TAROMA LI LUO MIGU SITO’ÖLÖ SI - 14 DÖFI C

FOMBASO  I

Taroma Li Lowalangi nihalö moroi ba zura Yesaya, sama'ele'ö.-

Mi'omusoi'ö dödömi ba Yerusalema andrö, mi'owuawua'ö dödömi börö Ziona, ya'ami fefu, dozi sangomasi'ö ba sangahakhösi tödö ya'ia. Mi'a'iki ba mi'omusoi'ö dödömi, ya'ami si fao ba wa'abu dödö khönia föna. Terara dödömi dania ba wanalaguinia ba te'abusoi'ö ami fa'afahöna lakhöminia, amaedola ndraono si so ba mbagi zusu. Börö me no fawu'u li Zo'aya : Ufahele wa'ohahau dödö ba mbanua Yerusalema simane ungo nidanö, ba Ufangele dania girögirö soi niha khönia si hulö mbombo si lö ogö'ö. nisakhei ami, simane iraono sawuyu, nirusirusi dania ami, nihagi. Hulö na irara dödö nononia ina, simanö göi Ndra'o wondrara tödömi. Na falukha ami da'ö, ba somuso tödö ami, ba misöndra wehulu dödö si bohou, amaedola na ifuli tumbu ndru'u na no aefa mbaŵa wa'okafu.- Yes 66:10-14a

Simanö daroma li Lowalangi.-

 

Sinunö Fanema Li : Psallite No 66                      (ma Laudate No 37B ma 59)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Galatia.-

Ya'ami ira talifusö ! Lö ba dödögu wanuno ya'o, na tenga ba röfa Zo'aya ya'ita, Yesu Keriso. Börö me mate Ia ba röfa, wa lö sa'ae eluahania khögu nösi gulidanö andre. Sanandrösa ba nösi gulidanö andre, hulö zi no mate ndra'o. Muboto ba lö muboto, lö moguna (föna Lowalangi), ba hiza fa'atobali niha si bohou. Fefu niha same'e ba dödöra niŵa'ögu andre, u'andrö khö Lowalangi, ena'ö lasöndra wa'ohahau dödö ba fa'ahakhö dödöNia. Simanö göi Ndraono Gizara'eli sindruhu, soi Lowalangi si bohou. Ba zi so föna, böi ya mubusi sa'ae dödögu samösa niha, gofu haniha ia. Tefaböbö ndra'o ba khö Yesu. Oroma da'ö ba lade wamakao ba nösigu. Ya So'aya ya'ita, Yesu Keriso, zondrorogö ya'ami, ira talifusö, ba kharasiNia. Amen.- Gal 6:14-18

Simanö daroma li Lowalangi.-

 

Sinunö Föna Injil : Psallite No 250                                (ma Laudate No 55A)

 

INJIL

Turia Somuso Dödö khö Yesu Keriso nisura Luka.-

Me luo da'ö, Ifili So'aya fitu ngafulu nifahaöNia ba wamatenge ya'ira, darudarua, ba wowaöwaö fönaNia, ba mbanua sebua ba ba mbanua side'ide fefu, ba zi möi Ia dania. Imane khöra : "Ebolo sa mbasitö andrö, ba lö atoto zo halöŵö. Andrö mi'andrö khö Zokhö nowi andrö, ena'ö Ifatenge niha sangowuloi bua nowiNia.

Miae'e ! Hiza, Ufatenge ami, hulö nono mbiribiri ba hunö nasu gatua. Böi mi'ohe gofekofe ba ma kandrekandre ma zui badagahe. Böi tetaha ami ba wangowai niha ba lala. Na möi ami yomo ba zi sambua omo, ba da'ö zi föföna miŵa'ö : Ya falukha wa'ohahau dödö zi sambua omo andre. Ba na so ba da'ö niha sinangea wanema fa'ohahau dödö, ba ahono khönia wa'ohahau dödö andrö moroi khömi; ba na lö'ö, ba mangawuli ia khömi.

Mi'iagö manö zi sambua omo. Mi'a manö, hadia nibe'era khömi; noa sa sinangea itema zulö sohalöŵö. Böi mifa'ema'ema nomo moroi ba zi sambua omo numalö ba nomo bö'ö. Na möi ami ba zi sambua banua, ba na latema ami, mi'a hadia nibe'era khömi. Mifadöhö wökhö zofökhö ba mbanua andrö ba mimane khöra : Iada'e Ifasindro gamatöröŵaNia Lowalangi ba gotaluami."- Luk 10:1-9

Simanö duria somuso dödö khö Zo'aya ya'ita, Yesu Keriso.-

Vokalgrup dari The Father Group [Foto: Dok. Pribadi]

Erönua:

EBOLO MBASITÖ BA LÖ ATO ZOHALÖWÖ

Bakha ba wombaso siföföna nihalö moroi ba zura Yesaya sama’ele’ö, ifarongogö khöda, hewisa sindruhunia ita ba wahasambuada bakha ba Gereja. Börö wamatida andrö wa notobali ita ndrotondroto Gereja Katolik ba apostolik, ni’amoni’ö ba si ha sambua. No tekaoni ita ba wangomasi’ö Gerejada simane iraono sangomasi’ö inania. Lö mamalö irara dödöda Gereja bakha ba wa’atosasa, i’ehaogö wamatida, i’orifi wanötönada ba ibe’e khöda wa’atulö dödö. Famaedo nibe’e Yesaya andre no sambua tandra wondrorogö nifalua Gereja irege hulö nina ia khöda. Ba zimanö göi ifuli iandrö khöda hadia tola göi simanö ita?

Famaha’ö Waulo andrö ba niha samati ba mbanua Galatia, ifodanedane ba huku Moze. Huku Moze me föna sindruhundruhu moguna, ba oroisa si fulu andrö tobali sanolo ba wangehaogö fa’auri nono mbanua. Ba hiza, ha ba röfa Keriso andrö tesöndra wangorifi,  he ba niha Yahudi, he ba niha si tenga Yahudi ba fefu gana awö soi. Huku andrö lö mamalö göi so ia ba gotalua gowuloa, ba hiza tenga börö huku ma goigoi andrö wa tola alua khöda wahasambua. Ba hiza, börö wamati sihasambua ba khö Keriso sa wa lö mamalö tefatenge ita ba wanuriaigö andrö tobali ita niha sibohou sanuriaigö sifao fa’ahele dödö.

Bakha ba duria somuso dödö tarongo hewisa me Ifatenge So’aya ndra nifahaöNia molo’ö fa’oya soi, darudarua. Sambua lö soi ba samösa lö niha nitehegöNia tekiko ba fefu edöna mu’orifi. Fefu oi tola latema wa’atulö, fa-lö-mofökhö, fa’auri si lö aetu, ya’ia wefao ba wa’auri khö Lowalangi bakha ba lakhömiNia. Famatengenia andrö börö ba wanema li börö wa’ebolo mbasitö ba hiza lö ato zohalöwö.

Fondrorogö Gereja ya’ita niha samati andre, no ibali’ö simane ononia samösa. Ba zimanö, fefu ita niha samati andrö no hasambua ba lö amaehutada föna Lowalangi. Ba wondrorogö ninada Gereja andrö, lö göi mamalö ifatenge ita mangawuli ba wanuriaigö turia somuso dödö andrö ena’ö tesöndra gamatöröwa Lowalangi andrö. Iada’a, hewisa ita göi ba we’amöi enoninia andrö?

Ba we’amöi enoni andrö no ifangelama ita hulö mbiribiri nifatenge ba dalu nasu gatua. Bazimanö, ena'ö sindruhu ta'onahiagö nahiada faudu molo'ö fetaroda. Ya'ita umat tekaoni ba wangamoni'ö ulidanö. Fangamoni'ö ulidanö andre ya'ia ba lala halöwöda zamösana, ba wehede ba ba gamuatada sifao fa'omasi. Amen.

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011