TAROMA LI LOWALANGI LUO MIGU SI – 16 DÖFI C

FOMBASO  I

Taroma Li Lowalangi nihalö moroi ba zura Moze si sara.-

Me luo da'ö, I'oroma'ö Ia khö Gaberahamo So'aya, ba gatua Mamere, me dumadao ia ba mbawandruhö nose, me hino wa'aukhu zino. Me ifaöga hörönia Aberahamo, ba hiza niha, datölu, si so fönania. Me i'ila ira, ba fagohi ia, i'oroi mbawandruhö nose, ifaondragö ira, ba ifaöndrö ia, irugi danö tou, imane : "He So'aya, na no atö falukhado ma'ifu wa'ebua dödöU, wamaigiU, böi atö talu'i genoniMö andre. Dalabe'e idanö ma'ifu, ena'ö misasai gahemi. Midadao ba lumö geu andre, ba da'uhalö khömi zambawa kue, ena'ö mi'abölö'ö ami. Dania, ba tola mitohugö wofanö. Da'ö sa mbörö wa mitörö genonimi andre." Ba lamane : "Lau niŵa'öu andrö !"

Fagohi Gaberahamo, numalö ba nose, khö Zara, imane : "Ta'ita'i, halö hamo, tölu hinaoya, faruka ba fazökhi kue ! " Awena idölö ia ba nahia zaŵi Aberahamo, ifili sambua nono zaŵi sawuyuwuyu ba si sökhi, ibe'e ba danga zangai halöŵö ba imane : "Aliokö wangasiwai !" Ba ihalö matega ba susu Aberahamo ba saŵi andrö, ni'asiwainia, ba ifa'oli göra. Ya'ia samösa zangaingai hadia zoguna khöra, ba da'ö, ba lumö geu, me manga ira. Me aefa manga ira, lasofu khö Gaberahamo : "Hezo wo'omou, Sara ?" Imane Aberahamo : "Hiza ba nose." Imane So'aya : "Ba ndröfia mangawuliDo khöu.

Ba ginötö da'ö no so nono khö wo'omou, Sara."- 1 Moz 18:1-10a

Simanö daroma li Lowalangi.-

 

Sinunö Fanema Li : Psallite No 15  (ma Laudate No 132A)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Golose.-

Ya'ami ira talifusö !

Omuso dödögu, wa tola utaögö wamakao soguna khömi. Me famakao andre si no so ba mbotogu, no ba wombönökhi hadia ia nasa zambö ba wamakao Keriso soguna ba Gereja, si no botoNia. No tobali ngoningoni Gereja ndra'odo, nihonogöi Lowalangi, ena'ö u'ombakha'ö daroma li Lowalangi si fahöna andrö ba khömi, ya'ia duria si no tobini andrö, si lö oroma i'otarai föna, götö wa'ara zi lalö, ba hiza, iada'e tefa'ele'ö ba soi ni'amoni'ö andrö khöNia. Noa sa omasi Lowalangi I'oroma'ö ba soiNia hewisa wa'ebua lakhömi andrö nifa'anöNia soguna ba soi niha ma'afefu. Da'ö zi tobini andrö, ya'ia Keriso, nituriagö ba gotaluami, si tenga niha Yahudi. Ya'ia dötönafö wanöndra lakhömi. Keriso andrö ni'ombakha'öma ero'ero na mafarou dödö dozi niha, ba na mafahaö ira ba ngawalö wa'atuatua, ba wolohe dozi niha ba wa'atulö so'ahonoa ba khö Keriso Yesu.- Kol 1:24-28

Simanö daroma li Lowalangi.-

Sinunö Föna Injil : Psallite No 250                                (ma Laudate No 99A)

 

INJIL

Turia Somuso Dödö khö Yesu Keriso nisura Luka.-

Me luo da'ö, möi Yesu ba zi sambua banua side'ide. So ba da'ö samösa ndra alawe, Marata döi, ikaoni Yesu ba nomonia. Ba so dalifusönia, Maria döi. Dumadao Maria föna Zo'aya mamondrongo famahaöNia. Ba no owölö'ölö Marata ba wangai hadia ia zoguna khö Yesu. Möi Ia khö Yesu, imane : "He So'aya, hadia lö ba dödöU, wa ibe'e manö sangai halöŵö ndra'o Maria, ha ya'oya'o? Ŵa'ö khönia, akha itolodo." Itema linia So'aya, Imane : "He Marata, he Marata, wa'oya manö wangabu dödöu ba oya ngawalö wa lö ahono'ö. Ha sambalö zoguna. No ituyu khönia zi sökhi Maria, ba lö aheta khönia da'ö."- Luk 10:38-42

Simanö duria somuso dödö khö Zo'aya ya'ita, Yesu Keriso.-

Sombaso Taroma Li Lowalangi [Dok. Pribadi]

 Erönua:

FE’AMÖI ENONI

Taroma li Lowalangi nihalö moroi ba zura Moze sisara andrö, idunödunö khöda hewisa wanaisi Gaberahamo niha sidatölu andrö. Isaisi ira, ibe’e göra awö wamaluania fa’omasi andrö bagafuriatania, itema zulö ya’ia duria wa’aso khönia ono matua, nifotöinia dania Iza’aki. bawamalua si sökhi ba niha si lö ta’ila ma niha si fatewu, ba no möi börö wangandrö howuhowu Zo’aya si falawu, börö me si lö tola lö’ö Ihude’ö wa’asökhiNia Lowalangi moroi ba wa’asökhi niha. Böi olifu, wa bakha ba walukhasatada ba niha bö’ö ero ma’ökhö, ba no göi falukha ita khö Lowalangi. Andrö dania wa asese lawa’ö: “falukhata andrö ba no sambua fa’omuso dödö wanuriaigö turia somuso dödö”.

Ösi wombaso sidua ya’ia wamaha’ö Waulo ba niha samati ba mbanua Golose. Ba wamaha’önia andrö ifarou ita ena’ö mangandrö ita salahi niha bö’ö. Ifarou göi ita ba wanaögö fa’atosasa soguna ba niha bö’ö. Fa’atosasa nitaögöda börö me ya’ita ndrotondroto Keriso, tobali umbu howuhowu ba niha bö’ö, ba ba Gereja ma’afefu.

Ba duria somuso dödö andrö nisura Luka, idunödunö khöda mbuabua zidarua zifatalifusö andrö, Maria ba Marata. Oroma sibai wekökökökö Marata andrö börö lala halöwö soya ngawalö. Ba hiza Maria andrö lö tebulö ia wamondrongo Yesu. Ba zimanö, fe’amöi enoni Yesu Keriso ba niha bö’ö, ba no halöŵö sebua böli. Ba hiza abölö ebua  mböli na talulu ita we’amöi enoni Yesu Keriso ba wamondrongo taroma liNia ba wanema sakramenNia. Börö, na lö talulu ita we’amöi enoniNia, ba fe’amöida enoni ba niha bö’ö itugu mate.

Sitölu ngawua wombaso andre edöna idönia’ö ita ba we’amöi enoni sifao fa’ahele dödö. Ba we’amöi enoni andrö sindruhunia no sambua folo’öda li Lowalangi si no tafondrondrongo ba daroma liNia. Ba wamaluada taroma liNia sebua böli andrö lö mamalö tatema zulö, he na tenga ba zoroma ba höröda. Da’e niwa’ö Waulo andrö. Simanö göi, börö wolo’ö Gaberahamo andrö ba we’amöi enoni zidatölu andrö, sindruhu no möi börö wa itema mbuala si’oroi Lowalangi, ya’ia wa so khönia nono matua. Ba gafuriata, datatuyu khöda zisökhi, ya’ia daroma li Lowalangi andrö, simane Maria. Me taroma li Lowalangi andrö nitemada, lö sitola mangai ya’ia khöda. Ya lö mamalö göi sitehulu tödö ita ba wolo’ö taroma liNia andrö. Amen.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011