Falukhata si-10: UPACARA WANGOWASAINI SAKRAMEN KRISMA BAKHA BA WANGOWASAINI EKARISTI

 A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra waöwaö wamalua Upacara Wangowasaini Sakramen Krisma bakha ba Wangowasaini Ekaristi.

2.   Aboto ba dödöra hewisa wetaro mbotora (=sikap) bakha ba wefao ba Upacara Fanema Sakramen Krisma.

3.   Lafalua wanemali (=aklamasi) bakha ba Upacara Fangowasaini Fanema Sakramen Krisma.

B.   LALA WAMALUA :

1.   Fangombakha.

2.   Famadumaisi (=simulasi).

C.   FAKAKE NI’OHUNA’Ö :

1.   Buku Laudate.

2.   Buku Wamahaö ba Sakramen Krisma.

3.   Buku Upacara Wangowasaini Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

1.   Famobörö :

a.   Sinunö Famobörö : Laudate No. 77:1-3.                                                      

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu Keriso, solomasi ba si fahuwu khöma. Masuno Ndra’ugö ba ma’andrö saohagölö khöU, börö wa’omasi ba fondrorogöU ya’aga fefu, irege no tola zui owulo ndra’aga ba nahia andre ba wefao ba wamahaö afuriata andre. Ma’andrö khöU: fahowu’ö ndra’aga fefu ba tolo ndra’aga, ena’ö tola aboto ba dödöma hewisa waöwaö wamalua, fetaro mboto ba fanemali sinangea mafa’ema bakha ba Upacara Fangowasaini Sakramen Krisma.  KhöU zumange ba lakhömi sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Yesu Kerso. Famahaö si me wulu andre, tobali famahaö afuriata khöda bakha ba Wama’anö Fanema Sakramen Krisma. Bakha ba wamahaö afuriata andre, tebe’e khöda wa’aboto ba dödö sanandrösa ba  UPACARA WANGOWASAINI SAKRAMEN KRISMA BAKHA BA WANGOWASAINI EKARISTI. Bakha ba wamahaö andre, so tölu zinangea tatöngöni ya’iada’ö: 1) Hewisa waöwaö wamalua Upacara Sakramen Krisma bakha ba Wangowasaini Ekaristi; 2) Hewisa wetaro mbotoda (=sikap) ba wefaoda bakha ba upacara fangowasaini Sakramen Krisma andrö; 3) Hewisa wame’eda fanemali (=aklamasi) bakha ba upacara wanema Sakramen Krisma andrö. Databörögö wamahaö andre sifao fa’ahono dödö.

3.   Fama’ema Famahaö :

a.   Fangombakha :

Samahaö ibe’e wangombakha khö ndra sifao ba wamahaö sanandrösa ba Upacara Fangowasaini Sakramen Krisma bakha ba Wangowasaini Ekaristi.

Keterangan :

Ø  Sondrönia’ö Upacara (Pemimpin Upacara) : Bapa Uskup/Wakil Uskup ma Vikjend.

I.     FAMOBÖRÖ ------------------------------- Musindro

1.   Sinunö Famobörö : Laudate No. ….

2.   Tandra Röfa :

P: Ba döi † Nama ba Ono ba Eheha Ni’amoni’ö (mu’anunöisi).      U: Amen.

3.   Fangowai (=Salam): (Tola mufili: a,b, ma c).

(a) Mu’anunöisi :

P: Ya fao khömi wa’atulö.  U: Ba ya fao ia khöu.

(b) Mu’anunöisi :

P: Ya fao khömi Zo’aya ma :

(c)  Mu’anunöisi :

P: Ya fao khömi wa’ebua dödö Zo’aya ya’ita, Yesus Kristus fa’omasi Lowalangi Ama ba fa’awösa Geheha Ni’amoni’ö.

U: Ba ya fao ia khöu.

4.   Fehede fanema’ö moroi khö Pastor Paroki ma sanalahini Pastor Paroki :

Bapa Uskup nifosumange!   Ma

Pater (N….) nifosumange!

Si’oföna ua ma’andrö saohagölö we’amöi Bapa Uskup/Pater ba da’e ba wame’e Sakramen Krisma khö ndra talifusö moroi ba Paroki/Stasi …. andre.

Bakha ba Sakramen Krisma abölö tefaböbö ita khö Kristus ba ba GerejaNia ba tatema wamotandro Geheha Ni’amoni’ö ba wamaduhu’ö famatida.

Bakha ba Sakramen Ekaristi ni’owasainida dania göi, ba da’ö te’osambua’ö ita tobali ha sambua boto ba khö Kristus.

Ba ena’ö sinangea ita wanema kharasi simanö fa’ebua, datafa’anö ita ba ta’andrö wangefa ba ngawalö zi fasalasala ita ba ba horöda (inötö wa’ahono).

5.   Fangaku horö : ….

P: Data’akui horöda tanöföna Lowalangi ba tanöföna ndra talifusöda.

Lala (a) :

U: U’akui tanöföna Lowalangi si lö ambö fa’abölö ba föna ndra talifusö fefu wa no ebua sibai horögu ba gera’era, ba wehede, ba gamuatagu, he göi ba wangositengagö folau si sökhi. Sindruhu wa fasala ndra’o, fasala ndra’o, fasala sibai ndra’o.Börö da’ö, u’andrö khö Santa Maria, ono alawe si lö mamalömalö, khö ndra mala’ika ba ira niha ni’amoni’ö fefu, ba khömi göi, ya’ami ira talifusö, ena’ö mangandrö ami salahigu khö Zo’aya, Lowalangida.

P:  Ya Ihakhösi tödö ita Lowalangi si lö ambö fa’abölö, ya I’efa’ö fefu horöda ba ya Ifasao ita ba wa’auri si lö aetu.       U: Amen.

Lala (b) : Mufili moroi ba LITANI I-IV

6.   Sinunö Fanuno LAKHÖMI : …

7.   Fangandrö Famobörö : (tola mufili 1, 2, 3).

II.   LITURGI SABDA

1.   Fomaso si 1 : …

2.   Sinunö Fanema’ö : Psallite/Mazmur : …

3.   Fomaso si 2 : …

4.   Sinunö famaondragö Injil : …

5.   Fombaso Injil : …

6.   Homili : …

 

III. UPACARA SAKRAMEN KRISMA

1.   Pastor Paroki/Rekan i’ombakha’ö ndra calon Krisma khö Bapa Uskup/Wakil Uskup sifao fanguma’ö :

Bapa Uskup/Wakil Uskup N… nifosumange!

Ma’andrö saohagölö wamahaö sanandrösa ba Sakramen Krisma andrö ba hegöi si tobali noro dödö khönia.

Ba iada’a, ma’andrö wa’edöna dödö Bapa Uskup/Wakil Uskup N… ba wanema ira talifusöda moroi ba Paroki/Stasi (……) ba wame’e khöra Sakramen Krisma andrö.

2.   Uskup i’otahögö ndra calon awö umat sifao fanguma’ö :

Ya’ami sedöna manema Skaramen Krisma, bakha ba Sakramen Fanasa no mitema wa’auri sibohou, fa’auri fa’alowalangi. Iada’a mitema mbuala Geheha Ni’amoni’ö ba wa motandro si no mitema andrö bakha ba Sakramen Fanasa. Andrö wa sinangea, moroi ba wa’aboto ba dödömi, mitenaẃa gafökha awö gamuatania ba mifaduhu’ö wamatimi, si no lasalahini ami wamaduhu’ö me luo no ira satuami ba ira ama-ina serani ba ma si no mifaduhu’ö me luo faböbö ami ba Gereja Katolik.

3.   Lala a : Famohouni Wawu’usa Li ba

    Wanasa Ni’amoni’ö : ----- Musindro

P:  Hadia, mitenaẃa gafökha, ngawalö gamuata awö halöẃönia? Na simanö, ba mitema li : Matenaẃa!

C: Matenaẃa.

P: Hadia, mamati ami khö Lowalangi, Ama si lö ambö fa’abölö, sanga’asogö banua si yaẃa awö danö? Na mamati ami, ba mitema li : Mamati ndra’aga!

C: Mamati ndra’aga.

P:  Hadia, mamati ami khö Yesu Keriso, OnoNia si ha samösa, So’aya ya’ita, ni’adonogö nono alawe Maria, si no manaögö famakao, mate ba lako’o; si no maoso moroi ba gotalua zi mate ba sidadao ba gambölö Nama? Na mamati ami, ba mitema li : Mamati ndra’aga!

C: Mamati ndra’aga.

P:  Hadia, mamati ami khö Geheha Ni’amoni’ö, So’aya samofa’auri, nihude’ö fame’e khömi ma’ökhö andre bakha ba Sakramen Krisma, simane nibe’e khö ndra rasul me luo Pentakosta? Na mamati ami, ba mitema li : Mamati ndra’aga!

C: Mamati ndra’aga.

 

P:  Hadia, mamati ami ba Gereja Katolik ni’amoni’ö, fa’awösa niha ni’amoni’ö, fangefa horö, femaoso mboto ba fa’auri si lö aetu? Na mamati ami, ba mitema li : Mamati ndra’aga!

C: Mamati ndra’aga.

Lala b : Folaẃa Afökha

P: Hadia, edöna ami milaẃa zi lö sökhi ba khömi samösa ba hegöi ba wobanua? Na edöna ami, ba mitema li : Mafabu’u!

C: Mafabu’u!

P:  Hadia, edöna ami milaẃa ngawalö wanandraigö, simane fo’elemu, famaisa, awö wondrara dödö si lö enahöi? Na edöna ami, ba mitema li : Mafabu’u!

C: Mafabu’u!

P:  Hadia, edöna ami milaẃa ngawalö gamuata awö wa’ato’ölö si lö atulö awö wangosiwawöi okhöta zi samösamösa niha? Na edöna ami, ba mitema li : Mafabu’u!

C: Mafabu’u!

P: Iada’a tafaduhu’ö wamatida si fao si no owulo andre. Endronga lida :

U: Ya’o mamati ……

P: Da’e wamatida, da’e sa wamati Gereja, nifaduhu’öda fao fa’omuso dödö, ba khö Keriso Yesu, So’aya ya’ita.

U: Amen.

 

 

 

 

4.   Fame’e Sakramen Krisma

P:  Iada’a ya’ami ira talifusö (mituhi danö) ba damangandrö ita khö Lowalangi, Ama si lö ambö fa’abölö, ena’ö Ifatenge Geheha Ni’amoni’ö yaẃa ndra talifusö andre, si no te’adonogö mangawuli ba wa’auri si lö tebulö.

Ya I’abölö’ö ira Eheha Ni’amoni’ö ba wa’afahöna mbualaNia ba moroi ba wombayoiniNia Ibali’ö ira si fakhilikhili khö Keriso, Ono Lowalangi (inötö wa’ahono).

Uskup/Wakil Uskup I’otahögö ndra calon Krisma, itufa ira tanga (na lö ato) ma ifazaẃa dangania yaẃara, sifao fanguma’ö (tola mu’anunöisi faoma note prefasi) :

a   He Lowalangi si lö ambö fa’abölö,

Ama Zo’aya ya’aga, Yesu Keriso,

b   no Ô’efa’ö ndra enoniMö andre moroi ba

horö

c    ba Ôfatumbu’ö ira mangawuli ba nidanö

ba ba Geheha Ni’amoni’ö.

a    Ma’andröU :

          Ya edöna dödöU wondruwagö ba dödöra

b    Eheha Ni’amoni’ö

c    Sondrara tödö.

a   Ya Ô’amualagö khöra Geheha wa’atuatua

          ba fa’aboto ba dödö,

a   Eheha wamolala tödö ba fa’abölö

b   Eheha wangila watahögö ba fangalulu

c   ba ya Ôbe’e fahöna khöra Geheha wolo’ö

          somasi’Ô.

a   Simanö gangandröẃama nifa’ema Zo’aya

          ya’aga Yesu Keriso,

b   ba wa ha sambua khö Geheha Ni’amoni’ö

c   Ya’ugö Lowalangi götögötö wa’ara.

U:  Amen.

Ero samösa calon la’ondrasi Uskup/Wakil Uskup, ba samösa zanolo sombaso töitöi zanema Krisma (töi pelindung faoma töi side’ide), ba Wali Krisma itufa tangania gambölö ba haruharu/alisi calon. Uskup/Wakil Uskup itutugö duru sebua kambölö bakha ba wanikha Krisma, aefa da’ö ifotandra ba gangango zanema Krisma (sifao wa itufa tanga högöra, imane :

P:   N…N…,TEMA DANDRA MBUALA LOWALANGI : EHEHA NI’AMONI’ö.

P:   Ya fao khöu wa’atulö Zo’aya.

Krismawan/ti : Ba ya fao Ia khöu ma Amen.

(Ba ginötö wehede fangatulö, ifatahö dangania sanema Krisma, ba Uskup/Wakil Uskup ifatahö lalu’ania ba dangan zanema Krisma).

5.   Fangandrö Niha Samati : …

P : …..

U : …..

P : …..

IV. FANGOWASAINI EKARISTI

Ba wolohe fasömbata, tola lafaogö ndra si no manema Sakramen Krisma. Ba sökhi göi na latema Komuni Ni’amoni’ö dua rupa.

V.   FAMAHOWU’Ô : ……

b.     Famalua Simulasi Praktek Upacara Wangowasaini Fanema Sakramen Krisma :

(Na no awai wangombakha Upacara Wangowasaini Fanema Sakramen Krisma, aefa da’ö mube’e ginötö ba wamaguru ndra calon Krisma, hewisa lala wanema Sakramen Krisma sifao fa’asökhi).

4.   Fangasiwai :

a.   Fangandrö Fangasiwai.

S :  Damangandrö ita.

He Yesu Keriso, ba So’aya ya’aga, ma’andrö saohagölö khöU, börö howuhowu fa’omasi nitemama i’otarai mabörögö wamahaö andre, irugi ma’asiwai ia sifao fa’asökhi. Ma’andrö khöU : be’e khöma wamati sindruhu, fanötöna saro, ba fa’omasi sebua; ena’ö sinangea ndra’aga ba wanema Sakramen Krisma ba ginötö si so fönama andre. Simanö gangandröẃa khöU, he Yesu, Ya’ugö nisuno ba nifolakhömi awö Nama, ba Eheha Ni’amoni’ö, götögötö wa’ara.  Amen.

b. Sinunö Fangasiwai : Laudate No. 78:1-3.