Falukhata Si-2
A. OHITÖ DÖDÖ BA WALUKHATA
Ena’ö sifao ba walukhata tola :
1. Aboto ba dödöra mangawuli lala ba wangosisi’ö fa’auri ero zamösana, ena’ö tola ta’alui zi sӧkhi ba ta’arӧu’ӧ zi lӧ sӧkhi.
2. La’okhӧgӧ wa’atulӧ bakha ba wa’auri sero ma’ӧkhӧ sifao ba wame’e fanolo ba nawöda niha.
B. BÖRÖTA WANGERANGERA
(Sondrönia’ö ibörötaigö walukhata ba ibaso böröta wangerangera sadogodogo sifakhai ba ngawalö zalua ba ginötö iada’a ba tefaudu molo’ö tuho Mbawa Mbuku Ni’amoni’ö ba Ndröfi 2022)
Ya’ami ira talifusӧ ni’omasi’ӧ ba khӧ Keriso. Me inӧtӧ alua wӧkhӧ korona, fefu ngasi ba lala wa’auri niha oi tewu’a. Fa’atewu’a da’e, i’a’asogӧ zi sӧkhi, ba i’a’asogӧ gӧi zambӧ sӧkhi. Sambalӧ moroi ba zambӧ sӧkhi andrӧ ya’ia da’ӧ, Fa’alӧ’atulӧ bakha ba wa’auri wobanuasa ba fa’afaehu gotaluara niha si kayo ba sinumana. Tarasoi wa alua wa’alӧ’atulӧ ba niha sato. Tӧratӧra khӧ ndra niha sinumana awӧ niha sitolazi tӧdӧ bӧrӧ wa’alua wӧkhӧ korona andre.
Sifao fangabakhai’ӧ Taroma Li Lowalangi moroi ba Zura Gamosi 5:14-17 bakha ba walukhata sidua andre, ba ta’abakhai’ӧ gӧi duho : Lowalangi gumbu wanӧtӧna ba wolawa fa’alӧ’atulӧ. Tadӧnadӧna bakha ba walukhata da’a, tola ta’osisi’ӧ mangawuli he’iwisa wa’aurida zamӧsana, ena’ӧ ta’alui zi sӧkhi ba ta’arӧu’ӧ zi lӧ sӧkhi. Irege ta’okhӧgӧ wa’atulӧ bakha ba wa’aurida sero ma’ӧkhӧ, ba so gӧi khӧda wanolo awӧ.
C. FAMOBÖRÖ
(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre)
1. Sinunö Famobörö : Laudate No. 92A.
2. Famosumange Mbuku Ni’amoni’ö
Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.
“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ...
3. Tanda Röfa
S : Ba döi Nama † ba Ono ba Eheha Ni’amoni’ö. U : Amen.
S : Ya nisuno döi Zo’aya.
U : Iada’a ba irugi zi lö aetu.
4. Fehede Famasao
(Sondrönia’ö ifa’ema wehede famasao sadogodogo andre fatua lö mubaso Mbuku Ni’amoni’ö ma Daroma Li Lowalangi)
Ya’ami ira talifusӧ ni’omasiӧ ba khӧ Zo’aya, data’abakhai’ӧ ba dӧdӧda Daroma Li Lowalangi andre moroi ba Zura Gamosi 5:14-17. Bakha ba Daromali sadogodogo andre mu’ao genoni Lowalangi, Gamosi, ena’ӧ silӧ’aedu’aedu ita wangalui si sӧkhi ba zi sagӧtӧ fa’aurida. Moroi ba wa’edӧna ba wolau si sӧkhi, tumbu gӧi wa’edӧna ba wolau satulӧ ba ba wondrӧi ngawalӧ zi lӧ sӧkhi. Datafa’anӧ ita ba tahonogӧ dӧdӧda ba wamondrondrongo Taroma Li Lowalangi.
5. Fangandrö Famobörö
(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).
· Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.
S : Damangandrӧ ita :
He Lowalangi Ama fondrege zalawa ba fondrege zebua, lӧmalӧmalӧ Ӧbe’e khӧma zi sӧkhi ba Ӧlumӧ’ӧ ndra’aga moroi ba wa’ogӧmigӧmi horӧ. Ya Ӧ’abe’e”ӧ dӧdӧma ena’ӧ lӧmamalӧ ma’alui Ndra’ugӧ, umbu wa’asӧkhi, saro, irege masӧndra wa’atulӧ andrӧ ba mafalua ia bakha ba wa’aurima sero ma’ӧkhӧ. Ya tobali gӧi ndra’aga niha sanolo awӧma so’ambӧ’ambӧta, ba fao ndra’aga khӧndra talifusӧma sorasoi fa’alӧ’atulӧ. Börö Keriso, So’aya ya’aga ba sama’ema khöma, sauri ba samatörö awöU, bakha ba wa ha sambua khö Geheha Ni’amoni’ö, Ya’ugö Lowalangi götögötö wa’ara.
U : Amen.
D. FANGABAKHAI’Ö TAROMA LI LOWALANGI
1. Fombaso Buku Ni’amoni’ö (Gamosi 5:14-17)
Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.
Ia da’a databaso Mbuku Ni’amoni’ö
· Mibokai Sura Gamosi,...
· Ufuli uwa’ö samuza tö : Sura Gamosi, faza 5
· Samuza tö ufuli u’ombakha’ö : Sura Gamosi, faza 5 ayati 14 irugi ayati 17
· Sakali tӧ : Sura Gamosi, faza 5 ayati 14 irugi ayati 17
· Ube’e ginötö fasamösa moroi ba gotaluada (ira matua ba ira alawe) ba tola göi mufalalilalini ero sambua ayati ba wombaso Sura Gamosi andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.
· Ba ya’ita sifao ba walukhata andre tafondrondrongo Daroma Li Lowalangi andre sifao fangosisi’ö ba fa’ahono dödö ba wombaso Mbuku Ni’amoni’ö ni’oheda ero zamösana.
· Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.
Gamosi 5:14-17
14.Miʼalui zi sökhi, ba böi si lö sökhi, enaʼö auri ami! Awena dania itolo ami Yehowa Lowalangi ngahönö, si mane niwaʼömi.
15.Miʼogorofi zi lö sökhi ba miʼomasiʼö zi sökhi; böi mifuyuʼö huku, ba kato! Ma atö ihakhösi tödö zi tosai mado Yosefo Yehowa, Lowalangi ngahönö!
16.Andrö wa imane Yehowa, Lowalangi ngahönö, Soʼaya: Dozi olayama dania, ba fegeʼege, lamane ba newali fefu: Alai ndraʼo! alai ndraʼo! Sangahalö ba danö, ba humede dania ba zi no toʼölö ba wegeʼege ba waʼabu dödö ba ba wangeʼesi,
17.ba dozi kabu nagu misa, ba fegeʼege dania, na utörö ami, iwaʼö Yehowa.
S : Simanö daroma li Lowalangi.
U : Ma’andrö saohagölö khö Lowalangi.
2. Fanofu ba Wagambakhai’ö Taroma Li Lowalangi
· Sondrönia’ö: Ifarou dödö ndra niha sifao ba walukhata ba wangabakhai’ö Zura Gamosi 5:14-17 sifao fenema li moroi ba zi hauga ngawua wanofu andre mitou.
· Fangabakhai’ö Daroma Li Lowalangi andre göi tola mufalua sifao lala tanö bö’ö, dumadumania; tabagisi khö nawöda, hadia manö zi no tarongo moroi khö Lowalangi wehedenia si so bakha ba dödöda ma tafatunö sanandrösa ba ngawalö zalua nirasoida ba wa’aurida samösa.
· Sakali tö databaso wombaso moroi ba Mbuku Ni’amoni’ö andre, moroi ba Zura Gamosi 5:14-17, ena’ö itugu fatöfa ba tatanö ba dödöda irege
tola ta’omasi’ö Daroma Li Lowalangi andrö.
· Fanofu ba wangabakhai’ö Taroma Li Lowalangi:
1. Hadia zi lӧtolalӧ’ӧ lafalua Iraono Gizara’eli, ena’ӧ auri ira? (Fanema li faigi ba ayati 14)
2. Hadia zi lӧtolalӧ’ӧ lafalua Iraono Gizara’eli, ena’ӧ Ihakhӧsi tӧdӧ ira Lowalangi sombӧi banua awӧ danӧ? (Fanema li faigi ba ayati 15)
3. Silö’ölö’önia, hadia manö zi lӧtolalӧ’ӧ lafalua Iraono Gizara’eli so’amakhaita ba zi sӧkhi ba si lӧ sӧkhi? (Fanema li faigi ba ayati 14 ba 15)
4. Hadia zalua ba Ndraono Gizara’eli na lӧ la’o’ӧ ba lafalua Daroma Li Lowalangi? (Fanema li faigi ba ayati 16 ba 17)
3. Erönua Moroi ba Daroma Li Lowalangi
· Me no tafondrondrongo ba tafatunö ngawalö zalua nirasoida ba wa’aurida samösa, ba simanö göi ngawalö wanema li moroi ba wanofu andrö moroi yawa; ba Sondrönia’ö: Ihalö gamarahuta ma’afefu sifao fama’ema zi hauga faosatö andre.
1. Taromali andre, tefarou dӧdӧ Ndraono Gizara’eli, ena’ӧ la’alui ba la’omasi’ӧ zi sӧkhi, sitobali dela ba wanӧndra fa’auri si lӧ aetu. Si sӧkhi andrӧ ya’ia da’ӧ fefu ngawalӧ zitobali fangohahau dӧdӧ, sitobali fangomuso dӧdӧ ba moguna ba wa’auri. Ngawalӧ zi sӧkhi andrӧ, lӧmamalӧ i’a’asogӧ wa’ohauhau dӧdӧ ba fa’omuso dӧdӧ.
2. Mangomasi’ӧ folau si sӧkhi, eluahania mangosambua’ӧ si sӧkhi andrӧ bakha ba wa’auri sero ma’ӧkhӧ. Mangalui si sӧkhi eluahania mango’aurifagӧ si sӧkhi andrӧ, sifao famohouni fa’auri ena’ӧ sindruhundruhu musӧndra zi sӧkhi fondrege zaro, ya’ia da’ӧ: Lowalangi fondrege zi sӧkhi. Fangalui si sӧkhi tobali fangabӧlӧ’ӧ Ndraono Gizara’eli ba wogamӧ fa’auri, bӧrӧ me no Ifabu’u Lowalangi wa Ibe’e khӧra wa’auri, asala moroi ba wa’asӧkhi.
3. Taromali andre gӧi zamaretakӧ Ndraono Gizara’eli, ena’ӧ la ogorofi zi lӧ sӧkhi. Ba ayati 14, Iraono Gizara’eli tebai manӧ la’alui ba lafalua zi lӧ sӧkhi. Ba ba ayati 15, tefaretakӧ ira ena’ӧ la’ogorofi zi lӧ sӧkhi. Fangogorofi eluahania, mangarӧu’ӧ otalua zi lӧsӧkhi moroi ba wa’aurida, ba lӧ mangotomosi amakhaita ba ngawalӧ horӧ. Fa’asӧkhi tobali fangorudu, ba si lӧ sӧkhi tobali famambabӧ. Fa’asӧkhi mangahatӧ’ӧ niha khӧ Lowalangi ba ba khӧ nawӧda niha, ba hiza si lӧ sӧkhi mangarӧu’ӧ amakhaita zolau horӧ andrӧ khӧ Lowalangi ba khӧ nawӧnia niha gӧi.
4. Amosi sama’ele’ö, ifarou dӧdӧ Ndraono Gizara’eli ena’ӧ lafasindro wa’atulӧ. Fa’atulӧ tola mukhamӧ na mu’alui ba mu’omasi’ӧ zi sӧkhi, ba mu’ogorofi zi lӧ sӧkhi. Niha si sӧkhi i’odӧdӧgӧ wamalua si sӧkhi bakha ba wa’auri niha sato. Moroi ba da’ӧ te’a’asogӧ gera’era si sӧkhi ba sifaoma mame’e fanolo ba nawӧra. Tana khӧ zisamӧsamӧsa tefosasi ba tefӧnui. Fa’afaendronga wolau si sӧkhi ba fa’atulӧ andrӧ, i’a’asogӧ wariawӧsa si sӧkhi ba gotalua zi samӧsa niha khӧ nawӧnia niha tanӧ bӧ’ӧ.
5. Fa’atulӧ si lӧ tolalӧ’ӧ mufasindro ba mbawa gӧli. Mefӧna, bawa gӧli andrӧ nahia wa’owulo niha sato, bӧrӧ da’ӧ ba mbawa gӧli andrӧ asese la’atulӧ’ӧ ngawalӧ wasalata nono mbanua. Hana wa ba mbawa gӧli mbanua mufalua? ena’ӧ la’ila niha sato, ba fangatulӧ’ӧ horӧ andrӧ lӧ mbiniӧsӧ.
4. Mangotomosi Ni’era’era dödö ba Sedöna Tafalua
Me no aefa ta’erönuisi nösi daroma li Lowalangi andre, Sondrönia’ö: Ifarou dödö ndra niha sifao ba walukhata, ena’ö tola lafa’ema ni’era’era dödöra andrö ba sedöna mufalua, sifao fanoloni moroi ba ngawalö wanofu si no tefa’anö andre mitou. Ba wangotomosi ngawalö ni’era’era dödö sedöna mufalua andrö, ena’ö sindruhundruhu moroi ba dödö ero zamösana, abölö sökhi na ta’oguna’ö wehede fogatini simane “ya’o” ma “ya’ita” ba ma “ya’aga”.
Fanofu ba wangotomosi ni’era’era dödö sedöna mufalua:
1. Hadia no atulӧ nilaugu ba sӧkhi mbuabuagu ba nawӧgu niha, sagӧtӧ me’alua wӧkhӧ corona ?
2. Nafalukhado zi lӧ’atulӧ, hadia zitola ufalua ba wolawa fa’alӧ’atulӧ andӧ?
3. Hadia zedӧna ufalua ena’ӧ tedou walulusa fohalӧwo ba wame’e fanolo ba niha sibasaki bӧrӧ wa’alua wӧkhӧ corona andre?
4. Hewisa ena’ӧ tola ufodela gamakhaita si sӧkhi ba gotalua niha mbanua ba zi so ya’o, fabӧi arӧu sibai gotaluara niha sikayo niha silumana ?
· Fangowuloi Kolekte BKSN : Sinunö Laudate No. 91.
5. Fangandrö Niha Samati ma Fangandrö Situmbu Moroi Ba Dödö
Me no awai tabagisi ba wamatunö ngawalö zalua nirasoida ba wa’aurida ero zamösana sifao fangotomosi ngawalö ni’era’era dödö sedöna tafalua andrö, Sondrönia’ö: Ifarou dödö ndra niha sifao ba walukhata ba wamaehagö fangandrö niha samati ma fangandrö situmbu moroi ba dödö sifaudu molo’ö gangandröwa dödö ero zamösana, simanö göi ba wo’angandröi ena’ö fökhö dungö Korona si no manöröi gulidanö andre, tola alio tetayaigö. Fangandrö niha samati te’asiwai sifao Fangandrö Zo’aya.
S : Datafa’ema gangandrӧwada khӧ Zo’aya si lӧ mamalӧ mamondrongo ngarӧngarӧ dӧdӧ zamati khӧNia :
1. Soguna ba niha sorasoi fa’ata’u ba ginötö wökhö korona
He Lowalangi Ama fondrege Zabӧlӧ, Ya Ӧ’abӧlӧ’ӧ ba Ӧ’a’aro’ӧ dӧdӧ niha sorasoi fa’ata’u ba fanizinizi tӧdӧ, bӧrӧ dungӧ wӧkhӧ korona si no manӧrӧi Ulidanӧ. Mamati ndra’aga wa fefu ngawalӧ zi so ba gulidanӧ, no niwӧwӧiMӧ, irege lӧ Ӧlulu ndra’aga ba de’ala, ha bӧrӧ dungӧ wӧkhӧ korona andre. Ya itugu aro wamatima ba Khӧu ba wolawa fefu ngawalӧ wa’ata’u ba fanizinizi dӧdӧ.
Ma’andrö khöU ... Tehe wangandröma, he So’aya.
2. Soguna khöda fefu ba nösi Stasi, Lingkungan ba KBG khöda
He Lowalangi Ama, fondrege Zolomasi. Ya Ӧ’rorogӧ ba Ӧlumӧ’ӧ ndra’aga fefu, sambua stasi, lingkungan ba KBG khöma, moroi ba wa’atekiko bӧrӧ dungӧ wӧkhӧ korona andre. Ma’andrӧ khӧU, ya Öbe’e khӧma watahana mboto, ba wolawaini tungӧ andre fabӧi itugelai ndra’aga.
Ma’andrö khöU ... Tehe wangandröma, he So’aya.
· He Lowalangi Ama, oya nasa gangandrӧwa dӧdӧma ero zamӧsana ndra’aga, ba hiza sa no Ӧ’ila ba zorugo hadia zabӧlӧ moguna khӧma. Andrö ma’osambua’ӧ fefu gangandrӧwada andre ba wangandrӧ si no Öfahaӧ ndra’aga, wanguma’ö: He Ama khӧma …
E. FANGASIWAI
Sondrönia’ö: Ifarou dödö ndra niha sifao ba walukhata ba wangandrö fanolo Lowalangi ena’ö tola lafalua zomasi Lowalangi irege tola te’abölö’ö ita ba wamalua ngawalö ni’era’era dödöda ba mofozu gohitö dödö andrö sifao fa’edöna ba wamalua.
1. Fangandrö Fangasiwai
S : Damangandrӧ ita :
He Lowalangi Ama, ma’andrӧ saohagӧlӧ DaromaLiMӧ sangabӧlӧ’ӧ ya’aga. Ya silӧmamalӧ ndra’aga ba wangalui TaromaLiMӧ andӧ, ba ma’o’aurifagӧ gӧi ia irugi zi lӧ aetu, irege sito’ӧlӧ ndra’aga ba wamalua si sӧkhi, ba wanga’asogӧ fa’atulӧ ba ba wanolo awӧma niha sitosasa. Bӧrӧ Keriso, So’aya ya’aga.
U : Amen.
2. Fangandrö Howuhowu Lowalangi
S : Data’andrö howuhowu Zo’aya. Ya nisuno döi Zo’aya.
U : Iada’a ba irugi zi lö aetu.
S : Ba ya Ifahowu’ö ita fefu, Lowalangi si lö ambö fa’abölö.
Ama † ba Ono ba Eheha Ni’amoni’ö.
U : Amen.
Sinunö Fangasiwai: Laudate No. 84.
0 comments:
Posting Komentar