Falukhata Si-1
Ena’ö sifao ba walukhata tola :
1. Aboto ba dödöra mangawuli wa lösifaröi ita bakha ba wamati ba ta’alui Lowalangi sifao fangomasi’ö nawöda niha.
2. La’aurifagö wa’aterou dödö ba wo’agamasa satulö ba khö Lowalangi sitobali gumbu wanötöna ba wa’auri sibohou.
B. BÖRÖTA WANGERANGERA
(Sondrönia’ö ibörötaigö walukhata ba ibaso böröta wangerangera sadogodogo sifakhai ba ngawalö zalua ba ginötö iada’a ba tefaudu molo’ö tuho Mbawa Mbuku Ni’amoni’ö ba Ndröfi 2022)
Ira talifusö ni’omasi’ö ba khö Keriso, tuho sebua si no mutatugöi ba Mbawa Mbuku Ni’amoni’ö ba Zisagörö Indonesia (BKSN) ba ndröfi 2022 andre, ya’ia da’ö : “LOWALANGI GUMBU WANÖTÖNA BA WA’AURI SI BOHOU”. Tuho andre mufaosatӧ tobali 4 duho si de’ide ya’ia da’ӧ: Falukhta Sisara: Lowalangi Gumbu Wanötöna ba Wolawa Lala Wangofa’auri Fo’agamasa si lö Atulö. Falukhata Sidua: Lowalangi Gumbu Wanötöna ba Wolawa Fa’alö’atulö. Falukhata Sitӧlu: Lowalangi Gumbu Wanötöna Börö Wa’alöfaröiNia. Falukhata Si’öfa: Lowalangi Gumbu Wanötöna Börö Wa’ahakhö DödöNia. Ba ginötö wökhö dungö korona-19 (Covid-19) No oya ngawalö zifabö’ö moroi ba zito’ölö nifaluada bakha ba wa’aurida, ba hiza itugu ara ba itugu mo’alöta wökhö dungö korona andre, irege tola te’efa’ö ita ba tatema’ö ngawalö zalua andre. He wa’ae oya ngawalö zi no fabö’ö zalua bakha ba wa’aurida, ba hiza bakha ba gotolua wökhö dungö korona andre si manöröi gulidanö ma’asagörö, tefarou dödöda ena’ö tola tarasoi sifao fa’aboto ba dödö wa Lowalangi samösa zi tobali gumbu wanötöda bakha ba wogamö fa’auri si bohou.
Bakha ba walukhata siföföna andre, data’abakhai’ö bakha ba dödöda waosatö duho andre, ya’ia da’ö : Lowalangi Gumbu Wanötöna ba Wolawa Lala Wangofa’auri Fo’agamasa si lö Atulö. Tefarou dödöda ba wamaigi mangawuli lala halöwö si no tafalua ba wango’aurifagöda agamada ba zisagötö wökhö dungö korona andre. Bakha ba dalu gotalua ngawalö zi fabö’ö si no alua, he sanandrösa bakha ba lala halöwö nifaluada ba agamada, hadia lö sifaröi ita bakha ba wa’uri ba wamati? Ba hadia sindruhundruhu no ta’alui Lowalangi ba ta’omasi’ö nawöda niha?
C. FAMOBÖRÖ
(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre)
1. Sinunö Famobörö : Laudate No. 81B.
2. Famosumange Mbuku Ni’amoni’ö
Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.
“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ...
3. Tanda Röfa
S : Ba döi Nama † ba Ono ba Eheha Ni’amoni’ö. U : Amen.
S : Ya nisuno döi Zo’aya.
U : Iada’a ba irugi zi lö aetu.
4. Fehede Famasao
(Sondrönia’ö ifa’ema wehede famasao sadogodogo andre fatua lö mubaso Mbuku Ni’amoni’ö ma Daroma Li Lowalangi)
Ira talifusö ni’omasi’ö ba khö Keriso, bakha ba walukhata siföföna andre, tefarou dödöda ba wangabakhai’ö ba ba wo’erönuisi nösi daromali Lowalangi nihalö moroi ba zura Gamosi 5:4-6. Sitobali böröta wangerangera moroi ba daromali andre ya’ia da’ö: Fangandrö fanötöna ena’ö Ndraono Gizara’eli tola la’alui Lowalangi. Ba wangalui Lowalangi no sambua lala satulö ba wanöndra fa’auri si bohou. Sifao ba wangabakhai’ö ba ba wo’erönuisi daromali andre, manötöna ita ena’ö lö mamalömalö ta’alui Lowalangi bakha ba wa’aurida, mendrua manö bakha ba ginötö wökhö dungö Korona ba ginötö ia da’a.
5. Fangandrö Famobörö
(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).
· Datahonogӧ ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrӧ fe’aso Yesu bakha ba wangandrӧ.
S : Damangandrӧ ita :
He Lowalangi si lö ambö fa’abölö, ma’andrӧ saohagӧlӧ khӧU bӧrӧ kuaso awӧ we’ebua dӧdӧU bakha ba wa’aurima ba lömamalömalö Örorogö ndra’aga irugi ba ginötö ia da’e, mendrua ba gönötö wökhö dungö Korona si lö nasa mo’aetufa. Faduhu dödöma wa faofao Ndra’ugö khöma ba wanuturu lala ba wa’urima ena’ö lö faröi ndra’aga bakha ba wamatima ba khöU. Ya mabokai dödöma ba wamodrondrongo daromaliMö si tobali danedane ba wa’aurima. Ba Ya’ugö wanötöna ba tötönaföma siföföna ba wamasao ndra’aga bakha ba ngawalö zagalua sambö enahöi andre. Börö Keriso, So’aya ya’aga ba sama’ema khöma, sauri ba samatörö awöU, bakha ba wa ha sambua khö Geheha Ni’amoni’ö, Ya’ugö Lowalangi götögötö wa’ara.
U : Amen.
D. FANGABAKHAI’Ö TAROMA LI LOWALANGI
1. Fombaso Buku Ni’amoni’ö (Gamosi 5:4-6)
Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.
Ia da’a databaso Mbuku Ni’amoni’ö
· Mibokai Sura Gamosi,...
· Ufuli uwa’ö samuza tö : Sura Gamosi, faza 5
· Samuza tö ufuli u’ombakha’ö : Sura Gamosi, faza 5 ayati 4 irugi ayati 6
· Sakali tӧ : Sura Gamosi, faza 5 ayati 4 irugi ayati 6
· Ube’e ginötö fasamösa moroi ba gotaluada (ira matua ba ira alawe) ba tola göi mufalalilalini ero sambua ayati ba wombaso Sura Gamosi andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.
· Ba ya’ita sifao ba walukhata andre tafondrondrongo Daroma Li Lowalangi andre sifao fangosisi’ö ba fa’ahono dödö ba wombaso Mbuku Ni’amoni’ö ni’oheda ero zamösana.
· Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.
Gamosi 5:4-6
4. Da’ö sa niwa’ö Yehowa ba mbanua Ndraono Gizara’eli andrö: Misofu ndra’odo, ena’ö auri ami! Ba böi mi’alui Mbetieli andrö!
5. Böi mi’ae ba Giligala ba böi misawa Mbereseba! Giligala andrö sa, ba ni’oloi’ö dania ba Betieli ba nifufu.
6. Mi’alui Yehowa, ena’ö auri ami! Fa böi ihawui mado Yosefo, timba galitö, si mangamanga hadia ia, si lö samunu ba Mbetieli.
S : Simanö daroma li Lowalangi.
U : Ma’andrö saohagölö khö Lowalangi.
2. Fanofu ba Wagambakhai’ö Taroma Li Lowalangi
· Sondrönia’ö: Ifarou dödö ndra niha sifao ba walukhata ba wangabakhai’ö Zura Gamosi 5:4-6 sifao fenema li moroi ba zi hauga ngawua wanofu andre mitou.
· Fangabakhai’ö Daromali Lowalangi andre göi tola mufalua sifao lala tanö bö’ö, dumadumania; tabagisi khö nawöda, hadia manö zi no tarongo moroi khö Lowalangi wehedenia si so bakha ba dödöda ma tafatunö sanandrösa ba ngawalö zalua nirasoida ba wa’aurida samösa.
· Sakali tö databaso wombaso moroi ba Mbuku Ni’amoni’ö andre, moroi ba Zura Gamosi 5:4-6 ena’ö itugu fatöfa ba tatanö ba dödöda irege tola ta’omasi’ö Daroma Li Lowalangi andrö.
· Fanofu ba wangabakhai’ö Taroma Li Lowalangi:
1. Hadia ni’andrö Lowalangi ba mbanua Ndraono Gizara’eli, ena’ö tola te’orifi ira? (Fanema li faigi ba ayati 4 ba 6)
2. He zo manö nahia si tebai möi molo’ö si no tesura ba Daromali Lowalangi andre? (Fanema li faigi ba ayati 4 ba 5)
3. Sifao hadia ia zalua ba wamufu Mbetieli andrö (Fanema li faigi ba ayati 6)
3. Erönua Moroi ba Daroma Li Lowalangi
· Me no tafondrondrongo ba tafatunö ngawalö zalua nirasoida ba wa’aurida samösa, ba simanö göi ngawalö wanema li moroi ba wanofu andrö moroi yawa; ba Sondrönia’ö: Ihalö gamarahuta ma’afefu sifao fama’ema zi hauga faosatö andre.
1. Te’andrö ba Ndraono Gizara’eli ena’ö la’alui Lowalangi. Eluaha moroi ba wehede da’e, ya’ia da’ö, wa ha Lowalangi zinangea mu’alui. Lowalangi samösa zogaoni Ndraono Gizara’eli ena’ö la’alui Ia. Da’e tenga börö wa’omasi Lowalangi ena’ö fandröndröu Ia khöra. Bakha ba wehede ba niwa’ö Lowalangi andrö, Ikaoni Ndraono Gizara’eli ena’ö mangawuli ira ba zito’ölö satulö sifaudu molo’ö fawu’usalira siföföna ba mböröta, ya’ia wa lö faröi ira ba ha Lowalangi samösa sifosumange ba nisömbara. Lö moguna la’alui Lowalangi tanö bö’ö, ba hiza, moguna mangawuli ira khö Lowalangi si lö adagedage ba wombaloi ya’ira. Andrö lö tola lö’ö ena’ö laröi Lowalangi tanö bö’ö, ba hiza’i ena’ö möi ira ba wangondrasi Lowalangi.
2. Lowalangi andrö ba no sangokhögö fa’auri. Ba wangalui Lowalangi andrö ba no tobali lala ba wanöndra fa’auri. Lowalangi ba no sanga’asogö, me Ya’ia gumbu wanötöna ba wa’auri. Ba wa’auri andre no sambua lala sindruhu ba wa’ahatöda ba khö Lowalangi. Börö me Lowalangi samösa zi no tobali gumbu ba wa’auri, andrö gofu haniha manö zahatö ba khöNia ba si lö tola lö’ö isöndra wa’auri si lö aetu.
3. Betieli, Giligala ba Mbereseba andrö no tobali nahia ba wolohe Ndraono Gizara'eli bakha ba wa’elungu ba wanömba ba ba wamosumange Lowalangi tanö bö’ö. Betieli ba no tobali nahia ba wanömba nadu ono zawi balaki andrö, si no ifazökhi ba ifasindro Yerobeamo; Ba mbanua danö Giligala andrö tefasugi ba dödöda mangawuli lala nitörö ba we’amöi ba danö simate ba ba ginötö da’ö Iraono Gizara’eli latahigö Lowalangi; Simanö göi ba mbanua Mbereseba andrö si no so ba danö gotalua tanö miraya, zombali’ö Ndraono Gizara’eli ba wolo’ö ngawalö soi tanö bö’ö sifao folo’ö gamakhoita ba wo’olowalangigö Lowalangi tanö bö’ö. Andrö lö Itehegö Ndraono Gizara’eli Lowalangi ba we’amöi ba nahia nahia andrö. Ba hiza, ena’ö Iraono Gizara’eli, la’oigö dödöra sifao fangerangerara ba we’amöi khö Lowalangi samösa, tenga möi ira ba nahia-nahia tanö bö’ö andrö.
4. Amosi sama’ele’ö andrö, ifasugi ba dödö Ndraono Gizara’eli mangawuli, wa ha Lowalangi nifosumange. Börö na lö’ö, ba tohare khöra Lowalangi sihulö simane alitö. Ba alitö andrö dania simangamanga gofu hadia ia, samufu ba lö si tola ba wamunu dania galitö andrö. Betieli zi tobali nahia fangamoni’ö ba khöNia samösa ba sifao ba wamufu’öNia. Da’ö zalua safuria ba wa’auri niha si lö omasi mangalui Lowalangi.
4. Mangotomosi Ni’era’era dödö ba Sedöna Tafalua
Me no aefa ta’erönuisi nösi daroma li Lowalangi andre, Sondrönia’ö: Ifarou dödö ndra niha sifao ba walukhata, ena’ö tola lafa’ema ni’era’era dödöra andrö ba sedöna mufalua, sifao fanoloni moroi ba ngawalö wanofu si no tefa’anö andre mitou. Ba wangotomosi ngawalö ni’era’era dödö sedöna mufalua andrö, ena’ö sindruhundruhu moroi ba dödö ero zamösana, abölö sökhi na ta’oguna’ö wehede fogatini simane “ya’o” ma “ya’ita” ba ma “ya’aga”.
Fanofu ba wangotomosi ni’era’era dödö sedöna mufalua:
1. Hadia manö zabölö moguna u’alui bakha ba wa’aurigu?
2. Hadia no u’ofönaigö wangalui Lowalangi bakha ba wa’aurigu?
3. Ba ginötö wökhö dungö korona andre, hadia sindruhu lö faröi ndra’o ba wangalui Lowalangi? ma börö me tebai tola mufalua lala halöwö bakha ba wo’agamasa börö wökhö korona, irege tola te’aröu’ö ndra’o moroi khö Lowalangi?
4. Hadia manö ngawalö gamuata sito’ölö, irege tobali te’aröu’ö ndra’o moroi khö Lowalangi?
5. Hadia no irai urasoi wanegu moroi khö Lowalangi bakha ba wa’aurigu?
6. Bakha ba lala wa’auri wo’agamasagu, hadia lö tebulö molo’ö fehede ba amuatagu?
· Fangowuloi Kolekte BKSN : Sinunö Laudate No. 109.
5. Fangandrö Niha Samati ma Fangandrö Situmbu Moroi Ba Dödö
Me no awai tabagisi ba wamatunö ngawalö zalua nirasoida ba wa’aurida ero zamösana sifao fangotomosi ngawalö ni’era’era dödö sedöna tafalua andrö, Sondrönia’ö: Ifarou dödö ndra niha sifao ba walukhata ba wamaehagö fangandrö niha samati ma fangandrö situmbu moroi ba dödö sifaudu molo’ö gangandröwa dödö ero zamösana, simanö göi ba wo’angandröi ena’ö fökhö dungö Korona si no manöröi gulidanö andre, tola alio tetayaigö. Fangandrö niha samati te’asiwai sifao Fangandrö Zo’aya.
S : Datafa’ema gangandrӧwada khӧ Zo’aya si lӧ mamalӧ mamondrongo ngarӧngarӧ dӧdӧ zamati khӧNia :
1. Soguna ba niha fefu sorasoi fa’ata’u ba ginötö wökhö korona
He Lowalangi fondrege zi sökhi, ya Ö’abӧlӧ’ӧ fefu niha sorasoi fa’ata’u ba ginӧtӧ wökhö dungö Korona-19 andre, ena’ö si lӧ aetu wanӧtӧnara ba wolawa ngawalö zalua andre. Ya Ö’amualagö khöra wa’aro dödö sifao famati sindruhu me Ya’ugö gumbu wanötöna ba wa’aurima bongi ba ma’ökhö.
Ma’andrö khöU ... Tehe wangandröma, he So’aya.
2. Soguna ba niha samati ba Stasi, Lingkungan ba KBG khöda
He Ama solomasi, ya Ö’amualagö howuhowuMӧ khӧma ya’aga umat Stasi ba KBG khöma ba fefu ndra’aga si no owulo ba nahia andre. Ya sifao ba wo’erӧnusima daromaliMö, itugu lö marasoi wangiwa dӧdӧ wa ha Ya’ugö Lowalangi ba ena’ö sinangea ndra’aga ba wangalui Ya’ugö irege tola malawa ngawalö lala ba wangofa’auri fo’agamasa si lö atulö andrö.
Ma’andrö khöU ... Tehe wangandröma, he So’aya.
3. Soguna ba ngawalö gangandröwa dödö ba ngambatöda zamösana
He Ama ...
Ma’andrö khöU ... Tehe wangandröma, he So’aya.
· Data’osambua’ӧ fefu gangandrӧwada andre ba wangandrӧ si no Ifahaӧ Yesu Keriso samӧsa, He Ama khӧma …
E. FANGASIWAI
Sondrönia’ö: Ifarou dödö ndra niha sifao ba walukhata ba wangandrö fanolo Lowalangi ena’ö tola lafalua zomasi Lowalangi irege tola te’abölö’ö ita ba wamalua ngawalö ni’era’era dödöda ba mofozu gohitö dödö andrö sifao fa’edöna ba wamalua.
1. Fangandrö Fangasiwai
S : Damangandrӧ ita :
He Lowalangi si lö ambö fa’abölö, lö mamalömalö Ökaoni ndra’aga ba we’amöi tanö fönaU, ba wanöndra fa’auri sindruhu ba khöU. No ma’erönuisi daromaliMö ba no Öbotokhi bakha ba dödöma, ena’ö tola masöndra wa’atulö sindruhu bakha ba wefaoma ba khöU. Ya tola ma’aurifagö ba ma’amoni’ö wa’aurima ba zi sökhi, irege tola ma’oroma’ö ba faduhu’ö Ndra’ugö ba nawöma niha. Sifao fama’ema Keriso, So’aya ya’aga.
U : Amen.
2. Fangandrö Howuhowu Lowalangi
S : Data’andrö howuhowu Zo’aya. Ya nisuno döi Zo’aya.
U : Iada’a ba irugi zi lö aetu.
S : Ba ya Ifahowu’ö ita fefu, Lowalangi si lö ambö fa’abölö.
Ama † ba Ono ba Eheha Ni’amoni’ö.
U : Amen.
Sinunö Fangasiwai: Laudate No. 169.
0 comments:
Posting Komentar