TAROMA LI LUO ZUMAHA SEBUA (HARI JUMAT AGUNG)

FOMBASO I
Taroma Li Lowalangi nihalö moroi ba zura Yesaya, sama'ele'ö.-

Imane So'aya : Hiza, mofozu wolau GenoniGu andrö, molo'ö nihonogöiGu : Salaŵa dania ia, tefosumange sibai. Simane fa'atobali dödö niha sato mege khönia, börö me tenga famaedo niha sa'ae mbotonia, simanö dania, wa ato zi tokea soi niha ibe'e; ba  börö ia dania, wa lö hedehede ndra razo sa'ae, me la'ila zi lö irai mutunö khöra ba me larongo zi lö irai murongo ba khöra.- Ba lamane : Haniha zi faduhu tödö ba ni'ombakha'ö khöda, ba ha'ökhö manandrösa wa'abölö danga Lowalangi ? No manöi Ia, fönaNia, hulö lewiö, tumbu moroi ba danö si no oköliköli. Botonia lö sökhi sa'ae ba lö moadu, lö edöna dödöda wamaigi ya'ia, ni'ositengagö ia ba ni'erogö niha. Si no fahöna fa'afökhö ia ba si no to'ölö ba wökhö. Ni'ositengagö ia, irege labalugö mbawara fönania, fa lö ba dödöra ia.

Ba hiza fökhöda nilu'inia, ba no Ihare'ö khönia So'aya zafökhö khöda. Tawalinga, Lowalangi zanguhuku ba samözi ya'ia. Ba hiza, lalöda mbörö, wa tefesokho ia, ba horöda mbörö, wa terasa ia. Ya'ia zolu'i huku, ena'ö sohahau tödö ita, ba moroi ba zokhonia, wa no döhö wökhöda. No elungu ita fefu, hulö mbiribiri, ha lalania ni'ila zamösana. Khönia no Ihare'ö So'aya horöda, dozi ita. He ŵa'ae tefakao ia, iköwö manö ia ba lö hedehedenia, hulö nono mbiribiri ni'ohe ba wanaba. No lara'u ia, lahuku ba labunu; ba samösa lö niha solau rörönia. Ba hiza, olalöŵa niha sato mbörö, wa tetibo ia moroi ba danö  niha sauri, awö wa terasa ia. Ba gotalua niha sebua horö lako'o ia ba ba ngai zolau si lö sökhi labe'e lewatönia, he ŵa'ae lö nifazökhinia si lö sökhi ba he ŵa'ae lö falimosa ba mbewenia.

Ba no fatema ba dödö Zo'aya GenoniNia si no tefufu, andrö I'orifi ia, me no ibe'e fasömbata fameta horö wa'aurinia. Anau nosonia ba I'ila nga'ötönia, awö wa mofozu ba dangania zomasi Zo'aya. Börö wamakao sebua nitaögönia, wa'i'ila dania zahono dödönia. Ba wa'aboto ba dödönia andrö, wa ato dania zi falukha fangatulö. Andrö ebua dana khöNia ba zato andrö, ba Ya'ia zamaosa ba zato ahulua  ba wanuwö, böli gölöNia, me no Ibe'e ni'etu'ö nosoNia ba me no tebe'e awö zolalö Ia, lö lai wa no ilu'i horö zato andrö, awö wa no mangandrö ia salahi zolalö. Yes 52:13-53:12

Simanö daroma li Lowalangi.-                    Sato : Ma'andrö ...

 

Sinunö Fanema Li : Psallite No 31                      (ma Laudate No 52 ma 54)

 

FOMBASO II

Taroma Li Lowalangi nihalö moroi ba zura andrö ba niha Heberai'o.-

Ya'ami ira talifusö ! So khöda Gere sebua, si no möi bakha ba zorugo föna Lowalangi, Yesu, Ono Lowalangi andrö. Ere sebua si so khöda andrö tenga ere si tebai fao ba wamatöfa ba dödöNia wa'ambö fa'abölöda. No ere sebua Ia si no mutandraigö ba ngawalö hadia ia fefu, hulö simane ya'ita; awai i Ya'ia lö horö. Börö da'ö, data'ondrasi dadaoma wa'asökhi dödö andrö, böi aiwö ita, ena'ö tatema wa'ahakhö dödö, ba ena'ö falukha ita wa'ebua dödö ba fanolo, faudu ba ginötö moguna khöda.-

Ba ginötö so Yesu ba gulidanö andre, mu'ao Ia si fao fe'e, me mangandrö Ia, awö wa Ifa'ema gangandröŵaNia khö Lowalangi si tola mangefa'ö Ya'ia ba wa'amate. Ba no Ifondrondrongo Lowalangi gangandröŵaNia. He ŵa'ae Ono Lowalangi Ia, no ifamaha Ia ba wolo'ö moroi ba ngawalö hadia ia zi no itaögö. No mufo'ahonoa Ia. Ba börö da'ö tobali Ia umbu wangorifi ba niha solo'ö khöNia fefu.-  Heb 4:14b-16;5:7-9

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 161                              (ma Laudate No 106)

 

INJIL

 

Keterangan:

Hikaya Wamakao Zo’aya, si no mufa’anö andre tou, ba si sökhinia datölu zombaso : S = Sanutunö, Y = Yesu, N = Niha bö’ö.

 

S   Turia Wamakao khö Zo'aya ya'ita, Yesu Keriso nisura Yohane.-

 

Me luo da'ö, mofanö Yesu awö ndra nifahaöNia,

la'ötö mbombo Kendrona. So kabu ba da'ö,

ba da'ö bakha möi Yesu, awö ndra nifahaöNia.

No i'ila naha andrö Yuda, si manga mböliNia,

me asese möi ba da'ö Yesu, awö nifahöNia.

Möi Yuda ba da'ö, i'ohe ndra saradadu ba ira enoni gere sebua

ba ira enoni ndra farizai'o. La'ohe  wandru ba sulu ba fangöna.

I'ila Yesu hadia zedöna alua khöNia dania,

ba möi Ia baero, Isofu khöra :

Y  "Hadia ni'aluimi ?"

S   Latema liNia lamane :

N  "Yesu, banua Nazareta andrö."

Y  "Ya'odo da'ö."

S   So göi ba da'ö Yuda, si manga mböliNia, awöra.

Me Iŵa'ö khöra : Ya'odo da'ö, lawuwu ira furi,

alau tou ira ba danö. Ifuli Isofu khöra Yesu :

Y  "Haniha ni'aluimi ?"

S   Lamane :

N  "Yesu, banua Nazareta."

S   Itema lira Yesu, Imane :

Y  "No Uŵa'ö khömi Ya'odo da'ö.

     Na mi'alui Ndra'o, mifofanö da'e."

S   Ba zimanö alua zi no tehöna Iŵa'ö :

     He Ama, samösa lö si taya, niha nibe'eU ba dangaGu.

     So sara wöda khö Zimoni Fetero, isöbi ba ihare'ö

     khö genoni gere sebua, irege aetu dalinga kambölö.

     Malikho döi genoni andrö. Imane Yesu khö Wetero :

Y  "Fuli saembugö wöda andrö !

     Hadia, lö Ubadu nösi mako andrö, nibe'e NamaGu khöGu ?

S   Lara'u Yesu saradadu, awö kumandru

     ba ira enoni niha Yahudi andrö ba laböbö Ia.

     Siföföna la'ohe Yesu khö Hanasi, matua Gayafa.

     Ere sebua Gayafa zi döfi andrö. Ya'ia zo'amenesi niha Yahudi,

     wa abölö sökhi, ha samösa zi mate salahi sato,

     moroi na tekiko zi sambua soi.

     La'o'ö Yesu ira Simoni Fetero awö nifahaö bö'ö si samösa.

     No fa'ila li nifahaö andrö khö gere sebua, irege tola fao ia

     khö Yesu irugi golayama gere sebua. Toroi baero Wetero

     ba zinga mbawandruhö. Ba möi baero zui nifahaö si samösa andrö, si no fa'ila li khö gere sebua,

     fahuhuo ia khö ndra alawe sanaro mbawandruhö

     ba i'ohe bakha Wetero.

     Ba isofu khö Wetero ono alawe andrö, sanaro bawandruhö :

N  "Tenga ya'ugö göi nifahaö Niha andrö ?"

S   Imane Fetero :

N  "Tenga ."

S   No lahaogö galitö ira enoni awö ndra sanaro, o'afu ira, moleu ira.

     So göi Wetero ba da'ö woleu ba gotaluara.

     Ibe'e wanofu khö Yesu ere sebua sanandrösa ba nifahaöNia

     awö wamahaöNia. Itema linia Yesu, Imane :

Y  "Lö aetu fahuhuo Ndra'o föna niha sato. Mamahaö Ndra'o

     ba nomo wangandrö awö ba nahia gowuloa niha Yahudi.

     Lö huhuoGu ba zi tobini. Hana wa ösofu khöGu ?

     Sofu ba zi no mamondrongo hadia niŵa'öGu khöra.

     Hiza, ya'ira zangila hadia niŵa'öGu."

S   Me Iŵa'ö da'ö Yesu, ba itema ifalisi mbawa Yesu enoni,

     samösa si so ba da'ö, imane :

N  "Hadia, Ömanö wanema li gere sebua ?"

S   Itema linia Yesu, Imane :

Y  "Na sala wehedeGu, ombakha'ö hadia zi lö sökhi,

     ba na lö sala, hana wa öfakao Ndra'o ?"

S   Aefa da'ö ifatenge niha Hanasi wolohe Yesu

     khö gere sebua Kayafa, no laböbö dangaNia.

     No so nasa ba da'ö Zimoni Fetero, moleu. Lasofu khönia :

N  "Hadia, tenga ya'ugö göi samösa ba gotalua nifahaöNia ?"

S   Ba i'osilö'ögö, imane :

N  "Tenga."

S   Imane enoni gere sebua, samösa,

     si fahatö khö genoni andrö ni'eŵa Wetero talinga :

N  "Hadia, tenga no u'ila ndra'ugö, awöNia ba kabu andrö ?"

S   Ba ifuli i'osilö'ögö Fetero. Ba i'anema'ö miwo zilatao.

     Awena la'ohe Yesu ba gödo gumandru, la'otarai khö Kayafa;

     si hulö wongi. Ba lö möi ba nomo gumandru ira,

     fa lö latörö zalakha, börö me fao ira  wemanga gö Paska.

     Börö da'ö möi baero Wilato, wanofu khöra, imane :

N  "Hadia wangadumi ba niha andre ?"

S   Latema linia, lamane khönia :

N  "Na tenga solau si lö sökhi niha da'e, lö ma'ohe Ia khöu."

S   Imane Filato khöra :

N  "Ya'ami manö zamareso Ya'ia ba mi'etu'ö huku khöNia

     molo'ö huku agama ba khömi !"

S   Lamane niha Yahudi khönia :

N  "No tetenaŵa ndra'aga wame'e huku famunu ba niha."

S   Alua da'e faudu ba zi no Iŵa'ö Yesu

     sanandrösa ba lala wa'amateNia.

     Ifuli möi Wilato yomo ba nomo ba ikaoni Yesu, isofu khöNia :

N  "Hadia razo niha Yahudi Ndra'ugö ?"

S   Itema linia Yesu, Imane :

Y  "Hadia, moroi khöu öŵa'ö da'ö ma so niha bö'ö

     zi no mangombakha khöu sanandrösa khöGu andre ?"

S   Itema liNia Filato, imane :

N  "Hadia, niha Yahudi ndra'odo ? SoiMö samösa awö ndra ere sebua zame'e Ya'ugö ba dangagu; hadia horöU ?"

S   Itema linia Yesu, Imane :

Y  "Tenga  moroi ba gulidanö andre gamatöröŵaGu andrö,

     na moroi ba gulidanö andre gamatöröŵaGu,

     ba molaŵa niha si fao khöGu,

     faböi tebe'e Ndra'o ba danga niha Yahudi.

     Ba hiza, sindruhu tenga moroi ba gulidanö gamatöröŵaGu."

S   Imane khöNia Filato :

N  "Na simanö, hadia sindruhu razo Ndra'ugö ?"

S   Itema linia Yesu :

Y  "Ya'ia niŵa'öu, razo Ndra'odo. Andrö tumbu Ndra'o

     ba möiDo ba gulidanö, ba wamaduhu'ö sindruhu.

     Dozi niha si otarai zi duhu, da'ö niha sanema turia nifa'emaGu."

S   Imane khöNia Filato :

N  "Hadia zindruhu andrö ?"

S   Ifuli möi baero Wilato ba niha Yahudi, imane khöra :

N  "Lö nisöndragu sala khöNia. Ba hiza, molo'ö si to'ölö ba khömi,

     u'efa'ö samösa niha nikuru ba gowasa paska andrö.

     Hadia, omasi ami, ube'e aefa khömi Razo niha Yahudi andrö ?"

S   Mu'ao ira, lamane :

N  "Böi efa'ö Niha da'e ! Baraba andrö efa'ö."

S   Baraba no samösa sorabu.

     Aefa da'ö, ifahalö'ö Yesu Filato ba ifabözi'ö. Lafazökhi dakula

     wa'arazo moroi ba ndroi ira saradadu ba labe'e ba högöNia.

     Lafonukha Ia faoma baru sebua soyo ba la'ondrasi Ia, lamane :

N  "Ya'ahowu, Razo niha Yahudi !"

S   Ba lafalisi mbawaNia.

     Ba möi baero zui Wilato, imane ba niha sato :

N  "Hiza, u'ohe Ia baero khömi, ena'ö aboto ba dödömi,

     lö nisöndragu sala khöNia."

S   Möi baero Yesu, ba högöNia takula wa'arazo moroi ba ndroi

     andrö ba mobaru baru luo soyo no mege. Imane khöra Filato :

N  "Hiza niha andrö !"

S   Me la'ila Yesu ira ere sebua ba ira enoni andrö, ba mu'ao ira :

N  "Foröfa Ia ! Foröfa Ia !"

S   Imane khöra Filato :

N  "Mihalö Ia ba miforöfa manö. Ma'ifu lö nisöndragu sala khöNia."

S   Latema linia niha Yahudi, lamane :

N  "Molo'ö huku si so khöma, nihuku famunu Ia,

     börö me no Ibali'ö  Ono Lowalangi Ia."

S   Me irongo niŵa'öra andrö Filato, ba tedou wa'ata'unia,

     ifuli ia yomo ba gödo ba imane khö Yesu :

N  "Heza moroi Ndra'ugö ?"

S   Ba lö Itema linia Yesu. – Imane khöNia Filato:

N  "Hadia lö omasi'Ö fahuhuo khögu ? Lö Ö'ila wa so kuaso khögu

     wangefa'ö Ya'ugö ba so göi kuaso khögu wamoröfa Ya'ugö ?"

S   Itema linia Yesu, Imane :

Y  "Ma'ifu lö kuasou khöGu, na tenga nibe'e Lowalangi khöu.

     Andrö, horö niha same'e Ya'o ba dangau, abölö ebua."

S   Me irongo da'ö Filato, i'alui lala wangefa'ö Yesu.

     Ba hiza, mu'ao'ao niha Yahudi, lamane :

N  "Na ö'efa'ö niha da'ö, tenga si fahuwu khö kaisaro ndra'ugö.

     Niha sanguma'ö ya'ia razo, no si fa'udu khö kaisaro."

S   Me no irongo da'ö Filato, i'ohe baero Yesu, ilau mudadao ba

     gurusi wanguhuku, ba naha sotöi Nibale-Kara. Ba li Heberai'o

     lafotöi Gabata. Me inötö da'ö no arakhagö laluo; ba tebörögö

     gowasa Paska ba zi tanö owi. Imane Filato ba niha Yahudi :

N  "Ya'e Razomi !"

S   Ba mu'ao ira :

N  "Nibunu Ia ! Nibunu Ia ! Foröfa Ia !"

S   Imane khöra Filato :

N  "Hadia, omasi ami, uforöfa razomi ?"

S   Latema linia ira ere sebua, lamane :

N  "Lö razoma baero kaisaro."

S   Awena ibe'e Ia ba dangara, ena'ö laforöfa.

Lahalö Yesu. Ya'ia samösa zangosa'ö röfaNia. Ba möi ira baero numalö ba nahia sotöi Sole Högö, Gologata ba li Heberai'o.

ba da'ö laforöfa Ia ba darua nawöNia, samösa dambai,

ba gotaluara labe'e Yesu. Ifaŵa'ögö Filato, ena'ö ba högö röfa lasura : Yesu, banua Nazareta, razo niha Yahudi.

Ato niha Yahudi sombaso nisura andrö,

börö me lö aröu nahia wamoröfa Yesu moroi ba mbanua.

Tesura wehede andrö ba li Heberai'o, ba li Roma ba ba li Yunani. Lamane ira ere sebua ba niha Yahudi khö Wilato :

N  "Böi sura : Razo niha Yahudi ! Sura : No Iŵa'ö niha andre :

     Razo niha Yahudi Ndra'o :

S   Itema lira Filato, imane :

N  "Lö tebulö nisuragu andrö."

S   Me no aefa laforöfa Yesu ira saradadu, lahalö nukhaNia, la'o'öfa,

     sambua ni'o'öfa zamösa, awö gamezaNia. Si lö tagutagu gameza

     andrö, nisoso i'otarai miyaŵa numalö mitou.

     Faoma lamane khö nawöra :

N  "Böi tataba ia, datalau fadahödahö khönia, ha'ökhö möi ia."

S   Alua zimanö, ena'ö itörö zi so ba zura ni'amoni'ö, sanguma'ö :

     "Labagibagi khöra nukhagu ba lalau fadahödahö ba gamezagu."

     Da'ö nilau ndra saradadu. Ba zinga röfa Yesu muzizio nina Yesu,

      talifusö ninaNia, Maria, fo'omo Kelofasi, ba Maria, banua

     Magadala. Ifaigi ninaNia Yesu, awö nifahaö ni'omasi'öNia,

     Imane khö ninaNia :

Y  "He ina, faigi, hiza nonou !"

S   Aefa da'ö, Imane khö nifahaö andrö :

Y  "Faigi, hiza ninau !"

S   I'otarai da'ö, toröi nina Yesu ba nomo nifahaö andrö.

     Aefa da'ö aboto ba dödö Yesu, wa no awai fefu hadia ia.

     Ba ena'ö itörö zi no tesura ba zura ni'amoni'ö, Imane :

Y  Owökhi dödöGu."

S   So ba da'ö zamba naha safönu agu saisö. La'ungugö mbunga

     gara ba nagu andrö, latuwu ba mbalö döla zukhu ba la'oro'ö

     ba mbewe Yesu. Itandra nagu saisö andrö ba Imane :

Y  "No awai !"

S   Ileagö högöNia ba Itou'ö nosoNia.

 

Iada’e latuhi danö ba wangalulu khö Zo’aya, si no mate salahida

 

S   Luo Zumaha me luo da'ö. Börö da'ö la'andrö khö Wilato niha

     Yahudi, ena'ö itehegö khöra lafatö döla waha niha niforöfa andrö

     ba laheta ira, fa böi toröi ba röfa mbotora ba luo Sabato. Ba döfi andrö no luo sebua luo Sabato andrö. Möi ndra saradadu, lafatö döla waha si föföna, awena ganete andrö, darua nawö Yesu niforöfa. Me larugi Yesu, la'ila wa no mate Ia. Andrö lö lafatö wahaNia. Ihandro ngaiNia faoma toho samösa zaradadu,

     ba i'anema'ö alua ndro si faruka idanö.

     Niha sangila salua da'ö zamaduhu'ö da'ö, ena'ö mamati ami göi,

     ba duhu wamaduhu'önia. I'ila wa si duhu niŵa'önia.

     Alua zimanö, ena'ö itörö zi so ba zura ni'amoni'ö :

     "Sara töla böi mifatö khöNia !"

     Ba tesura göi ba zura ni'amoni'ö : "Anehe ira niha si no lafahö."

     Me no aefa da'ö, i'andrö Yosefo, banua Garimatia, khö Wilato,

     ena'ö tola iheta mboto Yesu. Solo'ö khö Yesu ia göi, ba ibini'ö,

     börö me ata'u ia ndra salaŵa niha Yahudi. Itehegö khönia Filato. Andrö  wa numalö ia wanga'i boto Yesu.

     Möi göi Nikodemo andrö (awö Yosefo). Ya'ia andrö zi no irai

     möi khö Yesu ba zi bongi. I'ohe gemuri awö gaharu Nikodemo.

     Fa'oya fefu mato tölu ngafulu kilo. Darua ira lahalö mboto Yesu,

     laböbö Ia faoma böbö nukha ba lalau zamohua,

     molo'ö hada niha Yahudi wogo'o si mate.

     So sambua kabu ba nahia wamoröfa Yesu andrö.

     Ba kabu andrö so lewatö si bohou,

     si lö irai mu'oguna'ö wogo'o niha.

     Me ahatö lewatö andrö, awö wa no ahatö luo Sabato,

     andrö wa labe'e mboto Yesu ba lewatö andrö.-              Yoh 18:1-19:42

 

Erönua:

Bakha ba wombaso sisara tarongo hewisa wehede Zo’aya andrö nifa’ema Yesaya. Ba da’ö ifa’ele’ö wa no sindruhu mofozu nifalua genoni andrö, irege tefolakhömi ia. Halöwö genoni andrö ba ya’ia ba we’amöi höli zato. Ba we’amöiNia höli zato andrö ba no tefalu’I’ö khöNia. Hewa’ae simanö, fe’amöiNia enoni Zo’aya andrö ba folo’öNia sifao fa’ahele dödö, no möi börö wamolakhömiNia. Enoni niwa’ö andrö ba wama’ele’ö Yesaya ba ya’ia Yesu Keriso.

Famaduhu’ö Waulo andrö bakha ba wombaso sidua, sindruhu I’oroma’ö khöda hewisa Yesu andrö si no ere sebua ba khöda ya’ita niha samati. Fa’atobaliNia ere sebua andrö ba no sindruhu itörö wanandraigö simane niha, ha awai gamaehuta, Ya’ia ba lö horö. Ba zimanö sindruhu idönia’ö ita Faulo ba wamati khöNia ena’ö Lö mamalö tasöndra wa’ahakhö dödö moroi khö Lowalangi. Ba zimanö tetötöi ia wa no ya’ia andrö tobali umbu wangorifi ba niha solo’ö ya’ia.

Turia somuso dödö ba no sindruhu i’oroma’ö khöda hewisa wa’omasi Yesu andrö ba we’amöiNia enoni. Fe’amöiNia enoni andrö sindruhu itörö wa’afökhö fa’akao. Teböbögö khönia zi lö atulö, ba hiza itema’ö da’ö fefu börö gohitö dödö Lowalangi ba wangoroma’ö fangöhöli andrö. Ba zimanö lö mamalö tefaduhu’ö wa’omasi sebua andrö. Fa’omasiNia andrö irugi ba itehe mate ba döla röfa.

Sitölu wombaso andre I’ohe ita ba zisambua furugö ya’ia wa’omasi sindruhu andrö ni’oroma’ö Lowalangi ba nitaögö Yesu ba döla röfa. Röfa andrö no tobali famohouni wahuwusa Lowalangi ba niha ba famohouni fahuwusa ba gotalua niha faoma awönia niha. Yesu si no enoni sanaögö da’ö fefu, ba no tobali ia khöda ere samokhouni amakhaita andrö. Ba da’ö idönia’ö ita Yesu ena’ö böi aiwö ita ba wangandrö ena’ö tebohouni gamakhaitada andrö khö Lowalangi. Ha sambua ndrela wamohouni ba ya’ia wangandrö fa’ahakhö dödö Lowalangi. Börö wamati ba khö Keriso sa, wa famohouni fawu’usa li andrö alio tefalua ia. Andrö ba wa’aurida böi tafamalö wangandrö fa’ahakhö dödö Lowalangi ba ena’ö göi tafalua wa’omasi andrö ba gotalua wa’atalifusötada. Amen.

Nifa’anö Kat. Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011