MANGEHAOGÖ FA’AURI BA GINÖTÖ WÖKHÖ KORONA (Falukhata Si-2 APP 2022)

A.   OHITÖ DÖDÖ

Ena’ö ngambatö tola :

Lasöndra lala ba wangehaogö fa’auri ba ginötö wökhö Korona.

 

B.   FAMOBÖRÖ

(Fatua lӧ Sondrӧnia’ӧ ifa’ema wamasao, si ofӧna ua Buku Ni’amoni’ӧ no mufonahia ba gotalua zato, so lili si no mufehola sifao gamagama si tobӧnӧ. Aefa da’ӧ Sondrӧnia’ӧ ifa’ema wamasao simane andre:)

 

1.    Sinunö Famobörö: Laudate No. 45A.

2.    Me no aefa manunӧ, Sondrӧnia’ӧ : Ifarou dӧdӧ ndra niha samati ba wamosumange Buku Ni’amoni’ӧ.

“Datafosumange Daroma Li Lowalangi, ya’ia Yesu Keriso si so bakha ba Mbuku Ni’amoni’ö andre sifao famaöndrö boto... Awai ba † Tanda Röfa.

 

C.   FAMASAO

(Sebelum Fasilitator menyampaikan pengantar, terlebih dahulu Kitab Suci telah ditahtakan di tengah umat, ada lilin menyala dengan dekorasi yang secukupnya. Kemudian Fasilitator menyampaikan pengantar sebagai berikut:)

 

Ama, Ina ba Talifusö ni’omasi’ö.

Ba walukhata si sara me luo migu si lalö, no te’abakhai’ö ba dödöda ngawalö zitobali dahataha ba wangehaogö mangawuli fa’aurida. Ta’ila wa i’otarai me 31 mbawa si 12 döfi 2019 si lalö, so wökhö nifotöi Korona samakiko hanuhanuda. Fökhö da’a no i’anöröi ba ifakiko fefu niha ba töra ngaotu wa’oya negara te’anöröi. Börö wökhö Korona andre tefakiko ngasi wa’auri niha he sanandrösa ba zoguna sero ma’ökhö, fa lö fanehegö we’amöi ndraono ba wanema famahaö ba zekola, fo’alöta ba wangalui lala halöwö ba mo’alöta göi wo’ame’egö tödö wamareta ba niha mbanua, mendrua manö ba wa’auri niha samati ba we’amöi ba Gereja. Ba Negarada Indonesia andre, ira sohalöwö ba wamareta la’alui lala ana’ö fökhö Korona andre tola te’alösi ba tetayaigö wökhö andrö moroi ba ngasi wa’aurida.

Mo’amakhaita ba ngawalö zagalua andre, he ngambatö, fobanuasa, ba zi’ero sambua negara ba ba daerah, mohalöwö wangerangerada ba wangalui lala nitörö, ena’ö tola te’ehaogö mangawuli fa’auri niha si no tekiko moroi ba wökhö Korona andre, irege lala halöwö si to’ölö nifalua sero ma’ökhö tola tetohugö ba tefalua ba ginötö wokhö Korona andre. Tatu manö oya lala zinangea tafalua ba wangehaogö fa’aurida andre, ya’ia ba wolo’ö zi no itatugöi famareta, ena’ö tazago wa’aurida moroi ba ngawalö wökhöfökhö ba ta’aurifagö bakha ba lala wa’auri sibohou sifao fa’aro dödö ba wa’ahatöda khö Lowalangi ba sifao göi ba wamalua lala halöwö ba wangehaogö fa’auri ba zifasui ya’ita ba wogamö fa’ohauhau dödö bakha ba ngambatö ba ngasi wa’auri niha.

Börö da’ö, ba walukhata sidua andre, data’angeraigö mangawuli ngawalö zi no tarasoi ba si no alua ba wa’aurida bakha wohagaini Daroma Li Lowalangi, ena’ö tola tasöndra lala ba WANGEHAOGÖ FA’AURI BA GINÖTÖ WÖKHÖ KORONA irege tola tafalua ngawalö lala nitörö ba wangehaogö fa’auri andrö bakha ba wa’auri sero ma’ökhö.

 

D.  BOSIBOSI WAMALUA FANGABAKHA’Ö FAMATI BA APP FAOMA LALA WOMBAGISI BUA ZÖNDRA INJIL SI-7 BOSI

(Sondrӧnia’ӧ : Ifarou dӧdӧ umat ba wa’ahono ambӧ-tӧra 2 miniti wa’ara).

 

1.   MANGANDRÖ FE’ASO ZO’AYA

·       Datahonogö ita sabata, tahonogö dödöda ba tarasoi we’aso Zo’aya bakha ba wa’aurida sifao fangandrö fe’aso Yesu bakha ba wangandrö.

 

Damangandrö ita:

He Yesu Ono Lowalangi safönu fa’omasi, masuno ba ma’andrö saohagölö khöU börö wa’omasiMö si no matema irege möi’Ö awöma ba walukhasatama si mendrua kali andre. No so Ndra’ugö ba gotalua ndra nifahaöMö ba ginötö so khöra wangiwa tödö me sarawongi lö ahulu ira ba lö lasöndra hadia ia. Andrö ba ginötö ia da’e fagohi dödöma ba wangehaogö fa’aurima, ma’andrö khöU ya so Ndra’ugö khöma ba iagö awöma ena’ö tefofa’abölö ndra’aga ba wanöndra lala si sökhi ba wangehaogö fa’aurima, irege tola te’oroma’ö bakha ba mbuabuama sero ma’ökhö. Börö Keriso So’aya ya’aga sauri ba samatörö awöU bakha ba wa ha sambua khö Geheha Ni’amoni’ö sagötö fa’ara, Amen.

 

2.   FOMBASO BUKU NI’AMONI’Ö (Yohane 21:1-12)

Sondrӧnia’ӧ : I’ombakha’ӧ wombaso moroi ba Mbuku Ni’amoni’ӧ nibaso dania.

 

Ia da’a databaso Mbuku Ni’amoni’ö

·       Mibokai Injil Yohane,...

·       Ufuli uwa’ö samuza tö : Injil Yohane, faza 21

·       Samuza tö ufuli u’ombakha’ö: Injil Yohane faza 21 ayati 1 irugi ayati 12

·       Sakali tӧ : Injil Yohane faza 21 ayati 1 irugi ayati 12

·       Ube’e ginötö fasamösa moroi ba gotaluada wombaso taroma li andre, sifao fa’ebua li ba fehede siterongo ba zato ba ida’ida’i wombaso ba bakha ba gofanöwa wangandrö tefalua.

·       Na so atö wombaso moroi ba li bö’ö, ube’e ginötö ba wombaso si fagölö ba faza ba ayati sifao fa’ebua li ba terongo ba zato ba ida’ida’i wombaso ba bakha ba gofanöwa wangandrö tefalua.

 

3.   FANGOMBAKHA’Ö NGAWUA WEHEDE MOROI BA MBUKU NI’AMONI’Ö SADÖNI DÖDÖDA, TEFAUDU BA WA’AURIDA BA TA’ERÖNUSI.

·       Ube’e ginӧtӧ khöda gofu haniha manӧ ba gotaluada nitufa Yesu tӧdӧ sifao fanguma’ӧ ngawua wehede ma ngaroto wehede sadogodogo ma zui ayati sadӧni dӧdӧda moroi ba wombaso Mbuku Ni’amoni’ӧ si no mubaso no mege, hulӧ simane ngawua gara sebua bӧli ma manimani si no tobini bakha ba wombaso andrӧ.

·       Tebe’e ginötö ba wamaehagö fehede sadogodogo andrö, 3 kali muwa’ögö, sifao fa’ebua li, mudai’da’i ba bakha ba ginötö wa’ahono ba bakha ba gofanöwa wangandrö tefalua.

·       Sakali tӧ databaso wombaso moroi ba Mbuku Ni’amoni’ӧ andre.

 

4.   TAHAOGÖ DÖDÖDA BA TALULU ZO’AYA FAHUHUO IA KHÖDA BA GINÖTÖ SI LÖ NINININI.

·       Datahonogö ita 2 meniti wa’ara, tafaigi hadia ia zi no alua ba wa’aurida, talulu ba tabe’e ginötö  khö Yesu fahuhuo Ia khöda sifao fangerönusi, mendrua manö ba ngawalö zagalua ba ginötö ia’da’a.

·       Hadia no ufalua lala halöwö ba wangehaogö fa’auri bakha ba ngambatöma ba ginötö wökhö korona andre, irege te’abölö’ö ba te’oroma’ö ia bakha ba wa’auri sero ma’ökhö.

 

o   Tola gӧi mufaogӧ faoma sinunӧ ba wa’ahono (taize). ma Sinunö Laudate No. 55B.

 

5.   TABAGISI KHÖ NAWÖDA, HADIA MANÖ ZI NO TARONGO MOROI KHÖ LOWALANGI WEHEDENIA SI SO BAKHA BA DÖDÖDA.

·       No muhede khӧda Yesu ero zamӧsana ba fahuhuo ia khöda moroi ba ngawalӧ wehede si no amaedola manimani sebua böli si tumbu bakha ba dödöda sitobali tandra ba wango’aurifagӧ lala wamatida.

·       Ube’e ginötö khöda ba wamaehagö sanandrösa ba wehede ma ngaroto wehede sadogodogo ma ngawalö ayati sifatöfa khöda samösa moroi ba wombaso Buku Ni’amoni’ö si no tarongo ba ni’erönuisida ba ginötö ia da’e. Hana wa fehede andre fatöfa ba dödögu...?

·       Tetötöna khöda, ena’ö tenga samalua khotbah ita ma sama’ema famahaö fa’aboto ba dödö ita ba niha bö’ö ma zui fahuohuosa ba nawö; ba hiza’i, tafatunö sanandrösa ba ngawalö zalua nirasoida ba wa’aurida samösa.

 

6.   MAMATUNÖ NGAWALÖ HALÖWÖ SEDÖNA TAFALUA BA NIKAONI LOWALANGI ITA BA WAMALUA YA’IA

Sondrӧnia’ӧ: Ihalӧ gamarahuta gohitӧ dӧdӧ moroi ba waosatӧ duho walukhata fakhai ia ba wombaso Buku Ni’amoni’ӧ si no muhonogӧi.

 

Ira talifusö ni’omasi’ö ba khö Keriso.

No tatu manö wa ba ginötö si so ya’ita ia da’e, bakha ba wangiwa dödö na sa so ita, no tarasoi wa’afatö dödö, irege lö tasönda wa’ahono dödö bakha ba wa’aurida, simane nirasoi ndra nifahaö Yesu no mege nirongoda bakha ba wombaso. Ba hiza, fawu’u li Zo’aya wa I’amualagö khöda wa’abölö ba fondrara dödö ba niha sangiwa tödö, ba ya molemba dödöda khöNia ba tabe’e fönada Zo’aya ba wolo’ö goroisaNia.

Ba ginötö iada’a, böi teduhö dödöda ma adogo wangerangerada ba ngawalö zo’amböta ya’ita he ba wariawösa ba nawöda ba he göi ba zoguna khöda börö wökhö korona andre. Data’ehaogö mangawuli wa’aurida sifao folo’ö lala nifalua andre:

a.    Manga’azökhi mangawuli wa’ohauhau dödö ba wa’auri niha ba wa’atedou wa’asökhi ba zi fasui ya’ita.

b.    Mondrorogö nahia ba zi fasui ya’ita ena’ö lö wökhöfökhö irege sökhi ba muadu.

c.     Mo’ame’egö tödö ndra talifusöda si so bakha ba wangaröngarö börö me no göna khöra wökhö Korona-19.

d.    Ta’andrö saohagölö ba tasuno Lowalangi börö me no Ibe’e khöda wa’abölö ba fehi’a dödö he wa’ae itaria na sa so khöda wangiwa dödö.

 

·       Hadia halöwö si bohou si tola tafalua ba wangorama’ö Turia Somuso Dödö bakha ba migu andre...?

·       Haniha zamalua? (owuloa haniha) ba hadia nifalua, hezo nahiania ba ha’uga bӧzi..?

·       Fangowuloi Kolekte Solidaritas: Sinunö Laudate No. 47B.

 

7.   FANGANDRÖ SITUMBU MOROI BA DÖDÖ

·       Tebe’e khöda ginötö ba wangandrö situmbu moroi ba dödö

(tani ni’angandrӧi ma fangandrӧ niha samati)

 

S : Datafa’ema gangandröwada khö Lowalangi si lö’adagedage ba wamondrondrongo gangandröwa dödö soiNia:

 

1.   Soguna ba niha fefu si so bakha ba nahia wamadöhö fökhö me no göna khöra wökhö Korona-19

          He ama solomasi, abölö’ö ba rara dödö fefu niha si so ba nahia wamadöhö fökhö mendrua manö me no tefabali ira moroi ba ngambatönia börö me no göna khöra wökhö Korona-19. Aröu’ö khöra ngawalö wa’ata’u ba fangiwa tödö me ambö fa’abölö mbotora. Fadöhö ira moroi ba wa’afökhö nitaögöra andrö ba lumö’ö fefu niha sanolo ya’ira ena’ö lö manuge khöra wökhö Korona andrö.

 

Ma’andrö khöU he So’aya ...   Tehe wangandröma, he So’aya.

 

2.   Soguna ba niha sabu tödö ba wa lö manöndra wangalui zoguna börö wökhö Korona-19

               He ama, Ya Öfahowu’ö fefu niha si so bakha ba wangaröngarö me lö lasöndra wangalui ba zoguna khöra, börö lala halöwö si no lafalua ba wangalui soguna itugu mo’amböta, mendrua manö ba niha si no te’efa’ö moroi ba lala halöwönia ba tanö bö’öniana. Ya tefazawagö ba ya muhi’a dödöra mangawuli ba wangehaogö lala wangalui soguna khöra, irege tola tebönökhi ngawalö zoguna ba ngambatö sero ma’ökhö.

 

     Ma’andrö khöU he So’aya ...   Tehe wangandröma, he So’aya.

 

3.   Soguna ba niha samati ba Stasi ba KBG khöda

               He ama, fahowu’ö halöwö ni’ohalöwögöigöma ba ngambatöma, simane me Öfahowu’ö ndra nifahaöMö ba wondra’u i’a. Hewa’ae ba ginötö wökhö korona so ndra’aga nasa, ba hiza faduhu dödöma ba manötöna ndra’aga wa’Öbe’e khöma harazaki irege tola te’orifi ndra’aga ba masöndra wa’ohahau dödö bakha ba ngambatöma.

 

     Ma’andrö khöU he So’aya ...   Tehe wangandröma, he So’aya.

 

4.   Soguna ba ngawalö gangandröwa dödö ba ngambatöda zamösana

               He Ama ...

     Ma’andrö khöU he So’aya ...   Tehe wangandröma, he So’aya.

 

·       Data’osambua’ö fefu gangandröwada andre ba wangandrö si no Ifaha’ö ya’ita Yesu Keriso, wanguma’ö: He Ama khöma ...

 

·       Fangandrö Fangasiwai sifao Fangandrö Howuhowu Zo’aya.

He Lowalangi, ma’andrö saohagölö me no fao Ndra’ugö khöma ba walukhasatama andre, fahowu’ö ndra’aga fefu ena’ö tola mafalua ba ma’o’aurifagö fefu hadia ia zi no Öwa’ö khöma irege ihötöi ara tola ma’ehaogö mangawuli wa’aurima sero ma’ökhö. Simanö gangandröwama  nifa’ema  Keriso So’aya ya’aga, Amen.

 

Sinunö Fangasiwai: Laudate No. 107.