TAROMA LI LOWALANGI LUO MIGU SITO’ÖLÖ SI – 15 DÖFI C

FOMBASO  I

Taroma Li Lowalangi nihalö moroi ba zura Moze si lima.-

Imane Moze ba Ndraono Gizara'eli : "Mifondrondrongo li Zo'aya, Lowalangimi, wolo'ö oroisaNia, awö nifakhoiNia andrö, nitanö ba zura goroisa andrö. Akha mifuli ami khö Zo'aya, Lowalangimi, moroi si'aikö ba dödömi ba moroi si'aikö ba gera'erami. Oroisa andre, nifa'emagu khömi ma'ökhö, tenga si tebai ami, tenga si tebai mikhamö. Tenga ba mbanua si yaŵa tesöndra daroma li andrö, irege miŵa'ö ena'ö : Haniha ba gotaluada zi möi ba mbanua si yaŵa ba wangai ya'ia, ba i'ohe mitou ba wangombakha khöda, ena'ö tola ta'o'ö ! Ba tenga göi yefo nasi tesöndra daroma li, irege miŵa'ö: Haniha ba gotaluada zi möi yefo nasi, mangai ya'ia khöda, ba wangombakha ya'ia khöda, ena'ö ta'o'ö ?  No sahatö sibai khömi daroma li andrö. Ba mbewemi ba ba dödömi tebe'e ia, irege tola mi'ila mi'o'ö."- 5 Moze 30:10-14

Simanö daroma li Lowalangi.-

 

Sinunö Fanema Li : Psallite No 19B                              (ma Laudate No 152)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Golose.-

Ya'ami ira talifusö !

Yesu Keriso no famaedo Lowalangi. Ba khöNia oroma Lowalangi si lö oroma. Ya'ia zia'a moroi ba ni'a'asogö andrö fefu. Ya'ia sa mbörö, wa I'a'asogö fefu hadia ia Lowalangi, he si so ba zorugo, ba he si so ba gulidanö; soroma ba si lö oroma, awö göi ngawalö geheha (ba zorugo) sabölö ba samatörö. I'a'asogö fefu hadia ia Lowalangi si fao fama'emaNia, ba Ya'ia zaŵatö fefu hadia ia. Ya'ia no föna danö bö'ö fefu, ba ba khöNia aro fefu hadia ia. Yesu Keriso no göi högö mboto andrö, ya'ia Gereja. Ya'ia mböröta ni'a'asogö sibohou,  börö me Ya'ia zi oföna ni'orifi moroi ba wa'amate. Da'ö mbörö, wa Ya'ia göi föna moroi ba danö bö'ö fefu. Lowalangi samösa zomasi, ena'ö fefu hadia ia zi so khöNia so ba fahöna khö NonoNia andrö. Ba khö Keriso andrö göi I'atulö'ö Lowalangi fefu hadia ia khöNia, he si so ba gulidanö, he si so ba zorugo. Lowalangi zamalua da'ö fefu, nifodanedane ba wa'amate NonoNia andrö ba röfa.- Kol 1:15-20

Simanö daroma li Lowalangi.-

 

Sinunö Föna Injil : Psallite No 260                                 (ma Laudate No 103)

 

INJIL

Turia Somuso Dödö khö Yesu Keriso nisura Luka.-

Me luo da'ö, maoso samösa zangila amakhoita ba wamesu li Yesu. Imane : "He Guru, hadia nilaugu, ena'ö usöndra wa'auri si lö aetu ?" Itema linia Yesu : "Hadia nisura ba zura goroisa ? Hewisa wombasou ?" Itema liNia, imane : "Omasi'ö Zo'aya, Lowalangiu, moroi si'aikö ba dödöu, nosou ma'asambua zangomasi'ö Ya'ia, ba hori wa'abölöu, awö gera'erau wangomasi'ö Ya'ia. Ba omasi'ö nawöu niha, simane fangomasi'öu ya'ugö samösa." Imane Yesu khönia : "Atulö wanemau li. Lau zimanö ba ösöndra wa'auri."

Ba ibu'a ena'ö sangila amakhoita andrö, isofu khö Yesu :  "Haniha nawögu niha andrö?" Imane Yesu : "So samösa zi möi misi tou, i'otarai Yerusalema, numalö ba Yerikho. Ba dalu lala falukha ia zorabu. Larabu nukhania, laböbözi ia ba lalau mofanö. Laröi ia arakhagö mate. Tefaudu itörö ba da'ö samösa ere, i'ila ba itörö manö. Simanö göi samösa nono Lewi : Me irugi da'ö, ifaigi niha andrö ba itörö manö. Itörö göi ba da'ö niha Zamaria, sikoli. Me i'ila niha andrö, ahakhö dödönia. I'ondrasi ia, i'olohuni zokhonia, me no ilau wanikha ba agu bakha. Awena ifazaŵa ia ba hulu galidenia ba i'ohe ia ba nomo zi mörö zikoli ba irorogö ia ba da'ö. Mahemolu ö, ihalö dombua ngawua rufia firö, ibe'e khö zokhö omo andrö, imane : "Rorogö ia ! Ba na so na sa zoguna bö'ö, ubu'a dania khöu, na mangawulido ba da'e." Isofu Yesu khö zangila amakhoita : "Moroi ba zi datölu andrö, haniha molo'ö ya'ugö nawö niha nibözi zorabu andrö ?" Imane sangila amakhoita : "Niha si hakhösi tödö ya'ia." Imane khönia Yesu : "Ba ae'e, ba lau zimanö göi !".- Luk 10:25-37

Simanö duria somuso dödö khö Zo'aya ya'ita, Yesu Keriso.-

Bowo Mbunga Tandra Wa'omasi.

Erönua:

FAMATI BA DAROMA LI LOWALANGI SIFAO FOLO’Ö

Ba wombaso siföföna andrö nihalö moroi ba zura Moze si lima, i’oroma’ö khöda hewisa Ndraono Gizara’eli andrö ba wamondrongo li Lowalangi. Iwa’ö da’ö Moze, börö me I’ila hewisa mbuabua ndraono Gizara’eli ba wolo’ö amakhoita Lowalangi. Khöda göi irugi ma’ökhö andre tola ta’erönusi hewisa göi ita ba daroma li Lowalangi andrö. Sökhi sibai, na asese ma ero ma’ökhö tabaso Zura Ni’amoni’ö. Ba hiza taroma li Zo’aya andrö, no göi tetanö bakha ba dödöda, ba hunö dödö, he ŵa’ae asese lö ha’uga oroma ba arakhagö lö terongo. Ya’ita göi asese ambö omasi ba wamondrondrongo ya’ia.

Famaha’ö Waulo andrö ba niha samati ba mbanua Golose, edöna ifangöhösi wetaro Yesu andrö. Fe’aso Yesu Keriso tenga ha i’otarai me tumbu Ia ba Mbetilekhema ma me auri ia ba gulidanö. Ba hiza i’otarai mböröta no so Ia ba ngai Nama. Fefu hadia ia ba te’a’asogö si fao fama’emaNia. Börö da’ö, na tabokai hörö dödöda, gofu heza tola ta’ila hagaNia, fa’asökhiNia, fa’afahönaNia, fa’atuatuaNia ba fa’omasiNia. Heza ta’ila fefu da’e, ya’ia da’ö bakha ba daroma li-Nia andrö. Famaha’ö Waulo andre faudu molo’ö famaduhu’ö Yohane sanura injil wanguma’ö: “Ba mböröta daroma li andrö ba no Lowalangi, ba Lowalangi andrö ba no taroma li”.

Bakha ba wombaso turia somuso dödö andrö tarongo hewisa wamabu’a samösa zangila amakhoita ba waöwaö samösa ndrawa Samaria. Sangila amakhoita andrö sindruhu ahori i’ila gamarahuta goroisa andrö, ba hiza lö khönia famalua simane ndrawa Samaria andrö. Fefu goroisa ba zura Moze tola larahugö nösinia bakha ba goroisa wa’omasi si dombua, ya’ia ba wangomasi’ö So’aya ba awöda niha.

Ba lala wa’auri si’ero ma’ökhö, ato niha sanguma’ö ösi daroma li Lowalangi ba lawa’ö börö wa’asese labaso mbuku daroma li Lowalangi. ba hiza ato manö niha si so fa’aboto ba dödö daroma li Lowalangi andrö, hulö zimane lewi, ba sangila amakhoita andrö, nirongoda bakha ba wombaso injil. So khöra wa’aboto ba dödö ba hiza lö khöra folo’ö. Lowalangi si no taroma li andrö ba no fa’omasi andrö. Da’ö wa asese lawa’ö Lowalangi andrö ba no fa’omasi. Inada Teresa moroi ba Kalkuta zi no itai manguma’ö: “he ha sambua ayati öfati daroma li andrö, ba na öfalua ia, ba sindruhu mowua ia fa’ohahau dödö”. Böi dania hulö gamaedola khöda wanguma’ö: “He naesenaese, naesenaese ndraha lase. Ha ba mbewe utehe, tödögu bakha no fakaole”. Data’ohia’ö wombaso taroma li Lowalangi andrö sifao folo’ö ba lala wa’aurida si’ero ma’ökhö. Amen.

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011