TAROMA LI LUO MIGU PASKA BA WEMAOSO ZO'AYA

FOMBASO I

Taroma Li Lowalangi nihalö moroi ba zura "Halöŵö ndra Rasul."-

Me luo da'ö, ibörögö muhede Wetero ba niha sato, imane : Mi'ila, ya'ami ira talifusö, wa no Ifili Yesu, banua Nazareta, Lowalangi  ba no Ibe'e khöNia Geheha Ni'amoni'ö ba kuaso. Mi'ila göi, wa no Itöröi danö misa wolau si sökhi ba Ifadöhö wökhö niha fefu nifakao gafökha, börö me no fao khöNia Lowalangi. Ya'aga samösa no ma'ila hadia nilauNia fefu, he ba danö niha Yahudi, he ba Yerusalema. He ŵa'ae simanö, laforöfa sa'atö Ia ba labunu. Ba hiza ba ngaluo si tölu Ifuli I'orifi Ia Lowalangi moroi ba wa'amate ba Iforoma'ö Ia ba niha; tenga ba niha fefu, ha ba khöma, si no Ifili Lowalangi mböröta, tobali samaduhu'ö khöNia. Ya'aga zi manga ba samadu idanö awöNia,  me no auri mangawuli Ia moroi ba wa'amate.- Ba Ibe'e goroisa khöma, wangombakha ba niha sato ba ba wamaduhu'ö, wa Ya'ia nifataro Lowalangi, tobali sanguhuku niha sauri awö zi no mate.  Sanandrösa khöNia fahuhuo fefu ndra sama'ele'ö. Lamane : Fefu niha si faduhu tödö khöNia,  tola lasöndra wangefa horöra, börö kuasoNia.-  HalRas 10:34a.37-43

Simanö daroma li Lowalangi.-                    Sato : Ma'andrö...

 

Sinunö Fanema Li : Psallite No 118, 1+5+6                  (ma Iaudate No 67, 1-2)

 

FOMBASO II

Taroma Li Lowalangi .

nihalö moroi ba zura Waulo ba niha samati ba mbanua Kolose.

Ya'ami ira talifusö ! Me no maoso ami awö Keriso, mi'alui zi so ba zorugo, ba naha wamatörö Keriso awö Lowalangi. Si so ba zorugo mifatoutou tödömi,- böi si so ba gulidanö. Noa sa mate ami, ba no tobini wa'aurimi andrö awö Keriso ba khö Lowalangi. Ba na to'ele dania Keriso, si no fa'aurimi, awena dania to'ele göi ami awöNia ba lakhömi.- Kol 3: 1-4

Simanö daroma li Lowalangi.-                    Sato : Ma'andrö ...

 

Sinunö Föna Injil : Psallite No 229 ma 230                          (ma Laudate No 67, 3)

 

INJIL

Turia Somuso Dödö khö Yesu Keriso nisura Yohane.-

Ba ngaluo si föföna aefa Sabato, möi ba lewatö Yesu, Maria, banua Magadala, ihulö wongi, me ogömigömi na. Me no irugi, i'ila no laheta gowe lagölagö lewatö ba mbawania. Fagohi ia wangalui Simoni Fetero awö nifahaö tanö bö'ö ni'omasi'ö Yesu. Imane khöra : "No lahalö Zo'aya ba lewatö, ba lö ma' ila heza labe'e Ia." Maoso Wetero, awö nifahaö bö'ö andrö, numalö ira be lewatö. Lalau fagohi darua ira, ba hiza,  abölö alio nifahaö bö'ö andrö moroi khö Wetero, irege oföna ia wondrugi lewatö moroi khö Wetero. Ba me ifaigi bakha ba lewatö, i'ila mböbö nukha andrö, nitou'ö tou. Ba hiza, lö möi sa ia bakha. Awena so Zimoni Fetero moroi furi,  idölö ia bakha ba lewatö, i'ila mböbö nukha no mege ba he göi nukha fangolohuni  högö Yesu, no lagölugö, sambua nahia. Awena möi göi bakha ba lewatö nifahaö si'oföna mondrugi andrö. I'ila, ba faduhu dödönia. Lö'ö nasa aboto ba dödöra zi no tesura ba zura ni'amoni'ö, wa lö tola lö'ö ifuli auri Yesu moroi ba wa'amate.-  Yoh 20:1-9

Simanö duria somuso dödö khö Zo'aya yaita, Yesu Keriso.-

 

Dari Kami Sekeluarga.

Erönua:

TURIA WANGEFA’Ö

Bakha ba wombaso sisara andre tarongo hewisa Wetero andrö samaduhu’ö Yesu föna niha sato. Me ba ginötö tera’u Yesu, ata’u sibai Wetero wamaduhu’ö Yesu. Irege fatua lö miwo zilatao, no medölu i’osilö’ögö Yesu.  Ba ma’ökhö andre bakha ba wa’abölö  Geheha Ni’amoni’ö ifaduhu’ö Fetero wemaoso Yesu. Turia Wemaoso Yesu andrö zame’e fangaboto ba dödö khö Wetero wa tenga zayazaya gölö wamaduhu’ö Yesu andrö. Ifaduhu’ö Fetero wa börö wemaoso Yesu andrö, no te’alaŵa’ö Ia ba tobali sanguhuku soi niha ba sangorifi ösi gulidanö ma’asagörö. Iada’a, hewisa göi ita wanuriaigö femaoso Keriso andrö?

Ba wombaso sidua andrö ifaha’ö ita Faulo hadia zedöna tafalua me no maoso Keriso andrö. Börö me no maoso Keriso ba mangawuli Ia khö Nama, tenga si so tou ba gulidanö sa’ae nifaigida, ba hiza lö tola lö’ö tafaöga höröda ba mendrua manö dödöda miyaŵa ba zi so Keriso. Dataröi wa’abu dödö ba horö andrö, data’omusoi’ö dödöda börö wangöhöli andrö. Dataröi wa’ata’u, ya sitehulu tödö ita wanuriagö femaoso Keriso andrö. Me ba zimane da’e dania tasöndra zulö wanuriaigö andrö ya’ia wahasambua khö Keriso.

Bakha ba wombaso Turia Somuso Dödö tarongo hewisa duria wemaoso Keriso andrö me awena larongo ira nifaha’ö, töratöra Wetero andrö. Ba we maoso Yesu, Iröi sambua dandra side’ide ba lewatö, ya’ia nukha famöbö gahe awö danga zi mate molo’ö si to’ölö ba niha Yahudi. Tanda nukha mböbö gahe ba mböbö tanga andrö no sambua tandra wamöbö börö horö. Ba hiza börö wemaoso Keriso andrö, tandr andrö no tebokai ba teheta ba niha fefu. Tandra mbobö gahe ba mböbö tanga andrö ya’ia: dandra wangefa’ö moroi ba horö, moroi ba wangosawuyu ba moroi ba wa’amate.

Turia wemaoso Keriso andrö, no sambua turia fangefa’ö horö ba niha samati fefu. Börö wemaoso Keriso andrö göi, teheta ita ya’ita niha samati moroi ba huku horö fa’amate, ba hiza no tesou ita börö wangöhöli nitaögö Yesu andrö. Ba zimanö I’andrö khöda ena’ö lömamalö tafatoutou ia tödöda ba tafalua ia ba lala wa’aurida. Famaluada andrö ba lala wa’aurida ba no sambua fanuriaigöda femaosoNia andrö.

Hewisa, hadia tola tobali ita sanuriaigö femaoso Yesu andrö simane Fetero safönu Eheha andrö ba wombaso siföföna? Fanuriaigöda andrö tola tabörögö ia moroi ba zide’ide sibai ya’ia wangefa’ö sala ba niha sifasala khöda; ba fangandrö salahi niha sifatiu tödö khöda. Ba zimane no taturiagö sambua wangefa, böbö andrö si so ba gotaluada faoma fatambai. Ya faoma itolo ita Lowalangi ena’ö tola nasa tasöndra lala wanuriaigöda femaoso Yesu andrö ba lala wa’aurida si’ero ma’ökhö. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011