A. OHITÖ DÖDÖ :
Ena’ö ira sifao ba wamahaö tola :
1. Aboto ba dödöra wa fa’abihasa Gereja, ifotandra ia faoma fa’auri Gereja si tobali angowuloa ndra niha samati.
2. Aboto ba dödöra wa angowuloa niha samati andrö no si sambua boto.
B. LALA WAMALUA :
1. Fangombakha
2. Fanofu ba fanema li.
3. Famatöfa ba wa’auri.
4. Fame’e halöŵö.
C. FAKAKE NI’OHUNA’Ö :
1. Buku Laudate.
2. Amabu’ula Li Si Bohou.
3. Buku Wamahaö ba Sakramen Krisma.
D. INÖTÖ NI’OGUNA’Ö : 60 – 90 miniti.
E. BOSI-BOSI WAMALUA FAMAHAÖ :
1. Famobörö :
a. Sinunö Famobörö : Laudate No. 9:1-2.
b. Fangandrö Famobörö :
S : Damangandrö ita.
S+N: † Ba Döi Nama ba Ono ba Eheha Ni’amoni’ö. Amen.
S : He Yesu samatörö Gereja Ni’amoni’ö. Mafuli zui owulo ba nahia andre ba wanohugö famahaö ba wa’anö fanema Sakramen Krisma. Si oföna ma’andrö saohagölö khöU, börö wondrorogöU ya’aga fefu, irege lö hadia ia khöma, ba somusomuso tödö ndra’aga me Ya’ugö zangomasi’ö ya’aga. Ma’andrö khöU: fahowu’ö ndra’aga fefu sedöna mamalua famaha’ö andre, i’otarai mabörögö irugi ma’asiwai ia dania. Simanö gangandröŵama khöU he Yesu, khöU wanuno ba lakhömi sagötö fa’ara. Amen.
2. Fehede Famasao :
Ya’ami ira Talifusö ni’omasi’ö ba khö Zo’aya ya’ita, Yesu Keriso. Ba zima’ökhö andre, tafuli zui tatohugö khöda wamahaö ba wama’anö fanema Sakramen Krisma. Ba walukhatada si me öfa andre, ta’abakha’ö ba ta’erönusi sambua duho ya’iada’ö : MANGOTOMOSI GEREJA TOBALI SAMBUA BOTO. Databörögö wamahaö andre sifao fo’ame’egö tödö ba fehi’a dödö.
3. Fama’ema Famahaö :
a. Fangombakha :
Samahaö ibe’e wangombakha khö ndra sifao ba wamahaö modanedane ba zura Waulo ba Niha Samati ba mbanua Gorindro si föföna (1Kor. 12:12-27).
NIHA SAMATI BA NO BOTO KERISO
Ya’ami ira talifusö ni’omasi’ö. Dozi ita ahori aboto ba dödöda ba anehe ita, wa boto wa’anihada andre, so nifotöi högö, so nifotöi boto ba so göi nifotöi ndroto-ndroto mboto. Lö auri niha na ha högö ba ma ha boto, ba ma zui ha ndroto-ndroto mboto. Andrö börö da’ö, högö, boto ba ndroto-ndroto mboto tebai nifabali. Simanö göi gangowuloa niha samati ma Gereja, oya ndroto-ndrotonia, ba hiza ha sambua boto, ba högönia ya’ia Keriso samösa.
Bakha ba wombaso Taroma Li Lowalangi nirongoda dania, nihalö moroi ba Zura Waulo ba mbanua Gorindro si Föföna faza 12:12-27; ba da’ö ihöndrögö Faulo wanguma’ö : “Simane boto niha si no ha sambua ba no oya ndroto-ndrotonia, ba fefu ndroto-ndroto mboto andrö, heŵa’ae oya, no sambua boto, simanö sa Keriso. Börö me ya’ita fefu, bakha ba Geheha si ha sambu andrö, he niha Yahudi ma zui niha Yunani, he sawuyu ma zui si tenga sawuyu, no tatema wanasa ba wa’atobali sambua boto; ba ha sambua Geheha nifaduwagö khöda”(1kor.12:12-13).
Heŵa’ae oya ndroto-ndroto mboto andrö, ba hiza ha sambua mboto; andrö börö da’ö ero sambua ndroto-ndroto mboto (ahe, tanga, talinga, hörö, btn.), tebai faoma lamane : “Tenga föfö mboto ndra’o!” Ba hiza sa, no Ifonahia ngawalö ndroto-ndroto mboto andrö Lowalangi ba mboto, ba Ifonahia ira molo’ö sedöna dödöNia. Sakali tö mufuli muŵa’ö : “Oya sa ndroto-ndroto, ba hiza ha sambua mboto” (1Kor. 12:20).
Modanedane ba zi no mufatunö moroi yaŵa, tebai lamane ero sambalö ndroto-ndroto mboto andrö: “Lö moguna khögu ndrotondroto mboto tanöbö’ö!” Hadia tola ihalö halöŵö danga ahe ma hörö ma talinga? Tatu wa tebai. Ba börö da’ö, ero sambalö ndroto-ndroto mboto fabö’öbö’ö wa’amogunania. Ba hiza lafalua halöŵöra ero zamösana soguna ba mboto si ha sambua andrö.
Simanö göi ita nifotöi angowuloa niha samati khö Yesu Keriso ma Gereja, no fabö’öbö’ö wetaroda, fa’abölöda, fa’onekheda/fangi’ilada, lala wa’aurida; so biarawan-biarawati, so guru, so fagawe, so zogale, so zondröni becak, so göi zohalöŵö ba danö, btn; ba hiza tafalua halöŵöda bakha ba Gereja molo’ö buala nibe’e Geheha khöda ero zamösa ita, soguna ba wangotomosi fa’auri Gereja, si no boto Keriso.
b. Fombaso Buku Ni’amoni’ö : 1 Kor. 12:12-27
12 Simane boto niha si no ha sambua ba no oya ndrotondrotonia, ba fefu ndrotondroto mboto andrö, heŵa’ae oya, no sambua boto, simanö sa Keriso.
13 Börö me ya’ita fefu, bakha ba Geheha si ha sambua andrö, he niha Yahudi ma zui niha Yunani, he sawuyu ma zui si tenga sawuyu, no tatema wanasa ba wa’atobali sambua boto; ba ha sambua Geheha nifaduwagö khöda.
14 Börö me tenga ha sambua ndrotondroto mboto andrö, ba hiza no oya ndrotondroto.
15 Na imane ahe : “Börö me tenga tanga ndra’o, tenga föfö mboto ndra’o”, hadia, sindruhu wa tenga föfö mboto ia?
16 Na imane talinga : “Börö me tenga hörö ndra’o, tenga föfö mboto ndra’o”, hadia, sindruhu wa tenga föfö mboto ia?
17 Na ha hörö manö zi sageu boto, hewisa wa tola mamondrongo? Ma zui na ha talinga manö mboto ma’asageu, hewisa wa tola mangago?
18 Ba hiza, no Ifonahia ngawalö ndroto-ndroto mboto andrö Lowalangi ba mboto, ba Ifonahia ira molo’ö sedöna dödöNia.
19 Na ha sambua ndorotondroto mboto ma’afefu, he so nifotöi boto?
20 Oya sa ndrotondroto, ba hiza ha sambua mboto.
21 Börö da’ö tebai imane hörö ba danga: “Lö moguna khögu ndra’ugö”. Simanö göi högö tebai imane ba gahe: “Lö moguna khögu ndra’ugö”.
22 Ma na’i ndrotondroto si hulö ambö abölö andrö zabölö moguna.
23 Ndrotondroto niŵa’öda ambö moadu andrö, da’ö zabölö tafosumange, ba ndrotondroto niŵa’öda ambö enahöi, da’ö zabölö ta’odödögö wondrorogö;
24 ba hiza, ndrotondroto soadu andrö, lö moguna ta’odödögö sibai ba wondrorogö ya’ia. No Ihaogö sibai Lowalangi ba wama’anö botoda, irege ndrotondroto sambö tebe’e dödö andrö zabölö tefosumange,
25 ena’ö lö alua wa’afabali ba ndrotondroto mboto andrö, ba hiza faoma labe’e dödöra nawöra.
26 Ba na so ndrotondroto sanaögö famakao, fefu ndroto-ndroto bö’ö oi larasoi wa’afökhö; na tefosumange zi sambua ndrotondroto, fefu ndrotondroto bö’ö oi larasoi wa’omuso dödö.
27 Ya’ami sa mboto Keriso andrö, ba ero zamösana no ndrotondrotonia.
c. Fangabakhai’ö Taroma Li Lowalangi :
Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:
1) Hewisa wo’amaedolagö rasul Faulo wa ha sambua niha samati khö Keriso ma Gereja molo’ö ayati 12?
2) Molo’ö ya’ami, hadia tola nifabali ndrotondroto mboto andrö? Hana?
3) Hadia ero sambalö ndroto-ndroto mboto andrö tola imane : “Ha ya’o zoguna ba mboto, lö moguna ndrotondroto mboto tanöbö’ö?” Hana?
4) Hewisa wolauda sabölö sökhinia molo’ö rasul Faulo khö ndrotondroto mboto sambö abölö, ambö moadu, sambö enahöi ba ayati 22-24?
5) Hadia nirasoi mboto si ha sambua andrö na so ndrotondroto mboto sanaögö famakao, ba simanö göi na tefosumange zi sambua ndrotondroto mboto?
d. Famatöfa ba wa’auri :
1) Molo’ö rasul faulo, Gereja ma Angowuloa Niha Samati ba no boto Keriso (1Kor.12:27). Sombali’ö Gereja tobali boto Keriso ya’iada’ö Eheha Ni’amoni’ö, Eheha Yesu Keriso. Börö mbuala Geheha Ni’amoni’ö andrö, ya’ita ndrotondroto mboto soya ngawalö andrö, te’osambua’ö tobali ha sambua boto (hafela: 1Kor. 12:12-13).
2) Bakha ba wangotomosi boto Keriso (=Gereja) si ha sambua andrö, rasul Faulo i’amenesi ita, ena’ö ya’ita fefu fa’aurida sindruhundruhu tobali ha sambua, ba moroi ba da’ö, moguna tatöngöni zi tölu ngawalö andre:
Ø Si lö tola lö’ö tarorogö (tabelelgö) ndrotondroto sambö fa’abölö (ayati 22);
Ø Si lö tola lö’ö ta’obadödöi ndrotondroto “sambö tefosumange” (ayati 23);
Ø Moguna sibai ta’obadödöi ndrotondroto si göna famakao (ayati 26a).
4. Fame’e Halöŵö Ndra Nifahaö :
Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.
Imane Faulo : “YA’AMI SA MBOTO KERISO ANDRÖ, BA ERO ZAMÖSANA NO NDROTO-NDROTONIA” (1Kor. 12:27).
5. Fangasiwai :
a. Fangandrö Fangasiwai.
S : Damangandrö ita.
He Yesu Keriso, si no högö Gereja si ha sambua, sinangea na ma’andrö saohagölö khöU, börö wamahaö si no matema ma’ökhö andre. Ba wombaso awö ba wangabakhai’ö Taroma Li Lowalangi nirongo moroi ba zura rasul Faulo nomege, tebotokhi bakha ba dödöma, wa Gereja andrö no botoU samösa. Ma’andrö khöU, fofa’abölö ndra’aga ena’ö tola marorogö wa ha sambua mbotoU andrö ya’ia Gereja, ba simanö göi wa ha sambuama khöU, iada’a ba irugi zilö aetu. Amen.
b. Sinunö Fangasiwai : Laudate No. 109:1-3.
0 comments:
Posting Komentar