TAROMA LI LUO MIGU SI - 12 DÖFI C

 FOMBASO  I

Taroma Li Lowalangi

nihalö moroi ba zura Zakharia, sama'ele'ö.-

Imane So'aya : Ba nösi nomo Dawido ba ba mbanua Yerusalema, Ulau Geheha samatumbu'ö fangesa dödö ba Eheha samarou tödöra ba wangandrö fa'ahakhö dödö. Ba wangesa dödöra latöngöni genoniGu nifahöra ba la'e'esi ia, nifange'esi ono matua si ha sambusambua. Mege'ege sibai ira ba khönia, timba wa'abu dödö na mate nono sia'a. Na luo da'ö, ba tesao wange'esi sabölöbölö ba Yerusalema, timba wange'esi no ba Hada-Rimo, ba danö salo'o ba Megido. Na luo da'ö atöla dania gumbu ba mbanua Yerusalema. Faoma idanö gumbu andrö tesasai dania horö awö zi ra'ira'iö nösi nomo Dawido awö mbanua Yerusalema andrö.- Sakh 12:10-11;13:1

Simanö daroma li Lowalangi.-

 

Sinunö Fanema Li : Psallite No 63                                    (ma Laudate No 78)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Galatia.-

Ya'ami ira talifusö !

Börö me mamati ami khö Keriso Yesu ha sambua ami ba khöNia; Ba börö da'ö no tobali ami ono Lowalangi. Fefu ami si no tobali tana khö Keriso, me mitema wanasa ni'amoni'ö, no mi'onukha Keriso andrö, irege lö sa'ae amaehuta niha Yahudi ami ma niha si tenga niha Yahudi, ba sawuyu ma si tenga sawuyu, ba ira matua ma ira alawe. Dozi ami ha sambua khö Keriso Yesu. Ba na khö Keriso ami, ba no ma'uwu Gaberahamo ami. Börö da'ö ya'ami zanema ondröita si no Ifabu'u Lowalangi khönia.- Gal 3:26-29

Simanö daroma li Lowalangi.-

 

Sinunö Föna Injil : Psallite No 261                                     (ma Laudate No 9)

 

INJIL

Turia Somuso Dödö khö Yesu Keriso nisura Luka.-

Me luo da'ö, möi Yesu mangandrö ba naha si lö nininini, ba fao khöNia ndra nifahaöNia. Isofu khöra : "Haniha Ndra'odo andre wanguma'ö niha ?" Latema liNia, lamane : "So zanguma'ö : Yohane same'e fanasa Ndra'ugö. So göi zanguma'ö Elia. So ösa zanguma'ö : No ifuli maoso samösa moroi ba gotalua ndra sama'ele'ö me föna andrö." Imane khöra : "Molo'ö ya'ami, haniha Ndra'odo andre ?" Itema liNia Fetero, imane : "Keriso Ndra'ugö – Razo nobayoini Lowalangi andrö." Itenaŵa ira Yesu, Imane: "Böi mi'ombakha'ö da'ö, gofu ha'ökhö !.- Börö me lö tola lö'ö oya Itaha wamakao Ono Niha andrö, ba la'uduni Ia dania ira salaŵa niha Yahudi, awö ndra ere sebua ba ira sangila amakhoita. Ba labunu dania Ia. Ba na no irugi tölu ngaluo, te'orifi Ia mangawuli." Awena Imane Yesu ba niha sato : "Dozi niha sedöna molo'ö Ya'o, ya mu'ositengagö ia, ya mulu'i röfania ero ma'ökhö ba ya mu'o'ö Ndra'o. Haniha sa zedöna mangorifi fa'aurinia, khönia taya wa'auri dania; ba haniha zanehegö fa'aurinia börö Ndra'o, da'ö zanöndra ya'ia."- Luk 9:18-24

Simanö duria somuso dödö khö Zo'aya ya'ita, Yesu Keriso.-

 

Erönua:

FA’OMASI SIFAO FOLO’Ö

Ba wombaso siföföna tarongo hewisa wama’ele’ö Zakharia andrö so’amakhaita ba Yerusalema. Ba Yerusalema andrö dania lasöndra Geheha samatumbu'ö fangesa dödö ba Eheha samarou tödöra ba wangandrö fa'ahakhö dödö. Ba wangandöra fa’ahakhö dödö ba ba wange’esira andrö latörö tödöra nifahöra andrö, ba nifahö andrö ya’ia Yesu Keriso. Ba zimanö wama’ele’ö Zakharia andrö manandrösa i aba wamatida khö Yesu Keriso. Ba da’ö tebotokhi khöda na ero tatörö tödöda Yesu Keriso andrö, lö mamalö ena’ö so khöda Geheha samatumbu’ö fangesa dödö ba ngawalö zifasala ita ba samarou tödöda ena’ö tafuli tafahatö it aba wa’omasi Zo’aya andrö.

Bakha ba wombaso sidua tarongo wamaha’ö Waulo andrö ba niha samati. Famaha’önia andrö moguna ba wahasambua niha samati. Fefu niha tobali si fatalifusö ba ha sambua ba khö Keriso, börö wanasa ni’amoni’ö. Niha si numana ba niha si kayo, ira alawe ba ira matua, niha khöda ba niha bö’ö lo famaedo, ba hiza no sisambua famati ba fahasara dödö. Bakha ba khö Keriso göi, ya’ita niha si tenga niha Yahudi tobali nga’ötö Gaberahamo ba sanema nifabu’u Lowalangi khönia. Ba zimanö fao ba farahu it aba nga’ötö sangokhögö amatöröwa zorugo.

Bakha ba wombaso turia somuso dödö tarongo wamaduhu’ö ndra nifaha’ö andrö, töratöra Wetero. Ba wanofu Yesu andrö, sifao fa’abarani ifaduhu’ö wa Yesu andrö no “Keriso, Razo Nibayoini Lowalangi”. Famaduhu’ö Wetero andrö sindruhu famaduhu’ö si’oroi dödö. Ilau wamaduhu’ö si’oroi dödö andrö Fetero börö me no fao ia khö Yesu ba si’oroi dödönia wolo’ö Yesu. Andrö dania me no I’ila da’ö Yesu, iwa’ö khö ndra nifaha’öNia: "Dozi niha sedöna molo'ö Ya'o, ya mu'ositengagö ia, ya mulu'i röfania ero ma'ökhö ba ya mu'o'ö Ndra'o.”

Ba lala wa’aurida sirugi ma’ökhö andre, sindruhu wa no samati ba khö Keriso ita, ba no tatema wanasa si ha sambua andrö. Börö da’ö no sifatalifusö it aba khö Keriso. Ba zimanö tewa’ö göi khöda wolo’ö Ya’ia si’oroi dödö, ba ba galisida zamösana tebe’e röfada si no lala wa’aurida. Ba zimanö I’andrö khöda ena’ö lö mamalö ta’o’ö ia. Ba wolo’ö Ya’ia andrö ba ena’ö lö mamalö tasöndra Geheha samatumbu’ö fangesa ba Eheha si lö mamalö mamarou tödöda ba wa’omasiNia. Datafalua wa’omasi andrö I’otarai dalifusö siso ba zingada ba ba gafuriatania, folo’öda ya’ia andrö ta’oroma’ö ba wa lö aiwö it aba wolu’I röfada irugi gamozua. Amen.