LUO MIGU WANEMA ZO’AYA FANASA DÖFI C

 FOMBASO  I

Taroma Li Lowalangi nihalö moroi ba zura Yesaya, sama’ele’ö.-

Imane Lowalangi So’aya : Hiza genoniGu andrö, ni’a’aro’öGu, nituyuGu, ni’omasi’öGu. KhöNia no Ube GehehaGu, ena’ö I’ohe huku ba soi niha fefu. Tenga si’ao’ao Ia, tenga sebua li. Lö Ifarongogö liNia ba newali. Sukhu si no mufatö’ö, lö alua Ifatö. Fandru sanimbonimbo, lö Ibunu. Sindruhu lala Itörö wangombakha huku. Lö erege dödöNia, ba lö atage Ia, irege no Ifodanedane huku ba gulidanö ma’asagörö. Ladönadöna goroisaNia andrö niha si so ba hulo misa. Ya’odo, So’aya, zi no mogaoni ya’ugö, tobali enoniGu, satulö lala Utörö. U’ohe dangau ba Urorogö Ndra’ugö. Ube’e fawu’usa li ba soiGu Ndra’ugö ba Ubali’ögö haga soi niha : Ba wamokai hörö niha sau’a, ba wangefa’ö ba gurunga niha nikuru, ba wolohe baero nikuru ba zogömigömi. Ya’o Yahwe – Si So andre, da’ö döiGu.- Yes 42:1-4.6-8a

Simanö daroma li Lowalangi.-

 

Sinunö Fanema Li : Psallite No 29                         (ma Laudate No 37 ma 97)

 

FOMBASO  II

Taroma Li Lowalangi nihalö moroi ba zura Waulo khö Dito.-

Talifusö ni’omasi’ö ! No to’ele wa’asökhi dödö Lowalangi, sangorifi ya’ita, awö wa’omasiNia niha. I’orifi ita sa, tenga börö me no talau zambalö si sökhi, ba hiza, moroi khöNia samösa wangomasi’öNia ya’ita. Ya’ia zangorifi ya’ita bakha ba wanasa ni’amoni’ö  ba samohouni ya’ita ba wa’abölö Geheha Ni’amoni’ö. Eheha andrö zamatumbu’ö ya’ita mangawuli ba same’e fa’auri si bohou. Lowalangi zangöhöna EhehaNia khöda nifa’ema Yesu Keriso, sangorifi ya’ita, ena’ö börö kharasiNia,  amakhaitada khö Lowalangi tobali sökhi mangawuli, ba ena’ö tatema wa’auri si lö aetu, si no tadönadöna.- Tito 3:4-7

Simanö daroma li Lowalangi.-

 

Sinunö Föna Injil : Psallite No 218                                 (ma Laudate No 104)

 

INJIL

Turia Somuso Dödö khö Yesu Keriso nisura Luka.-

Me luo da’ö, ibörögö manofunofu dödö niha sato, hadia Yohane Mesia andrö nibalobaloira. Da’ö mbörö, wa imane khöra fefu Yohane : “Faoma idanö ube’e khömi wanasa.  So dania Zabölö ebua moroi khögu. Lö sinangea ndra’o wanoto’ö böbö mbadagaheNia. Faoma Eheha Ni’amoni’ö ba faoma alitö (wanguhuku) Ibe’e khömi wanasa dania”. Me latema wanasa niha sato, fao göi Yesu ba wanema fanasa. Me no aefa da’ö, ba me mangandrö Ia, ba teboka mbanua si yaŵa, ba möi mitou khöNia Geheha Ni’amoni’ö moboto wamaigira, hulö marafadi. Terongo li moroi ba mbanua si yaŵa sanguma’ö : “OnoGu Ndra’ugö, Ono ni’omasi’öGu,  nituyuGu andrö.”   Luk 3:15-16.21-22

Simanö duria somuso dödö khö Zo’aya ya’ita, Yesu Keriso.-

 

Erönua:

Bakha ba wombaso siföföna tarongo hewisa wama’ele’ö Yesaya andrö sanuriaigö Genoni Lowalangi andrö. Enoni Lowalangi si so andrö ba ya’ia ni’omasi’ö Lowalangi ba zafönu Eheha solohe fa’omuso dödö ba niha sabu tödö. ya’ia göi zamodanedane huku ba gulidanö andrö. Töi genoni sitohare andrö ba ya’ia Yahwe – Si So andrö.

Fama’ele’ö Yesaya andre no sambua famobörö ba wangombakha we’aso Yesu Keriso andrö ba gulidanö. Fe’amöi Yesu ba gulidanö andrö ba ya’ia ba wamodanedane huku sebua ba niha. Huku sebua ba siföföna andrö ba ya’ia huku wa’omasi; “Omasi’ö Zo’aya Lowalangiu moroi si’aikö ba dödö, ba omasi’ö nawöu niha simanö fa’omasiu ndra’ugö”. Na sindruhu ifalua niha huku andre ba no si sökhi tou gulidanö andrö.

Bakha ba wombaso simendrua nihalö moroi ba zura Waulo andrö khö Dito, sindruhu ifaduhu’ö faulo wa no to’ele wa’omasi Lowalangi andrö ba oroma ia ba niha. Fa’omasi soroma andrö ya’ia wangorifi ba fangöhöli moroi ba huku horö fa’amate. Fangöhöli nifalua Lowalangi andrö ba tenga börö me no ifalua niha zambalö zisökhi, ba hiza no buala Lowalangi sebua ba niha. Fefu wangöhöli andrö alua ia ba tasöndra ia bakha ba wanasa ni’amoni’ö nitemada.

Bakha ba wanasa ni’amoni’ö tatema tölu ngawalö mbuala sebua, ya’ia da’ö: 1). Te’efa’ö moroi ba horö ondröita; 2). Tesou tobali Ono Lowalangi; ba 3). Tesou tobali ndrotondroto Gereja. Fefu da’e ba no buala Lowalangi sitebai I’amualagö niha khöda. Fefu da’e tadönadöna tatema ia sifao famati ba fama’ema Geheha Ni’amoni’ö.

Bakha ba wombaso Duria Somuso Dödö andrö tarongo, dombua faosatö sebua. Siföföna ya’ia wamaduhu’ö Yohane andrö same’e fanasa. Ba wamaduhu’ö Yohane andrö ifaduhu’ö wa “Faoma idanö ube’e khömi wanasa.  So dania Zabölö ebua moroi khögu. Lö sinangea ndra’o wanoto’ö böbö mbadagaheNia. Faoma Eheha Ni’amoni’ö ba faoma alitö (wanguhuku) Ibe’e khömi wanasa dania”.  Famaduhu’ö Yohane andrö mo’amakhaita ia ba wanofunofun niha haniha mesia andrö, ba ba wamaduhu’ö haniha zindruhunia zi so kuaso andrö.

Faosatö simendrua zedöna tefaehagö ba wombaso Turia Somuso Dödö andrö ba ya’ia wamaduhu’ö Lowalangi samösa sanandrösa khö Yesu andrö; “OnoGu Ndra’ugö, Ono ni’omasi’öGu,  nituyuGu andrö“. Sidombua faosatö nifa’ema bakha ba duria somuso södö andre, sindruhu mo’amakhaita ia ba wanasa ni’amoni’ö nitema Yesu ba fanasa ni’amoni’ö nitemaNia andrö ba no sambua famaduhu’ö Yaia ba niha ba böröta wangöhöli andrö.

Sitölu ngawaua wombaso nirongoda andre, sindruhu terahugö ia ba zisambua furugö ya’ia ba wanema Zo’aya fanasa. Fanema Zo’aya fanasa andre ba no sambua famaduhu’ö sebua nifa’ema Lowalangi he I’onarai zama’ele’ö andrö ba he Lowalangi samösa göi. Fanasa nibe’e Yohane andrö ba no fanasa börö horö andrö ondröita. Ba hiza fanasa nibe’e Yesu andrö dania khöda zamösana no ba wanema’öda angetula wanguhuku andrö ba luo safuria khöda zamösana.

Ba zi manö, fanasa nibe’e Yohane andrö göi tefatohu ia ba wa’aurida irugi mane ma’ökhö. Bakha ba lala wa’aurida ya’ita niha Katolik, siföföna tetötöi ita tobali ndrotondroto Gereja Katolik ya’ia wanemada fanasa ni’amoni’ö. Iada’a moguna göi manofu ita ba dödöda zamösana; “hadia geluaha wanasa ni’amoni’ö nitemada andrö?”

Fanasa ni’amoni’ö nitemada andrö ba no sambua tandra wamati ia ba khöda ya’ita niha Katolik. Tandra wamati andrö ya’ia ba wangombakha sitölu faosatö. 1). Famati ba wamaduhu’ö famalalini era’era; 2). Famati ba wanou’ö fa’auri ba khö Yesu Keriso; ba 3). Famati ba wamaduhu’ö wa sindruhu wamati andrö khö Yesu Keriso. Sitölu faosatö tandra wamati ni’oroma’ö sitobali bua wanasa ni’amoni’ö andre, te’oroma’ö ia ba mbuabua wa’omasi nifaluada ya’ita niha samati, bongi ba ma’ökhö. 1). Hadia sindruhu no ta’omasi’ö Lowalangi moroi si’aikö ba dödö? ba 2). Hadia sindruhu no ta’omasi’ö nawöda niha simane fa’omasida ya’ita samösa? Ya lö mamalö itolo ita Lowalangi ba wo’erönusi ba ba wanema li ba wanofu andrö, Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011