hewa’ae no sitebai mbotoda andre, ba hiza börö wamati andrö tatema Geheha Ni’amoni’ö sangabölö’ö ya’ita ba wamalua fa’omasi ba fanaha tödö. Ba gafuriata, börö wamarou Geheha Ni’amoni’ö andrö, te’abölö’ö ita ba wamati erege tola tafalua zitebai ikhamö tödö niha. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011