Falukhata si-5: EHEHA NI’AMONI’Ö IBOKAI DÖDÖ BA IFAROU NIHA BA WANGOBADÖDÖI AWÖ

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra wa Eheha Ni’amoni’ö Ifarou Gereja si ha sambua ba hegöi ero ndrotondrotonia ba wefao ba wangotomosi fa’ohauhau dödö niha sato.

2.   Aboto ba dödöra wa tenga ha khöra samösa wa’aurira, ba hiza ba wanuriaigö Turia Somuso Dödö ba niha fefu.

B.   LALA WAMALUA :

1.   Famatunö salua ba wa’auri.

2.   Fanofu ba fanema li.

3.   Famatöfa ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

 

1.   Famobörö :

a.   Sinunö Famobörö : Laudate No. 156:1-2.

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S:  He Yesu Solomasi ba khöma. Börö wa’omasiU si lö ola fa’ebua, no Öbe’e khöma ginötö si sökhi irege no tola owulo zui ndra’aga ba nahia wamahaö andre, sifao fa’omuso dödö. Börö da’ö, ma’andrö saohagölö khöU ba wa’omasiU si no matema andrö. Ma’andrö khöU: rorogö ba fahowu’ö ndra’aga fefu sagötö famaluama famahaö andre, i’otarai wamobörö irugi ma’asiwai ia dania. Simanö gangandröŵama khöU he So’aya, Ya’ugö zauri sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Yesu, So’aya. Ba zima’ökhö andre, tafuli zui tatohugö khöda wamahaö ba wama’anö fanema Sakramen Krisma. Ba walukhatada si lima andre, tafatunö sambua duho ya’iada’ö : EHEHA NI’AMONI’Ö IBOKAI DÖDÖ BA IFAROU NIHA BA WANGOBADÖDÖI AWÖ. Databörögö wamahaö andre sifao fanöngöni.

3.   Fama’ema Famahaö :

a.   Famatunö salua ba wa’auri :

Samahaö ifatunö khö ndra sifao ba wamahaö hewisa wa’abasaki wa’auri ngambatö Nama Jadi, sondröni beca  ba mbanua sebua:

Keterangan:

S = Sanutunö; AJ = Ama Jadi; IJ = Ina Jadi.

FA’ABASAKI WA’AURI ZONDRÖNI BECA

BA MBANUA SEBUA

 

S  :  Ba zihulöwongi, Ama Jadi ifofanö becania, i’alui seŵa.

AJ: Lau bale, da’udöni beca ba zihulöwongi andre, ba wangalui harazaki.

S :  Ba lala aspal ba mbanua sebua, beca Nama Jadi asese ihulö ia oplet (=moto side’ide) ba wangalui seŵa. Ba börö wa’abölö moto fao khönia nangi, gawugawu awö zimbo ba ihawui Nama Jadi si so furi moto.

AJ: He bale, börö me moto andre ifake mesin, andrö wa lö ba dödönia niha side’ide sondröni beca si so furinia!

S :  Ba zitanö’owinia mangawuli Nama jadi ba nomo, ba ma’ifu lö nisöndrania kefe.

AJ: Ee... ba beca, börö me lö mesin mö ba niha zondröni ya’ugö, andrö wa ambö laharagoi ndra’ugö niha. Ma’ökhö andre, lö usöndra gefe.

S :  Ba hiza Ina Jadi, idönadöna wa isöndra gefe ba zima’ökhö da’ö Ama Jadi.

IJ : Ha’uga ösöndra gefe ma’ökhö Ama Ndraono!?

AJ: Lö nisöndragu gefe ma’ökhö Ina Ndraono!, börö me lahulöhulö ndra’o wangai seŵa ira niha solohe moto sewa.

IJ: Ya’ia, kosokoso manö ero ma’ökhö. No ahori mböra, ba koso gefe zui. Noa khönia da’ö!! Amawa manö beca da’ö, ba alui halöŵöu ba nahia bö’ö, simane ira awöu tanöbö’ö.

AJ: Akha aboto ba dödöu Ina Ndraono, simanö göi ndra awögu tanöbö’ö, lö nisöndrara halöŵöra nasa irugi iada’a. Hewisa wa ufamawa beca da’a, ha da’ö lala wangalui harazakida!

IJ: Hu! Beca da’ö khöu solohe fa’a’udi. Lö irai ibe’e wa’omuso dödö khöda!

S : Ilau zi lö hedehede Ama jadi, irege tolea manö ia ba naha wemörö. Imane bakha ba dödönia :

AJ: Ee... bale, uwalinga ba mbanua sebua andre, oya tesöndra harazaki; ba hiza’i fa’abasaki wa’auri zi falukhado.

S : Simanö lala wa’auri ngambatö Nama Jadi si tosasa tödö; ba börö da’ö moguna niha bö’ö sanolo, samokai lala, ba same’e lala halöŵö. Hewisa ita ba zimanö!?

b.   Fangabakhai’ö Salua ba Wa’auri :

Samahaö ibe’e wanofu khö ndra nifahaö ba wangabakha’ö  salua ba wa’auri nomege :

1)   Ngambatö haniha nifatunö nomege, ba hadia lala wangaluira?

2)   Hadia zi falukha Nama Jadi na ero idöni beca ba mbanua sebua nomege?

3)   Hadia so göi ba gotalua niha mbanuada sorasoi fa’abasaki wa’auri simane ngambatö Nama jadi nomege?

4)   Molo’ö ya’ami, hewisa lala ba wanolo na tesöndra niha si tosasa ba mbanuada simane ngambatö Nama Jadi nomege?

c.   Fombaso Buku Ni’amoni’ö : Hal Ras. 4:32-37 :

32 Ha sara dödö ndra niha samati andrö fefu ba ha sambua gera’era. Lö ba gotaluara sanguma’ö wa ha khönia manö hadia ia zi so khönia; ba hiza, ba dödöra okhötara fefu.

33 Ba wa’afönu kuaso labe’e wamaduhu’ö ba wemaoso Yesu Keriso, So’aya, ira rasul; ba oroma wa abölö wa’ebua dödö Lowalangi ba niha samati ma’afefu.

34 Samösa lö sambö hadia ia ba gotaluara, börö me dozi sokhö kabu ma omo la’amawa, ba bölönia labe’e ba danga ndra rasul.

35 Ba tebe’e ba zamösana molo’ö sabölö moguna.

36 Simanö göi Yosefo, samösa Lewita si’otarai danö Siprus, nitötöi ndra rasul Baranaba, eluahania samehulu tödö.

37 So sagörö kabubia, i’amawa kabu andrö ba ibe’e ba danga ndra rasul mbölinia.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege :

1)   Hadia fao ma fagöna ba dödömi lala wa ha sara dödö niha samati ba wombaso Taroma Li Lowalangi nomege? Hana?

2)   Hewisa wangobadödöira nawöra bakha ba wombaso nirongoda nomege?

3)   Na mifahela tödömi, hadia fa ha sara dödö niha samati nirongoda nomege, tesöndra ba gotalua niha samati ba ginötö iada’a ba ma hewisa?

4)   Hewisa na so ba mbanuada niha si tosasa, si göna famakao ba fangabudödö, ba ma niha silumana, niha sofökhö, btn. hadia nifaluami?

e.   Famatöfa ba wa’auri :

1)     Gereja auri ia tenga ha soguna khönia samösa, ba hiza Gereja si no boto Keriso, si lö tola lö’ö auri ia simane Keriso ba möi ia enoni niha sato soguna ba wangorifi ya’ira. Börö da’ö, Gereja i’otomosi wa’aurinia, tenga ha khönia samösa. Gereja Ifatenge Yesu Keriso ba wanuriaigö Turia Somuso Dödö ba gulidanö.

2)     Gofu hadia zindruhu ngasi wa’aniha, ba mo’amakhaita ia ba wa’auri Gereja. Da’ö mbörö wa Gereja si lö tola lö’ö i’obadödöi wa’auri niha sato, faofao ia khöra ba wolohi fa’atulö, falöfawinisa, fa’afatalifusöta, fanga’atulö, awö wa ifosumange mbosi wa’aniha sodanedane ba wa’omasi Lowalangi.

3)     Eheha Ni’amoni’ö ba no Eheha Keriso. Yesu Keriso ba no fangoroma fa’omasi Lowalangi. Eheha Ni’amoni’ö Ifarou dödö ero samösa niha ba wangoroma’ö fa’omasi Lowalangi si ha sambua ba si fagölö gofu he khö, lö i’olaini zoguna khö zi samösa niha molo’ö gana, mado, agama, soi, btn.

4)     Eheha Ni’amoni’ö Ibokai dödö  ero samösa niha ba wangobadödöi awö ba wefao bakha ba wondrou’ö fa’aniha sindruhu, ya’iada’ö fangefa’ö ndra niha si tosasa, silumana, nitimbagö, nirate, tefakao molo’ö boto, noso, fariaẃösa, ba molo’ö fa’alowalangi, irege ero samösa niha tola mofa’abölö ia ba wa’auri ba gotalua nawönia niha, ba simanö göi tola auri tanö föna Lowalangi. Ba moroi ba da’ö, ero samösa ndrotondroto Gereja mohalöẃö ia ba wanga’asogö nifotöi “amuata wa’omasi”.

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

“HA SARA DÖDÖ NDRA NIHA SAMATI ANDRÖ FEFU BA HA SAMBUA GERA’ERA. LÖ BA GOTALUARA SANGUMA’Ö WA HA KHÖNIA MANÖ HADIA IA ZI SO KHÖNIA; BA HIZA, BA DÖDÖRA OKHÖTARA FEFU” (HalRas 4:32).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu ba So’aya ya’aga, ma’andrö saohagölö khöU, börö me no Örorogö ndra’aga fefu si no fao ba wamahaö andre. Ma’andrö  khöU, abölö’ö ndra’aga ena’ö tola ma’obadödöi ndra talifusöma si göna fa’abu dödö, silumana, so’amböta soguna, sofökhö, ba nifakao si so ba gotaluama; ba zi lö mamaigi bawa, soi, agama, ba fetarora. Fahowu’ö ndra’aga fefu afu tola marugi nahiama ero zamösana sifao fa’omuso dödö. KhöU lakhömi ba sumange gotögötö wa’ara.

N : Amen.

b. Sinunö Fangasiwai : Laudate No. 79 A:1-3.