TAROMA LI LOWALANGI LUO MIGU SI - 6 DÖFI C

 LUO  MIGU  SI - 6

Kegembiraan Keluargaku. [Foto Dok. Pribadi]

 

FOMBASO  I

Taroma Li Lowalangi nihalö moroi ba zura Yeremia, sama'ele'ö.-

Imane So'aya : Ni'elifi niha si fabali tödö khöGu ba sanötöna fangorifi ba nawönia niha si lö fa'abölö ! Amaedola zinanö ba danö si mate, lö falukha zi sökhi, ba danö si no oköliköli so ia, ba danö so asio, ba zi tebai monahia niha. Ba tefahowu'ö niha, sanötöna khö Zo'aya, same'e fa'abe'e dödönia, So'aya ! Eu nitanö ba mbewe nidanö ia, sangoro'ö ŵa'ania ba mbombo ba si lö ata'u na aukhu zino; lö aleu mbulunia ba lö abu dödönia, na döfi lö teu, ba lö mo'otalua wowua.- Yer 17:5-8

Simanö daroma li Lowalangi.-

 

Sinunö Fanema Li : Psallite No 1  (ma Laudate No 91)

 

FOMBASO  II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö !

Na no maturiaigö, wa no te'orifi Keriso moroi ba wa'amate, hana wa so ba gotaluami zanguma'ö, lö te'orifi mangawuli niha si no mate ? Na lö te'orifi mangawuli niha moroi ba wa'amate, eluahania, lö te'orifi mangawuli Keriso göi moroi ba wa'amate.  Na lö auri mangawuli Keriso moroi ba wa'amate, ba no ha fangifi wamatimi. Eluahania, lö si tebulö ami ba horömi. Tobali, si no tekiko göi niha si no mate andrö, he ŵa'ae no faduhu dödönia khö Keriso. Na ha ba wa'aurida ba gulidanö andre manötöna ita khö Keriso, no sabölö numana ita, moroi ba niha bö'ö fefu.Ba hiza, no te'orifi mangawuli Keriso moroi ba wa'amate. Da'e zi tobali lohelohe,  wa te'orifi mangawuli dania niha si no mate.- 1 Kor 15:12.16-20

Simanö daroma li Lowalangi.-

 

Sinunö Föna Injil : Psallite No 254 (ma Laudate No 63)

 

INJIL

Turia Somuso Dödö khö Yesu Keriso nisura Luka.-

Me luo da'ö, möi mitou Yesu moroi ba hili, awö ndra rasul si felendrua andrö. Ba I'iagö nahia salo'o. Ba da'ö owulo ndra nifahaöNia, ato sibai, awö niha sato si oroi danö Yudaia ma'asagörö ba si oroi mbanua Yerusalema, niha si oroi mbanua Tiro ba Sidona ba zinga nasi. Ifaigi ndra nifahaöNia, Imane :

"Ya omuso dödömi, ya'ami si numana, me khömi gamatöröŵa Lowalangi.

Ya omuso dödömi, ya'ami solofo iada'e, me I'abusoi'ö ami dania Lowalangi.

Ya omuso dödömi, ya'ami sege'ege iada'e, me sa'iki ami dania.

Ya omuso dödömi, na fatiu dödö niha khömi, na latibo'ö ami, na la'o'aya ami, na laŵa'ö lö sökhi ami, börö me si faböbö khö Nono Niha andrö ami.

Na alua zimanö, akha somuso tödö ami ba mi'olaya ! Ibe'e zulö si falawu khömi Lowalangi. No lalau zimanö göi khö ndra sama'ele'ö me luo no, ira tuara.

Alai ami, ya'ami niha sikayo iada'e; me no mirasoi zi sökhi.

Alai ami, ya'ami sabuso iada'e, me solofo ami dania.

Alai ami sa'iki'iki iada'e; me sabu tödö ba sege'ege ami dania.

Alai ami, na lasuno ami niha fefu !

Simanö sibai sa göi wolau ndra tuara ba zama'ele'ö sofaya andrö."- Luk 6:17.20-26

Simanö duria somuso dödö khö Zo'aya ya'ita, Yesu Keriso.-

 

Erönua:

YA OMUSO DÖDÖMI!

Bakha ba wombaso si sara nihalö moroi ba zura Yeremia sama’ele’ö, ibe’e khöda dombua wamaedo lala wa’auri. Siföföna ya’ia niha samati ba nawönia niha. Niha da’ö ba no ni’elifi. Niha andrö göi ba no hulö zinanö si so ba danö simate, si lö falukha si sökhi. Famaedo simendrua ba ya’ia niha samati ba khö Zo’aya. Niha da’ö ba no nifahowu’ö. Niha andrö ba no hulö zinanö situmbu ba zinga nungo nidanö. Lö khönia fa’abu dödö ba lö tebulö ia wamalua si sökhi.

Famaedo nifa’ema Zo’aya andre bakha ba wombaso siföföna ba no tobali ia famaedo sinangea nifili niha. No ibe’e dombua wamaedo nifili, ba hiza ba niha gulidanö so gangetula hezo nifilinia. Ba ngawua nifili andrö ba no tohöna so mbagia sedöna itema. Na ifili wamati ba niha ba ni’elifi ia. Ba na ifili wamati ba khö Zo’aya ba nifahowu’ö ia.

Na tahaogö ta’angeraigö wehede waulo andrö sanguma’ö: “Na lö te'orifi mangawuli niha moroi ba wa'amate, eluahania, lö te'orifi mangawuli Keriso göi moroi ba wa'amate.  Na lö auri mangawuli Keriso moroi ba wa'amate, ba no ha fangifi wamatimi.” Fehede da’e ba no sambua fehede sabe’e ba niha sangiwangiwa tödö ba wamati ba khö Zo’aya ya’ita Yesu Keriso.

Hewa’ae fehede da’e abe’e na ta’angeraigö, ifa’ema da’ö Faulo ena’ö sindruhu so lohelohe wamati saro ba niha sangiwangiwa tödö andrö. Lohelohe wamati andre dania zombali’ö so wanötöna saro ba niha samati fefu wa so dania wa’auri si lö aetu andrö ba niha samati ba khö Keriso.

Bakha ba wombaso Turia Somuso Dödö tarongo jui dombua wamaedo nifa’ema Yesu. Famaedo siföföna ba ya’ia sanandrösa ba niha side’ide andrö, ya’ia wehede wa’omuso dödö. Ba famaedo simendrua ya’ia sanandrösa ba niha niwa’ö segebua andrö ya’ia wehede fa’alai. Fehede Yesu andre sindruhu moguna sibai ia ba lala wa’auri niha. Niha sitola maögö fa’afökhö andrö ba wanötöna ba khö Yesu Keriso ba no niha sanema ondröita si sökhi ba mbanua Lowalangi. Ba hiza niha sangebua’ö ya’ia börö lakhömi wa’aniha ba lakhömi gulidanö andrö ba no niha sifa’alai dania ba mbanua na furi andrö.

Ba zitölu ngawua wombaso andre sindruhu I’oroma’ö khöda wa ba lala wa’auri wamatia andre, sindruhu I’oroma’ö khöda wa so dombua faosatö zinangea tafili soguna khöda ba lala wa’auri. Na tafili wa’aniha andrö, ba no ni’elifi ba sifa’alai ia dania ba mbanua nafuri andrö. Ba hiza na tafili wa’alowalangi ba no nifahowu’ö ita ba somuso tödö ba mbanua Lowalangi dania.

Ba wa’auri si’ero ma’ökhö asese lawa’ö: “Böi a’igi’igi ba mbawa wa’abuso, no manaronaro fönau mbawa wa’olofo, ba böi ege’ege ba mbawa wa’olofo, no manaronaro fönau mbawa wa’abuso.” Fehede da’e ba no same’e sambua fangaro dödö wa hania nirasoida iada’e ba so göi mbuania ba ginötö si so föna. Lohelohe andre ba ya’ia niwa’ö Waulo mege no ba wombaso simendrua wanguma’ö: “Na lö te'orifi mangawuli niha moroi ba wa'amate, eluahania, lö te'orifi mangawuli Keriso göi moroi ba wa'amate.  Na lö auri mangawuli Keriso moroi ba wa'amate, ba no ha fangifi wamatimi.” Ba wehede Waulo andre so sindruhunia wangaro dödö wa no ibe’e khöda dumaduma Yesu wanaögö fa’afökhö andrö irege mate. Ba hiza börö wa’amate andrö te’orifi Ia mangawuli. Fanaögöda fa’afökhö ba wefao ba khö Keriso andrö tenga simöi zayazaya gölö ba hiza simöi fangomuso dödö irugi mangawuli ita khö Nama ba zorugo. Amen.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

RD ST. Sutopanitro, Renungan dan Refleksi tentang 8 Sabda Bahagia dan Ajaran Sosial Gereja Jakarta: Obor, 2014

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011