LALA WAMALUA FANASA NI’AMONI’Õ BAKHA BA GEREJA KATOLIK

Ba ginõtõ si no numalõ, no tabagisi sambua Katekese sifao tuho “BUA SAKRAMEN FANASA NI’AMONI’Õ”. Ba ginõtõ andre ifuli zui ta’erõnusi zo’amakhaita ba Sakramen Fanasa Ni’amoni’õ andrõ ya’ia “Lala Wamalua Fanasa Ni’amoni’õ andrõ”.

Famaedo Sakramen Fanasa Ni’amoni’õ

Asese sibai so zanofu wanguma’õ: “Hezo manõ zatulõ lala wamalua fanasa ni’amoni’õ andrõ? Hadia lahõndrõ ba idanõ, ma laduwagõ idanõ moroi ba hõgõ, ma lafagule idanõ andrõ ba hõgõ, ma latefe manõ?” Ba wanofu simane da’e, asese sibai so zanguma’õ da’e zatulõ ba da’õ zifasala! Tatu manõ fefu da’õ mo’amakhaita ia bakha ba wamaha’õ zi sambusambua gereja. Lõ moguna mufadõni he za zatulõ ba heza zifasala. Ba hiza moguna gõi tagogohe famatida hewisa wamaha’õ Gereja Katolik mo’amakhaita ba lala wamalua Sakramen Fanasa Ni’amoni’õ andrõ.

Bakha ba mbuku Kompendium Katekismus Gereja Katolik Famaha’õ Wamati Katolik Ba Li Niha, nomoro 256 tesura: “Tuho nifalua ba Sakramen (Fanasa Ni’amoni’õ) andre ya’ia da’õ molõmõ niha bakha ba nidanõ ma zui mangelegõ idanõ moroi yawa ba hõgõ sifao fanguma’õ ba Dõi Nama ba Ono ba Eheha Ni’amoni’õ.”

Ba zi no tesura andrõ yawa, tola ta’ila wa so dombua lala wamalua Sakramen Fanasa Ni’amoni’õ andrõ ya’ia da’õ: Lalõmõ bakha ba nidanõ ba lafangelegõ idanõ moroi yawa ba hõgõ.

1. Lalõmõ bakha ba idanõ.

Folõmõ niha bakha ba idanõ andrõ ba no lala wamalua Wanasa Ni’amoni’õ si so bakha ba mbuku daroma li, nifalua Yohane sama’ele’õ andrõ. Ba zi õfa ngawua Injil andrõ tesura wa Yohane andrõ ibe’e wanasa sifao idanõ ba nidanõ Yoridano. Lala wamalua fanasa andre irugi iada’e, so manõ nasa zolo’õ lala wamalua da’e. Gereja Katolik irugi iada’a lõ mamalõ nasa mufalua gõi wanasa ni’amoni’õ simane nifalua Yohane andre.

2. Lafangele idanõ moroi yawa ba hõgõ.

Faudu molo’õ lala wamalua fanasa ni’amoni’õ si no mufaehagõ yawa, lõ dozi ero gereja tesõndra nidanõ sebua (sungai) sitola mu’oguna’õ tobali naha wamalua Fanasa Ni’amoni’õ. Ba zimanõ da’õ, ira Amada Uskup ma ira Sama’anõ Famaha’õ Gereja (Teolog) la’alui lala ena’õ tola lafalua wanasa hewa’ae tenga nihõndrõ ba idanõ.

Ba wangerangera ndra Uskup ba Sama’anõ Famaha’õ Gereja (Teolog), lasõndra sambua zinangea õsi lohelohe wamati ya’ia wa fanasa andrõ “idanõ sangele”. Andrõ wa tola teombakha’õ bakha ba mbuku wamaha’õ andrõ wangelegõ idanõ moroi ba hõgõ.

Ba zi dombua lala wamalua Fanasa Ni’amoni’õ andre, sambua nõsi si tobali tuho ya’ia wa fanasa andrõ wa moguna mangele idanõ andrõ ba isasai na so zita’unõ andrõ. Ba wohõndrõgõ niha ba idanõ andrõ asasa zita’unõ andrõ ba simanõ gõi idanõ sangele andrõ. Da’e zi no tobali famaha’õ wamatida meno tatema wanasa ni’amoni’õ andrõ. Amen.

Nifa’anõ Kat. Ingatan Sihura, S.Ag.

Umbu:

Kompendium Katekismus Gereja Katolik Famahaõ Wamati Katolik Ba Li Niha Keuskupan Sibolga; Gununungsitoli, 2013.

Katekismus Gereja Katolik Ende: Arnoldus, 1998

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017