Taroma Li Luo Rabu Awu Tahun C

 LUO  RABU  AWU

 

FOMBASO I

Taroma Li Lowalangi

nihalö moroi ba zura Yo'eli, sama'ele'ö.-

 

Da'ö niŵa'ö Zo'aya: "Mifuli ami ba khöGu moroi si'aikö ba dödömi, ya fao wamoni ba fege'ege !  Tödömi mire'a, ba tenga nukhami." Ya mifuli ami khö Lowalangi, So'aya, me no sebua tödö Ia ba sahakhö tödö. Sebolo tödö Ia ba no fahöna wa'asökhi dödöNia, ba mangesa dödöNia ba wamakao andrö. Haniha zangila, na lö Ifuli mangesa dödöNia, irege Ibe'e zui khömi howuhowu.

Milau dorofe ba hili Ziona ! Miŵa'ö wamoni ni'amoni'ö ! Mikaoni niha sato fefu ba gowuloa ! Mi'owuloi niha sato, mi'amoni'ö mbanua, mifa'aso zi no tohare huwa, - mi'owuloi ndraono, numalö si lö aefa na ba mbagi zusu ! Ya muröi mbate'enia sawena mangowalu, ba ono nihalö, ba ya muröi wörömania ! Ira ere, enoni Zo'aya, ya mege'ege ira ba nomo Lowalangi, ba zinga naha wasömbata, ya lamane : Hakhösi tödö soiMö, So'aya, ba böi be'e aila dana khöU, böi möi salaŵara soi niha bö'ö ! Hana wa Ötehegö wa lamane soi bö'ö: Heza so Lowalangi ? Ba afökhö bakha dödö Zo'aya ba danöNia andrö, ba Ihakhösi tödö soiNia.-  Yo’eli 2:12-18

Simanö daroma li Lowangi.-                       Sato : Ma'andrö …

 Sinunö Fanema Li : Psallite No 51 (ma Laudate No 86, 1+2)

 

FOMBASO II

Taroma Li Lowalangi

nihalö moroi ba zura Waulo si mendrua

ba niha samati ba mbanua Gorindro.-

Ya'ami ira talifusö !

Ya'aga, ba no tengetenge Lowalangi,  salahi Keriso ba wehedema andrö: ba döi Keriso ma'andrö sibai, ena'ö mifa'atulö'ögö ami khö Lowalangi ! Noa sa Ibali'ö horö Zi lö irai mangila horö, salahida, ena'ö tobali fa'atulö khö Lowalangi ita ba khö Keriso andrö. Ba ma'andrö khömi, ya'aga si fao ba halöŵö andrö, ena'ö böi saekhu ölö wa'ebua dödö Lowalangi andrö nitemami. Noa sa Iŵa'ö Lowalangi ba zura ni'amoni'ö : "Ufondrondrongo we'aomi, na no irugi inötö; Utolo ami, na no irugi luo wangorifi." Hiza, iada'e no irugi inötö; iada'a no luo wangorifi andrö.- 2 Kor 5:20-6:2

Simanö daroma li Lowalangi.-                    Sato : Ma'andrö …

 Sinunö Föna Injil : Psallite No 221 (ma Laudate No 86, 3)

 

INJIL

Turia Somuso Dödö khö Yesu Keriso nisura Matai'o.

Me luo da'ö, Imane Yesu khö ndra nifahaöNia : "Mifaigifaigi sibai, fa böi mifalua wa'atulö dödömi föna zato, ena'ö la'ila na milau zimanö, ba lö sulö moroi khö Namami si so ba zorugo. Na öbe'e wanolo ba zi numana, böi mifahöngöhöngö ba niha fefu. Na mibe'e wanolo ba zinumana, ya mibe'e ia ba zi lö la'ila niha, he göi si fondrege zahatö khömi. Ba Isulöni khömi Amami sangila si tobini andrö.- Na mangandrö  ami, böi hulö niha sangosatulö ami. Omasi ira mangandrö föna zato ba nomo wangandrö ba ba wabaliŵa lala, ena'ö la'ila ira niha. Sindruhu niŵa'öGu khömi, no latema zulö. Na mangandrö ami, mi'ae'e si bakha ba mbate'e ba mikusi mbawandruhö ba mi'angandrö khö Namami andrö si lö oroma. Ya'ia zame'e sulö khömi ba wolau simanö. Na fuasö ami, böi mifangerau mbawami hulö niha sangosatulö ya'ira. No laleunileuni wowaöwaö, ena'ö oroma wa fuasö ira. No latema zulö khöra. Na milau wuasö, mibayoini högömi, misasai mbawami, ena'ö lö oroma ba niha, wa milau wuasö, ba hiza ha khö Namami, si so ba zi tobini, ba Isulöni khömi Amami andrö, sangila si tobini."- Mat 6:1-6.16-18

Simanö duria somuso dödö khö Zo'aya ya'ita, Yesu Keriso.-

 

Menandai diri dengan abu sebagai lambang pantang dan puasa.

Erönua:

TÖDÖMI MIRE'A, BA TENGA NUKHAMI

Bakha ba wombaso sisara nihalö moroi ba zura Yo’eli sama’ele’ö andrö, sindruhu no sambua fehede sasese tarongo ba ginötö föna paskah ma bangaluo rabu awu. Hadia wehede andrö, ya’ia: "Mifuli ami ba khöGu moroi si'aikö ba dödömi, ya fao wamoni ba fege'ege !  Tödömi mire'a, ba tenga nukhami." Fehede andre moguna sibai, hadia mbörö me ya’ita andre niha gulidanö si lö manö irai aefa ba ngawalö zala ba olalöwa. Ba zimanö andrö ibe’e khöda sambua ginötö sisökhi Gereja ba wamalua fangandrö fa’ahakhö dödö Lowalangi: “Hakhösi tödö soiMö, So'aya”.

Fehede Waulo simendrua ba mbanua Gorindro edöna ifaehagö khöda hewisa zindruhu wa’omasi Lowalangi andrö irege ibe’e NonoNia si ha samösa andrö. Andrö dania wa iwa’ö Faulo “ba döi Keriso ma'andrö sibai, ena'ö mifa'atulö'ögö ami khö Lowalangi ! Noa sa Ibali'ö horö Zi lö irai mangila horö, salahida, ena'ö tobali fa'atulö khö Lowalangi ita ba khö Keriso andrö”. Ba ginötö andre göi si no ihönagö Gereja ena’ö sindruhu tobali ia khöda sambua inötö si sökhi ba wamalalini eraera.

Turia somuso dödö andrö nisura Matai’o sindruhu I’ombakha’ö khöda Yesu hewisa ita ba wamalalini era’era andrö. Moguna sibai ia ba khöda zamösana ba tenga ba nawöda. Ba wehede Yesu andrö i’andrö ena’ö ha Lowalangi zangila ösi dödöda ba wangandrö fa’ahakhö dödö Lowalangi andrö ba tenga ba ni’ila niha. Na i'ila niha wamaluada fangandrö fa’ahakhö dödö Lowalangi andrö ba no hulö zangalui lakhömida ita ba tobali tenga saae sangandrö fa’ebolo dödö Lowalangi.

Ba zimanö moguna ta’angeraigö ba ginötö wamörögöda inötö wuasö ba famoni andre ena’ö sindruhu sangide’ngide’ö ita föna Lowalangi. Fangidengide’öda ya’ita föna Lowalangi andrö ya’ia na tafalua ia sifao fa’ahele dödö ba wamalua somasi Lowalangi andrö. Famalua somasi Lowalangi andrö ba ya’ia wamalua fa’omasi ba nawö töratöra khö ndra talifusö sabölö mangoguna’ö. Ba fefu da’ö moguna mufalua ia sifao fa’asökhi ba tenga ba wangalui lakhömi ba zato. 

Ya'ahowu wamörögö inötö wuasö ba famoni.
Ya lö mamalö ihakhösitödö ita Lowalangi.