Falukhata Si-4
A. OHITÖ DÖDÖ BA WALUKHATA
Ena’ö sifao ba walukhata tola :
1. Aboto ba dödöra wa Lowalangi andrö sebua fa’ahakhö dödö ba si lömamalömalö faofao Ia khöda ero ma’ökhö.
2. Ta’ofönai’ö wangalui Lowalangi, irege tola ta’ehaogö mangawuli wa’aurida.
B. BÖRÖTA WANGERANGERA
(Sondrönia’ö ibörötaigö walukhata ba ibaso böröta wangerangera sadogodogo sifakhai ba ngawalö zalua ba ginötö iada’a ba tefaudu molo’ö tuho Mbawa Mbuku Ni’amoni’ö ba Ndröfi 2022)
Ya’ami ira talifusö ni’omasi’ö ba khö Zo’aya ya’ita Yesus Keriso, ambö töra dua fakhe irugi tölu fakhe wa’ara, no oya manö ngawalö dahataha fa’abasaki nitöröda. Fökhö korona sarakhagö döhö ba te’alösi ba no iröi furi khöda wa’abu dödö ba wa’afabö’ösa ngawalö zito’ölö nifaluada, ya’ia simane wa’afabö’ösa wangi’ila sanandrösa ba wa’aboto ba dödö ba khö Lowalangi. Ato niha zorasoi wa’afandrödröu Lowalangi ba niha, töratöra ba ginötö wökhö korona sigöna ya’ita ba gulidanö andre. Itaria so zangumaö wa lö Lowalangi sa’ae andrö Itehegö itörö ita fanandraigö ba gulidanö andre.
Ba walukhasata si-4 andre, ta’abakhai’ö ba dödöda waosatö duho andre, ya’ia da’ö: Lowalangi Gumbu Wanötöna Börö Wa’ahakhö DödöNia. Lowalangi sebua fa’ahakhö dödö ba si lö faröi, lömamalömalö fao fao Ia khöda ero ma’ökhö, mendrua manö ba ginötö alua wökhö korona andre. Ba ginötö wa’alua ngawalö gamaehuta moroi ba zito’ölö, irege oya ngawalö wa’atekiko sabölöbölö bakha ba ngasi wa’auri niha, ba hiza, lö mamalö faofao Lowalangi khöda bakha ba gofanöwa wa’aurida ba wanörö ba ba wanema’ö ngawalö zalua andrö. Ba zalua andre, ato niha sanguma’ö lö fa’ahakhö dödö Lowalangi khöda ba hiza, na dali zindruhunia ba da’e Ikaoni ita ba Iforoma’ö Ia Lowalangi khöda, ena’ö tola ta’oigö dödöda ba ta’ofönai’ö wangalui Lowalangi. Börö da’ö, tekaoni ita fefu ena’ö aboto ba dödöda wa Lowalangi andrö sebua fa’ahakhö dödö ba sanoloni ya’ita ba ngawalö zalua bakha ba wa’aurida sero ma’ökhö.
C. FAMOBÖRÖ
(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre)
1. Sinunö Famobörö : Laudate No. 86.
2. Famosumange Mbuku Ni’amoni’ö
Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.
“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ...
3. Tanda Röfa
S : Ba döi Nama † ba Ono ba Eheha Ni’amoni’ö. U : Amen.
S : Ya nisuno döi Zo’aya.
U : Iada’a ba irugi zi lö aetu.
4. Fehede Famasao
(Sondrönia’ö ifa’ema wehede famasao sadogodogo andre fatua lö mubaso Mbuku Ni’amoni’ö ma Daroma Li Lowalangi)
Ya’ami ira talifusö ni’omasi’ö, bakha ba walukhata si-4 andre, ta’erönusi Daroma Li Lowalangi nihalö moroi ba Zura Hosea 11:1-11. Bakha ba Daromali andre, te’oroma’ö khöda sanandrösa ba gamakhaita wa’afaofao Lowalangi bakha ba gofanöwa Ndraono Gizara’eli. Amakhaita si sökhi andre, itaria adölö ba itaria abila, itaria lasöndra wa’ohahau dödö ba itaria göna ira famakao, börö me so khöra wangiwa dödö ba wangerogö Lowalangi, irege lasömba nadu ba lafosumange Lowalangi tanö bö’ö. Sindruhunia moroi ba nifaluara andrö ba tehuku ira; ba hiza, börö me Lowalangi andrö sebua fa’omasi ba sebua fa’akhakhö dödö, andrö lö omasi Lowalangi Ihuku ira.
Bakha ba Daromali andre, tetoloni ita ba wamaigi mangawuli waöwaö wa’afahatöda ba khö Lowalangi mendrua manö ba ginötö wökhö korona andre. Itaria manö arörö ita ba wo’angeraigö ngawalö zoguna ba wa’aurida samösa, irege itaria lö ta’ila wa no oya ngawalö mbuala fa’omasi ba fa’ahakhö dödö Lowalangi bakha ba wa’aurida. Simane ba DaromaliNia, “Fe’asogu tenga simöi ba wamakiko” Faduhu dödöda wa so Lowalangi ba gotaluada mendrua manö ba ginötö si so ya’ita ia da’e, ena’ö Ifatalui’ö ita moroi ba ngawalö wa’abu dödö ba Ifasao ita ba wogamö fa’ohahau dödö irege tola ta’ehaogö mangawuli wa’aurida saekhu ba lala wa’auri si bohou.
5. Fangandrö Famobörö
(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).
· Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.
S : Damangandrӧ ita :
He Lowalangi sebua fa’ahakhö tödö, ma’andrö saohagölö khöU me no Ötuturu khöma lala ba Ölumö’ö ndra’aga, irege tola matalu’i fefu ngawalö dahataha ba gofanöwa wa’aurima andre. Faduhu dödöma wa itaria ambö mafaduhusi tödö we’asoMö khöma sifao fa’afönu fa’ahakhö dödöU. Ya Öbokai hörö dödöma ena’ö lömamalö marasoi wa Ya’ugö zondrönia’ö ya’aga börö wa’omasiMö, irege tola dania masulöni wa’omasiMö andrö ba wanolo awöma niha faoma fatambai. Börö Keriso, So’aya ya’aga ba sama’ema khöma, sauri ba samatörö awöU, bakha ba wa ha sambua khö Geheha Ni’amoni’ö, Ya’ugö Lowalangi götögötö wa’ara.
U : Amen.
D. FANGABAKHAI’Ö TAROMA LI LOWALANGI
1. Fombaso Buku Ni’amoni’ö (Hosea 11:1-11)
Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.
Ia da’a databaso Mbuku Ni’amoni’ö
· Mibokai Sura Hosea,...
· Ufuli uwa’ö samuza tö : Sura Hosea, faza 11
· Samuza tö ufuli u’ombakha’ö : Sura Hosea, faza 11 ayati 1 irugi ayati 11
· Sakali tӧ : Sura Hosea, faza 11 ayati 1 irugi ayati 11
· Ube’e ginötö fasamösa moroi ba gotaluada (ira matua ba ira alawe) ba tola göi mufalalilalini ero sambua ayati ba wombaso Sura Hosea andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.
· Ba ya’ita sifao ba walukhata andre tafondrondrongo Daroma Li Lowalangi andre sifao fangosisi’ö ba fa’ahono dödö ba wombaso Mbuku Ni’amoni’ö ni’oheda ero zamösana.
· Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.
Hosea 11:1-11
1. Me ono’ono na Ndraono Gizara’eli, ba no omasido ira ba ukaoni zato andrö, uheta ba danö Miserayi.
2. Ba na humededo khöra, ba la’erogö ndra’o. Latataba zumange nadu ba lafosumange wamaedo andrö,
3. ba ya’odo ba ututuyu galogo mado Geferayi [nifolau ba ndraono], ba uhagi ira. Ba lö la’ila wa ufadöhö wökhöra.
4. No udöni ira sinali, simane ni’oguna’ö niha, fosu fa’omasi, ba no amaedola zolulu kalo mbagi andrö, ba mbagira, ndra’odo, ba u’oro’ö göra.
5. Sangawuli ba danö Mesirayi ira, ba razo Ndrawa Asiria razora dania, me no te khöra wamuli ya’ira khögu.
6. Ba nidöni sa’ae zi’öli, ba wolau ba mbanuara andrö, famufu lazi mbawa göli ba si manga hati andrö khöra.
7. Noa sa aso’ala dödö mbanuagu andrö, wangerogö ya’odo; ba he na mu’ao ita khöra: miyawa! ba samösa lö sedöna.
8. Ba hadia, tola uböhöli ami, ya’ami mado Geferayi, tola ululu ami, ya’ami Iraono Gizara’eli? Tola uböhöli ami simane Adama no, tola ubali’ö Sebo’i ami? Tobali bakha dödögu, ba no a’oi tesao wa’ahakhö dödögu.
9. Böi molualua wönugu saukhu andrö; lö ufalua wamakiko mado Geferayi. Me no Lowalangi ndra’odo, ba me tenga niha, u’iagö ba khömi, Lowalangi Ni’amoni’ö, ba lö tesao wönugu.
10.La o’ö dania khö Yehowa; si ndröndröndröndrö ia, hulö zingo; si ndröndröndröndrö ia, ba so moroi sa ba mbewe nasi nono matua, manizinizi.
11.So ira moroi sa, ba danö Meserayi, hulö wofo, manizinizi, hulö marafadi si oroi danö Asiria. Ba sahono baomora dania ira ube’e, Iwaö Yehowa.
S : Simanö daroma li Lowalangi.
U : Ma’andrö saohagölö khö Lowalangi.
2. Fanofu ba Wagambakhai’ö Taroma Li Lowalangi
· Sondrönia’ö: Ifarou dödö ndra niha sifao ba walukhata ba wangabakhai’ö Zura Hosea 11:1-11 sifao fenema li moroi ba zi hauga ngawua wanofu andre mitou.
· Fangabakhai’ö Daroma Li Lowalangi andre göi tola mufalua sifao lala tanö bö’ö, dumadumania; tabagisi khö nawöda, hadia manö zi no tarongo moroi khö Lowalangi wehedenia si so bakha ba dödöda ma tafatunö sanandrösa ba ngawalö zalua nirasoida ba wa’aurida samösa.
· Sakali tö databaso wombaso moroi ba Mbuku Ni’amoni’ö andre, moroi ba Zura Hosea 11:1-11, ena’ö itugu fatöfa ba tatanö ba dödöda irege tola ta’omasi’ö Daroma Li Lowalangi andrö.
· Fanofu ba wangabakhai’ö Taroma Li Lowalangi :
1. Hadia wehede Lowalangi ba Ndraono Gizara’eli?
(Fanema li faigi ba ayati 1 ba ayati 3 ba ayati 9)
2. Hadia manö zi lö sökhi nifalua Ndraono Gizara’eli khö Lowalangi? (Fanema li faigi ba ayati 2)
3. Hadia nifalua Lowalangi ba Ndraono Gizara’eli?
(Fanema li faigi ba ayati 3 ba ayati 4 ba ayati 8 ba ayati 9)
4. Hana wa lö Ifalua wönuNia Lowalangi ba Ndraono Gizara’eli? (Fanema li faigi ba ayati 9)
5. Hadia nifalua Lowalangi ena’ö Iraono Gizara’eli lafuli ira khö Yehowa? (Fanema li faigi ba ayati 10 ba ayati 11)
3. Erönua Moroi ba Daroma Li Lowalangi
· Me no tafondrondrongo ba tafatunö ngawalö zalua nirasoida ba wa’aurida samösa, ba simanö göi ngawalö wanema li moroi ba wanofu andrö moroi yawa; ba Sondrönia’ö: Ihalö gamarahuta ma’afefu sifao fama’ema zi hauga faosatö andre.
1. Lowalangi, Itötöi Ndraono Gizara’eli tobali OnoNia samösa. Ifaeri sifao fa’afönu wa’omasi, Ifahaö ira ba wofanö, Ifazawa ira ba ginötö alau tou, Ifadöhö na mofökhö ira. Ba Lowalangi andrö nasa, Ifaöndrö Ia ba ginötö Ibe’e göra faböi olofo. Fefu da’ö, Ifalua Lowalangi, bakha ba lala wofanöra i’otarai danö Mesirayi numalö ba danö Amabu’ula. Lowalangi tobali Ia samösa Ama sabölö mangomasi’ö onoNia.
2. Nifalua Lowalangi ba wondrorogöNia Ndraono Gizara’eli andre, lö khöra fo’ame’egö tödö ba ngawalö zi sökhi nifalua khöra. Gizara’eli andrö Iraono sitebai nifarisayoi ba asese laröi Lowalangi. Ya’ira andre, la’erogö Lowalangi ba möi ira lafosumange wamaedo nadu andrö nibali’öra tobali lowalangira. Famaedo nadu ya’ia da’ö Mba’ali=Baal, eluahania “tua=tuan” ma “fo’omo ira matua=suami”. Mangalui Mba’ali eluahania la’alui tuara si bohou. Ba hiza, tuara si bohou andrö, lö tola itatugöi wozu ba lualua lala wa’auri Ndraono Gizara’eli, irege tefakao ira mangawuli ba aekhu ira bakha ba wa’atosasa ba fangaröngarö ba danö Mesirayi ma nilakha’ö moroi ba nemalira tanö bö’ö, ba te’ohe ira ba mbanua Asiria. Börö me no laröi Lowalangi sondrorogö ya’ira ba samalua khöra wa’omasi si lö ola andrö, lualuania Iraono Gizara’eli aekhu ira bakha ba wa’atekiko.
3. Hewa’ae no simanö, ba hiza lö Ifakiko Ndraono Gizara’eli Lowalangi. Andrö Ifaduhu’ö wa no Lowalangi Ia ba tenga niha Ia. Fa’alöfaröiNia khöra tenga börö ba nifaluara si tobali sulö. I’omasi’ö Gizara’eli andrö simane fa’omasiNia ba khö nonoNia. Fa’alöfaröiNia, fa’ahakhö dödöNia ba fa’ahelehele dödöNia, da’ö zabölö moguna moroi ba wönu Lowalangi. Börö da’ö, andrö wa lö Ifalua wönuNia Lowalangi, hewa’ae Iraono Gizara’eli tefuyu ira.
4. Ba wolohe mangawuli ndraono sitefuyu khö Lowalangi, ena’ö tobali ono ni’omasi’öNia, oya lala nitörö Ibe’e Lowalangi; ena’ö so wangesa tödö ba famalalini era’era, si no amaedola zingo si ndröndröndröndrö irege so wa’ata’u ba fanizinizi ena’ö tola lafuli ira khö Lowalangi. Fe’ao zingo sindröndröndröndrö tobali tandra ba wolohe fa’atekiko ba fa’amate, ba hiza fe’ao Lowalangi tobali lala ba wanöndra fa’auri si bohou. Dozi samondrondrongo Li Lowalangi ba solo’ö TaromaliNia, Irorogö ba Ifasao ba nahia nomora so’ahonoa si no Ihönagö Lowalangi.
4. Mangotomosi Ni’era’era dödö ba Sedöna Tafalua
Me no aefa ta’erönuisi nösi daroma li Lowalangi andre, Sondrönia’ö: Ifarou dödö ndra niha sifao ba walukhata, ena’ö tola lafa’ema ni’era’era dödöra andrö ba sedöna mufalua, sifao fanoloni moroi ba ngawalö wanofu si no tefa’anö andre mitou. Ba wangotomosi ngawalö ni’era’era dödö sedöna mufalua andrö, ena’ö sindruhundruhu moroi ba dödö ero zamösana, abölö sökhi na ta’oguna’ö wehede fogatini simane “ya’o” ma “ya’ita” ba ma “ya’aga”.
Fanofu ba wangotomosi ni’era’era dödö sedöna mufalua:
1. Hadia no urasoi wa lö fa’ahakhö dödö Lowalangi khögu ba ginötö wökhö korona andre? Mazui no urasoi wa’ahakhö dödöNia andrö, me ba ginötö so ndra’o bakha ba wanandraigö sabölöbölö?
2. Hadia zitobali fanga’aro’ö tödögu irege löfaröi ndra’o ba wamati khö Lowalangi, hewa’ae utörö ngawalö wamakao sabua?
3. Hewisa worasoigu wa’omasi Lowalangi ba fondrorogöNia ya’o ba ginötö wökhö korona?
4. Fanegu hadia ia zi no urasoi, irege tefasao ndra’o bakha ba wamalua famalalini era’era?
5. Bakha ba wamalalini era’era, hadia zi lö tola lö’ö uröi furi ena’ö itugu ahatö ndra’o khö Lowalangi?
· Fangowuloi Kolekte BKSN : Sinunö Laudate No. 90.
5. Fangandrö Niha Samati ma Fangandrö Situmbu Moroi Ba Dödö
Me no awai tabagisi ba wamatunö ngawalö zalua nirasoida ba wa’aurida ero zamösana sifao fangotomosi ngawalö ni’era’era dödö sedöna tafalua andrö, Sondrönia’ö: Ifarou dödö ndra niha sifao ba walukhata ba wamaehagö fangandrö niha samati ma fangandrö situmbu moroi ba dödö sifaudu molo’ö gangandröwa dödö ero zamösana, simanö göi ba wo’angandröi ena’ö fökhö dungö Korona si no manöröi gulidanö andre, tola alio tetayaigö. Fangandrö niha samati te’asiwai sifao Fangandrö Zo’aya.
S : Datafa’ema fefu ngaröngarö dödöda tanö fӧna Lowalangi, tola gӧi salua baeha ba tola simane fangandrӧ si no mufa’anӧ andre mitou:
1. Soguna ba niha sata’u ba wökhö korona
He Ama Lowalangi solomasi ba sahakhö tödö khöma, fofa’abölö ndra’aga fefu ena’ö böi so khöma wa’atau ba fangiwa dödö, he wa’ae itörö ndra’aga ngawalö wanandraigö sabölöbölö.
Ma’andrö khöU ... Tehe wangandröma, he So’aya.
2. Soguna ba Stasi, Lingkungan ba KBG khöma andre
He Lowalangi umbu wa’ahakhö dödö, ya lö mamalömalö faofao Ndra’ugö khöma, ena’ö itugu sitedou ndra’aga bakha ba wamati, ba ya Ö’amualagö khöma wahasara dödö bakha ba gangowuloama andre, irege tola te’efa’ö ndra’aga moroi ba ngawalö wa’abu dödö bakha ba wa’aurima ero zamösana.
Ma’andrö khöU ... Tehe wangandröma, he So’aya.
3. Soguna khöda ya’ita sowulo ba nahia andre
Ya lö mamalö Ibe’e khöda wa’abölö Lowalangi si samösa tölu, irege tola sinangea ita ba wangofönai’ö wangalui Lowalangi, irege tola ta’ehaogö mangawuli lala wa’aurida saekhu ba zomasi Lowalangi.
Ma’andrö khöU ... Tehe wangandröma, he So’aya.
4. Soguna ba ngawalö gangandröwa dödö ba ngambatöda zamösana
He Ama, abölö’ö ndra’aga ba wamalua ohitö dödöma si no ma’angeraigö bakha ba wa’owuloma andre, ya’ia ...
Ma’andrö khöU ... Tehe wangandröma, he So’aya.
· Data’osambua’ö wangandrӧda andre sifao fangandrӧ nifaha’ö Yesu ya’ita, wanguma’ö: He Ama khӧma …
E. FANGASIWAI
Sondrönia’ö: Ifarou dödö ndra niha sifao ba walukhata ba wangandrö fanolo Lowalangi ena’ö tola lafalua zomasi Lowalangi irege tola te’abölö’ö ita ba wamalua ngawalö ni’era’era dödöda ba mofozu gohitö dödö andrö sifao fa’edöna ba wamalua.
1. Fangandrö Fangasiwai
S : Damangandrӧ ita :
He Lowalangi Ama si so ba zorugo, ya Ö’oro’ö dangaU khöma ba ya Ötoloni ndra’aga, ena’ö tola matema’ö fefu ngawalö dahataha solohe fa’abudödö, fa’abasaki ba fefu ngawalö zalua samawukaisi fa’aurima bakha ba lala halöwöma, irege lö alio alua khöma wa’afatö dödö, ba hiza itugu aro dödöma si hulö gowe saro si lö moheu na ilau angi. Ya itugu marasoi wa’ahakhö dödöU khöma ba ngawalö wanandraigö salua ba wa’aurima, irege lö ata’u ndra’aga bakha ba wonohugö lala wa’aurima andre. Börö Keriso, So’aya ba sama’ema khöma.
U : Amen.
2. Fangandrö Howuhowu Lowalangi
S : Data’andrö howuhowu Zo’aya. Ya nisuno döi Zo’aya.
U : Iada’a ba irugi zi lö aetu.
S : Ba ya Ifahowu’ö ita fefu, Lowalangi si lö ambö fa’abölö.
Ama † ba Ono ba Eheha Ni’amoni’ö.
U : Amen.
Sinunö Fangasiwai: Laudate No. 107.
0 comments:
Posting Komentar