TAROMA LI LOWALANGI LUO MIGU SI – 17 DÖFI C

FOMBASO  I

Taroma Li Lowalangi nihalö moroi ba zura Moze si sara.-

Imane So'aya khö Gaberahamo : "Ngaröngarö dödö (ndra mala'ika) sanandrösa ba mbanua Zodoma ba Gomora no irugi khöGu. Laŵa'ö, ebua sibai horöra. Andrö möiDo mitou ba wamaigi, na duhu dozi zolau da'ö, simane duriara andrö, si no irugi khöGu, ba na faya. Omasido U'ila."

Mofanö niha andrö (si datölu, tome Gaberahamo), numalö ba Zodoma. Muzizio nasa föna Zo'aya Gaberahamo. Ihatö'ö Ia Aberahamo, imane : "Hadia Öfarahugö wamakiko zi lö horö, awö zi so horö ? Ma dania lima wulu niha si lö horö ba mbanua andrö. Hadia Öfakiko niha da'a göi, ba lö'ö sa Öhakhösi tödö mbanua andrö, börö zi lima wulu andrö, si lö horö, si so ba mbanua bakha mena'ö? Ya aröu khöU wolau simanö, wa Öfarahugö ba zi so horö, wamunu ya'ira, fa faoma nifatörö, he ba zi lö horö ba he ba zi so horö. Ya aröu khöU da'ö! Hadia tenga sökhi na satulö Ilau Lowalangi sanguhuku ulidanö ma'asagörö andrö?"

Imane So'aya : "Na Usöndra ena'ö lima wulu niha si lö horö ba Zodoma, ba mbanua andrö, ba Uhakhösi tödö mbanua ma'asambua, börö ira andrö." Itohugö Aberahamo, imane : "Hiza sa, lö ata'udo muhede khöU, he ŵa'ae no tanö ba awu ndra'odo. Ma dania ambö lima wulu niha si lö horö andrö. Hadia Öfakiko mbanua andrö ma'asambua börö zi lima niha andrö ?" Imane So'aya : "Lö Ufakiko ira, na Usöndra zi öfa wulu a lima bakha."

Itohugö na wehede khö Zo'aya Aberahamo, imane : "Ma dania zi öfa wulu bakha si lö horö." Imane So'aya : "Lö Ufalua, ba zi öfa wulu andrö." Imane Aberahamo : "He So'aya, böi ofönu, na muhede nasa ndra'o. Ma dania tölu ngafulu zi so bakha." Imane So'aya : "Lö Ufalua, na Usöndra zi tölu ngafulu." Imane Aberahamo : "Lö sata'u ndra'o na muhede khöU. Ma dania falukha zi dua wulu bakha." Imane So'aya : "Lö Ufakiko mbanua andrö, börö zi dua wulu andrö." Imane Aberahamo : "Böi ofönu, So'aya, na uŵa'ö na, hatö samuza andre. Ma falukha zi dafulu bakha." Imane So'aya : "Lö Ufakiko ira, börö zi dafulu andrö."- 1 Moze 18:20-32

Simanö daroma li Lowalangi.-

 

Sinunö Fanema Li : Psallite No 138                                (ma Laudate No 164)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Golose.-

He ya'ami ira talifusö! Me luo no, me mitema wanasa ni'amoni'ö, no teko'o ami awö Keriso. Ba ba wanasa ni'amoni'ö andrö te'orifi ami göi ba wa'auri si bohou awö Keriso,  nifodanedane ba wamatimi ba wa'abölö Lowalangi, si no mangorifi Keriso mangawuli moroi ba wa'amate. Ya'ami göi si no mate föna me misawö goroisa, ba hiza, I'orifi ami Lowalangi awö Keriso, börö me no I'efa'ö fefu lalöda. No Itayaigö zura wangadu ya'ita andrö, sanguhuku ya'ita molo'ö amakhoita. No iheta gömöda, me no I'osö ba röfa.- Kol 2:12-14

Simanö daroma li Lowalangi.-

 

Sinunö Föna Injil : Psallite No 257                            (ma Laudate No 92A, 3)

INJIL

Turia Somuso Dödö khö Yesu Keriso nisura Luka.-

Me luo da'ö, Ilau mangandrö Yesu ba zi sambua nahia. Me no aefa mangandrö Ia, samösa ba gotalua ndra nifahaöNia, sanguma'ö khöNia : "He So'aya, fahaö ndra'aga ba wangandrö, simane Yohane same'e fanasa samahaö ira nifahaönia wangandrö." Imane khöra Yesu : "Na mangandrö ami, mimane :

He Ama ! Ya la'amoni'ö döiMö fefu niha.

Ya tohare gamatöröŵaU.

Be'e khöma gö soguna ero ma'ökhö. Be'e aefa khöma horöma.

Ya'aga sa göi ma'efa'ö zala ba niha fefu si no fasala khöma.

Ba böi tehegö göna ndra'aga fanandraigö."

Ba Imane Yesu khö ndra nifahaöNia : "Na so ba gotaluami zi möi ba nomo nawönia ba zi talu mbongi, ba imane khö nawönia andrö : He talifusö, be'e nifalaligu roti ma'ifu, ha tölu ngawua. Noa sa möi khögu niha si fahuwu khögu i'otarai kumoli, ba lö hadia ia khögu, önia. Hadia iŵa'ö dania moroi si bakha : Böi busi dödögu, noa sa mukusi mbawandruhö. No sa'ae mörö ba ngaigu ndraonogu. Tebai maosodo, ba wame'e khöu ni'andröu. Uŵa'ö khömi, he lö'ö göi ibe'e khönia, ba lö maoso ia, ba me si fahuwu khönia ia, ba maoso ia sa'atö,  me iforege wangandrö, ba ibe'e khönia, hadia ia zoguna khönia. Börö da'ö : Mi'angandrö, ba tebe'e khömi. Mi'angalui ba misöndra. Mibököbökö mbawandruhö, ba tebokai. Dozi sangandrö, ba itema; sangalui, ba isöndra; khö zamökömökö bawandruhö, tebokai khönia. Ba haniha ba gotaluami zatua, same'e khö nononia gara, na i'andrö roti, ba same'e ulö, na i'andrö gi'a ? Ba ma zui same'e tongo, na i'andrö gadulo manu ?  Gofu hewisa wa'a-lö-sökhimi, ba mi'ila sa'atö mibe'e zi sökhi ba ndraonomi. Ba lö mendrua manö Namami si so ba zorugo zangila wame'e Eheha Ni'amoni'ö ba niha sangandrö khöNia ?"- Luk 11:1-13

Simanö duria somuso dödö khö Zo'aya ya'ita, Yesu Keriso.-

Erönua:

DOZI SANGANDRÖ BA TEBE’E

Fombaso siföföna nihalö moroi ba zura Moze si sara, no tohutohu wombaso siföföna me migu sino tatalu’i. Ba wombaso andrö ta’ila hewisa wa’ahatö Gaberahamo andrö khö Zo’aya, töratöra ba wamabu’a ena’ö tehakhösi tödö mbanua Zodoma fabaya Gomora. Ba wamabu’ara andrö, oroma khöda hewisa dödö Lowalangi andrö. Lowalangi tenga fa’abölö sogömigömi ba tenga samalua somasi Ia si lö famakhölö ba gambölö ma ba gabera. Lowalangi sihulö niha fondrege zolomasi ba somasi fariawö   khöda, sihulö sifahuwu fondrege zi sökhi. Omasi Ia na tabe’e ba dödöda lualua wa’auri niha bö’ö.

Fombaso si dua nihalö moroi ba zura Waulo andrö ba niha samati ba mbanua Golose, sindruhu no sambua famaha’ö samatumbu’ö fanötöna saro ba niha si so famati. Oya wa’afaito salua ba gulidanö. Oya wa’afaito si tobini bakha ba dödö niha gulidanö, ba ba dödöda samösa. Fa’afaito ba no noro sabua ba niha gulidanö. Fe’amöi Yesu ba gulidanö irugi mate ba lako’o Ia, no möi fangöhölida ya’ita niha samati moroi ba wangosawuyu horö nifalada. Yesu Keriso no möi khöda ba wangefa’ö ya’ita moroi ba noro andrö. Ba we’amöiNia andrö, no fozu moroi ba wa’omasi Lowalangi ba nösi gulidanö andrö.

Bakha ba wombaso turia somuso dödö andrö, sindruhu omuso dödöda me Yesu samösa zamaha’ö ira rasul andrö ba wangandrö. Fangandrö nifaha’ö Yesu andrö ya’ia ni’ilada nifotöi fangandrö Zo’aya. Ba wangandrö andrö sindruhu I’oroma’ö khöda hewisa wa’ahatö gotalua niha samati andrö khö Lowalangi. Amakhaitania andrö no hulö gamakhaita nama ba khö nononia. Na simanö tola manofu ita: hana wa si lö tola lö’ö ta’andrö gofu hadia ia khö Lowalangi bakha ba wangandrö, na no I’ila Lowalangi hadia ia zoguna khöda? Tafalua wangandrö andrö, ya’ia da’ö ena’ö teboka dödöda ba kharasi sedöna Ibe’e khöda Lowalangi.

Ba lala wa’auri si’ero ma’ökhö, fangandrö andrö asese sibai tafalua ia. Ba hiza so manö zanguma’ö “hana hulö lö manö ibe’e gangandröwagu Lowalangi andre”. Ba da’e moguna göi khöda wamareso tödöda hewisa gamakhaitada ma fa’ahatöda khö Lowalangi. hewa’ae lö mamalö I’obadödöi ita Lowalangi, ba hiza börö horö ba ‘olalöwa nifaluada, tobali börö wamandröndröuda moroi ba kharasi Nama. Fa’amate Yesu ba döla röfa, no möi ndrela wangehaogö gamakhaitada andrö khö Nama. Ba zimanö lö mamalö itehe gangandröwada Lowalangi na ta’andrö. Sindruhu, lö mamalö I’o’awögö ita Lowalangi ba ngawalö gangandröwada, na sindruhu ahatö ita khönia ba sindruhu mamati ita sifao folo’ö oroisaNia andrö. Amen.

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011

Famaha'ö sitola mufakhai: 4 FAOSATÖ NÖSI WANGANDRÖ KATOLIK