Fangandrö, no sambua faosatö ba lala wa’auri niha samati si tebai mutalu’i manö. Silö’ölö’önia, mufalua wangandrö andre ero ma’ökhö ba ginötö moluo, bongi fatua lö mörö, ba ginötö wemanga, ba ginötö so gangandröwa sinangea mufa’ema khö Lowalangi. Fefu lala wangandrö andre, tola manö mufalua ia ba zi hasamösa ba tola göi sifao sato.
 |
| Faosatö Wangandrö Katolik [Dok. Pribadi] |
Moroi ba wamobörönia, fangandrö andre asese sibai lafo’eluaha ia tobali “fahuhuosa niha (he samösa ma ba gangowuloa zato) khö Lowalangi nifati”. Ba wamo’eluaha da’e, sindruhu te’oroma’ö khöda hewisa sindruhunia wamalua sambua fangandrö andrö. Ba wamalua sambua fangandrö andrö ena’ö hulö zi sambua fahuhuosa. Sisambua fahuhuosa andrö, si sökhinia na toföfö ia, i’otarai wamobörö irugi wangasiwai. Börö da’ö, so 4 (öfa) faosatö nösi wangandrö nifaha’ö Gereja Katolik; ya’ia da’ö:
1. Fangowai.
Na omasi ita fahuhuo, siföföna sibai ua ena’ö aboto ba dödöda ha’ökhö fahuhuo ita. Börö da’ö, ena’ö tabörögö göi wangandrö andrö sifao fangowai Amada Lowalangi somasi ita tafa’ema gangandröwada andrö. Ba zimanö, sökhi na mangandrö andrö mutatugöi ha’ökhö mangandrö, ba ena’ö ha khönia gangandröwa andrö. Oroma da’e ba wamobörö fangandrö andrö wanguma’ö: “He Ama Lowalangima si so ba zorugo …” ma “He Yesus Keriso So’aya ya’aga …” ba tanöbö’önia na. Fangowai andre göi no tobali ia famörögö wangandrö.
2. Fangandrö Saohagölö.
Na no aefa wangowai ba zi sambua fangandrö, ganetenia si sökhi ba ya’ia wangandrö saohagölö. Fangandrö saohagölö andrö sindruhunia zabölö ebua ba gotalua mbosi wangandrö. Hadia mbörö wa tobali ia sebua, börö me si lö mu’andrö niha nasa khö Nama, ba no tola I’amualagö Lowalangi. fangandrö saohagölö andre, tebörögö ia moroi ba wa’auri si so nasa ba mboto irugi ngawalö mbuala si no mutema. Fangandrö saohagölö göi andre no tobali ia tandra “wangobadödöida” Lowalangi ma tola tamane “fanulönida” mbuala si no tatema.
3. Famaehagö Angandröwa.
Hadia gangandröwa sedöna mu’andrö ba wangandrö? Fanema li ba wanofu da’e tola lö awai ba zima’öma’ökhö wangerai hadia manö zitobali angandröwa niha. Ba hiza moguna tafati wa’ahakhö dödö Lowalangi nösi gulidanö. Si lö irai ta’andrö na’I ba I’amualagö khöda. Ba zimanö hadia zi lö tola lö’ö ta’andrö ba wangandröda? Ba da’e sindruhu ena’ö tafosasi ia hadia gangandröwa sitobali ohitö dödöda ba hadia gangandröwa sitefaudu ba zoguna khöda. Oya sibai gohitö dödö, ba hiza sitefaudu ba zoguna, da’ö zinangea ni’olohesi ba wangandrö, faudu molo’ö inötö ba fa’amogunania.
4. Fanuno ma Famolakhömi.
Sitobali fangasiwai ba zi sambua fangandrö andrö ba ya’ia wanuno ma famolakhömi. Fanuno ma famolakhömi andre no sambua famuli sumange ba wangandrö andrö, töratöra ba wanou’ö tanöföna Lowalangi fefu wangandrö andrö ena’ö ba wamatöröNia wa’alua fefu nösi wangandrö andrö. Dumadumania: “Ya’ugö nisunoma lö mamalö, iada’a ba irugi zi lö aetu. Amen” ma “Simanö gangandröwama, sifao fama’ema Keriso So’aya ya’aga. Amen” ba tanö bö’önia na.
Si öfa andre tefalua ia sifao fa’ahono dödö, ba mufalua ia ba musambuani. Tabaya göi ita tödöda na so göi niha sangandrö khöda. Na isambuania khöda wangandrö ba sifao fa’asinangea, tatu manö ahono dödöda wamondrongo, atöla ba dödöda hadia niwa’önia irege aboto ba dödöda, ba ba gafuriatania sifao fa’ahele dödö göi ita ba wanema’ö angandröwania andrö. Ba zimanö tenga mangiwa dödöda ba wa’atuatua Lowalangi wamondrongo fangandröda, ba hiza lö mamalö lö aröu fabö’ö göi wa’ahatöda khö Lowalangi andrö. Ba wangandrö andrö, tola göi ta’erönusi nasa ia sifao fo’eönusida taroma li Lowalangi nihalö moroi ba zura 1Moze 18:20-32 angandröwa Gaberahamo khö Lowalangi ba Luka 11:1-13 fangandrö Zo’aya. Ya lö mamalö sinura andre tobali fanolonida ba wamati ba ba wamalua fangandröda. Amen.
Nifa’anö Kat. Ingatan Sihura, S.Ag.
Umbu:
Felix Supranto SS.CC, Doa Yang Dikabulkan Memahami dan Menghayati Doa “Bapa Kami” Dengan Lebih Dalam Jakarta: Obor, 2013
Konferensi Waligereja Indonesia, Iman Katolik Yogyakarta: Kanisius, 1999
Petrus Danan Widharsana & RD. Victorius Rudy Hartono, Pengajaran Iman Katolik Yogyakarta: Kanisius, 2017
Prof. Dr. Tom Jacob, SJ, Teologi Doa Yogyakarta: Kanisius, 2010
T.J. van Bavel, Hatiku Merindukan Allah Ajaran Agustinus Tentang Doa Yogyakarta: Kanisius, 2011
0 comments:
Posting Komentar