TÖLU FAOSATÖ GELUAHA WEHEDE “AMEN”

Nifa’anö Kat. Ingatan Sihura.

Ilustrasi [dok. pribadi]

Ero inötö na mangandrö niha Katolik, fehede “amen” no tobali hulö sambua duri mbewe salio sibai na so niha sondrönia’ö fangandrö. Töratöra na so Wangowasaini Ekaristi ma Luo Zo’aya, auli kali tola mutötöi wehede “amen”. Ba zimanö moguna so wanofu, hadia sindruhunia geluaha wehede amen andrö?

Ngawua wehede amen, na tafo’eluaha ia ba li niha khöda lawa’ö “yaduhu”. He wa’ae simanö, amen tenga ha irugi wamaduhu’ö. Ngawua wehede amen, no sambua amatohula wehede ba li Ibrani EMUNAH eluahania abölö, lö humeu, ba tola nifati. Na lafatöfa ia ba gofanöwa lala wamati, emunah lafo’eluaha ia tobali fa’alöfaröi ba fa’atulö. Ba wamo’eluaha simane, tola tasöndra geluaha wehede amen andre, ya’ia da’ö:

Siföföna; ba wangasiwai fangandrö. Ba wangasiwai fangandrö, fehede amen andrö no sambua fangandrö zato ba wamangöhösi ena’ö alua zimane ni’angandröi andrö ma zui faduhu dödö ba sifao tödö ba wangandrö andrö.

Simendrua; fanema zato ba wangasiwai fangandrö. Fehede amen nitema niha sato ba wangasiwai fangandrö, no sambua tandra wahasambua Gereja ba wamalua fangandrö. Fahasambua andrö ba no sambua tandra wamati si ha sambua nifaduhu’ö Gereja. famati sahasambua andre göi mo’ofanöwa ia tobali sambua fanötöna wa lö mamalö itema’ö ba i’amualagö nösi gangandröwa andrö Lowalangi.

Simedölu; fanema li ba ginötö wanema komuni. Fehede amen ba ginötö manema komuni, no sambua tandra wamaduhu’ö sebua ba sifao famati. Famaedo roti nitema andrö, no tefaduhu’ö wa no tobali boto ba do Zo’aya ia.

Sitölu faosatö geluaha wehede amen andre, tobali famotokhi ba dödö niha samati ena’ö böi so wa’alawö ba wanema li. Baero da’ö, fefao ba wanema li andre, to bolali göi famaduhu’öda wa ya’ita no niha samati. Ba wamati andrö, no tafaogö göi gangandröwa awö wanötönada ena’ö itema So’aya. Amen.

Umbu:

Katekismus Gereja Katolik

Prof. Dr. Tom Jacobs, SJ, Teologi Doa Yogyakarta: Kanisius

P. Yustinus Andi Muda Purniawan, Pr., “Amin” Tak Sebatas Ungkapan Setuju dalam Majalah Hidup, Edidi No. 40, Tahun ke-75, Minggu, 3 Oktober 2021