Famahaö si-1: EHEHA NI’AMONI’Ö ZAMATUMBU’Ö NIHA SAMATI KHÖ KERISO NIFOTÖI GEREJA

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra hewisa zalua ba ginötö Pentakosta.

2.   Aboto ba dödöra wa Yesu Ifatenge Geheha Ni’amoni’ö khö ndra nifaö (rasul) ba wanolo ya’ira ba wamohouni fa’aurira awö ba wanuriagöra Turia Somuso Dödö andrö khö Yesu Keriso.

B.   LALA WAMALUA :

1.   Fasurito.

2.   Fanofu ba fanemali.

3.   Famosasi salua ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Buku Gambu’ula Li Sibohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

 

1.   Famobörö :

a.   Sinunö Famobörö : Laudate No. 86:1-3.

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S :  He Ama Fondrege, Zolomasi ba khöma. Masuno Ndra’ugö ba ma’andrö saohagölö khöU, börö wa’omasiU khöma, ero zamösana ndra’aga, irege no tola owulo ndra’aga ba da’e ba wamörögö Famahaö ba Wama’anö Fanema Sakramen Fanga’aro’ö moroi khöU. Ma’andrö khöU: rorogö ba fahowu’ö ndra’aga fefu sifao ba wamahaö andre, ena’ö tola ma’ofa’auri ia si faudu ba zomasi Ndra’ugö. Simanö gangandröŵama nifa’ema Zo’aya ya’aga, Yesu Keriso. Amen.

2.   Fehede Famasao :

Ero samösa niha Keriso bakha ba wa’aurinia, moguna sibai khönia wanoloni moroi khö Geheha Ni’amoni’ö. Sifao fanema Sakramen Fanga’aro’ö (=Krisma), ibe’e wa’aboto ba dödö khöda ba wangi’ila awö ba wariaŵösa khö Geheha Ni’amoni’ö si lö mamalömalö. Bakha ba walukhata si föföna andre, ifarou dödöda hewisa wamörögö fa’aboto ba dödöda Geheha Ni’amoni’ö andrö.

Eheha Ni’amoni’ö andrö, ba no Eheha Lowalangi si tebai i’ila höröda, ba hiza tola mu’ila ia bakha ba wa’a-Lowalangi, ya’iada’ö faoma “hörö wamatida”. Simane niha göi, tola aboto ba dödöda haniha ia moroi ba wehedenia, nisurania, amuatania, ba moroi ba mbua halöŵönia; simanö göi Geheha Ni’amoni’ö, tola aboto ba dödöda Ia moroi ba mbua halöŵöNia. Databörögö wamahaö andre, sifao famokai tödöda.

3.   Fama’ema Famahaö :

a.   Fasurito :

Samahaö ifa’ema surito tou andre :

FA’ABOTO BA DÖDÖ SOLOHE FANGEFA

 Ba zi sambua atua sebua, auri ngawalö wofo simane: kakatua, fofo’usö, kanehua (tetahau’a), fune, buru’u, la’oro, nagoyoma, ba tanöbö’önia na. Ero sihulöwongi lalau fakore; terongo hulö ngawalö zoli (=musik) si fangemagema, ba wamaondragö fa’atumbu luo ba zihulöwongi. Ngawalö wofo andre, lalau manunö sifao fohombohombo ba ndraha geu si so ya’ira, sindruhu omuso sibai dödöra ba wa’atoröi ba gatua andrö ero ma’ökhö.

Ba zi samuza ma’ökhö, tohare sambua wofo sotöi kasuari ba gatua andrö. Ba wamobörö fofo kasuari andrö fahuwu ia ba ngawalö wofo side’ide si so ba gatua andrö. Ba hiza, arara irasoi kasuari wa ya’ia wofo sabölö ebua moroi ba wofo fefu ba gatua andrö. Börö da’ö, kasuari ifalua hadia ia molo’ö somasi dödönia manö. Imane kasuari khö ndra fofo tanöbö’ö: “He ya’ami ma’afefu, mifondrondrongo! I’otarai ma’ökhö andre, ya’o zamatörö ya’ami. Börö me ya’o zabölö ebua ba sabölö ba gatua andre. Fefu ami, ba migo’ö khögu. Ero ma’ökhö ba mifa’anö gö soya khögu. Ba na lö atö mifalua da’ö, ba u’a ami sambusambua. Böi mitandraigö molaŵa! Na milau da’ö, ba mi’ila samösa dania lualuania. Ia da’a olofo ndra’o, mi’alio’ö mi’ohe khögu gö!” Börö zimanö, sambua lö fofo solaŵa fareta kasuari.

Luo fagati luo, itugu ara ba abölö marase wofo si gide’ide nomege si so bakha ba gatua andrö. Auri ira bakha ba wa’ata’u. Baero da’ö, oi göi olofo ira, börö me fefu gö si so bakha ba gatua, ahori i’a kasuari. Fefu wofo si gide’ide tebai lafalua hadia ia, irege iada’a bakha ba gatua andrö, lö sa’ae nininini ero sihulöwongi, talu ma’ökhö, ba hegöi ba zibongi.

Ba zi zamuza ngaluo, kakatua i’owuloi fefu wofo si gide’ide nomege, ba zi lö i’ila kasuari. Imane kakatua: “Ya’ami ira talifusögu, no ara auri ita bakha ba wa’ata’u ba ba wa’olofo, börö  wamakao kasuari. Ba dödögu, no irugi inötönia ba wangefa’ö ya’ita moroi ba wamakao kasuari andrö. Si lö tola lö’ö tafalua hadia ia ba wangefa’ö ya’ita awö ba wangorifi ya’ita moroi ba wa’afaito kasuari. Data’osambua’ö ita fefu ba wolaŵa kasuari.” Fefu wofo tanöbö’ö oi fao dödöra ba niŵa’ö kakatua.

Imane fofo’usö: “Datakalaisi kasuari faoma watafalua watandrisa wohombo. Haniha zabölö alaŵa wohombo ya’ia zimöna. Ba hiza, fatualö tafalua watandrisa wohombo ba zi dua wongi tö; ba börö me ebua ba abölö kasuari; ba si oföna ua ba zibongi dania, datadedeha mbu gafi kasuari na no mörö ia.” Fao dödö wofo fefu ba niŵa’ö wofo’usö. Andrö me no irugi talu mbongi, ba owulo wofo si gide’ide fefu; lada’ida’i lazara-zara wonösöbi bu gafi kasuari irege ahori.

Ba zi hulöwongi, ba no maoso ira fefu, lalau fakore fofo si gide’ide fefu lamane: “Faoso kasuari, datalau fatandri wohombo. Haniha zabölö alaŵa wohombo ba ya’ia zimöna.” Ba ginötö da’ö, awena aboto ba dödö kasuari wa no ahori adeha mbu gafinia, ba lö i’ila mohombo sa’ae, ha mofanö ahe manö ia ba danö. Ba watandrisa andrö, kala kasuari ba möna wofo si gide’ide sato. I’otarai da’ö, kasuari lö sa’ae ifatörö wofo sigide’ide bö’ö ba gatua andrö; iröi gatua andrö mofanö ia isaŵa ba nahia bö’ö. Ba i’otarai da’ö göi, awena ifuli omuso dödö wofo si gide’ide ba gatua nomege simane si to’ölö.

b.   Fangabakhai’ö Surito :

Samahaö ibe’e wanofu khö ndra nifahaö ba wangabakha’ö surito nomege :

1)   Hewisa wa’auri ngawalö wofo si gide’ide ba gatua ba surito nomege, fatualö tohere wofo kasuari ?

2)   Hewisa göi zalua ba wa’auri ngawalö wofo ba surito nomege me no tohare wofo kasuari ?

3)   Hadia nifalua wofo si gide’ide me no larasoi wa’amarase ba wolau wofo kasuari ?

4)   Na alua göi zimanö bakha ba mbanuada, hadia göi zi tola tafalua ?

c.   Fombaso Buku Ni’amoni’ö : Halöŵö Rasul 2:1-13.

1  Me irugi ngaluo Pentakosta, owulo fefu niha samati ba zi sambua nahia.

2 I’anema’ö so zi höngö si’otarai mbanua si yaŵa hulö na itörö angi sabölöbölö, ba ifönui nomo andrö ma’asambua ba zi so ira.

3 To’ele khöra lela si hulö galitö si fabalibali ba manuge ba högöra zamösana.

4 Ifönui ira fefu Eheha Ni’amoni’ö, ba labörögö lalau li bö’ö, simane nibe’e Geheha khöra fanötöi.

5 Me inötö da’ö, ato niha satulö tödö si’otarai soi fefu ba gulidanö, si toröi ba Yerusalema.

6  Me so zi höngö andrö, ato sibai niha sangondrasi, tobali sibai dödöra me larongo fahuhuo ndra rasul andrö ba lira zamösana.

7 Tokea sibai ira ba ahölihöli dödöra, lamane : “Hadia, tenga niha Galilaia fefu zi fahuhuo andrö ?

8  Hewisa wa tola tarongo fahuhuo ira ba li ni’oguna’öda ba soida zamösana ?

9 Ya’ita niha Weretia, niha Media, niha Gelama, niha si toröi ba Mesopotamia, moroi ba Yudaia ba ba Kapadokia, moroi ba Wondro ba ba Asia,

10 moroi ba Wirigia [Frigia] ba ba Wafilia [Pamfilia], moroi ba danö Mesirayi ba ba danö Libia sahatö ba Girene, ba so göi zi’otarai Roma,

11 so niha Yahudi, so proselita awö niha Kreta ba Arabia. Fahuhuo ira ba lida ba wangombakha sebua andrö nilau Lowalangi.”

12 Fao fa’atokea ba fa’ahölihöli dödö faoma lamane khö nawöra : “Hadia geluaha da’a?”

13      Ba so göi zango’aya lamane : “No mabu tuo ira”

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Hadia zalua khö ndra rasul ba ginötö Luo Pentakosta molo’ö fombaso nomege? Tutunö khöda ba wa’adogo !

2)   Hewisa wangi’ila ndra rasul wa’ato’ele Geheha Ni’amoni’ö simöi khöra me luo da’ö ?

3)   Hewisa dödö niha samondrongo si toröi ba mbanua Yerusalema me inötö Ngaluo Pentakosta andrö ?

4)   Hewisa göi molo’ö ya’ami, hadia atulö niŵa’ö ndra niha tanöbö’ö sango’aya andrö, wa ira rasul “No mabu tuo ira” ba ma hewisa ?

e.   Famatöfa ba wa’auri :

1)   No tarongo ba wamobörö surito wamakao wofo si gide’ide ba gatua nifalua kasuari fofo sebua ba sabölö andrö. Simanö göi alua wangosawuyu niha mbanua Roma khö niha Yahudi ba ginötö Yesu, ba famakao simanö göi no alua khö ndra Rasul ba ginötö me no aefa maoso Yesu moroi ba ngai zi mate.

2)   Fe’amöi Yesu tou ba gulidanö, fa’auriNia ba gotalua ndra nifahaö/rasul, famahaö ba halöŵöNia ba gotaluara; I’ohe “Duria Somuso Dödö” khö ndra niha nifakao, silumana, ba si tosasa. Fe’aso Yesu ba gotalu niha samati, Ibe’e khöra wa’aboto ba dödö sanandrösa ba wamakao nitöröNia göi. Börö da’ö, Ifarou dödöda Yesu ena’ö tawu’ai gamuatada ba tafalalini gere’erada, afu tola aheta ita moroi ba wamakao ba tobali ita niha ni’efa’ö sindruhu.

3)   Me no aefa maoso Yesu moroi ba wa’amate, ba Ifabu’u wa Ifatenge zanolo si lö faröi khö ndra nifahaö/rasul, ya’ia Geheha Ni’amoni’ö. Eheha sanolo nifabu’u Yesu andrö, tefönui ia ba ginötö Luo Pentakosta. Salua ba ginötö Luo Pentakosta, ba no famobörö wa’auri ndra niha samati khö Yesu Keriso, nifotöi Gereja. Fombayoini niha samati khö Keriso faoma Eheha Ni’amoni’ö, ba no tandra wangombakha Gereja Yesu Keriso ba gulidanö andre (fahela, HalRas. 2:5).

4)     Eheha Ni’amoni’ö diduwagö khö ndra nifahaö (rasul) ba ginötö Pentakosta, mo’ofanöŵa wohalöŵöNia ba wamahouni “tödö si no ara” tobali “tödö sibohou” ya’iada’ö tödö nifatörö Geheha Ni’amoni’ö. Faoma tödö si bohou andrö, dozi nifahaö  mofa’abölö ira ba wanuriaigö fa’aduhu. Andrö börö da’ö, ero samösa niha samati; moguna khönia ba idönadöna wamohouni dödö si tola manga’asogö fehi’a dödö si bohou simane salua khö ndra Rasul luo no.

5)     Eheha Ni’amoni’ö andrö, ba no Eheha sangosambua’ö, Eheha si tola mame’e fa’odöŵadöŵa dödö, fangorifi, ba fanuturu lala. Eheha samohouni tödö, ya’iada’ö tödö sibarani ba afönu fehi’a dödö ba wangoroma’ö fa’aduhu. Sifao buala Geheha Ni’amoni’ö andrö, ira nifahaö Yesu ya’ia Gereja, tefatenge ba wamalua halöŵö Keriso ba wanga’asogö ulidanö si bohou, niha si bohou si te’efa’ö, safönu fa’atalifusöta, fa’ahono dödö, ba fa’atulö sodanedane ba wa’omasi Lowalangi.

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

TO’ELE KHÖRA LELA SI HULÖ GALITÖ SI FABALIBALI BA MANUGE BA HÖGÖRA ZAMÖSANA (HalRas. 2:3).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu solomasi ba So’aya ya’aga, ya’aga fefu si no fao ba wamahaö andre, ma’andrö saohagölö khöU ba masuno Ndra’ugö Fondrege Zalaŵa; börö me no Örorogö ba Öfahowu’ö ndra’aga fefu, i’otarai mabörögö irugi ma’asiwai wamahaö andre. Ma’andrö khöU : Tanögö bakha ba dödöma wamahaö si no matema ma’ökhö andre, ba fahowu’ö ndra’aga fefu, irege tola marugi nahiama ero zamösana. KhöU zumange ba lakhömi götögötö wa’ara.   N : Amen.

b. Sinunö Fangasiwai : Laudate No. 77:1-2.