TAROMA LI LOWALANGI LUO MIGU PASKA SI – 3 DÖFI C

FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, la'ohe ndra rasul föna rafe sebua. Ifareso ira ere sebua, imane : "No mategu sibai ami, ena'ö böi sa'ae mamahaö ami sanandrösa ba khö Yesu andrö. Ba hiza, hadia zi no milau? Mifazaewe wamahaömi andrö ba zi sagörö mbanua Yerusalema ba mibe'e ba h,,,,,,,,uluma, wa börö ndra'aga wa mate Niha andrö." Latema linia ira Fetero, awö ndra rasul tanö bö'ö, lamane : "Lö tola lö'ö ma'o'ö khö Lowalangi ba tenga ba niha. Yesu, niforöfami andrö, no I'orifi mangawuli Lowalangi ndra tuada. Ba no Ibe'e khöNia wetaro awö kuaso salaŵa, tobali samatörö ba sangorifi, ena'ö tola lasöndra wamalalini era'era, ba fangefa horö Iraono Gizara'eli. Samaduhu'ö ndra'aga ba da'ö fefu, ya'aga ba he göi Eheha Ni'amoni'ö nibe'e Lowalangi ba niha solo'ö liNia." Aefa da'ö, lategu ndra rasul, akha böi sa'ae mamahaö sanandrösa khö Yesu, awena la'efa'ö ira. Laröi sa'ae rafe sebua, omuso dödöra, me no tetehe khöra, la'o'aya ira börö döi Yesu andrö.- HalRas 5:27-32.40b-41

Simanö daroma li Lowalangi.-

 

Sinunö Fanema Li : Psallite No 30                            (ma Laudate No 71, 1-2)

 

FOMBASO  II

Taroma Li Lowalangi nihalö moroi ba zura Wama'ele'ö.-

Ya'odo, Yohane andre, ufaöga hörögu ba urongo li ndra mala'ika si no ato sibai, si fasui dadaoma andrö. Fao göi si öfa nga'eu saliŵaliŵa ba danö, awö ndra satua (si dua wulu a öfa) andrö. Fa'ato ndra mala'ika andrö no mewulu ngahönö wa fulu ngahönö ba me hönö wa hönö. Manunö ira si fao fa'ebua li, lamane : "Ono Mbiribiri andrö si no mutaba, no sinangea ba wanema fa'abölö, fa'akayo, fa'atuatua, kuaso, sumange, lakhömi ba fanuno." Ba fefu hadia ia nifazökhi Lowalangi, he si so ba zorugo ba he si so ba gulidanö, he si so barö danö ba he si so ba nasi, urongo wa fao ira fefu wanguma'ö: "Ya'ia, si dadao yaŵa ba dadaoma andrö, ba Ono Mbiribiri andrö, sinangea wanema sömba ba sumange ba lakhömi ba fa'abölö, irugi zi lö aetu !" Lamane  saliŵaliŵa ba danö andrö si öfa nga'eu : "Amen !" Ba latuhi danö ira satua andrö, mangalulu ira.- Fam 5:11-14

Simanö daroma li Lowalangi.-

 

Sinunö Föna Injil : Psallite No 231                                (ma Laudate No 92B)

INJIL

Turia Somuso Dödö khö Yesu Keriso nisura Yohane.-

Me luo da'ö, Ifuli Iforoma'ö Ia Yesu khö ndra nifahaöNia, ba zinga mbaŵa Diberia andrö. Simane wangoroma'öNia Ya'ia : Owulo ndra Simoni Fetero ba Toma, nifotöi Sifaero, ba Natanaeli moroi ba Kana ba danö Galilaia, ba ono Zebedai'o si darua andrö, ba darua nifahaö Yesu tanö bö'ö. Imane Simoni Fetero ba danö bö'ö andrö : "Möido mangai i'a." Lamane khönia : "Fao göi ndra'aga." Mofanö ira, möi ira yaŵa ba dundraha. Ba hiza, sara wongi lö ahulu ira, sara i'a lö lasöndra.

Me moluo sa'ae, tohare Yesu, Ilau muzizio ba gawu. Ba hiza, lö la'ila ira nifahaö, wa Yesu da'ö. Imane khöra Yesu : "He iraono, hadia so khömi ma'ifu ndriwo ?" Lamane khöNia : "Lö'ö." Imane khöra Yesu : "Milau ndrialami tanö ba gambölö dundraha, awena misöndra gi'a !" Lalau ndriala ba nidanö, ba hiza, tebai ira wondröni mangawuli, börö wa'oya gi'a. Si samösa nifahaö andrö, ni'omasi'ö Yesu, imane khö Wetero : "So'aya da'e." Me irongo Simoni Fetero zanguma'ö : So'aya da'e ! –  i'anemai'ö ifake mbarunia (börö me no iheta mbarunia), awena ifazaumba ia bakha ba nidanö. La'o'ö ia ira nifahaö bö'ö faoma tundraha numalö ba danö, awö wa ladöni ndriala andrö safönu i'a. Lö aröu i'otarai danö so ira, ha mato otu mete.

Me möi ira baene, la'ila mbo galitö tou ba danö, ba sara gi'a ba detenia, awö roti. Imane khöra Yesu : "Mi'ohe gi'a andrö, sawena mihalö ösa." Numalö ba ndrundaha Zimoni Fetero, ba idöni ndriala andrö yaŵa ba danö, no afönu i'a segesolo, otu a lima wulu a tölu rozi wa'oya fefu. Ba he ŵa'ae oya gi'a andrö, lö asika ndriala. Imane khöra Yesu : "Mi'aine, milau manga !" Samösa lö si barani ba gotalua ndra nifahaö wanofu khöNia 'Haniha Ndra'ugö ?' – me no la'ila, wa So'aya. I'ondrasi ira Yesu, Ihalö roti no mege, Ibe'e khöra. Simanö göi wolauNia ba gi'a andrö.

Da'e zi medölu kali I'oroma'ö Ia Yesu khö ndra nifahaöNia, me no aefa auri Ia mangawuli moroi ba wa'amate. Me aefa manga ira, Imane Yesu khö Zimoni Fetero : "He Simoni, ono Yohane, - hadia, abölö omasi'ö Ndra'o, moroi ba niha andre ?" Itema li Fetero, imane : "Ya'ia, So'aya.- Ö'ila, wa u'omasi'ö Ndra'ugö." Imane khöNia Yesu : "Kubaloi nono mbiribiri khöGu." Ifuli Isofu khönia Yesu, no mendrua kali : "He Simoni, ono Yohane, hadia omasi'ö Ndra'o ?" Imane Fetero : "Ya'ia, So'aya.- Ö'ila, wa u'omasi'ö Ndra'ugö." Imane khöNia Yesu : "Rorogö mbiribiriGu !" Ifuli Isofu khönia Yesu, - no medölu kali : "He Simoni, ono Yohane, - hadia, omasi'ö Ndra'o ?" Abu dödö Wetero, me Ifuli Imane khönia Yesu, - no medölu : "Hadia omasi'ö Ndra'o ?" Ba imane khöNia : "He So'aya, fefu hadia ia Ö'ila, ba no Ö'ila, wa u'omasi'ö Ndra'ugö." Imane khönia Yesu : "Kubaloi mbiribiriGu !" Yoh 21:1-17

Simanö duria somuso dödö khö Zo'aya ya'ita, Yesu Keriso.-

 

Erönua:

Bakha ba wombaso siföföna andre sindruhu te’oroma’ö hewisa me ibörögö la’ohe ba rafe sebua ndra Rasul. Fanuriaigöra Yesu andrö si no te’orifi moroi ba gotalua zimate, no möi börö wa’ata’u ba khö ndra ere sebua andrö. Ba hiza, lö fa’ata’ö khö ndra Rasul börö kuaso wemaoso Yesu andrö nitemara. Itugu tetenawa ira ba itugu manö na sa laturiaigö duria Yesu andrö. Salua khö ndra Rasul andre sindruhu ibe’e khöda sambua wa’aro dödö ba wanuriaigö Yesu andrö. Na sindruhu wanuriaigö satulö andrö, ba lö moguna ata’u.

Bakha ba wombaso sidua sindruhu oroma khöda hewisa wama’ele’ö Yohane andrö. Ba da’ö i’ombakha’ö hewisa nono mbiribiri si no mutaba andrö ba no tefolakhömi. Ono mbiribiri andrö ba ya’ia Yesu andrö si no teforöfa. Ya’ia andrö nisuno ba si so ba dadaoma wa’arazo Nia Iraono Gizara’eli. Khönia no tebe’e kuaso ba lakhömi awö sumange si’oroi Lowalangi. Andrö ya’ita soi Lowalangi si bohou ba sanuno Lowalangi awö NonoNia si ha samösa. Ba wanunoda, tehawui ita lakhömi Lowalangi ba Ono Mbiribiri.

Bakha ba wombaso turia somuso dödö andre, sindruhu I’ombakha’ö khöda hewisa wangoroma’ö wa no maoso Yesu andrö simedölö khöndra nifaha’ö. Falukhata simedölu andre ya’ia ba zinga mbawa andrö. Ba hiza sambua zahöli dödöda ba wahuhuosa Yesu ba Fetero andrö, ya’ia wanofu Yesu andrö simedölu khö Wetero. Fanofu andre simedölu mo’amakhaita sibai ia ba wame’e Yesu kuaso khö Wetero. Kuaso nibe’e Yesu andrö khö Wetero ya’ia ba wokubaloi biribiriNia andrö. Ba hiza, hadia geluaha wanofu simedölu andrö? Eluaha wanofu simedölu andrö ba ya’ia wangoroma’ö hadia si’oroi dödö wamalua oroisa andrö.

Ba zitölu ngawua wombaso andre sindruhu I’oroma’ö khöda hewisa ita ba wanuriaigö turia somuso dödö andrö. Ba wanuriaigö turia somuso dödö andrö sindruhu ena’ö si’oroi dödö. Na si’oroi dödö wanuriaigö turia somuso dödö andrö, lö mamalö turia nifa’ema andrö so lakhömi ba kuasonia. Hadia zitobali lakhömi ba kuasonia, ya’ia na fehede nituriaigö andrö tola latema’ö sifao fa’omuso dödö ba fa’asinangea. Lakhömi si so andrö ba ya’ia na turia nifa’ema andrö tola ibe’e wa’ohahau dödö ba niha sanema ya’ia.

Ba gafuriata tola göi mu’angeraigö, hewisa göi wanuriaigö andrö ba zino mutalu’i? hadia no so tandratandra kuaso ba lakhömi? Na lö’ö, ena’ö lö mamalö moguna mubohouni mangawuli. Simane fa’oya wangosilö’ögö Yesu Fetero, simanö göi wa’oya me ifuli Isusugi wa’omasi Wetero khö Yesu, ba simanö wa’oya me Ifataro ia ba wa’atobali kubalo ngawawa Zo’aya. Ha bakha ba wa’omasi Zo’aya mowua wa’aurida, tobali sökhi ba mofodu.

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011