Bakha ba gofanöwa Liturgi Gereja Katolik, so 6 (önö) ngawalö la’ala’a sasese la’oguna’ö. Si önö ngawalö la’ala’a andrö ba ya’ia sa’usö, soyo, safusi, sobowo doru, sobulu gae, ba saitö. Si önö ngawalö la’ala’a andre ba lö ha samuza mu’oguna’ö, ba hiza so ginötönia ba so geluaha wa la’oguna’ö la’ala’a andrö. Fangoguna’ö la’ala’a andre asese sibai oroma ia ba nukha meza altar, töla mbagi jubah zondrönia’ö Luo Zo’aya ba nukha gere na mangowasaini Ekaristi. Ba zimanö sökhi na ma’ila geluahania zambua faosatö.
 |
| Nukha Gere sifaudu ba la'ala'a Liturgi. |
1. Sa’usö.
Na terongo la’ala’a sa’usö, asese sibai ma alio te’ohe wangerangera ba gana’a ma suasö. Hadia mbörö me sindruhu göi gana’a ma suasö andrö sindruhu mola’ala’a sa’usö. Töratöra gana’a, na lafatörö nasa ia ba galitö ba itugu tedou wa’a’usönia. Simanö göi la’ala’a sa’usö andrö bakha ba liturgi Gereja Katolik. Sa’usö andrö tefo’eluaha ia ba wangoroma’ö lakhömi, femöna, ba fa’omuso dödö.
La’ala’a sa’usö andre ba asese sibai ma tola lafagati ia ba la’ala’a safusi. La’ala’a sa’usö andre tola la’oguna’ö ia ba wangowasaini ngaluo sebua ya’ia Natal, Paskah, ba fangowasaini tanö bö’ö sifaudu eluaha wangoguna’ö ya’ia simane famahowu’ö fangowalu.
2. Soyo.
Na terongo la’ala’a so, asese sibai ma alio te’ohe wangerangera ba ndro. Hadia mbörö me sindruhu göi ndro andrö mola’ala’a oyo. Simanö göi la’ala’a soyo andrö bakha ba liturgi Gereja Katolik. Soyo andrö tefo’eluaha ia ba wangoroma’ö Eheha Ni’amoni’ö, fa’aduwa ndro, fa’alua galitö, fa’omasi, famelegö noso ba fa’abölö.
La’ala’a soyo andre tola la’oguna’ö ia ba wangowasaini ngaluo sebua ya’ia Ngaluo Zumaha Sebua, Luo Migu Bulugeu, Luo Migu Wanema Eheha Ni’amoni’ö, ba fangowasaini ngaluo wanörötödö fa’amate ndra niha ni’amoni’ö.
3. Safusi.
La’ala’a safusi andrö ba no arakhagö fagölö ira geluahania la’ala’a sa’usö. La’ala’a safusi andre moguna sibai ia ba wangoroma’ö fa’omuso dödö ba ni’amoni’ö.
La’ala’a safusi andre tola la’oguna’ö ia ba wangowasaini ngaluo sebua ya’ia Natal, Paskah, Luo Kami Safusi, ba fangowasaini luo wanörö tödö niha niha ni’amoni’ö sitenga martir (simate ba wa’aro wamati).
4. Sobowo doru.
La’ala’a sobowo doru andrö ba no la’ala’a sangoroma’ö tandra wamalalini era’era, fa’abu dödö, famoni ba fuasö.
La’ala’a sobowo doru andre tola la’oguna’ö ia ba wangowasaini ngaluo ni’amoni’ö, ya’ia Luo Migu Adven, Luo Migu Föna Paskah, ba ba ngaluo wananö simate.
5. Sobulu gae.
La’ala’a sobulu gae andre no la’ala’a sasese ta’ila ba sara mu’oguna’ö ia sagötö gofanöwa liturgi ba zidöfi. La’ala’a andre ba no la’ala’a danö si sökhi ba sowua. Ba zimanö asese sibai lafotöi ia tobali sambua tandra wanötöna, fangandrö saohagölö, ba fa’amowua danö.
La’ala’a sobulu gae andre la’oguna’ö ia sagötö zidöfi ma ngaluo migu sito’ölö.
6. Saitö.
Na terongo la’ala’a saitö, asese sibai ma alio te’ohe wangerangera ba zogömigömi ma sibongi. Hadia mbörö me sindruhu göi zogömigömi ma sibongi andrö mola’ala’a saitö. Bakha ba liturgi Gereja Katolik. Saitö andrö tefo’eluaha ia ba wangoroma’ö fa’abu dödö ba fangesa dödö.
La’ala’a saitö andre fagölö geluahara la’ala’a sobowo doru. La’ala’a andre tola la’oguna’ö ia ba wangowasaini ngaluo wanörötödö si no mate si so nasa ba nomo ba ngaluo wananö simate. La’ala’a saitö andre no ibörögö labato wangoguna’ö ya’ia ba hiza lafagati ba wangoguna’ö la’ala’a sobowo doru.
Si önö ngawalö la’ala’a sasese ni’oguna’ö bakha ba liturgi Gereja Katolik andre no la’ala’a nihonogöigö irugi iada’e. Ba hiza, sasese oroma la’oguna’ö ba gotalua umat sato ha öfa; safusi, soyo, sobowo doru ba sobulu gae. Sidombua la’ala’a tö andrö; sa’usö ba saitö, ha fa’itaria lafake ba mufaudugö i aba zito’ölö ba zifasui.
Fefu ngawalö la’ala’a andre moguna sibai ia ba gofanöwa lala wamati sagötö zidöfi. Fefu da’e no goigoi liturgi same’e fangahatö ba dödö niha samati ba wo’erönusi famati. Ba da’e ta’ila wa ibe’e Gereja ba niha samati fefu gofanöwa wamatinia ba si lö mamalö mubohouni ero röfi.
Umbu:
Bosco da Cunha O. Carm, Memaknai Perayaan Liturgi Sepanjang Satu Tahun Jakarta: Obor, 2011
E. Martasudjita, Pr, Liturgi Pengantar Untuk Studi dan Praksis Liturgi Yogyakarta: Kanisius,
I. Marsana Windhu, Mengenal Peralatan, Warna, dan Pakaian Liturgi Yogyakarta: Kanisius, 1997
0 comments:
Posting Komentar