ELUAHA HORÖ

 

Ba lala wa’auri si’ero ma’ökhö, asese sibai terongo ma lawa’ö’wa’ö nifotöi horö. Hewa’ae simanö, hadia no la’ila hadia geluaha horö andrö ba hendrege irugi nifotöi horö andrö?

Bakha ba zura Zinunö Dawido tesura: “khöU no mosala ndra’odo, ha sambalö khöU manö ulau zi lö omasi’Ö…” (Sura Zinunö 51:6). Moroi ba wombaso andre sindruhu tola ibörögö oroma hadia nifotöi horö andrö. Horö andrö ya’ia “wamalua si lö omasi Lowalangi”. Si lö omasi Lowalangi andrö ba alio sibai tefakhai ia ba goroisa Lowalangi andrö si fulu nifa’emaNia ba Ndraono Gizara’eli ni’ohe Moze (Sura Moze-2 20:2-7; Sura Moze-5 5:6-21).

Moroi ba wamotokhi andre, alio tebotokhi ba dödö wa dozi sanawö oroisa andrö ba no ifalua horö. Ba zitambai da’ö, tola manö i’o’ö niha sisamösamösa fefu goroisa andrö. Ba zimanö tola tumbu wanofu: hadia si lö manawö oroisa andrö lö tesöndra khönia horö?

Bakha ba mbuku Kompendium Katekismus Gereja Katolik Famaha’ö Wamati Katolik ba Li Niha, tedunödunö wamaha’ö so’amakhaita ba geluaha horö andrö. Ba mbuku andrö tesura:

Horö ba ya’ia da’ö “fehede, amuata, ma ohitö dödö si lö faudu ba Goroisa Lowalangi” (St. Agustinus). Horö andrö no fangositengagö Lowalangi ba fangosiwawöi fa’omasiNia. Horö zamesokho fa’awösa ba niha. Bakha ba wamakaoNia si no itaögö Keriso te’oroma’ö wa tenga fayafaya horö andrö ba wa no I’alani fao fa’ahakhö dödöNia (KKGK no. 392).

Moroi ba wamaha’ö andre oroma wa tenga ha moroi ba wanawö oroisa andrö tola tesöndra horö. Ba hiza, fehede, amuata, ma ohitö dödö si lö faudu ba Goroisa Lowalangi, no göi tobali sambua horö. Moroi ba wehede, ba gamuata ma ba gohitö dödö niha, tola manö alua wangositengagö Lowalangi ba mendrua manö ba wangosiwawöi fa’omasiNia. Fangositengagö ba fangosiwawöi andre zombali’ö niha sisamösamösa ifalua horö.

Moroi ba zi hauga faosatö andre moroi yawa, ba wa’adogo tola tamane: “horö andrö ya’ia nifalua (=he ni’era’era, he fehede, ba he amuata) solawa Lowalangi. Ba zimanö dania börö horö andrö tola ifesokho gamakhaita niha khö Lowalangi, khö nawönia niha, khö danö si so ya’ia, ba ba khönia samosa göi. Fesokho gamakhaita andre tola manö alua wa’aetu gamakhaita, irege niha si samosa tola aekhu ba wa’aetu wanötöna.

 

Umbu:

Katekismus Gereja Katolik Ende: Arnoldus, 1995

Kompendium Katekismus Gereja Katolik Famaha’ö Wamati Katolik Ba Li Niha Sibolga: Keuskupan Sibolga-STP Dian Mandala Gunungsitoli, 2013

Mgr. Ignatius Kardinal Suharyo, The Catholic Way Kekatolikan dan Keindonesiaan Kita Yogyakarta: Kanisius, 2009