Taroma Li Luo Migu Si - 1 Ba Ginötö Föna Paska Döfi C

Fasömbata Ndraono Gizara'eli.[umbu: satuharapan.com]

FOMBASO  I

Taroma Li Lowalangi

nihalö moroi ba zura Moze si lima.-

 

Me luo no, imane Moze khö Ndraono Gizara'eli ma'afefu : "Na no mirugi dania danö andrö, nibe'e Lowalangi, So'aya, khömi, okhötami, akha ero zamösana ba gotaluami ifo'ösi ragaraga faoma sia'a mbua nowinia ba möi ia ba nomo Zo'aya. Na itema moroi ba dangami ragaraga andrö ere ba na ibe'e ba naha wasömbata, ya mi'akui khö Zo'aya, Lowalangimi, mimane : Niha Garamo sanörönöröi tanö ndra tuama me föna ba lasaŵa misi tou danö Mesirayi, lö atoto zi fao khöra, ba si fatewu ira ba da'ö, ba tobali soi sebua ba da'ö, sato niha ba sabölö. Ba me la'osiwawöi ndra'aga niha Mesirayi, me lafakao ndra'aga ba me lafohalöŵö ndra'aga halöwö sabe'e, ma'angaröfi li Zo'aya, Lowalangi ndra furugöma andrö, ba Ifondrondrongo wangaröngaröma andrö So'aya, ba I'ila wa'anumanama ba famakaoma awö wa'atosasama. Ba Iheta ndra'aga ba danö Mesirayi So'aya faoma tangaNia sabe'e ba ta'ioNia andrö, ni'oro'ö, ba fao dandra ba ila'ila. Ba no I'ohe ndra'aga ba da'e ba no Ibe'e khöma danö andre, tanö si falawu susu ba ŵe ŵani. Ya'e ni'ohema, sia'a mbua danö andrö, nibe'eU khöma, Ya'ugö he So'aya. Na no mibe'e ragaraga andrö föna naha wasömbata andrö, ya mangalulu ami khö Lowalangi, So'aya. Awena mi'omusoi'ö dödömi ba howuhowu andrö fefu, nibe'e Lowalangimi, So'aya, khömi, ba khö nawömi ira sohalöŵö ba nomo Lowalangi ba khö niha bö'ö si so ba khömi."-  5 Moz 26:1-11

 

Simanö daroma li Lowalangi.-

 

Sinunö Fanema Li : Psallite No 91                                   (ma Laudate No 91)

 

FOMBASO  II

Taroma Li Lowalangi

nihalö moroi ba zura Waulo ba niha samati ba mbanua Roma.-

 

Ya'ami ira talifusö ! Hadia niŵa'ö zura ni'amoni'ö ? "No ahatö sibai duria Lowalangi andrö khömi, tesöndra ia ba mbewemi ba ba dödömi." Da'ö duria ni'ombakha'öma : turia wamati. Na mifaduhu'ö faoma bawami, wa Yesu andrö So'aya, ba na mifaduhu'ö ba dödömi, wa Lowalangi zangorifi Yesu moroi ba wa'amate, te'orifi dania ami.

Haniha zamati ba dödönia ba samaduhu'ö ba mbewenia, da'ö zanöndra dania fa'atulö dödö ba fangorifi. Noa sa tesura ba zura ni'amoni'ö : Lö aekhu gölö zamati khöNia. Ba da'e sa lö faehu ira niha Yahudi niha Yunani, börö ha samösa Zo'aya ya'ira. Moroi ba zi a'oi so khöNia Ibe'e mbuala ba niha fefu sangandrö tolo khöNia. No tesura ba zura ni'amoni'ö : Haniha zogaoni töi Zo'aya, te'orifi dania.-  Rom 10:8-13

 

Simanö daroma li Lowalangi.-

 

Sinunö Föna Injil : Psallite No 222                                   (ma Laudate No 94)

 

INJIL

Turia Somuso Dödö khö Yesu Keriso nisura Luka.-

 

Me luo da'ö, mangawuli Yesu moroi ba nungo nidanö Yoridano; no fahöna khöNia Geheha Ni'amoni'ö. Ba I'ohe Ia Eheha andrö ba danö si mate, ba itandraigö Ia afökha, öfa wulu wongi wa'ara. Ba zi sandrohu inötö andrö lö manga Ia, irege ba gafuriata olofo Ia.

Imane khöNia afökha : "Na Ono Lowalangi Ndra'ugö, hede ba gara andrö, ena'ö tobali roti." Itema linia Yesu, Imane : "No musura ba zura ni'amoni'ö : Tenga ha ba gönia auri niha." Aefa da'ö, i'ohe Yesu ba nahia salaŵa afökha ba iforoma'ö khönia fefu gamatöröŵa ba gulidanö, ba zi ha mamö'i hörö wa'ara. Imane khöNia afökha : "KhöU ube'e kuaso ba gamatöröŵa andrö fefu, si fao lakhöminia. Noa sa mube'e kuaso andrö ba dangagu, ba ube'e ba niha somasi ndra'o. KhöU dania fefu da'ö, na Ötuhi danö wangalulu khögu." Imane Yesu : "No musura ba zura ni'amoni'ö : Ha khö Zo'aya, Lowalangiu mangalulu ndra'ugö, ba ha Ya'ia öfosumange."

Aefa da'ö i'ohe Yesu ba Yerusalema afökha ba ifa'aso ba mbumbu nomo Lowalangi ba imane khöNia : "Na Ono Lowalangi Ndra'ugö, fazaumba'ö moroi ba da'e. Börö me no musura ba zura ni'amoni'ö : Iŵa'ö ba ndra mala'ika andrö khöNia Lowalangi, ba khöMö andrö, ena'ö larorogö Ndra'ugö; lataya dania faoma tangara Ndra'ugö, ena'ö lö manendre gaheU ba gara." Itema linia Yesu, Imane : "No musura göi : Böi tandraigö Zo'aya, Lowalangiu !" Ba me no i'o'ozui afökha fefu wanandraigö Yesu, ba iböhöi Ia ua ba ibaloi ginötö si sökhi.  Luk 4:1-13

 

Simanö duria somuso dödö khö Zo'aya ya'ita, Yesu Keriso.-

 

Erönua:

Bakha ba wombaso siföföna nihalö moroi ba zura Moze si lima andre, sindruhu no oroisa Moze ba Ndraono Gizara’ele sedöna mondrugi tanö amabu’ula andrö. Oroisa Moze andrö sindruhu manandrösa ia ba Ndraono Gizara’eli ena’ö böi olifu ira wangandrö saohagölö khö Lowalangi. So dombua faosatö zedöna la’andrö saohagolo Iraono Gizara’eli andrö ya’ia siföföna: ba wangandrö saohagölö meno ibe’e khöra Lowalangi danö si no fahöna bua ba simendrua: ya’ia ba wangandrö saohagölö me no teheta ira moroi ba danö Misirayi andrö. Bua wangandrö saohagölö andre ba ya’ia ena’ö wamuli sumange Lowalangi börö wondrorogöNia awö ba wame’eNia howuhowu hewa’ae oya wanandraigö andrö.

Fehede Waulo andrö ba mbanua niha samati ba mbanua Roma, no sambua fangaro dödö ba famaha’ö wa "No ahatö sibai duria Lowalangi andrö khömi, tesöndra ia ba mbewemi ba ba dödömi". Famaduhu’ö faoma bawa ba famonahia Lowalangi andrö bakha ba dödö, lö tobali zayazaya ia gölö. Fefu da’ö ba itema zulö khönia zamösana ya’ia wa’auri si lö aetu andrö.

Sitölö faosatö wanandraigö Yesu ba danö simate, sindruhu ba wamaheu hewisa wamati si no I’okhögö andrö. Yesu si so bakha ba mboto wa’aniha andrö lö te’efa’ö moroi ba ngawalö wanandraigö. Ba hiza börö wa’aro dödö Yesu ba daroma li Lowalangi andrö, fefu wanandraigö gafökha andrö, tola I’alani.

Bakha ba zi tölu ngawua wombaso andre, sindruhu wa: ö soguna bongi ma’ökhö, lakhömi ba kuaso, no sambua fanandraigö si lö irai faröi ba mboto wa’aniha. Ba hiza na tenga börö wa’aro dödö ba famati ba khö Lowalangi, no site’ala niha gulidanö. Andrö wa ifasugi Moze ba dödö Ndraono Gizara’eli ba wamuli sumange Lowalangi fefu mbuala si no latema, börö me no I’ila Moze hewisa me ibe’e khöra wanandraigö Lowalangi ba lö mamalö si kumökökökö manö Ndraono Gizara’eli.

Fangandro saohagölö ba famuli sumange Lowalangi andrö tenga börö zebua sibai.  Faulo zamaduhu’ö wa fangandrö saohagölö ba famuli sumange Lowalangi andrö ba no ahatö sibai ia khöda. Fefu da’ö tesöndra ia ba mbewe ba ba dödöda. “Na mifaduhu'ö faoma bawami, wa Yesu andrö So'aya, ba na mifaduhu'ö ba dödömi, wa Lowalangi zangorifi Yesu moroi ba wa'amate, te'orifi dania ami”. Ba “Haniha zamati ba dödönia ba samaduhu'ö ba mbewenia, da'ö zanöndra dania fa'atulö dödö ba fangorifi”.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011

Stefan Leks, Tafsir Injil Lukas Yogyakarta: Kanisius, 2003