TAROMA LI BONGI ZUMAHA SEBUA

HARI  KAMIS  PUTIH

 FOMBASO I

Taroma Li Lowalangi nihalö moroi ba zura Moze si dua.-

Me luo da'ö, Imane So'aya khö ndra Moze A'aroni, ba danö Misirayi : Sia'a mbaŵa khömi dania mbaŵa da'e; böröta mbaŵa ia ba ndröfi. Mimane ba Ndraono Gizara'eli fefu : Ba zi mewulu ba mbaŵa da'e, ya mufaigi khönia nono mbiribiri zamösana, ero sambua omo, ba sarasara nono mbiribiri. Ono mbiribiri si lö hadia ia zi sala nifaigi, si matua ba si döfi fa'ebua; na tenga ono mbiribiri, ba ono nambi nitutuyu. Mihoe, irugi zi mewele'öfa mbaŵa, tanö owi lataba, dozi Iraono Gizara'eli. Ya muhalö ösa ndro ba lagule'ö ba gehomo, fatambai mbawandruhö ba ba högö mbawandruhö, ba nomo andrö, ba ni'a ya'ia. Ba ösinia, ba ba zi bongi andrö la'a, nitunu. Roti si lö mu'aisöni ba bulu ndru'u safeto nawö.  Ba mimane wemanga : Si no mamöbö talu ami ba mbadagahe ba gahemi ba si'o ba dangami. Mita'ita'i wemanga ya'ia ! PASKA ia khö Zo'aya, eluaha : Fanörö Zo'aya. Börö ba zi bongi andrö Utöröi danö Mesirayi ba Ububunu nono sia'a fefu ba danö Misirayi, he ba niha ba he ba guriföra. Do andrö ba nomo, ba zi so ami, ba tandra khöGu, fangorifimi; Na U'ila ndro andrö, ba Utalu'i ami, lö göna ami famakiko andrö. Ba baŵa da'ö, ba baŵa wanörötödö khömi dania; si lö tebulö khömi wolau ya'ia, irugi zi lö aetu.-  2 Moz 12:1-8.11-14

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 116B, Cara A    (ma  Laudate No  150 ma 99A)

 

FOMBASO II

Taroma Li Lowalangi

nihalö moroi ba zura Waulo si föföna

ba niha samati ba mbanua Gorindro.-

Ira talifusö ! Moroi khö Zo'aya samösa wangohonogöi, zi no ufa'ema khömi : Yesu So'aya, ba zi bongi, me te'a mböliNia, Ihalö roti, I'andrö saohagölö khö Lowalangi, Iboboto roti andrö ba Imane : "Mitema ba mi'a : BotoGu da'e, nibe'e soguna khömi. milau da'e ba wanörö tödö Ya'o !"-  Simanö göi me no aefa wemanga, Ihalö piala nagu ba Imane : "No amabu'ula li si bohou piala andre, nifotandro ba ndroGu." Ero na mi'a roti andre, ya'ami ira talifusö, ba na mibadu nösi piala andre,  mituriaigö wa'amate Zo'aya irugi mangawuli Ia dania.- 1 Kor 11:23-26

Simanö daroma li Lowalangi.                     Sato : Ma'andrö …

 

Sinunö Fanema Li : Psallite No 119C                            (ma Laudate No 95)

INJIL

Turia Somuso Dödö khö Yesu Keriso nisura Yohane.-

Me föna gowasa Paska andrö, aboto ba dödö Yesu,  wa no irugi inötö aheta Ia ba gulidanö andre, möi Ia khö Nama. No I'omasi'ö dana khöNia ba gulidanö, föna, ba  I'omasi'ö ira irugi gamozua. Me manga ira, maoso Yesu ba ngai gö, Ibokai mbaruNia sebua Iböbö lembe löwilöwiNia. Ilau nidanö ba naha wanasa, Ibörögö isasai gahe ndra nifahaNia ba I'osi lembe andrö, ni'olembeNia. Me irugi Zimoni Fetero, imane Fetero khö Yesu : "Ya'ugö zanasai ahegu So'aya ?" Itema linia Yesu, Imane khönia :  "Lö aboto ba dödöu iada'a hadia nilauGu, ba hiza, aboto ba dödöu dania." Imane khöNia Fetero : "Lö irai utehegö, wa Ösasai gahegu." Itema liNia Yesu Imane : "Na lö Usasai'ö, lö si faböbö khöGu ndra'ugö." Imane khöNia Simoni Fetero : "Na simanö, So'aya, böi ha ahegu Ösasai : tanga awö högö göi." Imane khönia Yesu : "No tehaogö mboto niha si no mondri. Lö moguna tesasai ia sa'ae; ha ahe zoguna nisasai. No muhaogö ami andre, ba lö dozi." Noa sa I'ila Yesu, haniha zi manga mböliNia. Da'ö mbörö Iŵa'ö : "Lö dozi muhaogö ami." Me no aefa Isasai gahera Yesu, ifuli I'obaru mbaruNia ba dumadao Ia, Imane khöra : "Hadia, no aboto ba dödömi nilauGu khömi andrö mege ?  Mibe'e töiGu Guru ba So'aya.  Si sökhi na miŵa'ö da'ö, börö me duhu. Na no Usasai gahemi, Ya'odo andre, So'aya ya'ami ba Guru khömi, mo'ömö göi ami, faoma misasai gahe nawömi. Ube'e dumaduma andre khömi, ena'ö göi milau simane nilaugu khömi.-  Yoh 13:1.4-15
Simanö duria somuso dödö khö Zo'aya ya'ita, Yesu Keriso. 

Erönua:

FE’AMÖI ENONI

Bakha ba wombaso sisara andre idunödunö khöda Moze hewisa wamakhoi Zo’aya wamalua Paskah andrö. Ba wamalua da’ö ba si lö tola lö’ö mu’o’ö, töratöra wogule’ö ma’ifu ndro gurifö andrö ba gehomo mbawandruhö nomo. Na mufalua goigoi paskah andrö ba ba ginötö itörö So’aya ba lö ihalö nono matua sia’a. Do nono gurifö andrö no fawu’usa li.

Sura Waulo bakha ba wombaso sidua andrö sindruhu ifaduhu’ö wa fefu hadia ia nihonogöigö andrö ba no nihonogöigö Lowalangi. Fangohonogöi andrö nifalua Yesu andrö ya’ia wangohonogöigö watomesa ni’amoni’ö (Penetapan Ekaristi). Famalua fatomesa andrö ba no sambua tandra wa wu’usa li, fanörötödö, ba fanuriaigö fangawuliNia dania.

Bakha ba wombaso Turia Somuso Dödö andrö teturiagö khöda hewisa me isasai gahe ndra nifaha’öNia andrö Yesu. Fanasa ahe andrö nifalua Yesu ba no sambua dumaduma ma asese lafotöi ia famaha’ö si’olohia’ö boto. Famaha’ö andre ba ya’ia wa sindruhu si’oroidödö we’amöi enoni. Fe’amöi enoni andrö ba ya’ia na sindruhu tola lafalua halöwö zawuyu andrö ya’ia wanasai ahe.

Sitölu ngawua wombaso andre ba edöna ifasao ba zi dombua faosatö zinangea mu’erönusi yaia wangohonogöi fatomesa ni’amoni’ö ba fanasai ahe. Fatomesa ni’amoni’ö andrö ba no tandra sihasambua ngambatö ita ba khö Keriso (satu keluarga dengan Kristus). Fatomesa andrö göi ba no sambua fawu’usa li, fanörötödö, ba fanuriaigö turia somuso dödö andrö ba niha ba gulidanö.

Fawu’usa li andrö mo’amakhaita ba wame’e Yesu dumaduma ba folo’ö moroi ba  niha nifaha’öNia. Fanörötödö andrö mo’amakhaita ia ba wa lö mo’aetufa wamalua we’amöi enoni andrö si no ibörögö Yesu. Fanuriaigö andrö mo’amakhaita ia ba wamaluada halöwö we’amöi enoni. Ba we’amöi enoni andrö ba da’ö zi no tobali sambua fanuriaigö si’olohia’ö boto ba tenga ha ba mbewe manö. Fanasa ahe andrö ba no sambua lala halöwö fondrege zide’ide nifalua samösa sawuyu.

Ba wa’auri sero ma’ökhö, fe’amöi enoni andrö fa’itaria so wamatou. Oya niha sanguma’ö möi enoni ba hiza oya ba gotalua da’ö zangandrö luonia ba we’amöi enoni andrö. Yesu zame’e dumaduma we’amöi enoni andrö, ya’ia wa lö khönia famatou töratöra wangandrö luonia. Ba we’amöi enoni andrö ena’ö hulö zisambua fongambatösa; me ba gotalua wongambatösa andrö faoma lö famatou töratöra wangandrö luo zamösana na faoma mangoni faoma fatambai. Ba we’amöi enoni andrö göi ba tenga börö lala halöwö sebua. Fe’amöi enoni andrö ya’ia na tola tafalua lala halöwö andrö he ha no ideide ia. Ya faoma itolo ita Lowalangi ba we’amöi enoni andrö. Amen.

 

Nifa’anö Kat. Kat. Ingatan Sihura, S.Ag.

 

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011