Falukhata si-9: SAKRAMEN KRISMA (=SAKRAMEN FANGABÖLÖ)

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra geluaha Sakramen Krisma.

2.   Aboto ba dödöra wa’amoguna Sakramen Krisma.

3.   Aboto ba dödöra zi 7 mbuala Geheha Ni’amoni’ö, ba 12 mbuabua Geheha.

B.   LALA WAMALUA :

1.   Fangombakha.

2.   Fanofu ba fanema li.

3.   Famatomatou ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

1.   Famobörö :

a.   Sinunö Famobörö : Laudate No. 76:1-3.                                                      

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu Keriso, So’aya ba sangabölö’ö ya’aga. Masuno Ndra’ugö ba ma’andrö saohagölö khöU, börö wondrorogöU ya’aga fefu, irege no tola zui orahu ndra’aga ba nahia andre ba wefao ba wamahaö. Ma’andrö khöU: fahowu’ö ndra’aga fefu, si no owulo ba da’a; he nifahaö ba hegöi samahaö, irege tola mafalua wamahaö andre, sifao fa’asökhi bakha ba wamatörö GehehaU Ni’amini’ö. Simanö gangandröŵama nifa’emama khöU he So’aya, Ya’ugö zauri ba samatörö awö Nama, ba ba wa ha sambua khö Geheha Ni’amoni’ö götögötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Yesu, So’aya. Bakha ba wamahaö si me ziẃa andre, tatohugö zui wafatunö sambua duho ya’iada’ö: SAKRAMEN KRISMA (=SAKRAMEN FANGABÖLÖ). Bakha ba wamahaö andre,  tebotokhi khöda, hadia Sakramen Krisma andrö, hadia wa’amogunania, si 7 mbuala Geheha Ni’amoni’ö, ba 12 mbuabua Geheha. Ena’ö tola aboto ba dödöda duho nifatunöda andre, databokai dödö awö wangerangerada ba wanema’ö ya’ia.

3.   Fama’ema Famahaö :

a.   Fangombakha :

Samahaö ibe’e wangombakha khö ndra sifao ba wamahaö sanandrösa ba Sakramen Krisma (=Sakramen Fanga’aro’ö).

1)   Eluaha Sakramen Krisma.

Tefuli zui tefasugi bakha ba dödöda, wa Sakramen, eluahania “Tandra we’aso Lowalangi ba gotalua niha samati ma Gereja”. Moroi ba da’ö, Sakramen Krisma, eluahania “Tandra we’aso Lowalangi Eheha ba gotalua zamati khöNia (Gereja) ba wama’ema bualaNia”. Böi olifu, wa so fitu sakramen bakha ba Gereja Katolik, ba sambalö moroi ba zi 7 sakramen andrö, ya’ia Sakramen Krisma (= Sakramen Fangabölö).

2)   Fa’amoguna Sakramen Krisma.

Ø  Bakha ba Sakramen Krisma, niha si no manema Fanasa Ni’amoni’ö, tefatenge ia tobali samaduhu’ö Yesu Keriso ba samaduhu’ö Gereja ba gulidanö andre. Eheha Ni’amoni’ö andrö, tobali sangabölö’ö ba samehi’a tödö ba wa’atobali samaduhu’ö Yesu Keriso. Moroi ba da’ö, Eheha Ni’amoni’ö zombali’ö niha Keriso tola bihasa fangerangera ba gamakhaitania khö Yesu Keriso ba hegöi ba wa’atobali ndrotondroto Gereja.

Ø  Sakramen Krisma ibönökhi kharasi Lowalangi, irege niha Keriso tola auri ira ba wa’a’ono khö Lowalangi ba hegöi ba wa’atobali ndrotondroto Gereja Katolik. Fame’e kharasi andrö, ba no halöẃö Lowalangi samösa bakha ba khö Geheha Ni’amoni’ö. Börö da’ö, bakha Sakramen Krisma, Eheha Ni’amoni’ö Ibe’e wa’abölö ba niha ba wamalua halöẃö famatenge Keriso tobali Ere, Razo, ba Sama’ele’ö.

Ø  Niha sanema Sakramen Krisma, Ifatenge ba I’abölö’ö Eheha Ni’amoni’ö ba wamalua fefu halöẃö soguna ba wangorifi niha gulidanö. Halöẃö da’a tefalua ia faoma famaduhu’ö Yesu Keriso bakha ba wa’auri sero ma’ökhö, he ba wehede ba he göi ba gamuata.

b.   Fangabakhai’ö fangombakha :

Samahaö ibe’e wanofu khö ndra nifahaö ba wangabakha’ö  fangombakha si no mufatunö nomege moroi yaẃa :

1)   Hadia Geluaha Sakramen Krisma andrö?

2)   Tötöi khöda ba wa’adogodogo zi tölu wa’amoguna Sakramen Krisma!

c.   Fombaso Buku Ni’amoni’ö : Galatia 5:16-26.

16 Andrö uẃa’ö khömi : Mitehegö nifatörö Geheha ami, irege lö mi’o’ö dödö wa’anihami andrö.

17 Börö me fa’edöna dödö wa’aniha fabörö ba wa’edöna dödö Geheha, ba fa’edöna dödö Geheha fabörö ba wa’edöna dödö wa’aniha, fa’udu sa zi dombua balö andrö.

18 Ba hiza, na mitou’ö ami ba wondrönia’ö Geheha, tenga sa’ae barö wamatörö huku auri ami.

19 Noa sa ta’ila gamuata dödö wa’aniha andrö : Fohorö, fa’ara’iö, fa’alö’aila’aila,

20 fangolowalangigö ösi gulidanö, fakelemusa, fatiusa, fasosota, fa’afökhö dödö, fofönufönu, faya’osa, fa’udusa, fabalisa dödö,

21 fa’olohu, famabumabu, fa’olu’alu’a ba si fakhilikhili ba da’ö. Sanandrösa ba da’ö fefu tohöna uẃa’ö, simane si no uẃa’ö me föna, wa dozi niha samalua simanö lö mo’urakha ira ba gamatöröẃa Lowalangi.

22 Ba hiza, na Eheha zondrönia’ö ya’ita, ta’owua wa’omasi, fa’omuso dödö, fa ha sara dödö, fa’ebolo dödö, fa’asökhi mböwö, fa’ebua dödö ba fa’alöfaröi,

23 fa’alömofönu ba fanaha tödö. Lö hadöi huku si fabörö ba ngawalö da’ö.

24 Dozi si no faböbö ba khö Keriso Yesu, no laforöfa wa’anihara awö ngawalö gomasiö ba fangisöra.

25 Na ba Geheha auri ita, akha göi Eheha zondrönia’ö fa’aurida.

26 Böi fayaẃa ita, böi faoma tafobörö wönu nawöda ba böi faoma afökhö dödöda khö nawöda.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Hadia niẃa’ö Waulo khö ndra niha samati ba mbanua Galatia ba wamobörö wombaso nomege? Hadia mbörö wa iẃa’ö Faulo khöra zimanö?

2)   Hadia manö gamuata dödö wa’aniha si no itötöi Faulo bakha ba wombaso nomege?

3)   Ba hewisa göi molo’ö Faulo na Eheha zondrönia’ö ya’ita?

e.   Famatöfa ba wa’auri :

1)     Dosi niha sanema Sakramen Krisma, ba itema zi 7 mbuala Geheha Ni’amoni’ö*), ya’iada’ö :

·        Fa’atuatua.

·        Fa’aboto ba dödö.

·        Famolala tödö.

·        Fa’abölö.

·        Fangila wetahögö.

·        Fa’atulö dödö.

·        Fangata’ufi Lowalangi.

2)     Moroi ba mbuala Geheha Ni’amoni’ö nitema zi ero samösa niha sanema Sakramen Krisma, börö da’ö wa i’okhögö zi 12 mbuabua Geheha*), ya’iada’ö :

·        Fa’omasi.

·        Fa’omuso dödö.

·        Fa’atulö dödö.

·        Fa’ebolo dödö.

·        Fa’asökhi dödö.

·        Folau si sökhi.

·        Fa’ebua dödö.

·        Fa’oböwö.

·        Falöfaröi.

·        Fangidengide’ö

·        Fanaha tödö.

·        Falösinegu.

3)     Ya’ami ira talifusö, moguna tatöngöni bakha ba wa’urida niẃa’ö Waulo andre : “Dozi si no faböbö ba khö Keriso Yesu, no laforöfa wa’anihara awö ngawalö gomasiö ba fangisöra. Na ba Geheha auri ita, akha göi Eheha zondrönia’ö fa’aurida” (Galatia 5:24-25).

 

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mu’abakhai’ö nomege.

Imanae Faulo, ANDRÖ UẂA’Ö KHÖMI : “MITEHEGÖ NIFATÖRÖ GEHEHA AMI, IREGE LÖ MI’O’Ö DÖDÖ WA’ANIHAMI ANDRÖ” (Galatia 5:16).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu Keriso, Sangorifi ya’aga, masuno Ndra’ugö ba ma’andrö saohagölö khöU, börö wa’omasiU si no matema sagötö wamaluama famahaö andre. Ma’andrö khöU : be’e khöma wa’akhari dödö ba wanema Sakramen Krisma ba ginötö si so fönama andre. Abölö’ö ndra’aga, ba wama’anö ya’aga boto ba hegöi noso, ena’ö sinangea ndra’aga ba wanema buala Geheha Ni’amoni’ö andrö sifao fa’omuso dödö. Simanö gangandröẃa khöU, Ya’ugö zauri ba wa ha sambua khö Nama ba ba khö Geheha Ni’amoni’ö, götögötö wa’ara.  Amen.

b. Sinunö Fangasiwai : Laudate No. 163:1-5.