LUO MIGU PALMA BA WANÖRÖTÖDÖ FAMAKAO ZO’AYA DÖFI C

FOMBASO  I

Taroma Li Lowalangi

nihalö moroi ba zura Yesaya.-

Simane niŵa'ö Genoni Zo'aya andrö : No Ibe'e khögu lela nifahaö Lowalangi Yahwe, ena'ö u'ila ufehulu dödö niha si no erege tödö ba wehedegu andrö. Ero mahemolu mbanua Isusugi ndra'odo, Ititi dögi dalingagu, ena'ö hulö nifahaö sowölö'ölö urongo hadia ia ni'ombakha'öNia. No Ibali'ödo So'aya samondrondrongo si lö mamadaö, ba ufa'ema göi nirongogu. Lö si fatandrodo, lö nibödagu ya'odo. No ululu hulugu ba niha samözi ya'o ba bo'ögu ba niha sanöbi bu dangidangigu. No utehegö, wa la'o'aya ndra'o. Lö ubini'ö mbawagu ba zodiloi ya'o. Ba hiza, I'o'awögö ndra'o Lowalangi Yahwe, irege lö u'ila wa'aila.-  Yes 50:4-7

Simanö daroma li Lowalangi.-

Sinunö Fanema Li : Psallite No 22A (ma Laudate No 52)

 

FOMBASO  II

Taroma Li Lowalangi

nihalö moroi ba zura Waulo ba niha samati ba mbanua Wilifi.-

Ya'ami ira talifusö ! Simane tödö Keriso Yesu, ya simanö göi dödömi ! He ŵa'ae fagölö lakhömiNia ba khö Lowalangi, lö omasi Keriso Yesu Igogohe sibai lakhömiNia andrö, si no fagölögölö khö Lowalangi. No I'ositengagö lakhömiNia andrö ba we'amöi enoni ba Ifagölösi Ia ba niha gulidanö andre. Fa'auriNia no fa'auri niha. Ba wolo'ö khö Lowalangi I'ide'ide'ö Ia. I'ide'ide'ö Ia ba wanaögö fa'amate, irege mate na'i ba röfa. Da'ö ae mbörö, wa I'alaŵa'ö Ia Lowalangi  ba I'amualagö khöNia  döi si töra molakhömi moroi ba döi fefu. FönaNia lö tola lö'ö latuhi danö ni'a'asogö andrö fefu, he si so ba zorugo, he si so ba gulidanö ba he si so barö danö. Ba fefu ira lö tola lö'ö lafaduhu'ö, wa no So'aya Yesu Keriso. Ba wamaduhu'ö andre tefolakhömi Lowalangi Ama.-  Flf 2:6-11

Simanö daroma li Lowalangi.-

Sinunö Föna Injil : Psallite No 227 (ma Laudate No 103, 1- 3)

 

INJIL

Keterangan :

1.      S = Sanutunö

2.      Y = Yesu

3.      N = Niha tanö bö’ö

 

 

S  Turia Wamakao khö Zo'aya ya'ita Yesu Keriso nisura Luka.-

 

S   Me no irugi inötö watomesa Paska, mudadao Yesu ba wemanga,

     ba awöNia ira rasul si felendrua andrö. Imane khöra :

Y  "No humulu sibai dödöGu ba wemanga Paska andre awömi,

     fatua lö Utaögö wamakao. Uŵa'ö sa khömi,

     lö'ö sa'ae U'a gö andre, irege tefatörö'ö geluahania

     ba gamatöröŵa Lowalangi andrö."

S   Ba Ihalö mako, I'andrö saohagölö ba Imane :

Y  "Mitema da'e ba mifosasi khömi. Uŵa'ö khömi,

     lö'ö sa'ae Ubadu nösi mbua nagu i'otarai da'e

     irugi alua gamatöröŵa Lowalangi andrö."

S   Awena Ihalö roti, I'andrö saohagölö,

     Iboboto roti, Ibe'e khöra, Imane :

Y  "BotoGu da'e nifasömba'ö salahimi.-

     Mimane woalu ba wanörö tödö Ya'o."

S   Simanö göi, me no aefa wemanga,

     Ibe'e khöra mako (si so agu yaŵa) ba Imane :

Y  "Amabu'ula li si bohou mako andre, ni'a'aro'ö Lowalangi

     faoma doGu, - doGu andre niduwagö dania salahimi.-

     Ba hiza, no orudu ba wemanga andre niha si manga mböliGu.

     Mate sa dania Nono Niha andrö simane si no Ihonogöi Lowalangi;  ba alai niha andrö, si manga mböliNia."

S   Ibörögö faoma lasofu khö nawöra, haniha ba gotaluara

     zolau da'ö.  Ba tesao göi wamadöni khöra,

     haniha zabölö ebua ba gotaluara. Imane khöra Yesu :

Y  "Lafatörö soira ira razo ba gulidanö ba ira samatörö safaito,

     omasi ira na latötöi ira sebua tödö.

     Böi simanö ami ! Haniha zabölö ebua ba gotaluami,

     akha tobali sabölö ide'ide. Sololohe ya'ami, ya tobali ia enonimi.

     Haniha sa zabölö ebua? Niha sidadao manga ma sangai halöŵö?

     Hadia tenga niha sidadao manga ?

     Ba Ya'o ba gotaluami no hulö zangai halöŵö.

     No si lö faröi khöGu ami ba ngawalö wanandraigö si göna Ya'o.

     Börö da'ö Ufo'urakha ami dania ba gamatöröŵa

     nibe'e NamaGu khögu. Na ibörögö mamatörö Ndra'o,

     orudu manga ami khöGu ba fao ami awöGu

     wamatörö Iraono Gizara'eli, si felendrua mado andrö.

     He Simoni ! He Simoni ! Hiza, no Itehegö Lowalangi khö zatana,

     ba wamareso ya'ami, hulö latafi'ö wakhe. Ba no mangandrö Ndra'o salahimö, ena'ö lö taya wamatimö. Ba na no mangawuli ndra'ugö khöGu, öfofa'abölö ndra talifusöu."

S   Itema li Fetero :

N  "He So'aya, utehegö möido ba gurunga ba matedo awöU."

S   Imane Yesu :

Y  "Uŵa'ö khöu, Fetero, lö fakhamö miwo manu bongi andre,

     ba no medölu ö'osilö'ögö wangila Ya'o."

S   Aefa da'ö Imane Yesu :

Y  "Me luo no, me Ufatenge ami, me lö Utehegö mi'ohe gofekofe, kandrekandre ba badagahe, hadia no ambö khömi hadia ia ?"

S   Ba lamane :

N  "Ma'ifu lö'ö."

S   Imane Yesu :

Y "Ba iada'e, haniha zi so kofekofe ma kandrekandre, akha i'ohe.

     Si lö föda, akha ifamawa mbarunia sebua ba wowöli föda.

     Uŵa'ö khömi, lö tola lö'ö itörö ba khöGu zi so ba zura ni'amoni'ö, sanguma'ö : Laŵa'ö : Niha si lö sökhi Ia.

     Itörö sa nitandrösaigö khöGu andrö, irugi gamozua."

S   Lamane ira nifahaö Yesu :

N  "He So'aya, faigi, so ba da'e dua rozi wöda."

S   Imane Yesu :

Y  "No tobönö."

 S   Möi Ia baero, numalö Ia ba hili wanikha, simane si to'ölö,

     ba fao göi khöNia ndra nifahaöNia. Me no larugi, Imane khöra :

Y  "Mi'angandrö, fa böi göna ami fanandraigö !"

S   Aefa da'ö I'aröu'ö Ia ma'ifu moroi khöra, ikhamö tebutebu kara wa'aröu, ba Ibalöduhini tou danö ba mangandrö Ia, Imane :

Y  "He Ama, na tola, Ö'aröu'ö moroi khöGu mako wamakao andre.

     Ba böi ya itörö zomazi Ndra'o. Ya alua zomasi Ndra'ugö."

S   Ba to'ele khöNia samösa mala'ika moroi ba zorugo, sangabölö'ö Ya'ia. Ata'u sibai Yesu, andrö wa I'osindruhugö wangandrö.

     Ba tobali hulö mböiböi ndro mböböiNia, atoru ba danö.

     Me Ibato wangandrö andrö, maoso Ia ba I'ondrasi ndra nifahaöNia, ba Isöndra ira momörö, börö wa'abu dödö.

     Andrö Imane khöra :

Y  "Hana wa mörö ami ? Mifaoso, mi'angandrö,

     fa böi göna ami fanandraigö."

             Sinunö Laudate No 45C ma 46A

 S   Me humede na Yesu, tohare ngawawa niha, nidönia'ö Yuda,

     samösa ba gotalua ndra nifahaö Yesu si felendrua.

     I'ondrasi Yesu ba wangago bawaNia. Imane khönia Yesu :

Y  "He Yuda, hadia fa'ago bawa ndra'ugö khö Nono Niha andrö, wemanga mböliNia ?"

S   Me la'ila si fao khöNia, hewisa, ba lamane :

N  "He So'aya, hadia malau khöra wöda ?"

S   Samösa ba gotaluara samözi enoni gere sebua faoma föda,

     irege aetu dalinga kambölö genoni andrö. Imane Yesu :

Y  "Noa, böi mitohugö !"

S   Ba Ibabaya dalinga genoni andrö ba wamadöhö ya'ia.-

     Imane Yesu khö ndra ere sebua ba ira gumandra sanaro

     ba nomo Lowalangi, awö ndra salaŵa niha Yahudi si tohare

     ba da'ö ba wondra'u Ya'ia :

Y  "Hana wa tohare ami faoma föda awö wagado wondra'u Ya'o,

     hulö samara'u Ndra'odo andre ? Ero ma'ökhö so Ndra'o

     ba khömi ba nomo Lowalangi, ba lö barani ami wondra'u Ya'o.

     Ba hiza, da'e ginötö khömi;

     da'e ginötö wa ifatörö ami fa'abölö zogömigömi."

 S   Lara'u Yesu ba la'ohe ba nomo gere sebua.

     I'o'ö Fetero moroi ba zaröu. Ba me la'ebua'ö galitö

     ba dalu golayama, me dumadao ira fasui galitö andrö,

     ba dumadao göi Wetero ba gotaluara. Samösa genoni ira alawe sangila dumadao Wetero ba haga galitö.

     Ihaogö wamaigi ya'ia ira alawe andrö, imane :

N  "Si fao göi khö Yesu niha andrö."

S   I'osilö'ögö Fetero, imane :

N  "Lö u'ila haniha da'ö, alawe."

S   Lö ara aefa da'ö samösa niha bö'ö zangila Fetero ba imane :

N  "Samösa göi ndra'ugö ba gotaluara."

S   Itema lira Fetero, imane :

N  "Tenga, talifusö."

S   Mato sambua za aefa da'ö, ifaduhu'ö niha bö'ö, imane :

N  "Sindruhu, da'e göi nawöNia; banua Galilaia sa ia."

S   Imane Fetero :

N  "He talifusö, hadia niŵa'öu lö aboto ba dödögu."

S   Faudu ba ginötö andrö, me humede na Wetero, miwo manu.

     Ifakhölö Ia So'aya, Ifaigi Wetero. Awena itörö tödö Wetero

     niŵa'ö Zo'aya andrö, me Imane khöNia : Lö fakhamö miwo manu bongi andre ba no medölu ö'osilö'ögö Ndra'o.

     Ba möi Wetero baero ba me'e ia adö'udö'u.

 S   La'omai'ö ba lafakao Yesu, ira niha sanaro Ya'ia.

     Labalugö Ia ba lasofu khöNia, lamane :

N  "Na sama'ele'ö Ndra'ugö, ŵa'ö haniha zamözi Ya'ugö ?"

S   Ba oya nasa wehede fanandraŵaisi niŵa'öra khöNia.-

     Me no moluo, falukha ndra salaŵa mbanua,

     ira ere sebua ba ira sangila amakhoita

     ba la'ohe Yesu ba rafe khöra. Lamane khöNia :

N  "Na Keriso andrö Ndra'ugö, ombakha'ö khöma."

S   Itema li Yesu :

Y  "Na U'ombakha'ö khömi, lö faduhu dödömi.

     Ba na manofu Ndra'o, ba lö mitema liGu.

     Ba hiza, i'otarai iada'e dumadao Nono Niha andrö

     ba gambölö Lowalangi fondrege zabölö."

S   Ba lamane fefu :

N  "Na simanö, hadia Ya'ugö andre Nono Lowalangi ?"

S   Itema li Yesu :

Y  Ya'ia simane niŵa'ömi."

S   Lamane :

N  "Hadia guna nasa sasi khöda ?

     No tarongo samösa moroi ba mbawaNia."

             Sinunö Laudate No 52

 S   Maoso ira fefu ba la'ohe Yesu khö Wilato.

     Ba da'ö labörögö la'adugö Ia, lamane :

N  "No masöndra, wa Ifaelungu niha sato Niha da'e.

     Ifawe'e niha, afu lö labu'a belesite khö Kaisaro,

     börö me Imane, wa Ya'ia sa razo andrö nifabu'u Lowalangi."

S   Isofu khöNia Filato, imane :

N  "Hadia sindruhu razo niha Yahudi Ndra'ugö ?"

S   Itema liNia Yesu, Imane :

Y  "Ya'ia simane niŵa'öu."

S   Imane Filato khö ndra ere sebua, awö niha sato andrö :

N  "Ma'ifu lö nisöndragu sala ba wanguhuku Niha andre."

S   Ba hiza, lafaso, lamane :

N  "Ifahufa soi niha Yahudi ma'asambua faoma famahaöNia,

     i'otarai danö Galilaia irugi da'e."

 S   Me irongo Filato da'ö, isofu, na banua Galilaia Niha da'ö.

     Me irongo, wa moroi ba danö nifatörö razo Herode Yesu,

     ifatenge Ia khö Herode, si so ba Yerusalema göi, me luo da'ö.

     Omuso sibai dödö Herode, me i'ila Yesu.

     No ara sa'ae omasi ia i'ila Yesu, me no irongo duriaNia,

     ba itötöna wa i'ila samösa,

     na Ifazökhi dandra sahölihöli dödö Yesu.

     Wa'oya ibe'e wanofu khö Yesu, ba ma'ifu lö Itema linia Yesu.

     So göi ba da'ö ndra ere sebua, awö ndra sangila amakhoita,

     ba labe'e wangadu sagabua sibai khö Yesu.

     La'o'aya ba la'omai'ö Yesu göi Herode, awö zaradadunia.

     Ba wango'aya Ya'ia lafobaru  Ia faoma baru si takile.

     Ba mbaru andre ifatenge Ia mangawuli Herode khö Wilato.

     Ba tobali fahuwu ira, Herode Wilato, i'otarai luo da'ö.

     Föna da'ö, no si fa'udu ira.

      I'owului ndra ere sebua, awö ndra salaŵa,

     awö niha sato, Filato, imane khöra :

N  "No mi'ohe khögu Niha andrö, awö wa miŵa'ö, Ifaelungu niha.

     Hiza, no ufareso Ia fönami, lö nisöndragu sala ba ni'angadugömi khöNia. Ba simanö göi Herode. Andrö wa ifatenge Ia mangawuli khögu. Hiza, lö hadöi amuata Niha andre si tola tobali börö,

     wa la'aetu'ö huku famunu khöNia.

     Da'ufabözi'ö Ia, awena u'efa'ö Ia."

 S   Ero owasa Paska, no to'ölö i'efa'ö Filato samösa niha nitaha,

     somasi niha sato. Mu'ao fefu niha, lamane :

N  "Tibo'ö niha da'ö, efa'ö khöma Mbaraba."

S   Baraba andrö, no mukuru ia, börö wamaruka ba mbanua,

     awö wamununia niha. Ifuli mu'ao Wilato ba niha sato,

     wa omasi ia i'efa'ö Yesu. Latema linia ba we'ao, lamane :

N  "Foröfa Ia ! Foröfa Ia !"

S   Ba zi medölu kali mu'ao Wilato khöra, imane :

N  "Hadia horö nifazökhi Niha da'ö ? Lö nisöndragu hadia ia,

     si tobali börö ba wame khöNia huku famunu.

     Na no u'otu'ö Ia, u'efa'ö Ia."

S   Mu'ao'ao ira sa'oi dödöra, wa lö tola lö'ö ni'osö Yesu ba röfa.

     Ba ba gafuriata möna ira ba we'aora andrö.

     I'etu'ö Filato huku famunu khö Yesu, faudu ba zomasi niha sato.

     I'efa'ö khöra niha ni'andröra, nikuru börö wamaruka awö wamunu niha. Ba Yesu, ba ibe'e ba dangara, ena'ö lalau zomasi ira.- La'ohe baero Yesu. Ba dalu lala falukha ira zotöi Simoni,

     i'otarai mbanua Girene. Mangawuli ia moroi ba danö.

     Lara'u ba lafaso ia wolohe röfa furi Yesu.

     Ato niha zi fao sowaöwaö awö Yesu. So ba gotaluara ndra alawe sange'esi Yesu ba wa'ahakhö dödöra.

     Ibali'ö Ia khöra Yesu, Imane:

Y  "He ira alawe Yerusalema ! Böi mi'e'e khöGu, - mi'e'e khömi

     ba ba ndraonomi ! Hiza sa, so ginötö dania, lamane, moharazaki

     ndra alawe si lö ono ba si lö irai mo'ono, awö ndra alawe si lö irai mamaenu ono. Ba ginötö andrö dania labörögö laŵa'ö ba hili :

     Langögö ndra'aga ! Ba ba hilihili : Balugö ndra'aga ! Börö na lalau zimane ba döla geu sauri, hadia nilaura ba gadolu?"

 S   So göi darua niha bö'ö, darua manö samara'u,  ni'ohera

     ba wamunu ya'ira awö Yesu. Me no larugi nahia andrö,

     sotöi Sole-Högö, laforöfa Yesu ba da'ö, awö niha samara'u

     si darua andrö, - samösa tanö ba gambölö Yesu ba si samösa

     ba gaberaNia. – Ilau mangandrö Yesu, Imane :

Y  "He Ama, be'e aefa khöra, lö'ö sa la'ila hadia nilaura."

S   Labagibagi nukha Yesu, ira saradadu ba gotaluara,

     fadahödahö ira. Lalau muzizio niha sato ba da'ö, ba lafaigifaigi.

     La'o'aya Yesu ira salaŵa niha Yahudi, lamane :

N  "No I'orifi niha bö'ö, ya mu'orifi göi Ia samösa,

     na Keriso andrö Ia, razo sangorifi nifabu'u Lowalangi andrö."

S   La'o'aya Yesu göi ira saradadu.-

     Möi ira khöNia wame'e agu saisö, lamane :

N  "Na razo niha Yahudi Ndra'ugö, orifi Ndra'ugö."

S   Yaŵa högö Yesu no lasura wehede : "Razo niha Yahudi da'e".-

      Samösa ba gotalua ndra samara'u niforöfa andrö,

     zanandrawaisi Yesu göi, sanguma'ö :

N  "Tenga Razo sangorifi nifabu'u Lowalangi andrö Ndra'ugö ?

     Orifi Ndra'ugö ba ya'aga göi !"

S   Itegu ia samara'u si samösa, imane :

N  "Hadia lö ata'u ndra'ugö khö Lowalangi ? Faudu ba gamuatada

     huku andrö nibe'e khöda. Ba Ya'ia andre lö sala."

S   Awena iŵa'ö khö Yesu :

N  "He Yesu ! Törö tödöU ndra'odo,

     na Öbörögö mamatörö ba gamatöröŵaU andrö !"

S   Imane khönia Yesu :

Y  "Ya faduhu dödöu :

     Ma'ökhö andre awöGu ndra'ugö ba Waradaiso."

S   Me bözi felendrua laluo, ihawui danö ma'asagörö fa'ogömigömi,

     irugi bözi tölu tanö owi, me taya haga luo.

     Asika ba fabali mba'aba'a nukha (samabali nahia ni'amoni'ö moroi ba nahia wondrege ni'amoni'ö) ba nomo Lowalangi.

     Mu'ao Yesu, ebua liNia, Imane :

Y  "He Ama, ba dangaU Utou'ö nosoGu."

S   Me no aefa Iŵa'ö da'ö, mate Ia.

 Iada’e datatuhi danö ba wanömba So’aya, si no mate salahida ! – (Ifuli mudadao ita !)

S   Me no i'ila da'ö fefu kumandra ndra saradadu andrö,

     ibe'e zumange khö Lowalangi, wanguma'ö :

N  "Sindruhu, si lö sala Niha da'ö."

S   Ba dozi niha sato, si no möi mamaigi da'ö, me la'ila da'ö fefu,

     ba labözi dotora fao fa'alangu dödö ba lafuli ira ba nomora.

     Ba zaröu  ma'ifu muzizio göi niha si no fa'ila li khö Yesu.

     Ba gotaluara so göi ndra alawe andrö,

     solo'ö Yesu i'otarai Galilaia, ya'ira fefu zangila da'ö.

     So samösa niha sotöi Yosefo, si otarai mbanua Garimatia ba danö

     Yudaia. No niha si sökhi ia ba satulö tödö ba ibalobaloi we'aso gamatöröŵa Lowalangi. He ŵa'ae ndrotondroto zanguhuku

     ba agama ia,  - lö fao dödönia ba gangetula ndra sanguhuku andrö.  Ya'ia zi möi khö Wilato wangandrö, ena'ö ibe'e

     mboto Yesu. Ibe'e tou mboto Yesu moroi ba röfa Yosefo,

     i'olohuni faoma muko. Awena itou'ö mboto Yesu andrö

     ba lewatö nikhao ba narö gara, ba zi lö irai lako'o niha.

     Luo Zumaha me luo andrö. ba lö ara tö ibörögö luo Sabato.

     Ira alawe andrö, si no molo'ö Yesu moroi ba Galilaia, la'o'ö Yosefo lafaigi lewatö andrö ba he lawisa wogo'o boto Yesu.

     Aefa da'ö mangawuli ira ba wama'anö samohua,

     awö wanikha, nibe'era dania ba mboto Yesu.

     Ba luo Sabato, ahono ira, la'o'ö goroisa.-                      Luk 22:14-23:56

 S   Simanö duria wamakao khö Zo'aya ya'ita, Yesu Keriso.-

Sondrönia'ö Luo Migu Bulu Geu [Foto Dok. pribadi]

Erönua:

SOLOLOHE YA'AMI, YA TOBALI IA ENONIMI.

Bakha ba wombaso sisara andre tarongo hewisa nirasoi samösa enoni Zo’aya andrö. Enoni andrö ba si lö mamalö ena’ö mamondrongo hadia nifakhoi Lowalangi ya’ia. Ba zimanö lö mamalö ifalua fefu hadia nifatenge Lowalangi ya’ia. Ba wolo’önia halöwö nibe’e Lowalangi andrö, sindruhu lö khönia famadaö ba itayaigö göi ba dödönia fefu wa’aila ba wa’aniha.

Bakha ba wombaso sidua tarongo hewisa wehede Waulo andrö ba niha samati ba mbanua Wilifi. Ifaehagö khöda Faulo hewisa we’amöi Yesu andrö ba gulidanö. Fe’amöi Yesu ba gulidanö, tenga simöi mangoni ba hiza no simöi enoni. Ba we’amöinia enoni andrö, ba no ifagölösi ia ba niha ha ya’I wa lö faruka ia ba horö. Me lö fa’aiwö khö Yesu ba we’amöiNia enoni andrö, da’ö dania mbörö wa I’alawa’ö Ia Lowalangi ba ibe’e khöNia döi sitöra molakhömi ba döi fefu.

Bakha ba wombaso Turia Somuso Dödö, sindru I’oroma’ö khöda hewisa we’amöi Yesu andrö tobali enoni. Ba we’amöinia enoni andrö, itaögö fefu wamöbögö si lö atulö andrö irege laforöfa ia ba döla röfa simane niha samarabu andrö. Tenga ha moroi ba niha bö’ö, ba gotalua nifaha’öNia samösa göi, so zimanga böliNia. Hewa’ae simanö, lö khönia famadöni, ha folo’ö manö zalua khöNia. Ha fangandröNia wanguma’ö: "He Ama, na tola, Ö'aröu'ö moroi khöGu mako wamakao andre. Ba böi ya itörö zomazi Ndra'o. Ya alua zomasi Ndra'ugö."

Ba lala wa’auri sero ma’ökhö, fe’amöi enoni ba no sambua amuata sasese la’amatunöisi niha. Ba hiza ba wamalua ya’ia, fa’itaria oya niha sabölö mangoni moroi ba we’amöi enoni. Ba wamalua fangoni andrö ba no aoha sibai. Fe’amöi enoni andrö ba no sambua lala halöwö sabua famalua na tenga sifao fa’ahele dödö wamalua ya’ia.

Fe’amöi enoni andrö bas i lö mamalö no mama’anö, simane niwa’önia ba wombaso sisara andrö. Lö mamalö no ibe’e mbörö dalingania enoni andrö. Inönö nasa Faulo, wa enoni andrö ba si lö tola lö’ö ifaedogö ia simane niha sato simöi enoni. Yesu nibe’e Waulo tobali dumaduma. Hewa’ae no Lowalangi Yesu andrö, ba hiza me möi Ia enoni Lowalangi ba gotalua niha, bas i lö tola lö’ö iröi wa’asalawaNia andrö.

Ba wangowasaini Luo Migu Mbulu Geu andre sindruhu tebotokhi sindruhunia ba dödöda hewisa wanema’ö niha sato we’amöi Yesu ba Yerusalema. Hosanna! Da’ö wehede niha sato. Ba hiza hewa’ae la’a’aoni wa razo Yesu andrö, ba hiza ö igogohe sibai wa’arazoNia. Ba we’amöiNia razo andrö, ba da’ö tobali ia enoni zato ba wanaögö fa’afökhö irugi wa’amate ba döla röfa salahi niha sato. Fe’amöi Yesu tobali enoni andrö, ba da’ö I’oroma’ö wa’omasiNia sebua andrö wa sifao fa’ahele dödöNia da’ö fefu.

Iada’a na tasofu ba dödöda zamösana, hadia sinangea göi ita tobali enoni? Hadia tola tafalua we’amöi enoni andrö sifao fa’ahele dödö? Hadia lö mamalö tola tataögö wa’afökhö ba we’amöi enoni andrö? Bulu nohi ni’oheda andrö no tandra wa’atulö ia khöda si lö atoru ba zi sagötö zi döfi fa’ara. Foloheda bulu nohi andrö ena’ö tobali ia tandra khöda ba wa’aro dödöda ba wolohe fa’atulö andrö ba nahiada zamösana. Iada’a tefatenge ita göi ba we’amöi enoni ba wolohe fa’atulö andrö ena’ö sindruhu tefagamöi gamatöröwa Lowalangi andrö sifao fa’ohahau dödö.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011

Stefan Leks, Tafsir Injil Lukas Yogyakarta: Kanisius, 2003