Falukhata si-8: EHEHA NI’AMONI’Ö IBE’E WA’ABÖLÖ BA WAMADUHU’Ö FEMAOSO YESU

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra wa ira nifahaö, me no latema Geheha Ni’amoni’ö luo no, mofa’abölö ira ba wamaduhu’ö wa no maoso Yesu moroi ba gotalua zi mate.

2.   Aboto ba dödöra wa na no latema dania Geheha Ni’amoni’ö bakha ba Sakramen Krisma, mofa’abölö göi ira ba wanuriaigö Turia Somuso Dödö, simane ira nifahaö luo no.

B.   LALA WAMALUA :

1.   Fangombakha.

2.   Fanofu ba fanema li.

3.   Famatomatou ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

 

1.   Famobörö :

a.   Sinunö Famobörö : Laudate No. 74:1-3.                                                      

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu Keriso, kubalo ba si fahuwu khöma. Masuno Ndra’ugö ba ma’andrö saohagölö khöU, börö mbuala ba fa’omasiU si no matema, irege no tola zui owulo ndra’aga ba nahia andre ba wefao ba wamahaö fama’anö fanema Sakramen Krisma. Ma’andrö khöU: fahowu’ö ndra’aga fefu, sowulo ba da’a; he nifahaö ba hegöi samahaö, irege tola mafalua wamahaö andre, sifao fanoloU. Simanö gangandröŵama khöU he Yesu, Ya’ugö zauri ba samatörö sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Yesu Keriso. Bakha ba wamahaö si me ẃalu andre, tatohugö zui wafatunö sambua duho ya’iada’ö: EHEHA NI’AMONI’Ö IBE’E WA’ABÖLÖ BA WAMADUHU’Ö FEMAOSO YESU. Bakha ba wamahaö andre,  tebotokhi khöda, hewisa wa’abölö ndra nifahaö ba wamduhu’ö femaoso Yesu moroi ba gotalua zi mate, me no aefa latema Geheha Ni’amoni’ö me Luo Pentakosta. Ena’ö aboto ba dödöda wamahaö andre, datahaogö tafalua ia sifao fangobadödöi.

3.   Fama’ema Famahaö :

a.   Fangombakha :

Samahaö ibe’e wangombakha khö ndra sifao ba wamahaö sanandrösa ba wamaduhu’ö ndra nifahaö femaoso Yesu moroi ba gotalua zi mate :

FAMADUHU’Ö WETERO

Me no latema Geheha Ni’amoni’ö ira nifahaö me Luo Pentakosta, ba mofa’abölö ira sa’ae ba wamaduhu’ö femaoso Yesu moroi ba gotalua zi mate. Samösa moroi ba gotalua ndra nifahaö andrö, Fetero döinia, fahuhuo ia föna niha sato sifao fa’abölö ba wamaduhu’ö; wa Yesu si no teforöfa, mate ba lako’o, ba ngaluo si tölu, no maoso Ia moroi ba gotalua zi mate.

Sifao falö ata’u, imane Fetero : “He ya’ami niha Yahudi ba ya’ami fefu si toröi ba Yerusalema, ya’aboto ba dödömi ba mifondrondrongo niẃa’ögu. Tenga si mabu niha andre, simane fanguma’ömi, börö me awena bözi siẃa, ba hiza, no alua zi no Iẃa’ö Lowalangi sifao fama’ema Yo’eli, sama’ele’ö andrö, me imane: “Ba ginötö safuria andrö, Ufaduwa GehehaGu ba niha fefu, irege mama’ele’ö ndraonomi matua ba iraonomi alawe; so gangilata khö ndraonomi sagawena ebua ba mangifi ndra satua kömi. Sindruhu, fefu zi möi enoniGu, he ira matua, he göi ira alawe, Ube’e khöra GehehaGu ba ginötö da’ö, ba tobali ira sama’ele’ö”.

Ya’ami ira talifusö. Itohugö nasa huhuonia Fetero, imane: “He ya’ami Iraono Gizara’eli, mifondrondrongo niẃa’ögu andre : No Ifaduhu’ö Lowalangi Yesu andrö, banua Nazareta, ba khömi sifao halöẃö segebua awö dandra zahölihöli dödö nifalua Lowalangi ba gotaluami sifao fama’emaNia, simane si no mi’ila. No mi’osö ba röfa ba mibunu Ia sifao fanolo niha si lö mangila huku Lowalangi, heẃa’ae sindruhunia tetou’ö Ia molo’ö nifakhoi dödö ba angetula Lowalangi i’otarai mböröta. Ba hiza, no I’orifi Ia mangawuli Lowalangi ba wangefa’ö Ya’ia moroi ba wa’abölö wa’amate.

Huhuo Wetero sanandrösa khö Yesu, faudu göi ba niẃa’ö Dawido, me imane : “Lö mamalö so fönagu Zo’aya; na I’iagö tanö ba gambölöGu, lö mangiwa Ndra’o. Andrö omuso dödöGu ba manunö lelaGu, ba molombase na’i mbotoGu ba wanötöna, me lö Ôtehe toröi nosoGu ba mbanua niha tou ba lö Ôtehe Irasoi Niha Ni’amoni’ö andrö khöU wa’obou barö danö. No Ôtuturu khöGu lala saekhu ba wa’auri; haga mbawaU zamönui Ya’o fa’omuso dödö si lö awawö”. Ya’ami ira talifusö, simanö wamaduhu’ö Wetero sanandrösa khö Yesu andrö, si no maso moroi ba gotalua zi mate.

b.   Fangabakhai’ö fangombakha :

Samahaö ibe’e wanofu khö ndra nifahaö ba wangabakha’ö  fangombakha modanedane moroi ba Mbuku Ni’amoni’ö si no mufatunö nomege :

1)   Me no latema Geheha Ni’amoni’ö ira nifahaö me Luo Pentakosta, hezo la’oguna’ö wa’abölö nitemara?

2)   He khö fahuhuo Wetero sifao falö ata’u ba nitutunö nomege?

3)   Hadia nösi wamaduhu’ö Wetero föna niha Yahudi ba fefu zi toröi ba Yerusalema me luo da’ö?

c.   Fombaso Buku Ni’amoni’ö : HalRas. 2:14-28 :

14 Maoso Wetero awö ndra rasul si felezara andrö, ibörögö fahuhuo, imane : “He ya’ami niha Yahudi ba ya’ami fefu si’otarai ba Yerusalema, ya aboto ba dödömi ba mifondrondrongo niẃa’ögu.

15 Tenga simabu niha andre, simane fanguma’ömi, börö me awena bözi siẃa,

16 ba hiza, no alua zi no Iẃa’ö Lowalangi si fao fama’ema Yo’eli, sama’ele’ö andrö, me imane :

17 “Ba ginötö safuria andrö, Ufaduwa GehehaGu ba niha fefu, irege mama’ele’ö ndraonomi matua ba iraonomi alawe; so gangilata khö ndraonomi sagawena ebua ba mangifi ndra satua khömi.

18 Sindruhu, fefu zi möi enoniGu, he ira matua, he göi ira alawe, Ube’e khöra GehehaGu ba ginötö da’ö, ba tobali ira sama’ele’ö.”

19 Ufalua dandratandra ba mbanua si yaẃa ba ila’ila ba gulidanö tou : do, alitö ba simbo.

20 Ogömigömi dania luo, ba tobali oyo mbaẃa hulö ndro, tandra we’aso luo Zo’aya, luo sebua ba solakhömi andrö.

21 Ba ginötö da’ö, te’orifi dozi niha sangakui So’aya ba sangaröfili töiNia.

22 He ya’ami Iraono Gizara’eli, mifondrondrongo niẃa’ögu andre : No Ifaduhu’ö Lowalangi Yesu andrö, banua Nazareta, ba khömi sifao halöẃö segebua awö dandra sahölihöli dödö nifalua Lowalangi ba gotaluami sifao fama’emaNia, simane si no mi’ila.

23 No mi’osö ba röfa ba mibunu Ia sifao fanolo niha si lö mangila huku Lowalangi, heẃa’ae sindruhunia tetou’ö Ia molo’ö nifakhoi dödö ba angetula Lowalangi i’otarai mböröta.

24 Ba hiza, no I’orifi Ia mangawuli Lowalangi ba wangefa’ö  Ya’ia moroi ba wa’abölö wa’amate,

25 faudu ba niẃa’ö Dawido sanandrösa khöNia, me imane : “Lö mamalö so fönaGu Zo’aya; na I’iagö tanö ba gambölöGu, lö mangiwa Ndra’o.

26 Andrö omuso dödöGu ba manunö lelaGu, ba molombase na’i mbotoGu ba wanötöna,

27 me lö Ôtehe toröi nosoGu ba mbanua niha tou ba lö Ôtehe irasoi Niha Ni’amoni’ö andrö khöU wa’obou barö danö.

28 No Ôtuturu khöGu lala saekhu ba wa’auri; haga mbawaU zamönui Ya’o fa’omuso dödö si lö awawö”.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Hadia niẃa’ö Wetero ba wamobörö huhuonia khö ndra niha Yahudi awö fefu zi’otarai ba Yerusalema?

2)   Hadia niẃa’ö Wetero si no alua niẃa’ö Lowalangi sifao fama’ema Yo’eli, sama’ele’ö andrö?

3)   Hadia niẃa’ö Wetero ba Ndraono Gizara’eli ba wamaduhu’önia sanandrösa khö Yesu andrö banua Nazareta bakha ba ayati 23-24?

e.   Famatöfa ba wa’auri :

1)     Gofu hadia ia zi no Ifabu’u Yesu khö ndra nifahaöNia, ba ha sambalö wa alua ba itörö. No irai Iẃa’ö, wa Ono Niha andrö, lafakao, la’o’aya, laforöfa, ba ba ngaluo si tölu maoso Ia moroi ba gotalua zi mate. Fefu da’a oi itörö. Simanö göi fatua lö manahae Ia miyaẃa ba zorugo, no irai Ifabu’u wa Ifatenga Geheha Ni’amoni’ö khö ndra nifahaö. Sindruhu itörö ba alua da’a ba ginötö ngaluo Pentakosta (=Luo Si 50) si no tafatunö luo no bakha ba wamahaö si-1.

2)     Börö Geheha Ni’amoni’ö nitema ndra nifahaö me Luo Pentakosta, andrö wa mofa’abölö ira ba wamaduhu’ö sanandrösa khö Yesu si no teforöfa, mate, ba maoso mangawuli ba luo si tölu ba gotalua zi mate. Samösa moroi ba gotalua nifahaö Fetero döinia, ibe’e wamaduhu’ö, imane : “He ya’ami Iraono Gizara’eli, mifondrondrongo niẃa’ögu andre : No mi’osö ba röfa ba mibunu Ia sifao fanolo niha si lö mangila huku Lowalangi, heẃa’ae sindruhunia tetou’ö Ia molo’ö nifakhoi dödö ba angetula Lowalangi i’otarai mböröta. Ba hiza, no I’orifi Ia mangawuli Lowalangi ba wangefa’ö  Ya’ia moroi ba wa’abölö wa’amate, …” (HalRas. 2:23-24).

3)     Na tatema Sakramen Krisma, ba tatema göi wa’abölö awö mbuala Geheha Ni’amoni’ö, simane nitema ndra nifahaö luo no. Börö wanemada Sakramen Krisma andrö, tobali bihasa ita bakha ba wamati khö Lowalangi; ba moroi ba da’ö, monoro dödö ita ba halöẃö fanuriaigö Turia Somuso Dödö bakha ba wa’aurida sero ma’ökhö, gofu heza ba gofu hadia ginötö.

 

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

SINDRUHU, FEFU ZI MÖI ENONIGU, HE IRA MATUA, HE GÖI IRA ALAWE, UBE’E KHÖRA GEHEHAGU BA GINÖTÖ DA’Ö, BA TOBALI IRA SAMA’ELE’Ö (HalRas 2:18).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu Keriso, si lö ola fa’omasi ba khöma, ya’aga samati khöU. Ma’andrö saohagölö khöU ba masuno wa’ebua dödöU andrö khöma, ya’aga fefu si no fao ba wamahaö andre. Ma’andrö  khöU, fatenge ba fanaro’o bakha ba dödö GehehaU Ni’amoni’ö, ena’ö tola mafalua noro dödöma bakha ba wa’aurima sero ma’ökhö ba gotalua niha sato. Simanö gangandröẃa khöU, Ya’ugö zauri ba samatörö irugi zi si lö aetu.  Amen.

b. Sinunö Fangasiwai : Laudate No. 78:1.3.