Famahaö si-2: EHEHA NI’AMONI’Ö IBE’E NGAWALÖ MBUALA KHÖ ZI ERO SAMÖSA NDROTONDROTO GEREJA

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra ngawalö mbuala Geheha Ni’amoni’ö khö zi ero niha samati khö Yesu.

2.   Latötöi ngawalö mbuala Geheha Ni’amoni’ö molo’ö fombaso Taroma Li Lowalangi : 1Kor. 12:1-11.

B.   LALA WAMALUA :

1.   Famatunö salua ba wa’auri.

2.   Fanofu ba fanema li.

3.   Famosasi salua ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA :

1.   Famobörö :

a.   Sinunö Famobörö : Laudate No. 72:1-2.

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu, Fondrege zi Sökhi. Ma’andrö saohagölö khöU ba masuno Ndra’ugö, börö me no Örorogö ndra’aga ba ginötö si no matalu’i, irege no tola zui owulo ndra’aga ba nahia andre ba wanohugö famahaö fama’anö ba wanema Sakramen Krisma ba zi so fönama.  Ma’andrö khöU : fahowu’ö ndra’aga fefu sagötö famalua famahaö andre, irege tola ma’asiwai ia dania sifao fanoloni GehehaU. Simanö gangandröŵama khöU he Yesu, Ya’ugö zauri ba wahasambua khö Nama ba ba khö Geheha Ni’amoni’ö sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Zo’aya ya’ita, Yesu Keriso. Ba zima’ökhö andre, ifuli zui falukha ita ba wanohugö famahaö ba wama’anö fanema Sakramen Krisma. Ba walukhatada sakali da’a, data’osambalö’ö dödöda ba wamatunö sambua tuho ya’iada’ö : EHEHA NI’AMONI’Ö IBE’E NGAWALÖ MBUALA KHÖ ZI ERO SAMÖSA NDROTONDROTO GEREJA. Databörögö wamahaö andre sifao fo’ame’egö tödö.

3.   Fama’ema Famahaö :

a.   Famatunö salua ba wa’auri :

Samahaö ifatunö khö ndra sifao ba wamahaö zalua ba wa’auri samösa niha sotöi Helena Rose :

FANOFU HELENA ROSE

So samösa ono alawe niha Keriso sotöi Helena Rose, 17 fakhe ndröfinia. Ero sihulöwongi fatualö möi ia ba zekola, lö mamalömalö ibe’e ginötönia ba wangandrö sihulöwongi ba Gereja St. Stefanus si fahatö ba nomora.

Ero na möi Helana Rose bakha ba gereja andrö, ba lö mamalö ahöli dödönia. Fafa nahia gangombakhata si so ba kaki lima gereja lö mamalö afönu angombakhata, simane : Sohalöŵö ba Liturgi Ero Migu, rencana ziarah (fe’amöi ba nahia si no te’amoni’ö), ngawalö wamalua famahaö agama (katekese), btn.

Sadöni dödö Helena Rose nasa ya’iada’ö : Lonceng gereja sebua, moli ia ba ginötö si no muhonogöi, lö mamalö ibe’e wangombakha ba niha samati ba wangandrö, kurusi soya, sanganau si so bakha ba gereja, patung-patung, gambara Lala Röfa, Altar, karawa Wanasa Ni’amoni’ö, ngawalö lili, Buku Ni’amoni’ö sebua, nahia koor sifao orgel awö wangebua li.

Baero da’ö, Helena Rose i’ila ba nahia tanöbö’ö, oya nasa gama-gama si tola mu’oguna’ö na so wangowasaini sebua bakha ba gereja, he ba ginötö Luo Migu ba hegöi ba ginötö Luo Sebua. Bakha ba dödö Helena Rose, so wanofu simane: Hadia zango’ou niha samati ba wangotomosi gereja awö wanga’asogö ngawalö gama-gamania? Hewisa wamowaöwaö wamalua ngawalö halöŵö soya ngawalö andrö? Ba hana wa’ato sibai niha sifao bakha ba wamalua halöŵö andrö? Ba zitambai da’ö, Helena Rose so zi lö i’ila wanemali; hana wa ero sihulöwongi owölö’ölö ia wemaoso ba möi ia mangandrö ba gereja, hana wa lö alaŵa luo maoso ia ba idölö ia wofanö ba zekola?

b.   Fangabakhai’ö Salua ba Wa’auri :

Samahaö ibe’e wanofu khö ndra nifahaö ba wangabakha’ö  Salua ba Wa’auri :

1)   Na Helena Rose ahölihöli dödönia ba ngawalö gamagama awö lala halöŵö soya bakha ba Gereja nomege, hadia ya’ita samösa göi ahölihöli dödöda ba ngawalö gamagama awö halöŵö soya bakha ba Gerejada samösa? Hana?

2)   Hadia manö wa’amoguna  ngawalö gamagama awö lala halöŵö soya bakha ba Gereja andrö? Tutunö khöda ba wa’adogo!

3)   Hana wa owuloa niha samati mohi’a sibai dödöra ba wo’angeraigö awö ba wamalua lala halöŵö ba Gereja, hadia zamarou tödöra?

c.   Fombaso Buku Ni’amoni’ö : 1 Kor. 12:1-11.

1  Sanandrösa ba ngawalö mbuala Geheha andrö, ya’ami ira talifusö, lö omasi ndra’o na lö mi’ila watahögö.

2 Aboto ba dödömi wa me niha baero nasa ami, falemba dödömi ba nadu si lö hede andrö, hulö na no fatewu ira khömi.

3 Andrö wa u’ombakha’ö khömi, niha si hede ba Geheha Lowalangi, tebai imane : “Te’elifi Yesu!” Ba simanö göi lö si tola mamaduhu’ö : “Yesu no So’aya!” na tenga ba wamarou Geheha Ni’amoni’ö.

4  Oya ngawalö kharasi, ba ha sambua sa Geheha.

5 Oya ngawalö halöŵö fa’a’enoni, ba ha samösa sa Zo’aya.

6  Oya zamalua sahölihöli dödö, ba ha samösa Lowalangi; Ya’ia zamalua fefu hadia ia ba khöra fefu.

7 No tebe’e ngawalö kharasi Geheha ba zamösana, ena’ö te’oguna’ö [soguna ba wa’auri zato].

8  Khö zi samösa, tebe’e kharasi wehede fa’atuatua si fao fama’ema Geheha; ba ba danöbö’ö tebe’e kharasi ba wangi’ila molo’ö Eheha si fagölö.

9  Si samösa itema kharasi wamati saro ba Geheha si fagölö andrö.

10  Khö zi samösa tebe’e kuaso ba wamalua sahölihöli dödö. Khö zi samösa tebe’e kharasi ba wama’ele’ö, ba ba zi samösa tebe’e kharasi ba wamaehusi hezo zi’otarai khö Geheha Lowalangi ba hezo zi tenga. Khö zi samösa tebe’e kharasi wahuhuosa ba li Geheha, ba ba danöbö’ö tebe’e kharasi ba wamo’eluaha li Geheha andrö.

11 Ba hiza, fefu kharasi no ni’ohalöŵögöi Eheha si ha samösa ba si fagölö andrö, same’e kharasi ba zamösana molo’ö somasi Ia Ibe’e.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Hewisa wangombakha Rasul Faulo sanandrösa ba ngawalö kharasi awö ba ngawalö fa’a’enoni awö ngawalö zamalua sahölihöli dödö ba ayati 4-6 nomege ?

2)   Hezo te’oguna’ö ngawalö kharasi Geheha molo’ö Faulo bakha ba ayati 7 ?

3)   Tötöi khöda hadia ngawalö kharasi Geheha si ha sambua andrö, ba no fabö’öbö’ö ero zamösana niha molo’ö ayati 8-10 !

4)   Hadia aboto göi ba dödömi, wa kharasi Geheha si ha sambua andrö, no göi tebe’e khö ndra ndrotondroto Gereja bakha ba Stasi/ Lingkungan/Parokida? Tötöi ba be’e khöda dumadumania!

e.   Famatöfa ba wa’auri :

1)   Eheha Ni’amoni’ö, si no Eheha Keriso, Iduwagö ngawalö mbuala Geheha khö GerejaNia ma’afefu si ha sambua; ba Iduwagö göi ngawalö mbuala Geheha khö zi ero ndroto-ndroto Gereja.

2)   Buala Geheha khö zi ero ndrotondroto Gereja ba no fabö’öbö’ö (1Kor. 12:7-10). Ba hiza, buala Geheha niduwagö ba zi ero samösa ndrotondroto Gereja andrö, ba no moroi ba Geheha si ha sambua ba si fagölö (1Kor. 14:12; Efeso 4:12).

3)   Buala Geheha andrö, teduwagö khö ndroto-ndroto Gereja molo’ö fa’abölö ni’okhögöra, irege faoma buala Geheha andrö ero samösa ndrotondroto Gereja tola ifalua halöŵönia soguna ba wangotomosi awö ba wondrou’ö Gereja. Moroi ba da’ö bakha ba wa’auri Gereja, tesöndra oya ngawalö lala halöŵö.

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

OYA NGAWALÖ KHARASI, BA HA SAMBUA SA GEHEHA. OYA NGAWALÖ HALÖŴÖ FA’A’ENONI, BA HA SAMÖSA SA ZO’AYA (1 Kor. 12:4-5).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu Solomasi ba So’aya ya’aga. Ya’aga fefu si no fao ba wamahaö andre, ma’andrö saohagölö khöU ba masuno Ndra’ugö Fondrege Zalaŵa; börö me no Örorogö ba Öfahowu’ö ndra’aga fefu, i’otarai mabörögö irugi ma’asiwai wamahaö andre. Ma’andrö khöU : Tanögö bakha ba dödöma wamahaö si no matema ma’ökhö andre, ba fahowu’ö ndra’aga fefu, irege tola marugi nahiama ero zamösana. KhöU zumange ba lakhömi götögötö wa’ara.

N : Amen.

b. Sinunö Fangasiwai : Laudate No. 77:1-2.