LUO MIGU PASKA SI – 4 DÖFI C

 FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, mofanö ndra Faulo ba Baranaba moroi ba mbanua Warega, numalö ira ba Gandriokhia ba Wizidia. Möi ira ba nomo wangandrö, me luo Sabato. Me no aefa gowuloa, ato niha Yahudi awö zi faböbö ba agama khöra, zolo'ö ira Faulo Baranaba. Fahuhuo ira khöra, lafarou dödöra, ena'ö böi labulö'ö ira ba wamati, nibe'e Lowalangi khöra ba wa'ebua dödöNia.

Ba luo Sabato fanete da'ö, arakhagö fefu niha ba mbanua andrö zangondrasi ba wamondrondrongo taroma li Zo'aya. Me la'ila niha sato andrö niha Yahudi, tesao wa'afökhö dödöra ba lafadaö niŵa'ö Waulo, mamadaö ba wanandraŵa. Lamane ira Faulo Baranaba, lö aiŵö ira : "Lö tola lö te'ofönai'ö khömi wangombakha taroma li Lowalangi. Ba hiza, börö me lö omasi ami wanema, no mihonogöi samösa, wa tenga sinangea ami wanema fa'auri sindruhu andrö. Börö da'ö maröi ami ba möi ndra'aga ba soi niha bö'ö. Simanö sa ni'oroi'ö Zo'aya khöma: "No Ube'e haga soi niha bö'ö ndra'ugö, ena'ö ö'ohe wangorifi ba zi sagörö ulidanö." Me larongo da'ö niha si tenga niha Yahudi, omuso sibai dödöra ba lasuno daroma li Zo'aya. Niha nihonogöi Lowalangi wanöndra fa'auri si lö aetu, faduhu dödöra.

Teboloso daroma li Zo'aya ba danö andrö ma'asagörö. Ba lafawe'e niha Yahudi ndra salaŵa mbanua, awö ndra alawe satulö, nga'ötö zalaŵa. Lafatumbu'ö wa'udusa khö ndra Faulo Baranaba, ba lafofanö zi darua andrö moroi ba mbanua da'ö. Ba ya'ira, ba la'anotogö khöra gawugawu andrö ba gahera, möi ira ba Nikonia. Fahöna khö ndra nifahaö wa'omuso dödö ba Eheha Ni'amoni'ö.- HalRas 13:14.43-52

Simanö daroma li Lowalangi.-   

Sinunö Fanema Li : Psallite No 100 Ant. 3                      (ma Laudate No 72)

 

FOMBASO  II

Taroma Li Lowalangi nihalö moroi ba zura Wama'ele'ö.-

Ya'odo, Yohane, ufaöga hörögu ba u'ila : Hiza, niha sato sibai, si tebai mu'erai. Ya'ira no moroi ba ngawalö soi, moroi ba niwa fefu, moroi ba ngawalö mado ba moroi ba li fefu. Musindro ira föna dadaoma andrö ba föna Nono Mbribiri andrö. No la'onukha nukha safusi ba la'ohe mbulu nohi ba dangara.

Humede samösa ba gotalua ndra satua (si duawulu a öfa) andrö, imane khögu : "Ya'ira andrö, no latörö wamakao sabölöbölö. Ya'ira zi no manasai ba ndro Nono Mbiribiri andrö, irege tobali afusi. Da'ö mbörö, wa tola musindro ira föna dadaoma Lowalangi andrö, awö wa no enoniNia ira ba nomoNia ni'amoni'ö, bongi ma'ökhö. Ya'ia sidadao ba dadaoma andrö zolumö'ö ya'ira. Lö'ö sa'ae olofo ira, ba lö'ö sa'ae owökhi dödöra, ba lö göna ira sino,

ma fa'aukhu, me Ikubaloi sa'ae ira Ono Mbiribiri andrö, si so ba dalu dadaoma andrö, ba Ifasao ira ba gumbu nidanö same'e fa'auri. Ba Lowalangi zolosi dania fefu daŵa hörö ba höröra andrö."- Fam 7:9.14b-17

Simanö daroma li Lowalangi.-

 

Sinunö Föna Injil : Psallite No 239                                 (ma Laudate No 103)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra niha Yahudi : "Larongo liGu biribiriGu. U'ila ira, ba la'o'ö Ndra'o. Ube'e khöra wa'auri sindruhu. Lö tekiko ira, götögötö wa'ara, ba samösa lö si tola manöbi ya'ira moroi ba wondrorogöGu. Börö me abölö ebua moroi ba hadia ia fefu NamaGu, same'e ya'ira khöGu. Ba samösa lö si tola morabu ya'ira ba wondrorogö Nama. Ha sambua Ndra'aga Nama".- Yoh 10:27-30

Simanö duria somuso dödö khö Zo'aya ya'ita, Yesu Keriso.-

 

Fanörö TanöWe'amöi ba Stasi [Dok. Pribadi]

Erönua:

LÖ MAMALÖ HOWUHOWU BA NIHA SANURIAIGÖ TURIA SOMUSO DÖDÖ

Bakha ba wombaso siföföna tarongo hadia zalua ba lala wanuriaigö nifalua Waulo ba Baranaba. Fe’amöira ba mbanua Warenga andrö ba wanuriaigö Turia Somuso Dödö sindruhu wa so dabitabi. So niha sanema’ö, ba so göi niha si lö manema’ö. Ba hiza omasi Lowalangi wangoroma’ö Ya’ia si fao fama’ema Gereja. Iada’a tola manofu ita ba dödöda zamösana, hewisa na teduhö ita khöNia? Turia somuso dödö andrö idölö manö wofanö, he ŵa’ae lö fao ita mena’ö, ba hiza ya’ia tobali samaduhu’ö solaŵa ya’ita.

Bakha ba wombaso sidua tarongo göi wama’ele’ö Yohane sanadrösa ba niha si no mate börö wanuriaigö Turia Somuso Dödö andrö. Fefu ndra niha andrö ba no somuso tödö ira ba ngai Nama ba gamatöröwaNia. Na ba wa’auri wa’aniha, fanuriaigö andrö ba no sambua lala halöwö saoha na lawa’ö ba hiza abua ba wolo’ö ya’ia. Abua wolo’ö börö wolohi niha. Andrö lö ahölihöli dödö na alio si’ai ita wanguma’ö : Alai !- Ba niha si tosasa ma ba niha nibunu börö duria somuso dödö. Ba hiza ya’ira andrö sa dania ni’orifi ba sanema fa’auri si falawu.

Bakha ba Duria Somuso Dödö andrö sindruhu ibe’e khöda wangaro dödö Yesu. Yaita niha samati khö Yesu Keriso andrö sindruhu no tana khö Yesu Keriso ita, ba lö niha sitola mamadöni ya’ita moroi khöNia. Na ta’angeraigö ha wa’ato niha Keriso nifakao ba nibunu bakha ba waöwaö wa’auri Gereja, irugi  ma’ökhö. Ya faduhu dödöda wa ya’ira andrö tekiko dali mboto tanö andre ba hiza ya’ira andrö lö tekiko simane fanguma’ö niha gulidanö, ba hiza lö mamalö ba danga Nama so ira ba latema wa’auri si lö aetu.

Ba zitölu ngawua wombaso andre, sindruhu te’oroma’ö khöda hewisa niha sanuriaigö turia somuso dödö andrö. Faulo ba Baranaba andrö no sambua famaedo khöda. Ba wanuriagöra andrö so zanema’ö ba lö göi aefa wa so zolohi. Solohi börö wanandrawaisi ba famöbölö si lö duhu. Ba wolohi andre, sindruhu ibe’e sambua dahataha ba niha somasi molo’ö. Ha saae sanau ölö irugi gamozua da’ö ni’orifi.

Fanuriaigö andrö lö mamalö so wolohi. Fanuriaigöda Paskah wemaoso Keriso andrö, lö göi mamalö so wanandraigö. Na so niha sanema’ö Turia andrö ni’oheda ba ena’ö ahono khöra nono wa’omuawua dödö andrö. Ba ba niha si lö manema’ö ma mendrua manö na so zanandrawaisi, data’anotogö gawugawu ba gaheda. Ma no tobali ia niha baero ba khöda. Hiza fanuriaigöda turia somuso dödö andrö so ia ba wehededa, ba gamuatada, ba ba wariawösada bongi ma’ökhö.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011