Falukhata si-7: IFABU’U YESU WA IFATENGE GEHEHA NI’AMONI’Ö KHÖ NDRA NIFAHAÖ

A.   OHITÖ DÖDÖ :

Ena’ö ira sifao ba wamahaö tola :

1.   Aboto ba dödöra wa no irai Ifabu’u Yesu Geheha Ni’amoni’ö khö ndra nifahaöNia.

2.   Aboto ba dödöra wa Eheha Ni’amoni’ö nitemara dania, tobali sangabölö’ö ya’ira  ba wamaduhu’ö Yesu ba gotalua niha sato.

B.   LALA WAMALUA :

1.   Fangombakha.

2.   Fanofu ba fanema li.

3.   Famatöfa ba wa’auri.

4.   Fame’e halöŵö.

C.   FAKAKE NI’OHUNA’Ö :

1.   Buku Laudate.

2.   Amabu’ula Li Si Bohou.

3.   Buku Wamahaö ba Sakramen Krisma.

D.   INÖTÖ NI’OGUNA’Ö : 60 – 90 miniti.

E.   BOSI-BOSI WAMALUA FAMAHAÖ :

1.   Famobörö :

a.   Sinunö Famobörö : Laudate No. 77:1-3.                                                       

b.   Fangandrö Famobörö :

S : Damangandrö ita.

S+N: † Ba Döi Nama ba Ono ba Eheha Ni’amoni’ö. Amen.

S: He Yesu Keriso, samahaö ba kubalo si sökhi. Masuno Ndra’ugö ba ma’andrö saohagölö khöU, börö mbualaU si no matema bakha ba wa’aurima andre, irege no tola zui owulo ndra’aga ba nahia andre ba wefao ba wamahaö. Ma’andrö khöU: fahowu’ö ndra’aga fefu, he samahaö ba hegöi nifahaö, ena’ö tola mafalua wamahaö andre, sifao fa’asökhi. Simanö gangandröŵama nifa’emama khöU, Ya’ugö zauri ba samatörö sagötö fa’ara. Amen.

2.   Fehede Famasao :

Ya’ami ira Talifusö ni’omasi’ö ba khö Zo’aya ya’ita, Yesu Keriso. Bakha ba wamahaö si me witu andre, tatohugö wafatunö sambua duho ya’iada’ö: IFABU’U YESU WA IFATENGE GEHEHA NI’AMONI’Ö KHÖ NDRA NIFAHAÖ. Bakha ba wamahaö andre,  itutunö khöda zalua me no aefa maoso Yesu moroi ba gotalua zimate, faofao nasa Yesu khö ndra nifahaöNia 40 ngaluo ba 40 wongi wa’ara. Aefa da’ö, manahae Ia miyaẃa ba zurogo, dumadao Ia ba gambölö Nama si  lö ambö fa’abölö. Fatua lö manahae Ia miyaẃa ba zorugo, Ifabu’u wa Ifatenge Geheha Ni’amoni’ö khö ndra nifahaöNia. Eheha si fagölö göi Ifatenge khömi dania, bakha ba wanemami Sakramen Krisma. Datafalua wamahaö andre sifao fangodödögö.

 

3.   Fama’ema Famahaö :

a.   Fangombakha :

Samahaö ibe’e wangombakha khö ndra sifao ba wamahaö sanandrösa ba nifabu’u Yesu khö ndra nifahaöNia fatua lö manahae Ia miyaẃa ba zorugo :

IFABU’U YESU WA IFATENGE

GEHEHA NI’AMONI’Ö KHÖ NDRA NIFAHAÖ

Öfa wulu ngaluo  ba öfa wulu wongi faofao Yesu nasa khö ndra nifahaöNia, me no aefa maoso Ia moroi ba gotalua zimate. Fatualö fabali Yesu khö ndra nifahaöNia, Imane khöra : “Böi miröi Yerusalema, ba hiza mibaloi zi no Ifabu’u Ama, simane si no Uẃa’ö khömi : Faoma idanö ibe’e wanasa Yohane, ba hiza mato ha’uga ngaluo tö mitema wanasa ba Geheha Ni’amoni’ö. Ba ya’ami, mitema dania wa’abölö moroi khö Geheha Ni’amoni’ö si möi khömi, ba tobali samaduhu’ö ami khöGu ba Yerusalema, ba zi sagörö Yudai’a ba Samaria, ba irugi wondrege danö” (HalRas. 1:4-5.8). Me no Iẃa’ö da’ö, tefazaẃa Ia ba zanehe ira; ihalö Ia lawuo irege lö sa’ae oroma Ia khöra.

Bakha ba Injil Yohane faza 14 ayati 16-17, ba da’ö no irai Iẃa’ö Yesu khö ndra nifahaöNia : “U’andrö dania khö Nama, ba Ibe’e khömi zanolo tanöbö’ö, ena’ö lö mamalömalö faofao Ia khömi, ya’ia Geheha wa’aduhu andrö. Tebai latema Ia niha gulidanö, börö me lö la’ila Ia ba lö aboto ba dödöra. Ba ya’ami, aboto ba dödömi Ia, börö me faofao Ia khömi ba lö mamalö I’iagö gotaluami”.

b.   Fangabakhai’ö fangombakha :

Samahaö ibe’e wanofu khö ndra nifahaö ba wangabakha’ö  fangombakha sodanedane moroi ba Mbuku Ni’amoni’ö si no mufatunö nomege :

1)   Molo’ö ya’ami, ha’uga ngaluo ba ha’uga wongi nasa faofao Yesu khö ndra nifahaöNia me no aefa maoso Ia moroi ba gotalua zimate?

2)   Hadia niẃa’ö Yesu khö ndra nifahaöNia fatualö fabali Ia khöra?

3)   Ba na no latema dania Geheha Ni’amoni’ö nifabu’u Yesu andrö, hadia nifalua ndra nifahaö?

c.   Fombaso Buku Ni’amoni’ö : HalRas. 1:12-14 :

12 Aefa da’ö, mangawuli ndra rasul andrö ba Yerusalema, i’otarai hili nifotöi Hili Wanikha, si lö aröu ba Yerusalema, ha fa’aröu wofanö nitehegö ba luo Sabato.

13 Me no larugi yomo, numalö ira ba mbate’e tanö yaẃa; ba da’a toröi ira. Ya’ira andrö : Fetero ba Yohane, Yakobo ba Andrea, Filifo ba Toma, Batolomai’o ba Matai’o, Yakobo ono Galifai’o, Simoni Selote ba Yuda ono Yakobo.

14 So göi ndra’alawe si fao khöra, awö Maria, Ina Yesu, ba ira talifusö Yesu. Fefu ira lö aedu’aedu ba wangandrö, ha sara dödöra.

d.   Fangabakhai’ö Taroma Li Lowalangi :

Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:

1)   Me no sa’ae manahae Yesu miyaẃa ba zorugo, hezo lasaẃa ira nifahaö?

2)   Me larugi Yerusalema ira nifahaö, heza toröi ira, ba hadia nifaluara ba da’ö?

3)   Hadia nibalobaloi ndra nifahaö wa toröi ira ba Yerusalema ba nomo ba mbate’e tanö yaẃa?

e.   Famatöfa ba wa’auri :

1)     Me no maoso Yesu moroi ba gotalua zi mate, ba sindruhu tebai nisu’a ha wa’omuso dödö ndra nifahaöNia fefu; lö fa’ata’ura sa’ae börö me Yesu Ifuli faofao khöra. Ba hiza me no irugi öfa wulu ngaluo ba öfa wulu wongi toröi Yesu ba gotaluara, irugi inötönia mangawuli Yesu khö NamaNia miyaẃa ba zorugo, andrö wa ifuli zui abu dödöra börö wabalisa andrö. Börö da’ö, andrö wa Ifabu’u khöra Yesu wa Ifatenge khö ndra nifahaö Geheha Ni’amoni’ö, sangabölö’ö ya’ira ba wamaduhu’ö Yesu ba gotalua niha sato.

2)     Me inötö manahae Yesu miyaẃa ba zorugo, sambalö ni’andröNia khö ndra nifahaö ya’iada’ö, ena’ö böi laröi Yerusalema ba sifao fangandrö labaloi we’amöi tou Geheha Ni’amoni’ö si no Ifabu’u khöra. Ba hiza na no latema dania Geheha Ni’amoni’ö andrö, ba tobali ira samaduhu’ö Yesu ba Yerusalema, ba zi sagörö Yudai’a ba Samaria, ba irugi wondrege danö. Simanö göi ita dozi sanema Sakramen Krisma (=Sakramen Fangabölö), tatema göi Geheha Ni’amoni’ö simane nitema ndra nifahaö luo no, tobali ita samaduhu’ö Yesu Keriso sanuriagi Turia Somuso Dödö ba gotalua niha sato.

4.   Fame’e Halöŵö Ndra Nifahaö :

Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mubaso ba mu’abakhai’ö nomege.

BA YA’AMI, MITEMA DANIA WA’ABÖLÖ MOROI KHÖ GEHEHA NI’AMONI’Ö SI MÖI KHÖMI, BA TOBALI SAMADUHU’Ö AMI KHÖGU BA YERUSALEMA, BA ZI SAGÖRÖ YUDAI’A BA SAMARIA, BA IRUGI WONDREGE DANÖ” (HalRas. 1:8).

5.   Fangasiwai :

a.   Fangandrö Fangasiwai.

S :  Damangandrö ita.

He Yesu Keriso, ba So’aya ya’aga, ma’andrö saohagölö khöU ba masuno Ndra’ugö börö me faofao Ndra’ugö khöma bongi – ma’ökhö bakha ba wa’aurima, töratöra bakha ba wamalua famahaö ba zima’ökhö andre. Ma’andrö  khöU, a’aro’ö wamatima, ena’ö mofa’abölö’ö ndra’aga ba wombaloi fanemama Eheha Ni’amoni’ö ba ginötö si so mifönama dania, bakha ba wangowasaini Sakramen Krisma.  Khöu madönadöna da’a he Yesu, me Ya’ugö zama’ema khöma, iada’a ba irugi zi si lö aetu.  Amen.

b. Sinunö Fangasiwai : Laudate No. 78:1-3.