A. OHITÖ DÖDÖ :
Ena’ö ira sifao ba wamahaö tola :
1. Aboto ba dödöra wa Yesu Keriso andrö, no solohe fangorifi.
2. Aboto ba dödöra wa nituriaigö ba nifalua Gereja si no sambua owuloa, ba ma ero zamösana, ba no ba wangoroma’ö Yesu Keriso ba gotalua niha sato.
B. LALA WAMALUA :
1. Fasurito.
2. Fanofu ba fanema li.
3. Famatöfa ba wa’auri.
4. Fame’e halöŵö.
C. FAKAKE NI’OHUNA’Ö :
1. Buku Laudate.
2. Amabu’ula Li Si Bohou.
3. Buku Wamahaö ba Sakramen Krisma.
D. INÖTÖ NI’OGUNA’Ö : 60 – 90 miniti.
E. BOSI-BOSI WAMALUA FAMAHAÖ :
1. Famobörö :
a. Sinunö Famobörö : Laudate No. 78:1-3.
b. Fangandrö Famobörö :
S : Damangandrö ita.
S+N: † Ba Döi Nama ba Ono ba Eheha Ni’amoni’ö. Amen.
S: He So’aya ya’aga, Yesu Keriso; masuno Ndra’ugö ba ma’andrö saohagölö khöU, börö wondrorogö ba fa’omasiU si no matema bakha ba wa’aurima sero ma’ökhö, irege no tola owulo zui ndra’aga ba nahia andre sifao fa’omuso dödö. Ma’andrö khöU: fahowu’ö ndra’aga fefu, ena’ö tola mafalua wamahaö andre, sifao fa’asökhi. Simanö gangandröŵama nifa’emama khöU, Ya’ugö zauri ba samatörö awö Nama ba wa ha sambua khö Geheha Ni’amoni’ö sagötö fa’ara. Amen.
2. Fehede Famasao :
Ya’ami ira Talifusö ni’omasi’ö ba khö Yesu Keriso. Ba wamahaö si me önö andre, tafatunö sambua duho ya’iada’ö: MANGOROMA’Ö YESU KERISO BA GOTALUA NIHA SATO. Bakha ba surito Mbuku Ni’amoni’ö, ba da’ö dania tarongo wamaduhu’ö Yohane same’e fanasa sanandrösa khö Yesu, me imane: “Hiza Nono Mbiribiri Lowalangi, sangeheta horö gulidanö. Ya’ia andrö niẃa’ögu si tohare furigu, si no oföna moroi khögu, börö me no so Ia fatua lö so ndra’o”. Databörögö khöda wamahaö andre sifao fangodödögö.
3. Fama’ema Famahaö :
a. Fasurito modanedane ba Yohane 1:29-34 :
Samahaö isuritokö khö ndra sifao ba wamahaö hewisa wamaduhu’ö Yohane same’e fanasa sanandrösa khö Yesu :
FAMADUHU’Ö YOHANE
SANANDRÖSA KHÖ YESU
So samösa zama’ele’ö, töinia Yohane same’e fanasa. Yohane andre, me i’ila wa I’ondrasi ia Yesu, ba imane ba niha sato : “Hiza Nono Mbiribiri Lowalangi, sangeheta horö gulidanö”. Sanandrösa khö Yesu andrö, imane Yohane : si tohare furigu, sindruhunia, no oföna moroi khögu, börö me no so Ia fatua lö so ndra’o nasa ba gulidanö andre. Ba mböröta, lö i’ila Yohane haniha Yesu, ba hiza, börö dandra si’oroi Lowalangi, wa tola aboto ba dödönia haniha Yesu andrö.
Me inötö Itema wanasa Yesu moroi khö Yohane ba nidanö Yoridano, i’ila Yohane Geheha si möi tou moroi ba zorugo, hulö marafadi, ba I’iagö yaẃa Yesu. Imane Lowalangi samatenge Yohane ba wame’e fanasa : “Ni’ilau si möi tou Eheha, ba I’iagö yaẃaNia, Ya’ia andrö zame’e fanasa faoma Eheha Ni’amoni’ö.” Ba sindruhu itörö niẃa’ö Lowalangi andrö, irege imane Yohane : No u’ila da’ö, andrö wa ufaduhu’ö, wa no Ono Lowalangi Yesu andrö.
b. Fangabakhai’ö Surito Mbuku Ni’amoni’ö :
Samahaö ibe’e wanofu khö ndra nifahaö ba wangabakha’ö surito moroi ba Mbuku Ni’amoni’ö si no mufatunö nomege:
1) Hadia no irai mirongo surito Yohane same’e fanasa andrö? Hadia zaboto ba dödömi sanandrö khö Yohane andrö?
2) Hadia manö zadöni dödömi ba surito nomege? Na so atö zadöni dödömi, fatunö khöda!
c. Fombaso Buku Ni’amoni’ö : Yohane 1:29-34 :
29 Mahemolu ö, i’ila Yohane, wa I’ondrasi ia Yesu, ba imane : “Hiza Nono Mbiribiri Lowalangi, sangeheta horö gulidanö.
30 Ya’ia andrö niẃa’ögu si tohare furigu, si no oföna moroi khögu, börö me no so Ia fatua lö so ndra’o.
31 Lö u’ila Ia ba mböröta, ba hiza, ena’ö to’ele Ia ba Ndraono Gizara’eli, da’ö dani wa so ndra’o ba wame’e fanasa faoma idanö”.
32 Ba ifaduhu’ö Yohane wanguma’ö: “U’ila Geheha si möi tou moroi ba zorugo, hulö marafadi, ba I’iagö yaẃaNia.
33 Me inötö da’ö, lö u’ila haniha Ia; ba hiza, Lowalangi samatenge ya’o ba wame’e fanasa, no Imane khögu : Ni’ilau si möi tou Eheha, ba I’iagö yaẃaNia, Ya’ia andrö zame’e fanasa faoma Eheha Ni’moni’ö.
34 No u’ila da’ö ba ufaduhu’ö, wa Ono Lowalangi Ia”.
d. Fangabakhai’ö Taroma Li Lowalangi :
Samahaö ibe’e wanofu khö ndra nifahaö soguna ba wangabakhai’ö Taroma Li Lowalangi si no mubaso nomege:
1) Haniha döi zama’ele’ö nitutunö bakha ba womaso Buku Ni’amoni’ö nomege?
2) Hadia niẃa’ö Yohane ba niha sato, me i’ila I’ondrasi ia Yesu?
3) Ba mböröta, hadia aboto ba dödö Yohane haniha Yesu andrö, ba hewisa dania wa tola aboto ba dödönia Yesu andrö?
4) Hadia niẃa’ö Lowalangi khö Yohane sanandrösa khö Yesu?
e. Famatöfa ba wa’auri :
1) Yohane same’e fanasa, ibe’e wamaduhu’ö sanandrösa khö Yesu, imane : “Da’ö sa wa’omuso dödögu, ba iada’e afönu wa’omuso dödögu andrö. Lö tola lö’ö tedou wa’ebuaNia, ba ya’o lö tola lö’ö awuwu” (Yoh. 3:29c-30). Eluaha wamaduhu’ö Yohane andre sanandrösa khö Yesu ya’iada’ö, wa fefu wehede ba nifalua Yohane, tenga soguna khönia samösa, ma ena’ö tehöngö döinia; ba hiza ena’ö aboto ba dödö niha gulidanö, wa Yesu no Sangöhöli. Sifao fehede ba nifaluania, Yohane same’e fanasa iforoma’ö Yesu ba gotalua niha sato.
2) Simanö göi wa fefu nituriaigö ba nifalua Gereja si ha sambua, ba hegöi ero zamösana ndrotondrotonia, tenga soguna khönia samösa; ba hiza ena’ö fe’aso Yesu Keriso solohe fangorifi andrö, larasoi ba la’ofa’aurifagö ero’ero samösa niha. Hulö simane niẃa’ö Yohane same’e fanasa, Yesu Keriso si lö tola lö’ö itugu ebua ba itugu aboto ba dödö niha fefu, wa Ya’ia Sangorifi soi niha fefu.
4. Fame’e Halöŵö Ndra Nifahaö :
Samahaö ibe’e zinanö ba dödö khö ndra nifahaö moroi ba wombaso Taroma Li Lowalangi si no mu’abakhai’ö nomege.
“HIZA NONO MBIRIBIRI LOWALANGI, SANGEHETA HORÖ GULIDANÖ. NO U’ILA DA’Ö BA UFADUHU’Ö, WA ONO LOWALANGI IA” (Yoh. 1:29.34).
5. Fangasiwai :
a. Fangandrö Fangasiwai.
S : Damangandrö ita.
He Yesu Keriso, Ono Nama, ma’andrö saohagölö khöU ba masuno wa’ebua dödöU andrö si falukha ya’aga fefu. No Örorogö noso ba boto, ba Öbe’e wa’abölö khöma, irege no tola mafalua wamahaö andre sifao fa’asökhi. Ma’andrö khöU, abölö’ö ndra’aga ena’ö tola matara lahe Yohane same’e fanasa ba wamaduhu’ö awö ba wangoroma’ö Ya’ugö ba gotalua niha sato. Simanö gangandröẃa khöU, Ya’ugö zauri ba si lö mamalö sagötö fa’ara. Amen.
b. Sinunö Fangasiwai : Laudate No. 72:1-2.
0 comments:
Posting Komentar