LUO MIGU PASKA SI – 6 DÖFI C

FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, so ösa niha Keriso, niha Yudaia, si möi ba Gandriokhia. Laŵa'ö khö ndra talifusö si so ba da'ö : "Na lö mitehegö wa laboto ami, molo'ö huku Moze, - tebai te'orifi ami". Lalaŵa sibai wangerangera niha andrö ira Faulo ba Baranaba, irege lahonogöi, möi misi yaŵa ndra Faulo Baranaba ba awöra bö'ö ösa  ba Yerusalema, ba wamatunö da'ö khö ndra rasul ba khö ndra satua. Owulo ndra rasul, awö ndra satua, wamatunö sanandrösa ba da'ö. Awena lahalö gangetula ira rasul ba ira satua, awö niha samati fefu sifao ba gangowuloa ba wamili niha ösa ba wamatenge ya'ira ba Gandriokhia, ena'ö la'ohe sagörö zura khöra, simane nösinia : "Ya'aga ira rasul ba ira talifusö satua, ma'owai ndra talifusö andrö ba Gandriokhia ba ba Ziria ba ba Gilikia, si'otarai soi bö'ö si tenga niha Yahudi. No marongo, wa so ösa moroi ba gotaluama si möi khömi ba lafawukaisi awö wa lafökhöi högömi faoma famahaöra. Ba hiza, tenga nifatengema ira wolau da'ö. Börö da'ö no mamagölö ndra'aga ba no fao dödöma ba wamili ösa niha ba mafatenge ira khömi. Möi ira si fao talifusöda Faulo ba Baranaba ni'omasi'ö, niha si no manehegö nosora, börö döi Zo'aya ya'ita, Yesu Keriso. Ba mafatenge ndra Yuda Sila, sangombakha göi khömi da'ö ba wehede. Noa sa omasi Geheha Ni'amoni'ö ba ya'aga göi, böi sa'ae lafonoro ami, baero zi tola lö'ö andre : Böi mibabaya gö nadu, ba do, ba nitögi bagi. Ba mi'aröu'ö ami ba wohorö ! Na lö mibabaya da'ö, ba ohahau dödömi, Ya'ahowu ami !" HalRas 15:1-2.6.22-29

Simanö daroma li Lowalangi.-

 

Sinunö Fanema Li : Psallite No 67                            (ma Laudate No 79, 1-2)

 

FOMBASO  II

Taroma Li Lowalangi nihalö moroi ba zura Wama'ele'ö.-

Ya'odo, Yohane, - ba Ifatörö ndra'o Eheha Lowalangi, ba ba gangilata I'ohedo samösa mala'ika ba zuzu hili salaŵa sibai. Iforoma'ö khögu Yerusalema, banua ni'amoni'ö andrö. Banua andrö numalö mitou moroi ba zorugo, moroi khö Lowalangi, ba no muhaga si fao lakhömi Lowalangi. No takile mbanua andrö, hulö gara feremata sebua böli, hulö yasibi sobaluri. No fasui öli kara sebua ba salaŵa ba felendrua mbawa göli. Ba ba dete mbawa göli, nitarogö felendrua mala'ika. Ba ba mbawa göli no tesura döitöi zi felendrua mado Ndraono Gizara'eli. Si tölu mbawa göli sangotahögö miyöu, tölu mbawa göli sangotahögö miraya, tölu mbawa göli tanö ba gatumbukha ba tölu mbawa göli tanö ba gaekhula. Te'otomosi göli mbanua andrö ba dete si felendrua gowe danedane. Ba dete gowe andrö no musura döitöi ndra rasul Nono Mbiribiri andrö si felendrua. Ba lö ni'ilagu omo Lowalangi ba mbanua andrö. Börö me omo Lowalangi andrö no So'aya samösa,Lowalangi samatörö fefu hadia ia, ba Ono Mbiribiri andrö. Ba mbanua andrö, ba lö moguna haga luo ma haga mbaŵa, börö me ihagaini sa'ae ia lakhömi Lowalangi andrö, ba fandrunia Nono Mbiribiri andrö. Mowaöwaö dania soi niha fefu ba hagania, ba la'ohe dania wa'akayora ira razo bakha ba mbanua andrö.- Fam 21:10-14.22-24

Simanö daroma li Lowalangi.-

 

Sinunö Föna Injil : Psallite No 240                                (ma Laudate No 81A)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra nifahaöNia : "I'o'ö goroisaGu niha sangomasi'ö Ya'o. Ba I'omasi'ö AmaGu niha andrö. MöiGa khöNia, ba toröi Ndra'aga khönia. Lö i'o'ö goroisaGu niha si lö mangomasi'ö Ya'o. Oroisa andrö nirongomi, tenga moroi khöGu. Oroisa NamaGu da'ö samatenge Ya'o. Fefu da'ö U'ombakha'ö khömi, fatua so Ndra'o ba gotaluami ba samahaö fefu hadia ia khömi, ya'ia Geheha Ni'amoni'ö. Ya'ia andrö zanolo nifatenge NamaGu dania ba döiGu. Sanolo andrö zamasugi ba dödömi fefu hadia ia zi no U'ombakha'ö khömi.

Uröi khömi wa'ohahau dödö. Fa'ohahau dödö si otarai Ndra'o Ube'e khömi. Tenga simane lala wame'e fa'ohahau dödö ba gulidanö wame'eGu fa'ohahau dödö. Böi mibusi dödömi; böi ata'u ami ! No mirongo, me Uŵa'ö khömi : Mofanö Ndra'o ba hiza, mangawuli Ndra'o dania khömi. Na mi'omasi'ö Ndra'o, ba omuso dödömi ena'ö, me khö Nama möiDo, börö abölö ebua Nama moroi khöGu. U'ombakha'ö da'ö khömi iada'e, fatua lö salua,  ena'ö faduhu dödömi, na alua dania."- Yoh 14:23-29

Simanö duria somuso dödö khö Zo'aya ya'ita, Yesu Keriso.-

Erönua:

OROISA FA'OMASI

Bakha ba wombaso siföföna tarongo hewisa gofanöwa ndra rasul andrö. Börö wanuriaigö ndra rasul andrö, ato niha si tenga Yahudi ma niha baero somasi tobali niha Keriso. Ba zimanö manofu ira hadia moguna khöra wolo’ö fefu huku Moze ba si to’ölö ba niha Yahudi? Sanandrösa ba da’ö, ba wa’abölö Geheha Ni’amoni’ö no lahalö gangetula bakha ba rafe ira rasul. Lö fangorifi ba huku Moze, ha famati khö Yesu Keriso. Ba hiza, bakha ba wa’auri sero ma’ökhö, itaria moguna    ta’osara’ö dödöda ba wa’omasi. Huku nifazokhi Moze ba no huku niha börö wa’abe’e dödö niha. Huku nibe’e Yesu andrö ba no huku wa’omasi si’oroi Lowalangi.

Bakha ba wombaso sidua tarongo hewisa mbanua zorugo andrö ni’oroma’ö khö Yohane. Banua andrö ba no banua zisökhi ba ni’amoni’ö. Tobali banua si sökhi me fefu nono mbanuania telumö’ö ira moroi ba wondrönisi zi lö sökhi, lö fambinisa ba niha bö’ö, sikhala ba  angolifa toföfö, auri ira molo’ö Injil ba oroisa wangomasi’ö. Alua da’ö fefu börö wolo’öra oroisa Lowalangi andrö.

Bakha ba wombaso turia somuso dödö andrö sindruhu ibe’e khöda goroisa Yesu. Oroisa nibe’eNia andrö ba no oroisa fa’ohahau dödö si’oroi Lowalangi. Da’e goroisa si lö tola lö’ö ta’o’ö. Folo’öda oroisa nibe’e Yesu andrö ba no tobali tandra wangomasi’öda Ya’ia. Ösi goroisa nifa’ema Yesu andrö ba ya’ia goroisa “FA”OMASI”. Fangomasi’ö Lowalangi ba fangomasi’ö awö.

Oroisa nibe’e Yesu andrö no tola ta’olohesi ia ba lala wa’auri si’ero ma’ökhö. Folo’öda oroisa Lowalangi andrö tenga göi tobali ia fangositengagö huku ni’a’azokhi famareta sololohe ya’ita bakha ba negara. Huku ni’a’azökhi wamareta no amozua huku nifakhoi Lowalangi andrö ya’ia wa’omasi. Börö da’ö, folo’öda huku wamareta no göi folo’öda huku nifakhoi Lowalangi. Fefu huku andrö tefangamöi ia ba wanga’a’azökhi fa’ohahau dödö ba gotalua niha ma’afefu. Folo’öda huku andrö ena’ö mowua ia moroi ba wamati me Amada Uskup Anicetus Sugiyapranata no’irai iwa’ö wa ya’ita andre 100% niha katolik ba 100 % göi niha Indonesia. Ba zimanö folo’öda oroisa Lowalangi andrö, no folo’öda huku wamareta simöi fanga’azökhi lala wa’aurida ba gotalua wongambatö, wa’abanuasa, fa’atalifusöta ba mendröua manö ba wefaoda ba khöndra talifuso sifabö’ö li, agama, soi, ma gana. Ya faoma itolo ita Lowalangi. Amen.