Falukhata Si-3
A. OHITÖ DÖDÖ BA WALUKHATA
Ena’ö sifao ba walukhata tola :
1. Aboto ba dödöra wa’omasi Lowalangi silöfaröi si no tobali gumbu wanötöna ba wa’auri si bohou.
2. Lafalua halöwö fangobadödöi ba wanoloni nawöda niha, ena’ö tola te’efa’ö ita moroi ba ngawalö wa’abudödö bakha ba wa’auri.
B. BÖRÖTA WANGERANGERA
(Sondrönia’ö ibörötaigö walukhata ba ibaso böröta wangerangera sadogodogo sifakhai ba ngawalö zalua ba ginötö iada’a ba tefaudu molo’ö tuho Mbawa Mbuku Ni’amoni’ö ba Ndröfi 2022)
Ya’ami ira talifusö ni’omasi’ö, fa’aso wökhö korona-19 ba ngawalö gamabotolania no möi börö wa manofu niha hewisa wa’omasi ba fa’alöfaröi Lowalangi ba zamati khöNia. Hadia fefu da’e no ohitö dödö Lowalangi? Hezo so wa’omasiNia si lö ola ba zamati khöNia simane si no irai Ifabu’u?
Bakha ba walukhata si-3 andre, edöna ta’erönusi faosatö duho andre: Lowalangi Gumbu Wanötöna Börö Wa’alöfaröiNia. Moroi ba walukhata andre, faoma ta’erönusi so’amakhaita ba khö Lowalangi si lö faröi ba ngawalö ginötö, simane ba dalu ginötö zalua si so ya’ita iada’e. Tedönia’ö ita ba wamaigi wa’omasi Lowalangi si lö mamalö fao khöda ba ginötö wa’abasaki andre. So Ia bakha ba ngawalö lala hadia ia, simane bakha ba wamalua fangobadödöi situmbu ba gotaluada. Databörögö walukhata andre sifao sinunö famobörö.
C. FAMOBÖRÖ
(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre)
1. Sinunö Famobörö : Laudate No. 82.
2. Famosumange Mbuku Ni’amoni’ö
Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.
“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ...
3. Tanda Röfa
S : Ba döi Nama † ba Ono ba Eheha Ni’amoni’ö. U : Amen.
S : Ya nisuno döi Zo’aya.
U : Iada’a ba irugi zi lö aetu.
4. Fehede Famasao
(Sondrönia’ö ifa’ema wehede famasao sadogodogo andre fatua lö mubaso Mbuku Ni’amoni’ö ma Daroma Li Lowalangi)
Ya’ami ira talifusö ni’omasi’ö ba khö Keriso, bakha ba walukhata si-3 andre, ta’erönusi Daroma Li Lowalangi nihalö moroi ba Zura Hosea, ya’ia Hosea 6:1-6. Bakha ba Daromali andre, te’oroma’ö wa fa’alöfaröi Lowalangi andrö, si lö mamalömalö so Ia hulö simane haga luo ba teu same’e idanö sangokafui ulidanö.
Ba wangabakhai’ö ba ba wo’erönusi Taromali andre, la tötöna khöda ena’ö aboto ba dödöda ba tafaigi mangawuli wa’omasi Lowalangi si lö mamalö fao Ia khöda bakha ba ginötö wökhö sonöröi ulidanö andre. Fa’alöfaröi Lowalangi andrö lö irai mo’aetufa ba wanolo ya’ita göi, irege tobali sambua famehulu dödö ba khöda ena’ö faoma tatoloni nawöda faoma fatambai.
5. Fangandrö Famobörö
(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).
· Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.
S : Damangandrӧ ita :
He Lowalangi safönu fa’omasi, ma’andrö saohagölö wa’ahele dödö NonoMö Yesu Keriso we’amöi ba gulidanö andre ba toröi Ia ba gotaluama. Ba ya Ia andrö ba no tandra soroma wa’alöfaröiMö si lö mo’aetufa ba khöma. Ya lö mamalö marasoi we’asoMö ba fa’omasiMö andrö bakha wogamö ba lala wa’aurima. Abölö’ö ndra’aga, ena’ö tola mabagisi wa’omasi nitemama andrö ba nawöma niha faoma fatambai. Börö Keriso, So’aya ya’aga ba sama’ema khöma, sauri ba samatörö awöU, bakha ba wa ha sambua khö Geheha Ni’amoni’ö, Ya’ugö Lowalangi götögötö wa’ara.
U : Amen.
D. FANGABAKHAI’Ö TAROMA LI LOWALANGI
1. Fombaso Buku Ni’amoni’ö (Hosea 6:1-6)
Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.
Ia da’a databaso Mbuku Ni’amoni’ö
· Mibokai Sura Hosea,...
· Ufuli uwa’ö samuza tö : Sura Hosea, faza 6
· Samuza tö ufuli u’ombakha’ö : Sura Hosea, faza 6 ayati 1 irugi ayati 6
· Sakali tӧ : Sura Hosea, faza 6 ayati 1 irugi ayati 6
· Ube’e ginötö fasamösa moroi ba gotaluada (ira matua ba ira alawe) ba tola göi mufalalilalini ero sambua ayati ba wombaso Sura Hosea andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.
· Ba ya’ita sifao ba walukhata andre tafondrondrongo Daroma Li Lowalangi andre sifao fangosisi’ö ba fa’ahono dödö ba wombaso Mbuku Ni’amoni’ö ni’oheda ero zamösana.
· Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.
Hosea 6:1-6
1. “Talabu, tafuli ita khö Yehowa; ifuli sa ifadöhö zokhoda me no amaedola isasawi ita, idaludaluni zokhoda andrö, me no ifesokho ita!
2. Ha mato dua wongi, ba I’orifi ita, ba mahemolu ö, ba Ifuli I’abe’e’ö ita, ena’ö auri ita rorogöfönia.
3. Akha aboto ba dödöda, ba ena’ö na taforege wangalui fa’aboto ba dödöda Yehowa, möi ia khöda, si ndruhundruhu, timba wa’aduhu wa’amoluo, ena’ö itörö ita, timba deu, timba deu sara, si basöi tanö”.
4. He uwisa khömi, ya’ami mado Geferayi? Hadia nilaugu khömi, ya’ami mado Yuda? Me no hulö lawuo ba zanguhulö wongi wa’omasimi andrö, me no hulö namo mbanua, salio sibai taya.
5. Ba me no simanö, ba lö tola lö ufabago’ö ira ba zama’ele’ö andrö, ba lö tola lö ububunu ira taroma ligu andrö, ba nifa’ele’ö wanguhukugu, simane fa’atumbu luo.
6. Fa’omasi sa zomasido, ba tenga sumange nitaba; fa’aboto ba dödöra Lowalangi zomasido, ba tenga sumange nitunu!
S : Simanö daroma li Lowalangi.
U : Ma’andrö saohagölö khö Lowalangi.
2. Fanofu ba Wagambakhai’ö Taroma Li Lowalangi
· Sondrönia’ö: Ifarou dödö ndra niha sifao ba walukhata ba wangabakhai’ö Zura Hosea 6:1-6 sifao fenema li moroi ba zi hauga ngawua wanofu andre mitou.
· Fangabakhai’ö Daroma Li Lowalangi andre göi tola mufalua sifao lala tanö bö’ö, dumadumania; tabagisi khö nawöda, hadia manö zi no tarongo moroi khö Lowalangi wehedenia si so bakha ba dödöda ma tafatunö sanandrösa ba ngawalö zalua nirasoida ba wa’aurida samösa.
· Sakali tö databaso wombaso moroi ba Mbuku Ni’amoni’ö andre, moroi ba Zura Hosea 6:1-6, ena’ö itugu fatöfa ba tatanö ba dödöda irege tola ta’omasi’ö Daroma Li Lowalangi andrö.
· Fanofu ba wangabakhai’ö Taroma Li Lowalangi:
1. Hadia nifalua Lowalangi ba Ndraono Gizara’eli?
(Fanema li faigi ba ayati 1 irugi ayati 2 ba ayati 5)
2. Hewisa wa’alöfaröi Lowalangi moroi ba zi no te’oroma’ö bakha ba Daromali andre? (Fanema li faigi ba ayati 3)
3. Hadia zoroma ba wa’alöfaröi mado Geferayi ba Ndraono Gizara’eli khö Lowalangi? (Fanema li faigi ba ayati 4)
4. Ba wombaso andre, hadia wondrege zomasi Lowalangi?
(Fanema li faigi ba ayati 6)
3. Erönua Moroi ba Daroma Li Lowalangi
· Me no tafondrondrongo ba tafatunö ngawalö zalua nirasoida ba wa’aurida samösa, ba simanö göi ngawalö wanema li moroi ba wanofu andrö moroi yawa; ba Sondrönia’ö: Ihalö gamarahuta ma’afefu sifao fama’ema zi hauga faosatö andre.
1. Lowalangida ba no Lowalangi fondrege zi sökhi si lö mamalö mamalua si sökhi soguna khöda. Ya’ia andrö ba tenga ha Ira’u, ba hiza Ifadöhö. Ya’ia andrö ba tenga ha Ibözi ba Ifesokho, ba hiza Ifadöhö zokho. Ya’ia andrö göi I’orifi ba Isusugi, irege tola mosindro fönaNia. Famarou dödö ena’ö mangawuli khö Lowalangi no sambua lala ba wondrönia’ö ena’ö tefadöhö, te’orifi, ba tesusugi.
2. Iraono Gizara’eli tedönia’ö ena’ö sindruhundruhu aboto ba dödöra Lowalangi. Fangi’ila si sökhi sifao fangabakhai’ö ba dödö tobali sambua lala ba wanoloni zisamösamösa niha, ena’ö la’ila sifao fa’atulö hadia sibai gohitö dödö Lowalangi andrö. Fefu da’e, moguna sibai ia ba wanimbagö famaha’ö sifao fangerangera si fasala so’amakhaita ba khö Lowalangi. Ba ayati 6 te’ombakha’ö wa Lowalangi andrö, abölö omasi sibai Ia na’aboto ba dödöra haniha Ia, me tenga da’ö zomasi Ia, sumange nitaba ma sumange nitunu. Fasömbata nitunu tola manö lafasömba’ö, hewa’ae lö fa’aboto ba dödöra Lowalangi. Moroi ba da’ö, fa’aboto ba dödö sanandrösa ba khö Lowalangi abölö mo’eluaha, börö me no la’ila Iraono Gizara’eli haniha Lowalangira.
3. Lowalangi lö’erai faröi Ia ba ngawalö soiNia. Ba ayati 3, fa’alöfaröi Lowalangi hulö simane haga luo situmbu ba zanguhulö wongi ma hulö simane teu salua ba gangahorita mbawa. Ba zitambai da’ö, fa’alöfaröi niha khö Lowalangi no adogodogo sibai, la fo’amaedolagö ia hulö simane namo mbanua ba zanguhulö wongi, salio sibai taya ma hulö simane lawuo ma sau danö ba zanguhulö wongi. Fa’alöfaröi Lowalangi, sindruhunia tebai tafahela ia moroi ba wa’alöfaröi Ndraono Gizara’eli. Ba hiza’i, tefazawagö da’e ena’ö dozi Ndraono Gizara’eli moguna lafaha’ö sibai ira ba wangi’ila haniha Lowalangi andrö.
4. Mangotomosi Ni’era’era dödö ba Sedöna Tafalua
Me no aefa ta’erönuisi nösi daroma li Lowalangi andre, Sondrönia’ö: Ifarou dödö ndra niha sifao ba walukhata, ena’ö tola lafa’ema ni’era’era dödöra andrö ba sedöna mufalua, sifao fanoloni moroi ba ngawalö wanofu si no tefa’anö andre mitou. Ba wangotomosi ngawalö ni’era’era dödö sedöna mufalua andrö, ena’ö sindruhundruhu moroi ba dödö ero zamösana, abölö sökhi na ta’oguna’ö wehede fogatini simane “ya’o” ma “ya’ita” ba ma “ya’aga”.
Fanofu ba wangotomosi ni’era’era dödö sedöna mufalua:
1. Hadia urasoi ba itema botogu wa’omasi Lowalangi ba wa’alöfaröiNia ba ginötö wökhö korona so’anöröi ulidanö andre?
2. Hezo manö wa’omasi Lowalangi si no urasoi ba ginötö wökhö korona so’anöröi ulidanö andre?
3. Hadia so wangerangera sibohou so’amakhaita khö Lowalangi nisöndragu ba ginötö wökhö korona so’anöröi ulidanö andre?
4. Hadia no fao ndra’o ba wangomasi’ö Lowalangi ba ba wanoloni awögu niha sabölö mangoguna’ö?
· Fangowuloi Kolekte BKSN : Sinunö Laudate No. 7.
5. Fangandrö Niha Samati ma Fangandrö Situmbu Moroi Ba Dödö
Me no awai tabagisi ba wamatunö ngawalö zalua nirasoida ba wa’aurida ero zamösana sifao fangotomosi ngawalö ni’era’era dödö sedöna tafalua andrö, Sondrönia’ö: Ifarou dödö ndra niha sifao ba walukhata ba wamaehagö fangandrö niha samati ma fangandrö situmbu moroi ba dödö sifaudu molo’ö gangandröwa dödö ero zamösana, simanö göi ba wo’angandröi ena’ö fökhö dungö Korona si no manöröi gulidanö andre, tola alio tetayaigö. Fangandrö niha samati te’asiwai sifao Fangandrö Zo’aya.
S : Datafa’ema gangandrӧwada khӧ Lowalangi si lö’adagedage ba wamondrondrongo gangandröwa dödö soiNia :
1. Soguna ba GerejaNia Ni’amoni’ö
Ya lö mamalö Öbe’e GehehaMö ba dödö gubaloma bakha ba GerejaMö ni’amoni’ö ba gulidanö andre. Ya börö wolumö’öMö sindruhu lö faröi ira ba wokubaloi soimö sifao fa’ahele dödö.
Ma’andrö khöU ... Tehe wangandröma, he So’aya.
2. Soguna ba niha fefu sorasoi fa’ata’u ba ginötö wökhö korona
He Lowalangi Ama sokhö banua siyawa awö danö, TaromaliMö si no mafondrondrongo ma’ökhö andre no möi famasugi ba dödöma ena’ö lömamalö saro tödö ndra’aga ba khöU ba lö mamalö marasoi wa’alöfaröiMö khöma ero inötö. Ba zimanö he Ama mangandrö ndra’aga salahi niha sanizinizi tödö ba ginötö wökhö korona-19 andre. Ya Öbe’e wa’abölö khöra irege tola la’ila labohouni lala wa’auri ba ginötö andre sifao fa’afönu wamati ba fangöhöli si’oroi Ndra’ugö.
Ma’andrö khöU ... Tehe wangandröma, he So’aya.
3. Soguna ba niha samati ba Stasi, Lingkungan ba KBG khöda
He Ama, ya Ö’amualagö bakha ba dödö soiMö si so ba stasi ba lingkungan ba ba KBG khöma, fa’aboto ba dödö ena’ö sifaoma ndra’aga ba wanoloni awöma ba sifao fangobadödöi nawöma niha sifao fa’abölö ba fa’atuatua ba wamalua halöwöma sifao fa’ahele dödö. He So’aya, ya Öfahowu’ö fefu zoroiyomoma sifao nahia ba zifasui ya’aga, ena’ö tola marorogö wa’aurima irege tola te’aröu’ö ndra’aga moroi ba ngawalö wökhöfökhö ba tola göi itugu te’abölö’ö ndra’aga moroi ba ngawalö lala halöwö nifaluama, irege tesöndra wa’owuawua dödö ba zifasuima ba ba zoroiyomoma.
Ma’andrö khöU ... Tehe wangandröma, he So’aya.
4. Soguna ba ngawalö gangandröwa dödö ba ngambatöda zamösana
He Ama, abölö’ö ndra’aga ba wamalua ohitö dödöma si no ma’angeraigö bakha ba wa’owuloma andre, ya’ia ...
Ma’andrö khöU ... Tehe wangandröma, he So’aya.
· Datarahugö fefu gangandrӧwada andre ba wangandrӧ si no Ifaha’ӧ ya’ita Yesu Keriso, wanguma’ö: He Ama khӧma …
E. FANGASIWAI
Sondrönia’ö: Ifarou dödö ndra niha sifao ba walukhata ba wangandrö fanolo Lowalangi ena’ö tola lafalua zomasi Lowalangi irege tola te’abölö’ö ita ba wamalua ngawalö ni’era’era dödöda ba mofozu gohitö dödö andrö sifao fa’edöna ba wamalua.
1. Fangandrö Fangasiwai
S : Damangandrӧ ita :
He Lowalangi fondrege zi sökhi, no ma’erönusi DaromaliMö sondrönia’ö ya’aga ena’ö sindruhundruhu ma’ila Ndra’ugö. Ya lö mamalö marasoi wa’omasi ba wa’alöfaröiMö ba gotaluama, irege te’abölö’ö göi ndra’aga ba manoloni awöma niha, töratöra ya’ira sabölö mangoguna’ö fanolo. Simanö gangandröwama sifao fama’ema Keriso So’aya ya’aga.
U : Amen.
2. Fangandrö Howuhowu Lowalangi
S : Data’andrö howuhowu Zo’aya. Ya nisuno döi Zo’aya.
U : Iada’a ba irugi zi lö aetu.
S : Ba ya Ifahowu’ö ita fefu, Lowalangi si lö ambö fa’abölö.
Ama † ba Ono ba Eheha Ni’amoni’ö.
U : Amen.
Sinunö Fangasiwai: Laudate No. 83.
0 comments:
Posting Komentar