Famahaö si-3: EHEHA NI’AMONI’Ö IBALI’Ö ITA ONO LOAWALANGI SI BIHASA BOTO BA FANGERANGERA

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra wa fa’abihasa ba wamati tebai mufabali ira ba wa’abihasa mboto wa’aniha.

2.   Aboto ba dödöra wa fa’abihasa ba wamati ya’iada’ö fa’atumbu ba fa’auri ba wamatörö  Geheha Ni’amoni’ö.

B.   LALA WAMALUA :

1.   Fasurito

2.   Fanofu ba fanema li.

3.   Famatöfa ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

1.   Famobörö :

a.   Sinunö Famobörö : Laudate No. 76:1-3.

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu ba So’aya ya’aga. No ifuli zui owulo ndra’aga ba nahia andre, ba wanohugö famahaö ba wa’anö fanema Sakramen Krisma. Si oföna ma’andrö saohagölö khöU, börö wa’masiU khöma fefu, irege mofa’abölö ndra’aga ba wefao ba wamahaö andre. Ma’andrö khöU : fahowu’ö ba rorogö ndra’aga i’otarai wamobörö irugi wangasiwai famahaö andre. Simanö gangandröŵama khöU he Yesu, Ya’ugö zauri sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Zo’aya ya’ita, Yesu Keriso. Ba zima’ökhö andre, tafuli zui tatohugö khöda wamahaö ba wama’anö fanema Sakramen Krisma. Ba walukhatada si medölu andre, tafatunö sambua duho ya’iada’ö : EHEHA NI’AMONI’Ö IBALI’Ö ITA ONO LOWALANGI SI BIHASA BOTO BA FANGERANGERA. Databörögö wamahaö andre sifao fo’ame’egö tödö.

3.   Fama’ema Famahaö :

a.   Fasurito :

Samahaö isuritokö khö ndra sifao ba wamahaö sanandrösa ba Wanema’ö Iraono Tobali Bihasa ba Suku Dani, ba danö Papua :

 

FANEMA’Ö IRAONO TOBALI BIHASA

BA SUKU DANI BA DANÖ PAPUA

Ba  Suku Dani ba danö Papua, upacara wanema’ö iraono tobali bihasa, tefalua ia 9 (siŵa) ngaluo wa’ara. Fanema’ö iraono andrö, mubörögö ia faoma fanutugö ikhu sageu nono mbawi side’ide nasa, ba dalu ndraono nibali’ö bihasa. Nifalua andre, tobali tandra wa i’otarai da’ö iraono andrö so gö si tebai i’a, barö zi 9 ngaluo wa’ara.

Iraono nitema’ö tobali bihasa bakha ba upacara andrö, möi ira mondri samösa, aefa moroi ba wondrorogö ninara. Ba ginötö da’ö, latema “koteka” si föföna (koteka = sölu wamatua ba niha Papua) ba latema göi gamagama manimani si bohou fogati zi no ara. Aefa da’ö, labe’e öra nagole mbawi; ba kotekara si bohou lagule’ö wanikha dawö. Ba ginötö da’ö, fefu niha sifao ba upacara andrö mu’ao ira lamane : “Ya tobali bihasa ndra’ugö!”

Iraono nitema’ö tobali bihasa boto ba fangerangera, lafonahia ira bakha ba zi sambua omo, fabali ira khö ndra satuara. Fefu ndraono matua tanöbö’ö lafalua wanuwö omo si so iraono nitema’ö andrö si ha fayafaya. Heŵa’ae iraono andrö so khöra wa’ata’u, ba hiza si lö tola lö’ö lalaẃa zanuwö andrö si fao fanolo ndra samasao ya’ira. Ba ginötö da’ö ladönisi dödöra ba wemanga nagole mbawi. Na omasi atö latema nagole mbawi andrö, ba hiza lö labe’e khöra. Lalau manarinari sarasara wongi, lö mörö ira irugi moluo. Tebai labadu nidanö irugi tanö’owi aefa da’ö.

Ba ngaluo si tölu sakali tö lafuli lasuwö ira si ha fayafaya; nifalua ndra samasao ya’ira samösa. Na molombase ira ahatö ba galitö, ba lafofanö ira. Dua wongi aefa da’ö, iraono nitema’ö andrö, lö tola lö’ö momöi mangandröngandrö nagole mbawi ba mbanubanua si fasui sifao fanunönunö.

Ba ba ngaluo si fitu, lö tola lö’ö la’anöisi sara döla geu. Ba mbörö geu andrö, la’ebua’ö galitö irege simbonia awe’ewe’e. Hulö nihunagö ira ba larasoi wa’alele dölara. Ba hiza, si lö tola lö’ö la’odödögö sibai ba we’amöi tou ba mbörö geu sifao wa lö tekiko ira. Aefa da’ö labe’e khöra wamahaö ba wafanasa ba wama’anö ya’ira ba wangalui soguna khöra. Ya’ira göi si lö tola lö’ö la’alui samösa geu galitöra ba la’ohe khö ndra inara ero zamösana.

Khö ndra ono alawe nitema’ö tobali bihasa boto ba fangerangera, labe’e khöra naya ba mbagi nifotali sise’ise. Iraono nitema’ö andrö, ero zamösana lahawusi ira satuara sifao fanguma’ö : “Ya lö mamalö auri ndra’ugö”.

Simanö upacara wanema’ö iraono tobali bihasa boto ba fangerangera ba suku Dani, ba danö Papua.

b.   Fangabakhai’ö Surito :

Samahaö ibe’e wanofu khö ndra nifahaö ba wangabakha’ö  surito nomege :

1)   Hadia manö wamaedo (=lambang) ni’oguna’ö bakha ba wanema’ö iraono tobali bihasa ba suku Dani, ba danö Papua ? Tötöi khöda !

2)   Tötöi khöda hadia geluaha wamaedo (=lambang) andrö ?

3)   Hadia nidönadöna ndra niha suku Dani ba danö Papua ba wamalua upacara wanema’ö iraono andrö ?

c.   Fombaso Buku Ni’amoni’ö :

Ø  Yohane 3:1-5 :

1 So samösa warizai’o sotöi Nikodemo, si no salaŵa niha Yahudi.

2 I’ondrasi Yesu ba zibongi ba imane khöNia : “He Guru, aboto ba dödöma wa guru Ndra’ugö nifatenge Lowalangi. Börö me samösa lö si tola mamalua sahölihöli dödö andrö nilauMö, na lö fao khönia Lowalangi”.

3 Itema li Yesu, Imane khönia : “Amen, amen, Uŵa’ö khöu : Samösa lö si tola mangila amatöröŵa Lowalangi, na lö tumbu ia moroi yaŵa”.

4 Imane Nikodemo : “Hewisa wa tola tumbu niha, na no atua? Hadia tola zui ifuli ia ba dalu ninania, ena’ö tumbu ia mangawuli?”

5 Itema li Yesu, Imane : “Amen, amen, Uŵa’ö khöU : “Na lö tumbu niha moroi ba nidanö ba ba Geheha, tebai möi ia ba gamatöröŵa Lowalangi”.

Ø  Roma 8:9-17 :

9 Tenga sa ba wamatörö gisö’isö dödö wa’aniha so ami, no ba wamatörö Geheha, na sindruhu so khömi Geheha Lowalangi.

10 Na so khömi Keriso, heŵa’ae itörö wa’amate botomi börö horö, Eheha andrö zangorifi ya’ami me no te’atulö’ö ami föna Lowalangi.

11 Na so khömi Geheha Lowalangi, sangorifi Yesu moroi ba wa’amate, I’orifi göi dania mbotomi sanörö fa’amate andrö, faoma EhehaNia si so bakha ba dödömi.

12 Da’ö mbörö, ya’ami ira talifusö, wa monoro dödö ita, tenga ba wamalua amuata wa’aniha, irege ifatörö wa’aurida fa’aniha.

13  Na ifatörö wa’aurimi fa’aniha, mate ami dania. Ba hiza na faoma fa’abölö Geheha mi’alani gamuata wa’aniha, auri ami dania.

14  Dozi niha sanehegö wa Ifatörö ia Eheha Lowalangi, no ono Lowalangi ira.

15 Börö me Eheha nitemami moroi khö Lowalangi tenga Eheha sombali’ö ami sawuyu zui, irege sada’uda’u wa’aurimi; ba hiza, no mitema Geheha sombali’ö ya’ami ono Lowalangi; ba ba Geheha andrö tola mu’ao ita : Abba – he Ama !

16 Eheha andrö zanga’aro’ö tödöda wa no ono Lowalangi ita.

17 Na iraono ita, no sanema ondröita göi ita, sanema ondröita moroi khö Lowalangi, ba tatema na’i gondröita andrö si fao awö Keriso, asala tetehegö wanaögö famakao awöNia, irege tefolakhömi göi ita awöNia dania.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Hadia wanema li moroi khö Yesu me imane Nikodemo khöNia : Hewisa wa tola tumbu niha na no atua ia?

2)   Hadia geluaha wa’atumbu moroi ba nidanö ba ba Geheha molo’ö Yohane 3 ayati 5 nomege?

3)   Hewisa wa’auri niha nifatörö Geheha molo’ö Roma 8 ayati 10-11? Ba hewisa göi wa’auri niha na nifatörö wa’aniha ba ayati 13?

4)   Hadia niŵa’ö rasul Faulo bakha ba ayati 14?

e.   Famatöfa ba wa’auri :

1)   Tobali ndrotondroto Gereja, eluahania möi bakha ba wa’auri Lowalangi Samösa Tölu (=Allah Tritunggal), ya’iada’ö: Ama, Ono, ba Eheha Ni’amoni’ö. Möi bakha ba wa’auri Lowalangi Ama, eluahania tefatumbu’ö ma tewöwöi ita; möi bakha ba wa’auri Lowalangi Ono, eluahania tehöli ita moroi ba ngawalö horöda; ba möi bakha ba wa’auri Geheha Ni’amoni’ö, eluahania te’amoni’ö ita.

2)   Ba we’amöi bakha ba wa’auri Lowalangi Samösa Tölu, tebai na ha fa’abölö niha manö; ba hiza si lö tola lö’ö niha tefatumbu’ö mangawuli moroi yaŵa, ya’iada’ö tefatumbu’ö moroi ba Geheha Ni’amoni’ö (Yohane 3:5). Tefatumbu’ö mangawuli moroi yaŵa bakha ba Geheha Ni’amoni’ö, tefalua ia bakha ba Sakramen Fanasa Ni’amoni’ö, eluahania tefatumbu’ö tobali Ono Lowalangi, möi bakha ba ngambatö Lowalangi, tobali ndrotondroto Gereja (fehela: Roma 8:14-15).

3)   Tobali bihasa bakha ba wamati, eluahania möi bakha ba wamatörö Geheha Ni’amoni’ö, auri molo’ö Eheha ba bakha ba Geheha. Molo’ö rasul Faulo, fa’auri niha samati si lö tola lö’ö ifatörö Eheha Ni’amoni’ö, ba tenga nifatörö wa’omasi nösi niha (Roma 8:9-17).

4)     Fa’atobali Ono Lowalangi nifatörö Geheha Ni’amoni’ö; ibe’e niha itugu tobali bihasa ba wamati, i’angeraigö ngawalö hadia ia moroi ba Geheha ba ifahela tödönia ngawalö hadia ia modanedane ba wamatörö Geheha Ni’amoni’ö, awö wa ihalö gangetula simane Yesu Keriso ba wangaiNia angetula (fahela: Roma 8:4-5). Niha tobali bihasa ba wamati börö mbuala Geheha Ni’amoni’ö, ba i’odödögö mu’ao khö Lowalangi: “Ya Abba, he Ama”, ba ibe’e wamaduhu’ö wa ya’ia no Ono Lowalangi (fahela: Roma 8:15-16).

5)     Auri molo’ö Eheha moguna wolohi sifao fangodödögö; ba börö da’ö moguna aboto ba dödöda hadia zo’amböta si so ba wa’aurida, simane :

Ø Fa’aolo dödöda ba ngawalö wa’omasi wa’a’ulidanö, forasoi wa’asökhi wa’a’ulidanö, fahulösa ba zi tenga sinangea;

Ø Fa’aolo dödöda ba wa lö molo’ö somasi dödö Lowalangi.

Böi olifu, wa tola tatema’ö ngawalö zo’amböta ita andrö, na lö mamalö tagogohe wawu’usa li Lowalangi, si lö faröi ba nifabu’uNia. Na tabokai dödöda khö Geheha Ni’amoni’ö, Eheha andrö lö mamalö Itolo ita ba wolaŵa ngawalö zo’amböta ita andrö. Moroi ba da’ö, ba fao ita bakha ba wamolakhömi sifao Keriso awö wa itugu bihasa ita ba wamati.

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

Imane Yesu : “NA LÖ TUMBU NIHA MOROI BA NIDANÖ BA BA GEHEHA, TEBAI MÖI IA BA GAMATÖRÖŴA LOWALANGI” (Yohane 3:5).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu, Ono Lowalangi sauri, ma’andrö saohagölö khöU, börö me no Örorogö ndra’aga fefu si no fao ba wamahaö andre. Ma’andrö  khöU, tanögö bakha ba dödöma Daroma LiU nirongoma ma’ökhö andre, me Ömane : “Na lö tumbu niha moroi ba nidanö ba ba Geheha, tebai möi ia ba gamatöröŵa Lowalangi”. Tolo ndra’aga, ena’ö tola mangawuli ndra’aga ba khöma ba marugi nahiama ero zamösana, irege ba ginötö mifönama tola matohugö wamahaö andre sifao fehi’a dödö. KhöU zumange ba fanunoma irugi zi lö aetu.

N:  Amen.

b. Sinunö Fangasiwai : Laudate No. 99 A.