TAROMA LI LOWALANGI LUO MIGU SI – 23 DÖFI C

Liturgi Döfi A/B/C hlm. 623.

FOMBASO  I

Taroma Li Lowalangi nihalö moroi ba zura Wa'atuatua.-

Haniha zi tola mamorege fangi'ila nifakhoiMö, he So'aya ? Ba ma haniha zi tola mogamö fo'angeragö hewisa gohitö dödöu ? Si lö mo'ahonoa sa wangerangerama ba si lö manaro'o wamahelama. Noa sa itambuasi noso boto si ha gasagasa, ba botoma niwöwöi moroi ba danö, tobali noro sabua ba wangerangerama. Afökhö khöda ba wanekhegö, hadia zi so ba gulidanö andre, ba hadia zagahatö ba ngaima, no abua sibai wanöndra. Ba haniha sa zi tola mangila hadia zi no so fönada; mendrua manö haniha zi tola aboto ba dödö zi so ba zorugo ? Haniha zi tola mogamö fo'angeragö lala gera'eraU,  he Lowalangi, na lö Öbe'e wa'atuatua, ba na lö Öfatenge GehehaU Ni'amoni'ö moroi yaŵa ? Noa sa simanö lalaU ba wolohe fa'auri zowanua ba gulidanö, ba simanö lala niha ba wolohi fangi'ila hadia zomasi Ndra'ugö. No Öfa'anö wangorifima si fao fama'ema wa'atuatua.- Fa’at 9:13-19

Simanö daroma li Lowalangi.-

 

Sinunö Fanema Li : Psallite No 90                                    (ma Laudate No 90)

 

FOMBASO  II

Taroma Li Lowalangi nihalö moroi ba zura Waulo khö Wilemo.-

Talifusögu ni'amoni'ö.

Ya'o Faulo, si no atua ba nikuru iada'e zui, börö Keriso Yesu, u'andrö khöu, Filemo ni'omasi'ö, ba khö nonogu, Onesimo (sawuyumö). Ba gurunga andre no ufasao ia ba wamati, irege tobali ia onogu. Iada'e ufatenge ia khöu mangawuli, ma tola taŵa'ö, ufatenge khöu dödögu. Utaha ia mena'ö khögu, ena'ö itolo ndra'o salahiu, sagötö so ndra'o ba gurunga andre, börö duria somuso dödö andrö. Ba lö sa edönado ulau hadia ia, na lö ua ötehe, fa böi hulö zabua khöu wolau si sökhi andrö, ena'ö i aoha gölöu. Ma da'ö mbörö, wa tefabali ia khöu ba zi lö ara sibai, ena'ö ösöndra ia mangawuli sagötö fa'ara,- tenga sa'ae sawuyu ia, ba hiza talifusö ni'omasi'ö. No talifusö sa ia khögu, mendrua tö sa'ae ia khöu, he ba wa'aniha, he göi ba wa'alowalangi. Na si fatalifusö ita ba wamati, tema ia hulö na ya'o samösa.- Filemo 9b-10.12-17

Simanö daroma li Lowalangi.-

 

Sinunö Föna Injil : Psallite No 260                                     (ma Laudate No 9)

INJIL

Turia Somuso Dödö khö Yesu Keriso nisura Luka.-

Me luo da'ö, ato niha si fao khö Yesu ba lala, ba Ibali'ö Ia khöra, Imane : "Na so niha si möi khöGu, ba na lö iröi namania awö ninania, fo'omonia awö ndraononia, talifusönia ira matua ba talifusönia ira alawe, ba he göi na'i fa'aurinia, tebai tobali nifahaöGu ia. Niha si lö omasi molu'i röfania ba wolo'ö Ya'o, tebai tobali nifahaöGu. Haniha sa ba gotaluami zedöna mangotomosi malige, si lö dumadao ua wangerai ha'uga zoguna, ena'ö i'ila, hadia tobönö gefenia wangasiwai malige andrö ma lö'ö ? Na no ibe'e wondrasi, awena oroma tebai i'asiwai malige andrö, la'o'aya ia dozi samaigi, lamane : No ibörögö wotomo niha da'ö, ba tebai i'asiwai. Ma haniha razo sedöna manuwö razo bö'ö, si lö oföna dumadao manguhuhuo'ö, na tola i'ondrasi nudunia, si so khönia dua wulu ribu saradadu na ha fulu ribu saradadu khönia ? Ba na tebai, ifatenge tengetengenia, fatua aröu nasa nudunia ba wangandrö, ena'ö te'atulö'ö ira." Ba Imane Yesu : "Simanö göi ami : Samösa tebai möi nifahaöGu, na lö khönia fa'edöna dödö wondröi fefu hadia ia si so khönia."- Luk 14:25-33

Simanö duria somuso dödö khö Zo'aya ya'ita, Yesu Keriso.-

 

Mahasiswa PLP di Paroki KGB tahun 2021 [Dok. Pribadi]

Erönua:

FA’ATUATUA SI’OROI LOWALANGI

Bakha ba wombaso siföföna nihalö moroi ba zura Wa’atuatua andrö tarongo wa so niha sonekhe, so niha salaŵa sekola, ba hiza lö atuatua. Khöda göi ma ne ma’ökhö, so manö niha sonekhe ba ginötö möi sekola, ba aefa da’ö, fa’abu dödöda zalua nifaluania. Hadia mbörö wa alua zi manö, börö me lö khönia fa’atuatua. Fa’atuatua andrö ba no buala Lowalangi, si tola mu’andrö. Fa’atuatua andrö zamaha’ö niha ba wangoguna’ö fefu wa’onekhenia faudu molo’ö amatöröwa Lowalangi.

Bakha ba wombaso sidua andrö nihalö moroi ba zura Waulo andrö khö Filemo, te’oroma’ö khöda hewisa wangandrö Waulo ena’ö itema’ö Onesimo andrö Filemo. Börö wamati si hasambua andrö, tola itema’ö Filemo mangawuli Onesimo andrö, tenga saae tobali sawuyu ba hiza tobali talifusö. Ba da’e oroma khöda wa bakha ba wamati andrö tasöndra göi wa’atuatua. Faduhu dödöda wa fa’atuatua si so bakha ba wamati andrö ba no si’oroi Geheha Ni’amoni’ö.

Bakha ba duria somuso dödö andrö tarongo wamaha’ö Yesu ba niha sedöna molo’ö Ya’ia. Ba niha sedöna molo’ö ya’ia andrö si lö tola lö’ö iröi namania awö ninania, fo'omonia awö ndraononia, talifusönia ira matua ba talifusönia ira alawe, ba he göi na'i fa'aurinia. Fondroinia da’ö fefu ena’ö hulö zimane samazökhi malige ia, soföna dumadao u aba wangerai ha’uga zoguna; bas i hulö razo sedöna fasuwö, sidadao ua ba wangerai hawa’abölö ba fa’oya zaradadunia. Ba da’e ta’ila wa niha somasi molo’ö Yesu andrö si lö tola lö’ö so khönia wa’atuatua. Fa’atuatua andrö simöi manga’aro’ö tödönia ba wamalua ba ba wolo’ö somasi Lowalangi.

Ba wa’auri sero ma’ökhö göi ta’ila hewisa niha si so sekola andrö, irege tobali ira sondrönia’ö niha sato. Ba hiza oya manö göi tarongo wa me no tobali ira sondrönia’ö andrö, oya göi zimöi bakha ba gurunga. Na ta’angeraigö hadia mbörö wa’alua zi manö? Tenga börö wa lö onekhe ba hiza ambö fa’atuatua si so bakha ba dödönia. Ba wa’ambö fa’atuatuania andrö, niha nidönia’önia andrö ibali’ö sawuyunia ba tenga talifusönia. Na ibali’ö talifusönia fefu niha nidönia’önia andrö, sindruhu no tobali ia solo’ö Yesu andrö so’angeraigö fa’abölönia wangomasi’önia talifusönia. Ba gafuriata, hewisa göi ita wangoguna’ö fa’atuatua si so khöda zamösana? Fefu da’ö tola ta’oguna’ö ia he ba wehede mendrua manö ba gamuatada.

Ba luo migu si 23 andre göi, Gereja Katolik ba zi sagörö soi Indonesia manörö tödö luo migu Mbuku Ni'amoni'ö. Luo migu andre ba no faudu sibai ba wombaso nirongoda andre. Fangalui fa'atuatua andrö ba siföföna sibai abölö sökhi mu'alui ia bakha ba Mbuku Ni'amoni'ö. Buku Ni'amoni'ö andrö ba no tobali ia buku same'e fa'atuatua wamati ba niha sangomasi'ö ba sangoguna'ö ya'ia sifao fa'atuatua. Amen.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011