LUO MIGU SI – 5 BA GINÖTÖ FÖNA PASKA DÖFI C

 FOMBASO  I

Taroma Li Lowalangi

nihalö moroi ba zura Yesaya, sama'ele'ö.-

Da'ö niŵa'ö Zo'aya : Me luo no, no Ufazökhi lala ba dalu nasi, ena'ö itörö soiGu. Awena Ufatenge ndra saradadu Mesirayi si fao kureta, awö kudo, ba wanuwö soiGu andrö. Hiza tou ira fefu, lö maoso sa'ae ira; no mate ira, no alele, hulö dali wandru. Ba hiza, böi mitörö tödömi hadia ia föna. Mi'osilömilagö hadia ia zi no numalö ! Hiza, Ulau zi bohou. No motalinga sa'ae ia. Hadia, lö mi'ila ? Ufazökhi lala ba danö si mate ba boto nidanö ba zi lö nihaniha mege, ba wame'e nibadu ba soiGu andrö, nituyuGu, na so ira ba lala. Isuno dania Ndra'o utu ndru'u : Asu danö si mate ba ono wofo ondra, börö me Ufo'idanö danö si mate ba me U'a'asogö mboto nidanö ba zi lö nihaniha mege. Soi da'ö, nihaogöGu khöGu, zangombakha lakhömiGu dania.- Yes 43:16-21

Simanö daroma li Lowalangi.-

 

Sinunö Fanema Li : Psallite No 126                          (ma Laudate No 90, 1-2)

 

FOMBASO  II

Taroma Li Lowalangi

nihalö moroi ba zura Waulo ba niha samati ba mbanua Wilifi.-

Ya'ami ira talifusö ! Börö Keriso, wa fefu niŵa'ö dödögu haregu me föna, no tobali te'alagu iada'e. Ba hadia ia fefu sa'ae, ba te'ala manö, uŵa'ö tödögu, börö wa'aboto ba dödögu Keriso Yesu, So'aya ya'o, si no ebua moroi ba danö bö'ö fefu. Da'ö mbörö, wa utayaigö fefu hadia ia, ba sasao ia uŵa'ö tödögu, ena'ö usöndra haregu Keriso, ba ena'ö oroma, ha ba khöNia so ndra'o. Amakhaita si sökhi khö Lowalangi, lö sa'ae u'ohalöŵögöi samösa si fao folo'ö oroisa ma ngawalö huku, ba hiza, iada'e so khögu gamakhaita si sökhi khö Lowalangi, börö me mamati ndra'o khö Keriso. Eluahania, amakhaita si sökhi andrö no'i'oroi khö Lowalangi ba te'odanedanegö ba wamati khö Yesu Keriso.

Ha sambalö zabölö omasi ndra'o, ya'ia da'ö, ena'ö anehe ndra'o Keriso ba urasoi wa'abölö andrö, sangorifi Ya'ia moroi ba wa'amate. Omasi ndra'o fao khöNia ba wamakao andrö, akha tobali fagölö khöNia ndra'o bakha ba wa'amateNia. Ba manötöna ndra'o, wa te'orifi ndra'o göi moroi ba wa'amate ba ifuli auri sa'ae. Lö uŵa'ö, wa no ukhamö ba ma no mo'ahonoa ndra'odo. Ba utohugö wolohi ba wanöndra buala andrö, si no Ihönagö Yesu Keriso, si no mora'u ya'o, tobali tana khöNia. Lö uŵa'ö dödögu, ya'ami ira talifusö, wa no usöndra mbuala andrö. Ba ha sambalö nilaugu : Olifudo zi no numalö ba ugohi zi so fönagu. Fagohi ndra'o ba wogamö sawatö andrö ba wanöndra femöna, ya'ia wa'auri ba zorugo.  Ba da'ö Ikaoni ita Lowalangi, ba khö Keriso Yesu.-  Flf 3:8-14

Simanö daroma li Lowalangi.-

 

Sinunö Föna Injil : Psallite No 226C                            (ma Laudate No 90, 3)

 

INJIL

Turia Somuso Dödö khö Yesu Keriso nisura Yohane.- 

Me luo da'ö, möi ba gahe hili wanikha Yesu (ba wolombase ba zi bongi). Me no moluo, mangawuli Ia ba nomo Lowalangi, ba oi la'ondrasi Ia niha. Mudadao Ia mamahaö ya'ira.-Ba ginötö da'ö la'ohe khöNia ira sangila amakhoita ba ira Farizai'o samösa ndra alawe, nira'u ba wohorö, lafa'aso ia ba gotalua niha sato, ba lamane khö Yesu : "He Guru, nisöndra ba wohorö ndra alawe andre. Bakha ba goroisa no iŵa'ö khöda Moze, lö tola tabunu niha simanö, nitebu kara. Ba Ya'ugö, ha Öŵa'ö ?" Lamanö wanofu ba wamesu liNia, ena'ö la'ila mu'adugö Ia. Ifaöndö Ia tou Yesu, Isura danö faoma turuNia. Ba me labato wanofu khöNia, ba Ifuli Ifaöga Ia ba Imane khöra : "Haniha ba gotaluami zi lö horö, ya ibörögö wanebu ndra alawe andre faoma kara." Awena Ifuli Ifaöndrö Ia manura tanö. Ba ya'ira, me larongo niŵa'ö Yesu andrö, ibörögö lazarazara wofanö, i'otarai zatua. Ba gafuriata ha tö Yesu zi so ba da'ö, awö ndra alawe andrö ba dalu nahia andrö. Me no Ifaöga Ia Yesu ba me lö ni'ilaNia niha, baero ndra alawe andrö, Imane khönia : "He alawe, heza so ira fefu, sangadugö ya'ugö ? Hadia lö sanguhuku ya'ugö ?" Imane : "Lö'ö, So'aya." Imane khönia Yesu : "Ba ya'odo göi, lö Uhuku ndra'ugö. Ofanö iada'e, ba böi sa'ae fazökhi horö."-  Yoh 8:1-11

Simanö duria somuso dödö khö Zo'aya ya'ita, Yesu Keriso.-

Erönua:

BA YA'ODO GÖI, LÖ UHUKU NDRA'UGÖ

Bakha ba wombaso sisara nihalö moroi ba zura Yesaya sama’ele’ö andrö idunödunö hewisa wehede Zo’aya andrö ba Ndraono Gizara’eli. Bakha ba wehede Zo’aya andrö I’ombakha’ö hewisa wangefa’öNia Ndraono Gizara’eli moroi ba wangosawuyu ba ba lala wofanöra wangötö tanö simate ba asi zukhu andrö. Ba dalu wehede Zo’aya andrö iwa’ö: “böi mitörö tödömi hadia ia föna. Mi'osilömilagö hadia ia zi no numalö ! Hiza, Ulau zi bohou. No motalinga sa'ae ia. Hadia, lö mi'ila ?” ba wehede Zo’aya andre sindruhunia ta’ila wa’ahakhö dödö Zo’aya ba niha, hewa’ae no fasala ira.

Bakha ba wombaso sidua göi tarongo hewisa wamaduhu’ö Waulo andrö. Famaduhu’ö Waulo andrö manandrösa ia ba wamati si no ifati börö wogaoni Keriso ya’ia. Hewa’ae afökhö ba akao nitörö Waulo, ba hiza no itayaigö fefu da’ö börö wamatinia ba khö Keriso andrö. Ba zimanö andrö wa lö aiwö Waulo wanguma’ö: “Olifudo zi no numalö ba ugohi zi so fönagu. Fagohi ndra'o ba wogamö sawatö andrö ba wanöndra femöna, ya'ia wa'auri ba zorugo.”

Turia somuso dödö nihalö moroi ba zura Yohane andrö idunödunö khöda hewisa niha sato solohe khö Yesu ira alawe nira’u ba wohorö andrö. Ba wolohera ira’alawe andrö, edöna göi ira ba wanandraigö ya’ia. Ba zimanö omasi niha sato ba wanebu kara ira alawe andrö, ba andrö la’andrö hewisa wehede Yesu ba zimanö. Ba zimanö andrö iwa’ö khöra Yesu: "Haniha ba gotaluami zi lö horö, ya ibörögö wanebu ndra alawe andre faoma kara." Ba wehede Yesu andre aboto ba dödö niha sato wa so göi horö nifaluara. Andrö wa lalau mofanö I’otarai ba zatua. Ba gafuriata göi iwa’ö Yesu ba ndra’alawe andrö: "Ba ya'odo göi, lö Uhuku ndra'ugö. Ofanö iada'e, ba böi sa'ae fazökhi horö." Ba da’e sindruhu ibotokhi ba dödöda Yesu wa fefu ita andre oi so horö, börö da’ö böi göi faoma tahuku nawöda.

Ba zitölu ngawua wombaso andre sindruhu I’ombakha’ö khöda wa sindruhu lö mamalö wa’ahakhö dödö Lowalangi andrö ba niha si so horö. Lö omasi Lowalangi wanguhuku niha. Ba zimanö göi I’andrö ba niha ena’ö böi göi faoma lahuku nawöra niha. Da’e dania sambua nösi wangandrö nifaha’ö Yesu wanguma’ö: “efa’ö khöma horöma simane fangefa’öma horö niha sifasala khöma.” Fefu wangefa’ö sala andre tasöndra ia börö wamati ba fanötöna ba khö Keriso andrö si no fa’omasi si’oroi Nama.

Lö mamalö ikhakhösi tödö niha samalalini era’era Lowalangi. I’efa’ö fefu horö niha samati ba khö Yesu andrö ba lö ihöna ba dödönia Lowalangi horö niha andrö. Andrö göi I’andrö ba niha ena’ö böi tahöna ba dödöda fefu horö andrö töratöra horö nawöda niha. Ya lö mamalö mutayaigö ia ba dödö. Ba hiza ena’ö lö mamalö fa’omasi Lowalangi simane nifalua Yesu andrö ni’oroma’ö. Ba da’ö dania te’oroma’ö lakhömi Lowalangi andrö si no fa’omasi. Ba zimanö I’oroi’ö ba dödö niha me no tata wa’omasi Lowalangi andrö, ba zimanö göi böi sa’ae tafazökhi horö. Amen.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011