TAROMA LI LUO MIGU PASKA SI – 2 DÖFI C

 FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo no, si fao fama'ema ndra rasul alua oya ngawalö zagahöli dödö ba ila'ila ba gotalua niha sato. Ba wa-ha-sambua-dödö owulo niha samati fefu ba Newali Zelomo (ewali nifolose), ba ngai nomo Lowalangi. Niha bö'ö, lö barani ira orudu khöra. Lafosumange ira sa'atö niha sato. Itugu ara itugu ato zamati khö Zo'aya,  he ira matua, he ira alawe, ba lafaböbö ira khö ndra niha samati. Alua göi zimane da'e : La'ohe baero niha sofökhö ba lala ba labe'e ira ba gaso ma ba dufo, ena'ö he ha göna ira lumö Wetero, na itörö ba da'ö.

Ba tohare göi niha sato moroi ba mbanua si fasui Yerusalema, la'ohe zofökhö, awö nifakao mbekhu sira'iö, ba ahori tefadöhö.- HalRas 5:12-16

Simanö daroma li Lowalangi.-

 

Sinunö Fanema Li : Psallite No 4 ma 118, 1-3                 (ma Laudate No 67)

 

FOMBASO  II

Taroma Li Lowalangi nihalö moroi ba zura Wama'ele'ö.-

Ya'o, Yohane, talifusömi ba wamakao ba ba gamatöröŵa ba ba wanaha tödö, börö tefaböbö ita khö Yesu, no nitibo'ö ndra'o ba hulo Fatemo, börö me no uturiaigö duria si oroi Lowalangi ba u'ombakha'ö wemaoso Yesu. Me luo Zo'aya no Ifatörö ndra'o Eheha Lowalangi, irege urongo li sebua hulö li dorofe, muhede ia furigu, imane : "Sura hadia ia ni'ilau bakha ba mbuku ba fa'ohe'ö mbuku andrö ba zi fitu stasi andrö, ya'ia da'ö : Efeso, Simina, Feregamo, Tiatira, Sade, Filadefia ba La'odisea."

Ubali'ö ndra'o furi ba wamaigi haniha Zihede andrö khögu. Ba me ubali'ö ndra'o furi, u'ila fitu naha wandru ana'a. Ba gotalua naha wandru andrö oroma sumindro Samösa simane niha, no mobaru sanau ba no mamöbö talu ana'a ba dötö'aNia.

Me u'ila Ia, alaudo tou fönaNia, hulö zi mate. Ba Itufa ndra'o tangaNia kambölö, Imane : "Böi ata'ufi ! Ya'o zi oföna ba safuria. Ya'odo zauri andrö. No mate Ndra'o, ba hiza, no auri Ndra'o irugi zi lö aetu. Ya'o zamatörö fa'amate  ba he göi amatöröŵa niha si no mate."- Fam 1:9-13.17-18

Simanö daroma li Lowalangi.-

 

Sinunö Föna Injil : Psallite No 238                                   (ma Laudate No 98)

 

INJIL

Turia Somuso Dödö khö Yesu Keriso nisura Yohane.-

Me luo si föföna aefa Sabato (ba luo Migu), me tanö owi, no so ndra nifahaö Yesu ba zi sambua omo si no mukusi fefu mbawandruhö, börö me ata'u ira ndra salaŵa niha Yahudi. I'anemai'ö tohare Yesu, muzizio Ia ba gotaluara, Imane khöra : "Ya so khömi wa'atulö !" Me no aefa Iŵa'ö da'ö, Iforoma'ö khöra zokho ba dangaNia ba ba dötö'aNia.  Omuso sibai dödö ndra nifahaö, me la'ila Zo'aya. Ifuli Imane khöra : "Ya so khömi wa'atulö ! Simane famatenge Nama Ya'o, simanö göi wamatengeGu ya'ami." Me no aefa Iŵa'ö da'ö, Ihehaini ira hanuhanuNia, Imane : "Mitema Geheha Ni'amoni'ö ! Na so ni'efa'ömi horö, ba aefa horö andrö. Si lö mi'efa'ö horö, lö te'efa'ö horönia".-

Toma, nifotöi Sifaero, samösa ba gotalua ndra nifahaö Yesu, lö hadöi, me so Yesu. La'ombakha'ö khönia ira nifahaö bö'ö, lamane : "No ma'ila Zo'aya." Itema li Toma, imane : "Na lö u'ila ba dangaNia lahe gosö'osö andrö ba na lö ube'e durugu ba laheto gosö'osö andrö, ba na lö ube'e dangagu bakha ba zokho ba dötö'aNia, lö faduhu dödögu".-

Samigu aefa da'ö, so zui ndra nifahaö Yesu ba nomo andrö, ba so göi Toma. No muduhö fefu mbawandruhö. I'anemai'ö tohare Yesu ba muzizio Ia ba gotaluara, Imane : "Ya so khömi wa'atulö !" Awena Iŵa'ö khö Doma : "Ohe durumö ba da'e ba faigi dangaGu ! Ohe dangau ba be'e ia bakha ba zokho ba dötö'aGu ! Böi mangiwa sa'ae dödöu, - ya faduhu sa'ae !" Itema li Yesu Toma, imane khöNia : "So'aya ya'o ba Lowalangigu !" Imane khönia Yesu "Hadia faduhu dödöu,  börö me no ö'ila Ndra'o ? Ya'ohahau dödö niha si faduhu tödö, he ŵa'ae lö i'ila Ndra'o !"

Oya nasa zahölihöli dödö nifazökhi Yesu föna ndra nifahaöNia. Ba hiza, lö musura da'ö fefu ba mbuku andre. Si no tesura da'e, no musura, ena'ö faduhu dödömi, wa no Keriso andrö Yesu, Ono Lowalangi, ba ena'ö misöndra wa'auri si lö aetu ba döiNia andrö, na faduhu dödömi.-  Yoh 20:19-31

Simanö duria somuso dödö khö Zo'aya ya'ita, Yesu Keriso.-

 

Ofanöwa P. Sixtus We'amöi ba Stasi [Dok. Pribadi]

Erönua:

YA’AHOWU ZIFADUHU TÖDÖ BA SARO FANÖTÖNA

Ba wombaso siföföna nihalö moroi ba zura halöwö ndra Rasul, sindruhu te’oroma’ö khöda hewsia wamobörö si sökhi andrö ba Gereja. Ba mböröta, niha samati ba Yerusalema lö khöra nahia sitobali naha wangandrö. Andrö owulo ira ba newali Zelomo, ewali nifolose. Ba hiza teoroma’ö ndra Rasul ba ira sowulo andrö si fao fahasambua ba famalua sahöli dödö. Salua andre göi edöna ibe’e khöda sambua gerönua: Hadia göi dandra wa’asökhi gangowuloada ba stasi andre?

Ba wombaso sidua andre tarongo hewisa wama’ele’ö salua khö Yohane andrö. Ba da’ö oroma khönia gangi’ilata, ya’ia Zo’aya si no tefolakhömi. Ba walukhatania andrö, sindruhu I’ila Yohane wa tenga sinangea ia föna Zo’aya, irege alau ia tou ba danö. Ba hiza I’a’aro’ö dödönia So’aya ena’ö böi ata’u ia. Ero luo Migu, nifotoi Luo Zo’aya, Ifa’ele’ö Ia So’aya ba Daroma Li Lowalangi nirongoda, mendrua manö na fao ita ba Perayaan Ekaristi andrö.  Omasi Ia wangabölö’ö ya’ita, ena’ö so khöda wanaha tödö bakha ba wa’auri tou ba “danö zotanö” andre.

Bakha ba wombaso Turia Somuso Dödö andrö tarongo hewisa me I’oroma’ö Ia Yesu khöndra nifaha’öNia sata’u börö wolohi niha Yahudi. Ba zimanö ibe’e khöra Geheha Ni’amoni’ö si’oroi Lowalangi ba ifatenge ira wanuriaigö Turia Somuso Dödö. famatengeNia andrö ba wolohe Fa’atulö. Ba hiza lö Toma ba gotaluara. Me lö ya’ia ba hiza lö faduhu dödönia ba niwa’ö ndra Rasul bö’ö. Ba me ni ifuli I’oroma’ö ia Yesu ba zi so ya’ia, awena I’a’aro’ö dödönia Yesu. Ba zimanö andrö iwa’ö Yesu: “Ya'ohahau dödö niha si faduhu tödö, he ŵa'ae lö i'ila Ndra'o !".

Ba lala wa’auri bongi ma’ökhö, asese sibai hulö zahilu khöda we’amöi ba gangowuloa, töratöra na lawa’ö fe’amöi ba nomo Lowalangi. Fefu da’ö alua börö me so khöda wa’alö aro dödö ba ngawalö zagalua andrö. Asese sibai tawa’ö tödöda wa tenga sinangea ita wangondrasi So’aya börö zala olalöwa nifaluada. Da’e zombali’ö ya’ita itugu tebai ba itugu so ba wangiwa dödö. Ba hiza ba wangondrasi So’aya andrö, lö mamalö te’abölö’ö ita ba ngawalö zalua andrö nirasoida. Fangondrasi So’aya no möi börö wa’afaduhu dödö ba tarasoi wa’omasiNia andrö. Hewa’ae lö ta’ila mboto Yesu simane ira Rasul andrö, ba hiza Fehede Yesu andrö khö Doma zanga’aro’ö tödöda: “Ya'ohahau dödö niha si faduhu tödö, he ŵa'ae lö i'ila Ndra'o !" Fanuriaigö ndra Ere (Pastor) töratöra bakha ba wangowasaini Ekaristi, no fe’aso Zo’aya samösa. Da’ö na asese lawa’ö ira Ere (Pastor) andrö ba ginötö wangowasaini Ekaristi ba no famaedo Keriso. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011