TAROMA LI LOWALANGI BA BONGI PASKA DÖFI C

 FOMBASO  I

Taroma Li Lowalangi nihalö moroi ba zura Moze si sara.-

Me luo da'ö, Itandraigö Gaberahamo Lowalangi, Imane khöNia : "He Aberahamo !" Imane Aberahamo : "Ya'e ndra'o !" Imane Lowalangi : "Halö nonou andrö si ha samösa,  somasi ndra'ugö, Iza'aki, ba ae ba danö Moriya. Ba da'ö be'e fasömbata nitunu ia, ba hili niŵa'öGu khöu dania." Mahemolu ö, ihulö wongi Aberahamo, ifosela galidenia, ikaoni darua genoninia, awö nononia Iza'aki, isisila geu fanunu wasömbata. Awena mofanö ira, numalö ba naha andrö, niŵa'ö Lowalangi khö Gaberahamo.

Me no dua wongi ba lala, ifaöga hörönia Aberahamo, ba oroma khönia naha andrö ba zaröu. Imane Aberahamo khö ndra enoninia : "Toröi ami ba da'e, awö galide ! Möiga misa mangandrö, daruaga ono. Na no aefa wangandrö, mafuliga khömi." Ihalö geu andrö, fanunu wasömbata, ibe'e noro nononia Iza'aki  ba ituyu galitö ba si'öli fanaba, ba mofanö ira, darua ira. Humede Giza'aki khö namania, Aberahamo, imane : "He ama !" Imane Aberahamo: "Ya'e ndra'o, onogu !" Imane Iza'aki : "Alitö ba eu, no so ba da'e. Heza so mbiribiri, fasömbata nitunu ?" Imane Aberahamo : "Ifaigi sa dania Lowalangi mbiribiri,  fasömbata nitunu, onogu !" Ba latohugö wofanö, darua ira.

Me no larugi naha andrö, niŵa'ö Lowalangi khö Gaberahamo, ifa'anö naha wame'e fasömbata Aberahamo ba ifa'anö geu. Awena i'amöbö'ö nononia Iza'aki ba ibe'e ba naha wame'e fasömbata andrö ba dete geu. I'oro'ö dangania Aberahamo, ituyu zi'öli ba wanaba ononia. Mu'ao khönia mala'ika Zo'aya moroi ba mbanua si yaŵa, imane : "He Aberahamo ! He Aberahamo !" Imane Aberahamo : "Ya'e ndra'odo !" Imane mala'ika : "Böi babaya nono andrö, böi fakao ia! Awena sa U'ila, wa no sangata'ufi Lowalangi ndra'ugö, me lö alimagö khöu nonou andrö, si ha samösa, ölulu khöGu."

Ifaöga hörönia Aberahamo ba i'ila zi matua mbiribiri, si no tokhai ba ndru'u tandrunia. Möi Gaberahamo, ihalö mbiribiri andrö ba ifasömba'ö, salahi nononia. Ibe'e töi naha andrö Aberahamo "Zanehe Zo'aya." Andrö wa laŵa'ö irugi ma'ökhö andre : "Ba hili andrö, ba ni'oroma'ö Zo'aya Ya'ia."

Ifuli mu'ao mala'ika khö Gaberahamo i'oroi mbanua si yaŵa, imane : "Fahölu Ndra'o khöGu, Iŵa'ö So'aya : Me no ölau da'ö, me lö salimagö khöu nonou andrö si ha samösa, ölulu khöGu, Uhöna khöu howuhowu, ba ato sibai dania ma'uwumö Ube'e, fa'oya ndröfi ba mbanua si yaŵa ba fa'oya ngawua nene ba mbewe nasi. Lakalaisi dania nudura ba la'owanua mbanuara. Ba moroi ba ma'uwumö tefahowu'ö dania fefu soi ba gulidanö, böli gölöu, me no ö'o'ö niŵa'öGu andrö."- 1 Moz 22:1-18

Simanö daroma li Lowalangi.-

Sinunö Fanema Li : Psallite No 16                                   (ma Laudate No 90)

 FOMBASO  II

Taroma Li Lowalangi nihalö moroi ba zura Moze si dua.-

Me luo da'ö, Imane So'aya khö Moze : "Hadia wa ö'angaröfi li Ndra'o ? Ŵa'ö ba Ndraono Gizara'eli, ya mufazaŵa ira ! Ba ya'ugö, fazaŵa zi'ou ba oro'ö dangau yaŵa nasi, ena'ö fabali nasi. Latörö dania dalu nasi Iraono Gizara'eli, hulö na ba zabe'e tanö so ira. U'abe'e'ö dödö niha Mesirayi, ena'ö lagohi Ndraono Gizara'eli. U'oroma'ö wa'abölöGu khö Wara'o, ba khö ndra saradadunia fefu ba ba guretania andrö ba ba zi fakudo andrö khönia. Awena aboto ba dödö niha Mesirayi, wa no Ya'o YAHWE – SI SO andrö."

Mala'ika Lowalangi, sowaöwaö mege föna Ndraono Gizara'eli, iada'e möi ia furira. Iheta göi ia fönara boto lawuo andrö, möi furira, irege so ia ba gotaluara niha Mesirayi Ndraono Gizara'eli. Ogömigömi mboto lawuo tanö ba niha Mesirayi. Ihagaini zi bongi tanö ba Ndraono Gizara'eli. Ba tebai fahatö ira zi sara wongi andrö.- I'oro'ö dangania Moze yaŵa nasi, ba I'alösi nasi So'aya sara wongi manö ba nangi sabölöbölö soroi gatumbukha luo, otufo nasi Ibe'e, fabali nidanö, irege latörö dalu nasi Iraono Gizara'eli ba lala si no oköli. Idanö nasi hulö mbagolö ba gabera ba ba gambölöra.- Lagohi Ndraono Gizara'eli niha Mesirayi, la'o'ö moroi furi, kudo andrö khö Wara'o fefu, awö gureta, awö zi fakudo, möi ira ba dalu nasi bakha.- Ba zihulöwongi, me miwo manu, Ifaigi So'aya ndra saradadu Mesirayi moroi ba mboto galitö andrö, moroi ba mboto lawuo ba Ifakuyu ira. Tetahataha  wa'ategaolo gahe gureta andrö khöra Ibe'e So'aya, irege tosasa ira. Lamane niha Mesirayi : "Datalau moloi, me So'aya zi fasöndra khöda ba I'o'awögö Ndraono Gizara'eli." Imane So'aya khö Moze : "Oro'ö dangau yaŵa nasi, ena'ö ihawui niha Mesirayi asi, fabaya kureta awö zi fakudo andrö khöra !" I'oro'ö dangania Moze yaŵa nasi, ba mangawuli ba nahania nasi, me no arakhagö moluo, ba ifaondragö asi niha Mesirayi soloi. Itaboi ba dalu nasi niha Mesirayi So'aya. Ifuli fahalö nasi ba ihawui gureta, awö zi fakudo, awö ndra saradadu andrö khö Wara'o fefu, si no molo'ö Iraono Gizara'eli bakha ba nasi. Samösa lö ba gotaluara sauri.- Ba hiza, latörö danö soköli Iraono Gizara'eli, la'ötö nasi; ba idanö nasi hulö mbagolö fatambaira.

Simanö sa wangorifi Zo'aya Iraono Gizara'eli, me luo da'ö, moroi ba danga niha Mesirayi. Me la'ila niha Mesirayi si no mate ba mbewe nasi Iraono Gizara'eli, aboto ba dödöra zabölö sibai andrö nilau Zo'aya ba niha Mesirayi. Ihawui ira fa'ata'u ba fa'ahöli dödö, ba faduhu dödöra khö Zo'aya ba khö genoniNia andrö, Moze.- Me luo da'ö lalau zinunö andrö Moze ba Iraono Gizara'eli, wanuno So'aya, lamane wanunö : "Datalau manunö khö Zo'aya, me no fondrege nifosumange Ia. Kudo ba si fakudo yaŵa, no Itibo'ö bakha ba nasi."- 2 Moz 14:15-15:1

Simanö daroma li Lowalangi.-

 Sinunö Fanema Li : Psallite No 151                                   (ma Laudate No 7)

 FOMBASO  III

Taroma Li Lowalangi nihalö moroi ba zura Yesaya, sama'ele'ö.-

Imane So'aya ba mbanua Yerusalema : Böi ata'ufi, -  lö te'ailasi ndra'ugö sa'ae, ba böi aila'ö. Börö fo'omou sa'ae Zomböi ya'ugö andrö. Yahwe, So'aya samatörö fefu hadia ia döiNia. Sangorifi ya'ugö no Lowalangi ni'amoni'ö Ndraono Gizara'eli andrö. Lowalangi zi sagörö ulidanö döiNia. He Ya'ugö Yerusalema, noa sa si hulö ndra alawe ni'erogö dongania ba si no abu sibai tödö, börö me lö sa'ae i'omasi'ö ia fo'omonia simanö fangomasi'ö ya'ia me bohou muhalö, Iŵa'ö Lowalangi. Ba hiza, iada'e ifuli Ikaoni ndra'ugö So'aya, Imane : Duhu, no U'erogö ndra'ugö ba zi lö arara. U'ebua'ö wa'ahakhö dödöGu, wangahatö'ö Ya'ugö khöGu. Me tesao wönuGu, ba no Ubini'ö mbawaGu khöu, ba zi lö arara, ba Ufuli Uhakhösi tödö ndra'ugö, fa'ebua dödö si lö aetu, Iŵa'ö sangorifi ya'ugö andrö, So'aya. Timba wa'anönö danö idanö andrö, me luo No'akhi, khöGu da'ö : Simane fahölusaGu andrö, wa lö tola ifuli inönöi danö idanö andrö khö Noakhi, simanö wahölusaGu, wa lö'ö sa'ae mofönuDo khöu, awö wa lö'ö sa'ae Utegu'ö. Alakha sa'ae aruru hili ba alakha mangiwa hilihili, ba lö'ö sa tebulö khöu wa'ebua dödöGu ba tebai mangiwa wawu'usa li andrö khöGu, Iŵa'ö sahakhö tödö khöu, So'aya andrö. He ya'ugö, banua Yerusalema, si no abu tödö, nifaheu nangi, si lö fondrara tödö ! Hiza, Ube'e latalatamö weremata nila. Ba yasia Ube'e mbumbu gölimö ba bawa gölimö, ba feremata intan, ba fefu gowe nolamö andrö, ba batu indra'indra.

Ono mbanua khöu andrö fefu, ahori la'ila goroisa Zo'aya, irege auri ira bakha ba wa'ohahau dödö si lö tebulö. Fa'atulö dania latalatamö.  Ilumö'ö ndra'ugö fanoloGu andrö, irege aröu khöu wamakao ! Alakha lö ata'u'ö, ba ya aröu gameta'u'ö, lö'ö sa ihatö'ö ia khöu.-  Yes 54:4a.5-14

Simanö daroma li Lowalangi.-

Sinunö Fanema Li : Psallite No 30                                 (ma Laudate No 99A)

 FOMBASO  IV

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö !  Ya'ita si no manema fanasa ni'amoni'ö, no tobali ha sambua ita Keriso? Aboto ba dödömi, hadia geluaha da'e ? No tobali ha sambua ita ba wa'amateNia. Me tatema wanasa ni'amoni'ö, noa sa teko'o ita awöNia, ena'ö hulö wangorifi Keriso moroi ba wa'amate ba wa'abölö Nama solakhömi, si manö göi ita tatema wa'auri si bohou ba tatörö lala si bohou.- Na no ha sambua ita Keriso, börö me si fao ita wa'amate awöNia, ha sambua ita khöNia göi, börö me si fao ita te'orifi mangawuli simane Ya'ia. Aboto ba dödöda, wa amuatada si tohöna fa'aniha no muforöfa awö Keriso, ena'ö mufakiko wa'abölö gamuatada si so horö andrö. Ba zimanö lö'ö sa'ae i'osawuyu ita horö.- Na no mate zi samösa niha, no te'efa'ö niha andrö moroi ba wa'abölö horö. Na no mate ita awö Keriso, faduhu dödöda, wa no auri ita göi awöNia.- Börö me no ta'ila, wa no te'orifi Keriso moroi ba wa'amate ba lö mate Ia sa'ae. Lö mofa'abölö sa'ae wa'amate khöNia. Fa'amate nitörö Keriso no fa'amate börö horö. Alua da'ö samuza irugi zi lö aetu. Fa'auriNia iada'e no fa'auri khö Lowalangi.- Simanö göi ami, si lö tola lö'ö mimane dödömi,  wa no mate ami ba horö, ba auri ami ba gamakhaita saro khö Lowalangi, börö Keriso Yesu.- Rm 6:3-11

Simanö daroma li Lowalangi.-

Sinunö Föna Injil : Psallite No 228 ma 118, 1+5+6         (ma Laudate No 61)

 INJIL

Turia Somuso Dödö khö Yesu Keriso nisura Luka.-

Me luo si föföna aefa sabato, möi ndra alawe andrö ba lewatö Yesu, ahulö sibai, la'ohe wanikha samohua si no lafa'anö.Me larugi, la'ila, wa no mufagaölö gowe andrö, lagölagö lewatö, no aheta ba lewatö. Me möi ira bakha ba lewatö, lö lasöndra mboto Yesu, So'aya, ba da'ö. Me labusi tödö da'ö, i'anemai'ö muzizio ba ngaira darua niha sonukha sitakitakile. Me ata'u ira ba me lafatugu ira, lamane si darua andrö khöra : "Hana wa mi'alui Zauri ba gotalua zi mate ? Lö Ya'ia ba da'e, no ifuli auri Ia. Mitörö tödömi hadia zi no Iŵa'ö khömi, me so Ia nasa ba Galilaia, me Imane sanandrösa ba khöNia, Ono Niha andrö, wa lö tola lö'ö tebe'e Ia ba danga niha si so horö, teforöfa Ia ba ifuli auri Ia ba ngaluo si tölu." Itörö tödö ndra alawe andrö wehede Yesu. Mangawuli ira moroi ba lewatö, la'ombakha'ö zalua andrö khö ndra rasul si felezara andrö ba khö ndra nifahaö Yesu bö'ö fefu. Töitöi ndra alawe sangombakha fefu da'ö khö ndra rasul : Maria, banua Magadala andrö, Yohana ba Maria, ina Yakobo, awö ndra alawe tanö bö'ö si fao khöra. Latutunö da'ö fefu khö ndra rasul; ba lawai fayafaya ira rasul, lö faduhu dödöra ba ni'ombakha'ö ndra alawe andrö. Fagohi Wetero lumalö ba lewatö. Me ifaöndrö wamaigi bakha, ha böbö nukha ni'ilania. Mofanö ia manofunofu dödönia hadia maö zi no alua.  Luk 24:1-12

Simanö duria somuso dödö khö Zo'aya ya'ita, Yesu Keriso.-

 

Erönua:

FA’OMASI LOWALANGI SI LÖ OLA

Bakha ba wombaso siföföna tarongo hewisa wa lö alaŵö Gaberahamo wamasömba’ö ononia ni’omasi’ö si ha samösa. Ba wamasömba’önia Iza’aki andrö, ba ifa’onoro’ö nasa geu galitö andrö khö Giza’aki geu galitö. Ifalua da’ö Aberahamo börö me aboto ba dödönia hawa’ebua wa’omasi Lowalangi andrö ba niha. Simanö göi wa’omasi Lowalangi andrö nirasoida: lö alaŵö Ia wamasömba’ö OnoNia si ha samösa soguna ba wangorifi ya’ita. Fao fa’ahele dödö, I’onoro röfaNia Yesu ba horöda ba te’orifi mangawuli bakha ba wemaoso.

Ba wombaso sidua tarongo hewisa me la’ötö nasi zukhu andrö Iraono Gizara’eli. Me föna ifazaŵa dangania Moze, ifabali nasi zukhu ba te’orifi Ndraono Gizara’eli  ba ahöndrö nudura. Famazawa tanga Moze yawa nasi andre ba no sambua ndrela wangorifi ba Ndraono Gizara’eli ena’ö möna ira moroi ba nudura. Simanö göi me ifazaŵa dangaNia Yesu Keriso ba döla röfa ba wamatö’ö fa’abölö wa’amate ba ba wanuriaigö femaoso. Ifadölö dangaNia Yesu ba döla röfa göi andrö, no möi börö wanga’azökhi mangawuli amakhaitada khö Lowalangi ba ba nawöda niha göi. Andrö ya’ita niha samati khöNia, si no ihöli ba  ndroNia, tobali ita niha Keriso ba si lö mamalö ena’ö ta’aurifagö wa’auri wa’aniha Keriso andrö.

Ba wombaso sitölu sindruhu I’oroma’ö khöda wahuhuosa Zoaya ba mbanua Yerusalema. Fahuhuosa andre hulö zamatunö sala niha ba same’e aefa göi zala andrö. Ba da’e göi te’oroma’ö wa Itehegö Lowalangi tefakiko mbanua Yerusalema, börö wa-lö-atulö zowanuania. Ba hiza lö mamalö göi I’omasi’ö zui Ia, ena’ö te’otomosi mangawuli. Ba hiza tenga saae ha Yerusalema si no sambua banua andrö. Yerusalema si bohou ni’otomosi andrö ya’ia Gerejada sedöna mufasindro yaŵa ba wa’atulö ba mu’ehaogö si fao amuata si sökhi. Ya’ita ösi Yerusalema sibohou andrö, ya’ia fefu niha si no manema fanasa ba sanema fanasa ba zi bongi andre ba zi sagörö ulidanö. Famohounida Yerusalema andre, ba ya’ia wamohounida fawu’usa li da andrö ba wanema fanasa ni’amoni’ö.

Ba wombaso si’öfa andre ibe’e khöda wamaduhu’ö Faulo so’amakhaita ba wamatida khö Yesu si no teforöfa, mate ba lako’o andrö. Börö wanaögönia röfa andrö tehöli ita morou ba horöda. Fa’amatenia andrö no möi börö wa’auri sibohou. Bongi andre awu’a Yesu Keriso moroi ba wa’amate möi ba wa’auri. Börö Sakramen Fanasa tefaböbö ita khö Keriso ba tobali niha si bohou. Tenga horö sa’ae zamatörö ya’ita  ba hiza fa-ha-sambuada khö Keriso.

Bakha ba wombaso Turia Somuso Dödö andrö sindruhu te’oroma’ö khöda sambua wa’aro wamati wa no auri Keriso moroi ba gotalua zimate. Mala’ika zanuriaigö khö ndra alawe wa Yesu si no teforöfa andrö no maoso. Duhu no  auri Ia. Ba fefu alua molo’ö sura ni’amoni’ö, faudu molo’ö nifakhoi Lowalangi soguna ba wangorifi. Fanuriaigö turia wemaoso andrö ba siföföna ba ndra’alawe andrö sasese lawa’ö “lö moguna mufaduhusi tödö wehedera.” Ba hiza hewisa göi ita? Ira nifahaö göi ahou sibai aboto ba dödöra duria somuso dödö andrö.

Bakha ba wombaso bongi andre, sindruhu I’oroma’ö khöda hewisa sindruhunia wa’omasi Lowalangi si lö ola ba niha ba gulidanö. No I’oroi mböröta ibörögö wangomasi’ö niha Lowalangi, ba hiza asese manö isöndra niha gulidanö lö mamati ba faduhu dödö khöNia. Fa’omasi Lowalangi si lö ola andrö lö ifili niha. Ba hiza ha niha samati ba sifaduhu tödö zanöndra fa’auri si lö aetu andrö. Fanuriaigö ndra alawe andrö wa no maoso Yesu moroi ba gotalua zimate, zame’e khöda fanandraigö wamati: hadia faduhu dödöda wa’omasi Lowalangi andrö börö niha sanuriaigö ya’ia ma börö duria somuso dödö andrö? Famohounida wawu’usa li ba wanasa ni’amoni’ö andrö zamohouni göi fa’afaduhu dödöda ba khö Keriso töratöra wamohouni fahasambuada khöNia. Ba gafuriata, dataturiaigö göi wa’omasi Lowalangi andrö si lö ola ba wangomasi’öda awöda niha. Amen.

 

Nifa’anö Kat. Ingatan Sihura, S.Ag.

 

Umbu Nibaso:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011