LUO MIGU MBOTO BA DO ZO'AYA DOFI C

FOMBASO  I

Taroma Li Lowalangi nihalö moroi ba zura Moze si sara.-

Me luo da'ö, i'ohe baero roti ba agu Melekisede, razo Zalema, si no ere Lowalangi fondrege zalaŵa. I'ondrasi Gaberahamo ba ifahowu'ö ia, imane : "Ya Ifahowu'ö Gaberahamo Lowalangi fondrege zalaŵa, sanga'asogö banua si yaŵa awö danö. Ya nisuno Lowalangi fondrege zalaŵa, si no mame'e ba dangau udumö." Ba ibe'e khönia Aberahamo zambua ni'ofulu fefu hadia ia.- 1 Moz 14:18-20

Simanö daroma li Lowalangi.-

 

Sinunö Fanema Li : Psallite No 110                                   (ma Laudate No 83)

 

FOMBASO  II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ira talifusö !

No utema moroi khö Zo'aya hadia nifa'emagu khömi : Yesu, So'aya andrö, ba zi bongi, me te'a mböliNia, Ihalö roti, I'andrö saohagölö ba Iboboto roti andrö, Imane : "Mitema ba mi'a ! BotoGu da'e, nibe'e soguna khömi. Ya milau zimane ba wanörö tödö Ya'o."

Ba simanö göi ba piala andrö, me no aefa manga, Imane : "No amabu'ula li si bohou piala andre ba ndroGu. Ya milau zimane, ero'ero na mibadu, ba wanörö tödö Ya'o".- Andrö, ya'ami ira talifusö, ero'ero na mi'a roti andre ba na mibadu nösi piala andrö, mituriaigö wa'amate Zo'aya,  irugi mangawuli Ia dania.-  1 Kor 11:23-26

Simanö daroma li Lowalangi.-

 

Sinunö Föna Injil : Psallite No 206                          (ma Laudate No 9 ma 95)

 

INJIL

Turia Somuso Dödö khö Yesu Keriso nisura Luka.-

Me luo da'ö, fahuhuo Yesu ba niha sato, I'ombakha'ö gamatöröŵa Lowalangi andrö, ba haniha zofökhö, ba Ifadöhö wökhö. Ba lö'ö sa'ae alaŵa luo. Ba möi khöNia ndra nifahaöNia si felendrua, lamane khöNia : "Fofanö niha sato andrö, ena'ö tola möi ira mörö ba mbanua si fasui ba ba halama, ba ena'ö lasöndra gö, me ha ba danö si mate so ita ba da'e." Imane khöra : "Mibe'e göra, ya'ami !" Lamane : "Lö khöma, - ha lima ngawua roti ba ha dua rozi gi'a; hatö na möiga mowöli balazo niha sato andrö fefu."

So sa lima ngahönö ndra matua. Imane Yesu khö ndra nifahaöNia : "Mifedadao ira, - mifa'oli, limalima wulu." La'o'ö niŵa'öNia, - lafedadao niha sato. Ihalö roti, si lima ngawua Yesu, - ba i'a andrö, si dua rozi, Ifaöga höröNia miyaŵa ba zorugo, Ifahowu'ö gö andrö ba Iboboto ba Ibe'e khö ndra nifahaöNia ba wame'e ba niha sato. Ba manga ira ba abuso fefu. Ba la'ozaragö gakhökhöla si tosai, felendrua kude.- Luk 9:11b-17

Simanö duria somuso dödö khö Zo'aya ya'ita, Yesu Keriso.-

Erönua:

BOTO BA DO SI NO TANDRA WA’OMASI

Bakha ba wombaso siföföna andrö nihalö moroi ba zura Moze sisara, tarongo hadia zalua khö Melekisede. Melekisede si no ere ba razo, ifasömba’ö roti ba agu khö Lowalangi ba ifahowu’ö Gaberahamo, ama niha samati. Ya’ia sa wamaedo Yesu Keriso samasömba’ö boto ba ndroNia samösa. Bakha ba khöNia fefu niha samati tefahowu’ö.

Bakha ba wombaso sidua nihalö moroi ba Zura Waulo ba mbanua Gorindro tarongo hewisa zalua khö Yesu andrö. Fatua Lö mu’a mböliNia, ihalö roti sino famaedo mbotonia nibagi soguna ba zato. Ihalö pala andrö si no tandra ndroNia sitefaduwa höli zato. Ba wamalua simanö no Ibe’e sambua sakramen sama’aso fa’amateNia soguna ba wangorifi ya’ita ba soguna ba wamolakhömi Lowalangi Ama. Sakramen andrö zi no nitörö tödöda irugi ma’ökhö, ba tarasoi ba ginötö so gere.

Ba wombaso turia somuso dödö andrö tarongo hewisa me ibe’e gö niha si lima ngahönö andrö Yesu. Roti si ha lima ngawua ba dua rozi gi’a andrö, tola tobali ö niha si lima ngahönö börö me no ifahowu’ö Yesu. Fame’e Yesu gö ndra niha si lima ngahönö andrö, no sambua tandra wa’omasiNia. Tandra wa’omasi andrö no fa’omasi safönu ba si lö ola.

Ba lala wa’auri wamati ba danö niha andre asese göi lawa’ö wa, “somasi mangalui halöwö zatua niha keriso andrö ba ya’ia niha sangila mame’e gö dome”. Lala wehede simane da’e, no sambua tandra wa’omasi si’oroi nono niha ba niha simöi tome. Baero da’ö tandra wa’omasi ba wame’e gö andrö, ya’ia wa lö mamalö tabali’ö sisambua ngambatö ita ba khö Keriso.

Fanörö tödö luo migu boto ba do Zo’aya andre, sindruhu edöna I’oroma’ö göi khöda sambua dandra wa’omasi silö ola fa’ebua. Fame’eNia famaedo mboto ba ndroNia andrö no sambua tandra si lö ola. Boto ba do andrö no sambua lala wangorifi. Fanehegönia boto ba doNia andrö tebagisi, no sambua tandra waomasinia sebua. Itehe tefakao mbotoNia ba teduwagö ndroNia andrö ena’ö auri ita.

Ba gafuriata edöna göi ta’erönusi zamösana, hewisa göi ita ba wombagisi fa’omasida? Sambua lala wombagisi andrö aluia na lö mamalö tola tabagisi ginötöda ba wondrara tödö ndra talifusö si so bakha ba wa’abu dödö, ba tanöbö’önia na. Famalua fa’omasi andrö böi ha ba mbewe, ba hiza lö mamalö ena’ö si’olohia’ö boto. Ba zimanö no tola ta’o’ö niwa’ö Yesu me imane: “Mibe’e göra!”

Ya faoma itolo ita Lowalangi. Amen.